“আপুনি পাগল হৈছে!মই নহ’লে আপুনি জেলত থাকিলহেঁতেন…”; নেতান্যাহুক তিৰস্কাৰ ট্ৰাম্পৰ
ড’নাল্ড ট্ৰাম্পে ইজৰাইলৰ প্ৰধানমন্ত্ৰী বেঞ্জামিন নেতান্যাহুক ফোনযোগে তীব্ৰ ধমক দিয়ে।তেওঁ ইজৰাইলক হিজবুল্লাহৰ বিৰুদ্ধে চলি থকা আক্ৰমণ তৎক্ষণাত বন্ধ কৰিবলৈ হেঁচা প্ৰয়োগ কৰে।
ইজৰাইল আৰু হিজবুল্লাহৰ মাজত বৃদ্ধি পোৱা উত্তেজনাৰ মাজতে আমেৰিকাৰ ৰাষ্ট্ৰপতি ড’নাল্ড ট্ৰাম্পে ইজৰাইলৰ প্ৰধানমন্ত্ৰী বেঞ্জামিন নেতান্যাহুক ফোনযোগে তীব্ৰ ভৰ্ৎসনা কৰিছে। ‘নিউয়ৰ্ক পোষ্ট’ৰ মতে, ফোন কলটোৰ সময়ত ট্ৰাম্পে খঙত কেইবাবাৰো অসংসদীয় শব্দও ব্যৱহাৰ কৰিছিল।
শেহতীয়াকৈ ইজৰাইলে দক্ষিণ বেৰুতত সন্ত্ৰাসবাদীৰ ওপৰত বিমান আক্ৰমণৰ নিৰ্দেশ দিছিল। ইজৰাইলৰ এই পদক্ষেপৰ পিছতে ইৰানে আমেৰিকাৰ সৈতে চলি থকা আলোচনাৰ পৰা আঁতৰি অহাক লৈ সকীয়নি দিছিল। ‘এক্সিয়ছ’ৰ প্ৰতিবেদন অনুসৰি, নেতান্যাহুৰ সৈতে ফোনত কথা পতাৰ সময়ত ট্ৰাম্প অত্যন্ত খঙত আছিল। তেওঁ নেতান্যাহুক হিজবুল্লাহৰ ওপৰত চলাই থকা আক্ৰমণ তৎকালীনভাৱে বন্ধ কৰিবলৈ কয়।
এগৰাকী আমেৰিকান বিষয়াগৰাকীৰ মতে, ট্ৰাম্পে নেতান্যাহুক কৈছিল, “তুমি সম্পূৰ্ণ পাগল হৈ পৰিছা। যদি মই নাথাকিলোহেঁতেন, তেন্তে তুমি আজি জেলত থাকিলোহেঁতেন। মই তোমাৰ প্ৰাণ ৰক্ষা কৰি আছোঁ। এই সময়ত সকলোৱে তোমাক ঘিণ কৰে। তোমাৰ এই কাণ্ডবোৰৰ বাবেই আজি সকলোৱে ইজৰাইলক ঘৃণা কৰিছে।”
ট্ৰাম্পৰ অসন্তুষ্টিৰ পিছতো নেতান্যাহু নিজৰ সিদ্ধান্তত অটল হৈ আছে। এই ফোন কলটোৰ পিছত নেতান্যাহুৱে ছচিয়েল মিডিয়া প্লেটফৰ্ম ‘এক্স’ ত এটা পোষ্ট লিখি বিশ্বৰ সন্মুখত ইজৰাইলৰ কঠোৰ স্থিতি পুনৰ দোহাৰে।
নেতান্যাহুৱে কয়, “আজি নিশা মই ৰাষ্ট্ৰপতি ট্ৰাম্পৰ সৈতে কথা পাতিছোঁ। মই তেওঁক স্পষ্টকৈ কৈ দিছোঁ যে যদি হিজবুল্লাহে আমাৰ চহৰ আৰু নাগৰিকৰ ওপৰত আক্ৰমণ বন্ধ নকৰে, তেন্তে ইজৰাইলে বেৰুতত থকা সন্ত্ৰাসবাদীৰ ঘাটিসমূহৰ ওপৰত আক্ৰমণ চলাই যাব। আমাৰ এই স্থিতি অলপো সলনি হোৱা নাই। ইয়াৰ সমান্তৰালভাৱে ইজৰাইলী সেনাই দক্ষিণ লেবাননত নিজৰ অভিযান অব্যাহত ৰাখিব।”
লগতে পঢ়ক: মাউণ্ট ৰাছম’ৰত নিজৰ মুখমণ্ডল! ট্ৰুথ ছ’চিয়েলত ডিজিটেল ছবি শ্বেয়াৰ কৰি চৰ্চাত ড’নাল্ড ট্ৰাম্প