প্ৰিপেইড ৰিচাৰ্জৰ ম্যাদ উকলি যোৱাৰ পিছত ইনকাম কল ব্লক কৰা টেলিকম কোম্পানীসমূহক তীব্ৰ সমালোচনা কৰে চাড্ডাই
আম আদমি পাৰ্টিৰ ৰাজ্যসভাৰ সাংসদ ৰাঘৱ চাড্ডাই বুধবাৰে সংসদত মোবাইল ৰিচাৰ্জৰ বিষয়ক লৈ সৰৱ হৈ পৰে । প্ৰিপেইড ৰিচাৰ্জৰ ম্যাদ উকলি যোৱাৰ পিছত ইনকাম কল ব্লক কৰা টেলিকম কোম্পানীসমূহৰ প্ৰতি প্ৰশ্ন উত্থাপন কৰি তীব্ৰ সমালোচনা কৰে চাড্ডাই । তেওঁ নিয়ন্ত্ৰকসকলক গ্ৰাহকক সুৰক্ষা দিবলৈ দাবী জনায় । বৈধতা তথা ভেলিডিটিৰ সময়সীমা শেষ হোৱাৰ পিছতো ব্যৱহাৰকাৰীয়ে কল লাভ কৰিব লাগে বুলি সাংসদগৰাকীয়ে উল্লেখ কৰে । ইয়াৰ পিছতে এতিয়া টেলিকম নীতিক লৈ বিতৰ্কৰ সৃষ্টি হৈছে ।
সাংসদ ৰাঘৱ চাড্ডাই কয় যে ৰিচাৰ্জ প্লেনৰ ম্যাদ উকলিলে আউটগোয়িং কল ব্লক হোৱাটো বুজা যায় । কিন্তু ইনকামিং কলবোৰো কিয় ব্লক কৰা হয় ? বৈধতাৰ সময়সীমা শেষ হ’লে মানুহৰ সৈতে যোগাযোগ কৰিব নোৱাৰি আৰু বেংকৰ অ’টিপিৰ দৰে গুৰুত্বপূৰ্ণ বাৰ্তাও লাভ কৰা নহয় । জৰুৰীকালীন বা জৰুৰী পৰিস্থিতিত ইয়াৰ ফলত কোনো ব্যক্তি সম্পূৰ্ণৰূপে বিচ্ছিন্ন হৈ পৰিব পাৰে ।
আপ সাসংদগৰাকীয়ে কয়, “মই চৰকাৰক দাবী জনাইছো যে অন্তিমটো ৰিচাৰ্জৰ পিছত কমেও এবছৰলৈকে ইনকামিং কল আৰু এছএমএছ চলি থাকিব লাগে যাতে অত্যাৱশ্যকীয় যোগাযোগত বাধা নাহে । আন এটা দাবী হ’ল শেষৰ ৰিচাৰ্জৰ পিছত কমেও তিনি বছৰলৈ মোবাইল নম্বৰ নিষ্ক্ৰিয় কৰিব নালাগে । টেলিকম অপাৰেটৰসকলে যিসকল ব্যৱহাৰকাৰীয়ে কেৱল অত্যাৱশ্যকীয় কল, অ’টিপি আৰু চৰকাৰী সেৱাৰ বাবে নিজৰ নম্বৰ সক্ৰিয় কৰি ৰাখিব লাগে তেওঁলোকৰ বাবে কম খৰচী “কেৱল ইনকামিং” প্লেন প্ৰৱৰ্তন কৰিব লাগে ।”
আম আদমি পাৰ্টিৰ সাংসদগৰাকীয়ে কয়, “মই ২৮ দিনৰ ৰিচাৰ্জ “Monthly Plane” পৰিকল্পনাৰ বিষয়টোও উত্থাপন কৰিলোঁ । যদি কোনো বিষয় এটাক Monthly বুলি কোৱা হয়, তেন্তে সেয়া ৩০-৩১ দিনৰ কেলেণ্ডাৰ মাহৰ ওপৰত ভিত্তি কৰি হ’ব লাগে । ২৮ দিনৰ চক্ৰৰ বাবে গ্ৰাহকে প্ৰকৃততে বছৰত ১৩টা ৰিচাৰ্জৰ বাবে ধন দিছে । (২৮ দিন × ১৩ ৰিচাৰ্জ = ৩৬৪ দিন)।”
তেওঁ কয় যে, টেলিকম অপাৰেটৰসকলে তেওঁলোকৰ ৰিচাৰ্জ প্লেনসমূহ প্ৰকৃত কেলেণ্ডাৰ মাহৰ সৈতে সংযোগ কৰিব লাগে, ২৮ দিনৰ প্লেনৰ সৈতে নহয় । বৰ্তমান মোবাইল ফোন বিলাসীতা নহয় । ই এক জীৱনৰেখা । প্ৰিপেইড ৰিচাৰ্জ গ্ৰাহকসকল ন্যায় আৰু স্বচ্ছতাৰ যোগ্য । তেওঁ কয় যে, “মই ভাৰতৰ প্ৰিপেইড ৰিচাৰ্জ গ্ৰাহকৰ বিষয়ে উদ্বেগ প্ৰকাশ কৰিলোঁ, যিসকলে দেশৰ ১.২৫ বিলিয়ন মোবাইল ব্যৱহাৰকাৰীৰ প্ৰায় ৯০% প্ৰতিনিধিত্ব কৰে ।”
লগতে পঢ়ক : অপেক্ষাৰ অন্ত… একাউন্টত দুই হাজাৰ টকা পাবলৈ শীঘ্ৰেই কৰক এই কাম
