ৰাষ্ট্ৰপতি মুৰ্মুৰ সৈতে হোৱা বৈঠকত ৰাঘৱ চাড্ডাৰ সৈতে থকা সন্দীপ পাঠকেও মিছা এজাহাৰ দাখিল কৰি প্ৰাক্তন সাংসদসকলক ভয় খুৱাবলৈ চেষ্টা কৰাৰ বাবে আপক অভিযুক্ত কৰে
মঙলবাৰে ভাৰতীয় জনতা পাৰ্টিৰ সাংসদ ৰাঘৱ চাড্ডাই দাবী কৰে যে তেওঁ পঞ্জাব চৰকাৰৰ “পৰৱৰ্তী লক্ষ্য” হ’ব । আম আদমি পাৰ্টি ত্যাগ কৰা ৭ গৰাকী সাংসদৰ বিৰুদ্ধে চলা ‘প্ৰতিশোধমূলক ৰাজনীতি’ৰ বিষয়ে অৱগত কৰিবলৈ ৰাষ্ট্ৰপতি দ্ৰৌপদী মুৰ্মুক সাক্ষাৎ কৰাৰ পিছত তেওঁ এই দাবী কৰে ।
ৰাষ্ট্ৰপতি মুৰ্মুক সাক্ষাৎ কৰাৰ কিছু সময়ৰ পিছত এক সংবাদমেল সম্বোধন কৰি তেওঁ পঞ্জাব চৰকাৰৰ বিৰুদ্ধে ৰাজ্যিক পুঁজি ব্যৱহাৰ কৰি এজেঞ্চী নিয়োগ কৰা আৰু প্ৰাক্তন সাতগৰাকী আপ সাংসদক ভাবুকি দিয়াৰ অভিযোগ উত্থাপন কৰে । তেওঁ কয়, “মই আপক ক’ব বিচাৰোঁ যে তেওঁলোকে ভিজিলেন্স বৰ্ড আৰু প্ৰদূষণ বৰ্ডৰ সহায়ত প্ৰতিশোধৰ এক বিপজ্জনক খেল আৰম্ভ কৰিছে, কিন্তু ইয়াৰ পৰিণাম অতি ভয়াবহ হ’ব । সূত্ৰ অনুসৰি, মই তেওঁলোকৰ পৰৱৰ্তী লক্ষ্য হ’ম । পঞ্জাব চৰকাৰে ছচিয়েল মিডিয়াত আমাক ভাবুকি দিবলৈ এজেঞ্চী ভাড়া কৰিছে । পঞ্জাব চৰকাৰৰ পুঁজি ব্যৱহাৰ কৰি আপে এই কাম কৰি আছে । এইকাৰণেই মই কৈছোঁ যে আপ এতিয়া দুৰ্নীতিগ্ৰস্ত আৰু আপোচকাৰী লোকৰ হাতত বন্দী হৈ পৰিছে ।”
পঞ্জাব চৰকাৰে আম আদমি পাৰ্টি এৰি বিজেপিত যোগদান কৰা আন এগৰাকী ৰাজ্যসভাৰ সাংসদ সন্দীপ পাঠকৰ বিৰুদ্ধে দুখন এজাহাৰ পঞ্জীয়ন কৰাৰ কেইদিনমান পিছতে চাড্ডাই এই দাবী কৰিছে । চাড্ডাই লগতে কয় যে ৰাষ্ট্ৰপতিয়ে সাতগৰাকী প্ৰাক্তন আপ সাংসদক নিৰাপত্তাৰ আশ্বাস দিছে আৰু পঞ্জাব চৰকাৰৰ বিষয়াসকলক সাৱধান কৰি দিছে, কিয়নো বৰ্তমানৰ ৰাজ্য চৰকাৰখনৰ শাসনকালত মাত্ৰ কেইবছৰমানহে বাকী আছে ।
তেওঁ কয়, “আমি ৰাষ্ট্ৰপতিক আম আদমি পাৰ্টিৰ দ্বাৰা পঞ্জাব ৰাজ্যিক যন্ত্ৰৰ অপব্যৱহাৰৰ বিষয়ে অৱগত কৰিছোঁ । ৰাষ্ট্ৰপতিয়ে আমাক আমাৰ সুৰক্ষা আৰু সংবিধান ৰক্ষাৰ আশ্বাস দিছে । মই পঞ্জাব চৰকাৰৰ বিষয়াসকলক সাৱধান হ’বলৈ ক’ব বিচাৰোঁ, কাৰণ আপ চৰকাৰৰ হাতত এতিয়া মাত্ৰ কেইমাহমানহে বাকী আছে। আজি আমি ৰাষ্ট্ৰপতিক জনাইছোঁ যে যিসকল সাংসদে আপ এৰি বিজেপিত যোগদান কৰিছে তেওঁলোকৰ বিৰুদ্ধে পঞ্জাব চৰকাৰে কেনেকৈ ৰাজ্যিক যন্ত্ৰ ব্যৱহাৰ কৰি বিপজ্জনক প্ৰতিশোধমূলক ৰাজনীতি চলাইছে ।”
চাড্ডাই বিজেপি সাংসদ সন্দীপ পাঠকৰ বিৰুদ্ধে “দুৰ্ভাৱনাপূৰ্ণ” আৰু “ভিত্তিহীন” গোচৰ ৰুজু কৰাৰ লগতে পঞ্জাবত ৰাজিন্দ্ৰ গুপ্তাৰ কাৰখানা বন্ধ কৰি দিয়াৰ অভিযোগ উত্থাপন কৰে । চাড্ডাই কয়, “পঞ্জাব আৰক্ষীৰ সহায়ত আপ কৰ্মীসকলে বিশ্বকাপ বিজয়ী হৰভজন সিঙৰ বাসগৃহৰ বাহিৰত ‘দেশদ্ৰোহী’ বুলি লিখিছিল । ইয়াৰ পিছত পঞ্জাবত পদ্মশ্ৰী ৰাজেন্দ্ৰ গুপ্তাৰ কাৰখানাৰ পানীৰ সংযোগ কাটি দিয়া হয় । আপে সন্দীপ পাঠকৰ বিৰুদ্ধেও দুৰ্ভাৱনাপূৰ্ণ আৰু মিছা এজাহাৰ দাখিল কৰিছিল আৰু সংবাদ মাধ্যমৰ জৰিয়তে প্ৰচাৰ কৰিছিল যে তেওঁক গ্ৰেপ্তাৰ কৰা হ’ব ।”
ৰাষ্ট্ৰপতি মুৰ্মুৰ সৈতে হোৱা বৈঠকত ৰাঘৱ চাড্ডাৰ সৈতে থকা সন্দীপ পাঠকেও মিছা এজাহাৰ দাখিল কৰি প্ৰাক্তন সাংসদসকলক ভয় খুৱাবলৈ চেষ্টা কৰাৰ বাবে আপক অভিযুক্ত কৰে । তেওঁ কয়, “আমি সংবিধান প্ৰদত্ত অধিকাৰৰ ভিত্তিত আপ ত্যাগ কৰাৰ সিদ্ধান্ত লৈছিলোঁ । আপে ভুৱা এজাহাৰ দাখিল কৰি আমাক ভয় খুৱাবলৈ চেষ্টা কৰিছে। আমি আইনী যুঁজ দিম… আমি দেশৰ স্বাৰ্থত কাম কৰি আছোঁ ।”
লগতে পঢ়ক : কবিগুৰুৰ জন্মদিনত বংগত নতুন যুগৰ আৰম্ভণি, ৯ মে’ত শুভেন্দুৰ অভিষেক!
