ৰাছিয়াৰ পৰা খাৰুৱা তেল তথা শক্তি আমদানি কৰাক লৈ ভাৰতে আমেৰিকা যুক্তৰাষ্ট্ৰৰ পৰা অবিৰত কূটনৈতিক চাপৰ সন্মুখীন হৈ থকাৰ সময়তে পুটিনৰ এই গুৰুত্বপূৰ্ণ মন্তব্য প্ৰকাশ পাইছে

ৰাছিয়াৰ ৰাষ্ট্ৰপতি ভ্লাদিমিৰ পুটিনে মস্কো আৰু নতুন দিল্লীৰ মাজত থকা দ্বিপাক্ষিক সম্পৰ্কক তীব্ৰ প্ৰশংসা কৰি ইয়াক সকলো অৰ্থতে “ভাতৃত্ববোধ” আৰু “পাৰস্পৰিক বিশ্বাসৰ ওপৰত প্ৰতিষ্ঠিত” বুলি বৰ্ণনা কৰিছে । ৰাছিয়াৰ পৰা খাৰুৱা তেল তথা শক্তি আমদানি কৰাক লৈ ভাৰতে আমেৰিকা যুক্তৰাষ্ট্ৰৰ পৰা অবিৰত কূটনৈতিক চাপৰ সন্মুখীন হৈ থকাৰ সময়তে পুটিনৰ এই গুৰুত্বপূৰ্ণ মন্তব্য প্ৰকাশ পাইছে ।

ছেইণ্ট পিটাৰ্ছবাৰ্গ আন্তঃৰাষ্ট্ৰীয় অৰ্থনৈতিক মঞ্চত ভাষণ দি ৰাছিয়াৰ ৰাষ্ট্ৰপতিগৰাকীয়ে ভাৰতৰ মানৱ সম্পদ আৰু কাৰিকৰী প্ৰযুক্তিৰ ভূয়সী প্ৰশংসা কৰে । বিশেষকৈ ক’ডিং আৰু চফ্টৱেৰ ইঞ্জিনিয়াৰিং ক্ষেত্ৰত ভাৰতীয়সকলৰ থকা অসাধাৰণ দক্ষতাক তেওঁ গোলকীয় স্বীকৃতিপ্ৰাপ্ত বুলি অভিহিত কৰে ।

হৰমুজ প্ৰণালীৰ সংকট আৰু ভাৰত-ৰাছিয়াৰ সহযোগিতা

পশ্চিম এছিয়াৰ ভূ-ৰাজনৈতিক উত্তেজনা আৰু হৰমুজ প্ৰণালীত পৰিবহণ ব্যৱঘাতৰ আশংকাই যেতিয়া বিশ্বৰ শক্তি (ইন্ধন) বজাৰত তীব্ৰ অস্থিৰতাৰ সৃষ্টি কৰিছে, তেনে সময়ত ভাৰত-ৰাছিয়াৰ কৌশলগত মিত্ৰতাই দুয়োখন দেশকে সুৰক্ষা দিছে বুলি পুটিনে উল্লেখ কৰে । তেওঁ কয়, “প্ৰধানমন্ত্ৰী মোদীয়ে হৰমুজ প্ৰণালীৰ সংকটৰ বাবে দেশত ব্যক্তিগত গাড়ী কমকৈ ব্যৱহাৰ কৰিবলৈ বা দীৰ্ঘ দূৰত্বৰ যাত্ৰা পৰিহাৰ কৰিবলৈ কিছুমান পদক্ষেপ ল’বলগীয়া হৈছিল । কিন্তু আমাৰ আৰু ভাৰতৰ কোম্পানীসমূহে ঘনিষ্ঠ সহযোগিতাৰ সঠিক পথ বাছি ল’লে । আজি আমি ভাৰত তথা সমগ্ৰ এছিয়াৰ বজাৰত ইন্ধনৰ যোগান বৃদ্ধি কৰি সহায়ৰ হাত আগবঢ়াইছোঁ ।”

তেওঁ কয়- “কোনেও আমাক চৰ্ত জাপি দিব নোৱাৰে, আৰু কোনেও তেনে কৰিবলৈ চেষ্টাও নকৰে । আমি আমাৰ অংশীদাৰসকলৰ ওচৰত কৰা প্ৰতিশ্ৰুতি সদায় ৰক্ষা কৰিম, বিশেষকৈ ভাৰতৰ দৰে বিশ্বাসী বন্ধুৰ ক্ষেত্ৰত ।”

প্ৰতিৰক্ষা মিত্ৰতা আৰু ছোভিয়েট যুগৰ পৰম্পৰা

দুয়োখন দেশৰ সামৰিক সহযোগিতাৰ কথা উল্লেখ কৰি পুটিনে কয় যে ভাৰতীয় প্ৰতিৰক্ষা বাহিনীৰ এক বুজন অংশই আজিও ৰাছিয়াৰ মূল সামৰিক সঁজুলি (হাৰ্ডৱেৰ) ব্যৱহাৰ কৰে । এয়া ছোভিয়েট যুগৰে পৰা চলি অহা এটা সুদৃঢ় পৰম্পৰা । তেওঁ স্পষ্ট কৰি দিয়ে যে এই সম্পৰ্ক কেৱল ক্ৰয়-বিক্ৰয় বা ব্যৱসায়তে সীমাবদ্ধ নহয়, বৰঞ্চ বৰ্তমান দুয়োখন দেশে যৌথ গৱেষণা আৰু প্ৰতিৰক্ষা প্ৰযুক্তিৰ উন্নয়নৰ ওপৰতো সমানে গুৰুত্ব দিছে ।

মোদীৰ নেতৃত্ব আৰু ভাৰতৰ সাৰ্বভৌমত্বক স্বীকৃতি

ভাষণ প্ৰসংগত ৰাষ্ট্ৰপতি পুতিনে প্ৰধানমন্ত্ৰী নৰেন্দ্ৰ মোদীৰ নিৰ্ণায়ক নেতৃত্বৰ শলাগ লয় । তেওঁ সকীয়াই দিয়ে যে ভাৰতক লক্ষ্য কৰি লোৱা যিকোনো শাস্তিমূলক বা নিষেধাজ্ঞামূলক ব্যৱস্থাই অৱশেষত তেনে কৰিবলৈ যোৱা দেশসমূহৰ ওপৰতে ওলোটাকৈ প্ৰভাৱ পেলাব ।

একে সময়তে, ভাৰত আৰু আমেৰিকাৰ মাজত গঢ়ি উঠা ঘনিষ্ঠ সম্পৰ্ককো ৰাছিয়াই ইতিবাচক দৃষ্টিৰে চাইছে বুলি তেওঁ কয় । পুটিনে স্পষ্টকৈ কয় যে নিজৰ ৰাষ্ট্ৰীয় স্বাৰ্থ ৰক্ষা কৰি যিকোনো আন্তঃৰাষ্ট্ৰীয় সিদ্ধান্ত ল’বলৈ নতুন দিল্লীৰ সম্পূৰ্ণ সাৰ্বভৌম অধিকাৰ আৰু স্বতন্ত্ৰতা আছে । মূল্য আৰু গুণগত মানৰ দিশৰ পৰা নিজৰ বাবে আটাইতকৈ উন্নত সামগ্ৰী বিধ বাছি ল’বলৈ ভাৰত সম্পূৰ্ণ স্বাধীন ।

লগতে পঢ়ক : ভাৰত-ৰাছিয়াৰ সম্পৰ্ক অভেদ্য, মোদীৰ ওপৰত চাপ সৃষ্টি কৰাটো ক্ষতিকাৰক: ভ্লাদিমিৰ পুটিন

এক ভাষণ প্ৰদান কৰি ৰাষ্ট্ৰপতি পুটিনে কয় যে ভাৰত আৰু ৰাছিয়াই এক বিশেষ সুবিধাপ্ৰাপ্ত কৌশলগত অংশীদাৰিত্ব উপভোগ কৰে

ভাৰত আৰু ৰাছিয়াৰ মাজত থকা ঐতিহাসিক আৰু অন্তৰংগ সম্পৰ্কৰ কথা পুনৰ এবাৰ বিশ্ববাসীৰ সন্মুখত দোহাৰিলে ৰাছিয়াৰ ৰাষ্ট্ৰপতি ভ্লাদিমিৰ পুটিনে । ছেইণ্ট পিটাৰ্ছবাৰ্গ অৰ্থনৈতিক ফৰামত (St. Petersburg Economic Forum) এক ভাষণ প্ৰদান কৰি ৰাষ্ট্ৰপতি পুটিনে কয় যে ভাৰত আৰু ৰাছিয়াই এক বিশেষ সুবিধাপ্ৰাপ্ত কৌশলগত অংশীদাৰিত্ব উপভোগ কৰে । আন্তঃৰাষ্ট্ৰীয় সংবাদ প্ৰতিষ্ঠান ‘ৰয়টাৰ্ছ’ৰ এক প্ৰতিবেদন অনুসৰি, পুটিনে ভাৰতক এজন অতি বিশ্বাসযোগ্য অংশীদাৰ বুলি অভিহিত কৰি দুই দেশৰ ভৱিষ্যতৰ সম্পৰ্কৰ ওপৰত তীব্ৰ আস্থা প্ৰকাশ কৰে ।

মোদীৰ ওপৰত চাপ সৃষ্টি কৰাটো ক্ষতিকাৰক-

আমেৰিকা যুক্তৰাষ্ট্ৰই ভাৰতৰ ওপৰত জাপি দিব বিচৰা চাপৰ প্ৰসংগ উত্থাপন কৰি পুটিনে কয় যে বৰ্তমান আমেৰিকাই ৰাছিয়াৰ সৈতে সহযোগিতাৰ কিছুমান ক্ষেত্ৰত ভাৰতৰ ওপৰত চাপ সৃষ্টি কৰিবলৈ চেষ্টা চলাইছে । কিন্তু তেওঁ স্পষ্ট কৰি দিয়ে যে বিশ্বৰ আটাইতকৈ বেছি জনসংখ্যা থকা দেশ এখনৰ নেতা নৰেন্দ্ৰ মোদীৰ ওপৰত এনেদৰে চাপ সৃষ্টি কৰাটো আন্তঃৰাষ্ট্ৰীয় আৰু দ্বিপাক্ষিক সম্পৰ্কৰ বাবে অত্যন্ত ক্ষতিকাৰক । পুটিনে দৃঢ়তাৰে কয়, “এই চাপ ক’ৰ পৰা হৈছে সেয়া গুৰুত্বপূৰ্ণ নহয়, কিন্তু আমি ইয়াৰ কোনো নেতিবাচক প্ৰভাৱ দেখা নাই ।” তেওঁ আশা প্ৰকাশ কৰে যে সকলো অংশগ্ৰহণকাৰীৰ সৈতে আলোচনাৰ মাধ্যমেৰে এক সহমতত উপনীত হ’ব পৰা যাব ।

১৯৪৭ চনৰে পৰা গঢ়ি উঠা এক ঐতিহাসিক বন্ধুত্ব-

ৰাছিয়াৰ ৰাষ্ট্ৰপতিগৰাকীৰ মতে, ভাৰত আৰু ৰাছিয়াৰ এই বিশেষ কৌশলগত অংশীদাৰিত্ব কোনো এক বা পাঁচ বছৰীয়া নহয়, বৰঞ্চ ইয়াৰ আঁৰত আছে দশক দশক জোৰা পৰিশ্ৰম । ১৯৪৭ চনত যেতিয়া তদানীন্তন ছোভিয়েট ইউনিয়নে ভাৰতীয় প্ৰজাতন্ত্ৰৰ সৈতে কূটনৈতিক সম্পৰ্ক স্থাপন কৰিছিল, তেতিয়াৰে পৰা ৰাছিয়াই এখন নতুন স্বাধীন ৰাষ্ট্ৰ হিচাপে ভাৰতৰ উত্থানত অহৰহ সমৰ্থন আগবঢ়াই আহিছে । ভাৰতীয় ৰাইজৰ কঠোৰ পৰিশ্ৰম আৰু প্ৰতিভাৰ বাবেই ভাৰতে আজি উন্নয়নৰ ক্ষেত্ৰত এক মহান আৰু গুৰুত্বপূৰ্ণ সফলতা অৰ্জন কৰিছে বুলিও তেওঁ প্ৰশংসা কৰে ।

ভাৰতীয় অৰ্থনীতিৰ দ্ৰুত বিকাশ আৰু প্ৰধানমন্ত্ৰী মোদীৰ ভূমিকা-

ভাৰত বৰ্তমান বিশ্বৰ অন্যতম প্ৰধান আৰু দ্ৰুতবেগী অৰ্থনীতি বুলি উল্লেখ কৰি পুটিনে ইয়াৰ আঁৰত প্ৰধানমন্ত্ৰী নৰেন্দ্ৰ মোদীৰ নেতৃত্বক প্ৰশংসা কৰে । তেওঁ কয়, “ভাৰতৰ এই উচ্চ অৰ্থনৈতিক বিকাশৰ হাৰ এনেয়ে অহা নাই । এয়া প্ৰধানমন্ত্ৰী মোদীৰ নেতৃত্বত চৰকাৰে কৰি অহা কঠোৰ পৰিশ্ৰমৰ ফল ।”

ইফালে, আমেৰিকা-ভাৰতৰ বৰ্ধিত সম্পৰ্কই ভাৰত-ৰাছিয়াৰ সম্পৰ্কত কোনো প্ৰভাৱ পেলাব নেকি বুলি সোধা এক প্ৰশ্নৰ উত্তৰত পুটিনে কয় যে ভাৰতে সকলো দেশৰ সৈতে সম্পৰ্ক গঢ়ি তোলা কাৰ্যত তেওঁলোক সুখী । ১৫০ কোটি জনসংখ্যাৰ এই সৰ্ববৃহৎ গণতান্ত্ৰিক দেশখনে নিজৰ স্বাৰ্থ আৰু প্ৰয়োজন অনুসৰি যিকোনো দেশৰ সৈতে অৰ্থনৈতিক বিকাশৰ বাবে আগবাঢ়ি যোৱাটো একেবাৰে স্বাভাৱিক বুলি তেওঁ মন্তব্য কৰে ।

লগতে পঢ়ক : ভাৰতসহ ৬০ খনকৈ দেশত পুনৰ নতুন শুল্ক আৰোপ কৰাৰ পৰিকল্পনা ট্ৰাম্পৰ

ৰাষ্ট্ৰপতি পুটিনৰ এইয়া হ’ব এবছৰৰ ভিতৰত দ্বিতীয়টো ভাৰত ভ্ৰমণ

চলিত বৰ্ষৰ শেষৰ ফালে ভাৰতৰ অধ্যক্ষতাত নতুন দিল্লীত অনুষ্ঠিত হ’বলগীয়া ঐতিহাসিক ব্ৰিকছ (BRICS) সন্মিলনত ৰাছিয়াৰ ৰাষ্ট্ৰপতি ভ্লাদিমিৰ পুটিনে অংশগ্ৰহণ কৰিব । ক্ৰেমলিনৰ তৰফৰ পৰা আনুষ্ঠানিকভাৱে এই কথা নিশ্চিত কৰা হৈছে ।

দক্ষিণ আফ্ৰিকাস্থিত ৰাছিয়াৰ দূতাবাসে ছচিয়েল মিডিয়া প্লেটফৰ্ম ‘এক্স’ (X)-ত প্ৰকাশ কৰা এক পোষ্ট অনুসৰি, পুটিনৰ জ্যেষ্ঠ সহযোগী ইউৰী উশ্বাকভে জনাইছে যে ৰাছিয়াৰ ৰাষ্ট্ৰপতিগৰাকীয়ে অহা ১২ আৰু ১৩ ছেপ্টেম্বৰত অনুষ্ঠিত হ’বলগীয়া এই গুৰুত্বপূৰ্ণ শীৰ্ষ সন্মিলনত উপস্থিত থাকিব ।

এবছৰৰ ভিতৰত দ্বিতীয়বাৰৰ বাবে ভাৰত ভ্ৰমণ-

ৰাষ্ট্ৰপতি পুটিনৰ এইয়া হ’ব এবছৰৰ ভিতৰত দ্বিতীয়টো ভাৰত ভ্ৰমণ । ইয়াৰ পূৰ্বে শেহতীয়াকৈ ২০২৫ চনৰ ডিচেম্বৰ মাহত অনুষ্ঠিত হোৱা ২৩ সংখ্যক ভাৰত-ৰাছিয়া বাৰ্ষিক সন্মিলনত অংশ ল’বলৈ তেওঁ নতুন দিল্লীত উপস্থিত হৈছিল ।

দিল্লীত লাভৰভ-মোদীৰ বৈঠক : আলোচনা হ’ল গোলকীয় প্ৰেক্ষাপট

চলিত মে’ মাহৰ আৰম্ভণিতে ৰাছিয়াৰ বৈদেশিক মন্ত্ৰী চাৰ্গেই লাভৰভে ভাৰত ভ্ৰমণ কৰি ব্ৰিকছৰ বৈদেশিক মন্ত্ৰীসকলৰ বৈঠকত অংশ লৈছিল । এই ভ্ৰমণকালতে যোৱা ১৪ মে’ত তেওঁ প্ৰধানমন্ত্ৰী নৰেন্দ্ৰ মোদীক সাক্ষাৎ কৰে । বৈঠকত লাভৰভে প্ৰধানমন্ত্ৰী মোদীক দ্বিপাক্ষিক সহযোগিতাৰ অগ্ৰগতিৰ বুজ লোৱাৰ লগতে ইউক্ৰেইন আৰু পশ্চিম এছিয়াৰ সাম্প্ৰতিক পৰিস্থিতিৰ দৰে গুৰুত্বপূৰ্ণ আঞ্চলিক তথা গোলকীয় বিষয়সমূহৰ ওপৰত আলোচনা কৰে ।

নতুন দিল্লীত অনুষ্ঠিত এক সংবাদ মেলত বৈদেশিক মন্ত্ৰী লাভৰভে সদৰী কৰে যে প্ৰধানমন্ত্ৰী নৰেন্দ্ৰ মোদীয়েও চলিত বৰ্ষৰ শেষৰ ফালে ৰাছিয়া ভ্ৰমণ কৰিব বুলি পুনৰ নিশ্চিত কৰিছে । মস্কোৱে ভাৰতৰ সৈতে থকা ইয়াৰ “বিশেষাধিকাৰ প্ৰাপ্ত কৌশলগত অংশীদাৰিত্ব” অধিক শক্তিশালী কৰিবলৈ সম্পূৰ্ণ দায়বদ্ধ বুলি তেওঁ উল্লেখ কৰে ।

ব্ৰিকছ আৰু ভাৰতৰ ভূমিকা

ব্ৰিকছ হৈছে বিশ্বৰ ১১ খন প্ৰধান বজাৰ আৰু উন্নয়নশীল দেশৰ এক শক্তিশালী মঞ্চ। এই গোটত অন্তৰ্ভুক্ত দেশসমূহ হৈছে :

ব্ৰাজিল, চীন, ইজিপ্ত, ইথিঅ’পিয়া, ভাৰত, ইণ্ডোনেছিয়া, ইৰান, ৰাছিয়া, চৌদি আৰৱ, দক্ষিণ আফ্ৰিকা আৰু সংযুক্ত আৰৱ আমিৰাত ।

গোলকীয় ৰাজনৈতিক আৰু অৰ্থনৈতিক শাসন ব্যৱস্থাৰ লগতে সমসাময়িক গোলকীয় সমস্যাসমূহৰ সমাধানৰ বাবে এই মঞ্চই এক গুৰুত্বপূৰ্ণ ভূমিকা পালন কৰি আহিছে ।

লগতে পঢ়ক : ৪৩ বছৰৰ পাছত নৰৱেত ভাৰতৰ প্ৰধানমন্ত্ৰী; ওচলোত উষ্ম আদৰণি নৰেন্দ্ৰ মোদীক