বাংলাদেশত শ্বেখ হাছিনা আৰু ইউনুছ সমৰ্থকৰ মাজত ৰক্তাক্ত সংঘৰ্ষ

বাংলাদেশৰ পৰিস্থিতি পুনৰ অৱনতি ঘটিবলৈ আৰম্ভ কৰিছে । বুধবাৰে গোপালগঞ্জ অঞ্চলত শ্বেখ হাছিনাৰ দল আৱামি লীগৰ ছাত্ৰ শাখা আৰু অন্তৱৰ্তীকালীন চৰকাৰৰ মুৰব্বী মহম্মদ ইউনুছৰ সমৰ্থকৰ মাজত ৰক্তাক্ত সংঘৰ্ষৰ সূত্ৰপাত হয় । এই ঘটনাত চাৰিজন লোকৰ মৃত্যু হোৱাৰ লগতে ডজনৰো অধিক লোক আহত হয় । পৰিস্থিতি নিয়ন্ত্ৰণৰ বাহিৰলৈ যোৱা দেখি সেনাই টেংকেৰে ৰাজপথত টহল দি অঞ্চলটোৰ দায়িত্ব লয় । উল্লেখ্য যে, বাংলাদেশৰ প্ৰতিষ্ঠাপক শ্বেখ মুজিবৰ ৰহমানৰ জন্মস্থান গোপালগঞ্জ ।

তথ্য অনুসৰি নেশ্যনেল চিটিজেন পাৰ্টিয়ে গোপালগঞ্জত এক সমাৱেশৰ আয়োজন কৰিছিল, য’ত পৰিস্থিতিয়ে হিংসাত্মক ৰূপ ধাৰণ কৰে । হিংসাত্মক পৰিস্থিতিৰ পিছতে অঞ্চলটোত জাৰি কৰা হৈছে কাৰ্ফিউ । আৰক্ষীৰ উপৰিও অৰ্ধসামৰিক বাহিনীও মোতায়েন কৰা হয় । ভাৰতত আশ্ৰয় লৈ থকা শ্বেখ হাছিনাৰ দল আৱামী লীগে ইউনুছ চৰকাৰে দুষ্কৃতিকাৰীৰ জৰিয়তে ৰক্তপাত কৰাৰ অভিযোগ উত্থাপন কৰিছে ।

গোপালগঞ্জৰ হিন্দু অধ্যুষিত অঞ্চলত সংঘটিত হিংসাত্মক ঘটনা সন্দৰ্ভত মহম্মদ ইউনুছ চৰকাৰে কঠোৰ স্থিতি গ্ৰহণ কৰিছে । হিংসাত্মক অঞ্চলটোত সান্ধ্য আইনৰ মাজতে অৰ্ধসামৰিক বাহিনী মোতায়েন কৰা হৈছে । ইউনুছ চৰকাৰে এই ৰক্তপাতৰ বাবে আৱামী লীগক দোষাৰোপ কৰিছে । আনহাতে শ্বেখ হাছিনাৰ সমৰ্থকসকলে কয় যে ইউনুছ চৰকাৰে দলীয় কৰ্মীক আক্ৰমণ কৰিছে ।

অভিযোগ অনুসৰি শ্বেখ হাছিনা দলৰ সমৰ্থকে এন চি পিৰ সমাৱেশত আক্ৰমণ চলাইছিল । আৱামী লীগৰ ছাত্ৰ শাখা বাংলাদেশ ছাত্ৰ লীগৰ বিৰুদ্ধে হিংসাত্মক পৰিস্থিতিৰ উচটনি দিয়াৰ অভিযোগ উত্থাপন হৈছে । ইয়াৰ পিছতে সংঘৰ্ষৰ সৃষ্টি হয় । মহম্মদ ইউনুছ চৰকাৰৰ বিৰুদ্ধে শ্বেখ হাছিনাৰ সমৰ্থকে বিক্ষোভ আৰম্ভ কৰে । আৰক্ষীৰ গুলীত নিহত হৈছে ৪ জন ।

লগতে পঢ়ক : সত্যজিৎ ৰায়ৰ বাংলাদেশস্থিত পূৰ্বপুৰুষৰ ঘৰ সংৰক্ষণৰ আহ্বান ভাৰত চৰকাৰৰ…

বাংলাদেশৰ আন্তঃৰাষ্ট্ৰীয় অপৰাধ ন্যায়াধিকৰণত অভিযোগৰ শুনানি

বাংলাদেশৰ আন্তঃৰাষ্ট্ৰীয় অপৰাধ ন্যায়াধিকৰণে দেওবাৰে প্ৰাক্তন প্ৰধানমন্ত্ৰী শ্বেখ হাছিনাৰ বিৰুদ্ধে মানৱতাৰ বিৰুদ্ধে অপৰাধৰ অভিযোগৰ শুনানি গ্ৰহণ কৰাৰ সিদ্ধান্ত গ্ৰহণ কৰিছে । এই শুনানি বাংলাদেশৰ ইতিহাসত প্ৰথমবাৰৰ বাবে ৰাষ্ট্ৰীয় টেলিভিছন (বিটিভি)ত পোনপটীয়াকৈ সম্প্ৰচাৰ কৰা হ’ব । যোৱা বছৰৰ ৫ আগষ্টত ছাত্ৰ নেতৃত্বাধীন ব্যাপক প্ৰতিবাদৰ পিছত ক্ষমতাৰ পৰা অপসাৰণ কৰা হাছিনা কেইবাটাও গোচৰৰ সন্মুখীন হৈছে, যাৰ শুনানি এতিয়ালৈকে কেমেৰাৰ পৰা আঁতৰত ৰখা হৈছে । আই চি টি-বি ডিৰ এই সিদ্ধান্তই এই পৰম্পৰা ভংগ কৰিবলৈ সাজু হৈছে ।

১৮ ফেব্ৰুৱাৰীত তিনিজনীয়া ন্যায়াধিকৰণে হাছিনাৰ বিৰুদ্ধে তদন্ত এপ্ৰিলৰ ভিতৰত সম্পূৰ্ণ কৰিবলৈ নিৰ্দেশ দিছিল । ৰাষ্ট্ৰীয় সংবাদ সংস্থা বি এছ এছৰ মতে, দেওবাৰে আই চি টি-বিডিত ২০২৪ চনৰ জুলাই-আগষ্ট বিদ্ৰোহৰ সময়ত মানৱতাৰ বিৰুদ্ধে অপৰাধৰ অভিযোগ দাখিল কৰিব বিচাৰ বিভাগে । আই চি টি-বিডিৰ অভিযোজক গাজী এম এইচ তামিমে কয় যে শুনানি স্থানীয় সময় অনুসৰি পুৱা ৯.৩০ বজাৰ পৰা আৰম্ভ হ’ব আৰু বিটিভিক লাইভ সম্প্ৰচাৰ কৰিবলৈ কোৱা হৈছে । ষ্টুডেণ্টছ এগেইনষ্ট ডিচক্ৰিমিনেচন (এছ এ ডি)ৰ নেতৃত্বত হোৱা প্ৰতিবাদৰ পিছত ২০২৪ চনৰ ৫ আগষ্টত হাছিনাৰ আৱামি লীগ চৰকাৰক উৎখাত কৰা হয় ।

ইতিমধ্যে আই চি টি-বিডিয়ে হাছিনাৰ বিৰুদ্ধে গ্ৰেপ্তাৰী পৰোৱানা জাৰি কৰাৰ বিপৰীতে অন্তৱৰ্তীকালীন চৰকাৰে তেওঁক প্ৰত্যাৰ্পণৰ বাবে ভাৰতলৈ কূটনৈতিক নোট প্ৰেৰণ কৰিছে । ২০২৪ চনৰ জুলাই-আগষ্টৰ হিংসাত্মক ঘটনাৰ সময়ত শ শ লোকৰ মৃত্যুৰ পিছত হাছিনা চৰকাৰৰ অধিকাংশ জ্যেষ্ঠ নেতাক গ্ৰেপ্তাৰ কৰা হৈছিল । ৰাষ্ট্ৰসংঘৰ এক প্ৰতিবেদন অনুসৰি যোৱা বছৰৰ ১৫ জুলাইৰ পৰা ১৫ আগষ্টৰ ভিতৰত প্ৰায় ১৪০০ লোকৰ মৃত্যু হৈছিল । চৰকাৰৰ পতনৰ পাছতো হিংসাত্মক পৰিস্থিতি অব্যাহত আছিল ।

লগতে পঢ়ক : ‘মই সমগ্ৰ বিশ্বতে জনপ্ৰিয় হৈ গলো…’ পাকিস্তানৰ ৰেলিত পহলগাম কাণ্ডৰ মাষ্টাৰমাইণ্ডৰ স্বীকাৰোক্তি