‘ৰাজনীতিবিদসকলে ৰাজনৈতিক ধেমালি সহ্য কৰিব জানিব লাগিব’; ৰাঘৱ চাড্ডাৰ আবেদনক লৈ আদালতৰ প্ৰতিক্ৰিয়া
দিল্লী উচ্চ ন্যায়ালয়ে বিজেপি নেতা ৰাঘৱ চাড্ডাৰ আবেদন সন্দৰ্ভত এক মন্তব্য কৰিছে। আদালতে কৈছে ৰাজনীতিবিদসকলে ৰাজনৈতিক ধেমালি আৰু ব্যংগ সহ্য কৰিব জানিব লাগিব।
দিল্লী উচ্চ ন্যায়ালয়ে কয় যে ৰাজনীতিবিদসকলে ৰাজনৈতিক ধেমালি আৰু ব্যংগ সহ্য কৰিব জানিব লাগিব। নেতাসকল ইমান সংবেদনশীল হ’ব নালাগে যে তেওঁলোকে নিজৰ প্ৰতিটো সিদ্ধান্তৰ সমালোচনাতে অভিযোগ কৰিবলৈ আৰম্ভ কৰে। তেওঁলোকে সমালোচনাক বিনম্ৰতাৰে গ্ৰহণ কৰিব লাগিব।
আদালতে কয় যে নেতাসকলৰ সিদ্ধান্তক ৰাইজ আৰু বিৰোধী দলে সমালোচনা কৰাটো স্বাভাৱিক, আৰু এই সমালোচনা কেতিয়াবা ব্যংগ বা ধেমালিৰ ৰূপতো প্ৰকাশ পাব পাৰে। এনে পৰিপ্ৰেক্ষিতত যদি কোনো নেতাৰ সমালোচনা ধেমেলীয়া বা ব্যংগাত্মক সুৰত কৰা হয়, তেন্তে তাক প্ৰতিবাৰেই মানহানি বুলি গণ্য কৰিব নোৱাৰি। ৰাজহুৱা জীৱনত থকা নেতাসকলে এইটো স্বীকাৰ কৰিব লাগিব যে তেওঁলোকে সমালোচনাৰ সন্মুখীন হ’বই লাগিব, লাগিলে সেয়া তেওঁলোকৰ ভাল লাগক বা নালাগক।
দিল্লী উচ্চ ন্যায়ালয়ে এই মন্তব্য বিজেপি নেতা ৰাঘৱ চাড্ডাৰ এখন আবেদনৰ ৰায়দানত কৰে। আম আদমি পাৰ্টীৰ পৰা বিজেপিত যোগদান কৰাৰ পিছত ছ’চিয়েল মিডিয়াত ট্ৰ’লিঙৰ চিকাৰ হোৱা ৰাঘৱ চাড্ডাই ব্যক্তিত্বৰ অধিকাৰ সুৰক্ষাৰ বাবে দিল্লী উচ্চ ন্যায়ালয়ৰ দ্বাৰস্থ হৈছিল।ৰাঘৱ চাড্ডাই অভিযোগ কৰিছে যে তেওঁ বিজেপিত যোগদান কৰাৰ পিছৰে পৰা তেওঁৰ বিৰুদ্ধে ছ’চিয়েল মিডিয়াত এক কু-অভিপ্ৰায় চলোৱা হৈছে। তেওঁৰ বিৰুদ্ধে AI-দ্বাৰা নিৰ্মিত ডিপফেক ভিডিঅ’ আৰু বিভ্ৰান্তিকৰ তথা আপত্তিজনক সমল পোষ্ট কৰা হৈছে। এই পোষ্টবোৰত কোৱা হৈছে যে তেওঁ টকাৰ বাবে বিক্ৰী হৈ গ’ল।
দিল্লী উচ্চ ন্যায়ালয়ে নিজৰ নিৰ্দেশত ৰাঘৱ চাড্ডাৰ বিৰুদ্ধে ছ’চিয়েল মিডিয়াত আপলোড কৰা কিছুমান অশ্লীল আৰু আপত্তিজনক পোষ্ট আঁতৰাবলৈ নিৰ্দেশ দিয়ে। কিন্তু আদালতে এইটোও স্পষ্ট কৰি দিয়ে যে তেওঁৰ আবেদনত যিবোৰ সমলৰ উল্লেখ কৰা হৈছে, তাৰে সৰহভাগেই তেওঁৰ ৰাজনৈতিক সিদ্ধান্তক লৈ কৰা ব্যংগাত্মক সমালোচনা আৰু সেইবোৰক ‘অভিব্যক্তিৰ স্বাধীনতা’ৰ পৰিসৰত দেখা উচিত। সেই সকলোবোৰ আঁতৰাবলৈ নিৰ্দেশ দিব নোৱাৰি।
আদালতে কয় যে AI-ৰে প্ৰস্তুত কৰা ডিপফেক ভিডিঅ’, ভুৱা ছবি বা অশ্লীল সমলে যদি কাৰোবাৰ প্ৰতিষ্ঠা আৰু মৰ্যাদাত আঘাত হানে, তেন্তে সেয়া গ্ৰহণযোগ্য নহয়। যেতিয়ালৈকে AI-ৰ এনে অপপ্ৰয়োগ ৰোধ কৰিবলৈ কোনো কঠোৰ আইন প্ৰণয়ন নহয়, তেতিয়ালৈকে আদালতে প্ৰতিটো গোচৰতে এইটো চাব লাগিব যাতে ‘অভিব্যক্তিৰ স্বাধীনতা’ আৰু ‘ব্যক্তিৰ মৰ্যাদা’ৰ মাজত এক সঠিক ভাৰসাম্য বজায় থাকে।
আদালতে এনে পাঁচটা পোষ্ট আঁতৰাবলৈ নিৰ্দেশ দিয়ে যিবোৰত ৰাঘৱ চাড্ডাক লৈ অশ্লীল, অভদ্ৰ আৰু গালি-গালাজযুক্ত সমল আছিল। আদালতে লক্ষ্য কৰে যে এই সমলসমূহ যুক্তিসংগত ৰাজনৈতিক সমালোচনাৰ সীমাৰ বাহিৰত আছিল। এই গোচৰৰ পৰৱৰ্তী শুনানি ১৮ আগষ্টত হ’ব।
লগতে পঢ়ক: পশ্চিম বংগৰ টিএমচিৰ সাংসদ মহুৱা মৈত্ৰলৈ কণী নিক্ষেপ সমবেত জনতাৰ