বিজয় হাজাৰেত ৰোহিত-কোহলীৰ দুৰ্দান্ত শতক… ব্যৰ্থ ঋষভ পন্ট
বিজয় হাজাৰে ট্ৰফীৰ বুধবাৰে অনুষ্ঠিত হোৱা মেচত ৰোহিত শৰ্মা আৰু বিৰাট কোহলীয়ে নিজ নিজ দলৰ হৈ দুৰ্দান্ত প্ৰদৰ্শন আগবঢ়াই । দুয়োগৰাকী তাৰকাই বিস্ফোৰক শতক অৰ্জন কৰে ।
২৪ ডিচেম্বৰ বুধবাৰৰ দিনটো ভাৰতীয় ক্ৰিকেট অনুৰাগীৰ বাবে বিশেষ দিন আছিল । এই দিনটোত টিম ইণ্ডিয়াৰ দুই ডাঙৰ তাৰকা বিৰাট কোহলী আৰু ৰোহিত শৰ্মাক পুনৰবাৰ ঘৰুৱা ক্ৰিকেট খেলা দেখা গ’ল । দুয়োগৰাকী কিংবদন্তিয়ে বিজয় হাজাৰে ট্ৰফী ২০২৫ত নিজ নিজ দলৰ হৈ খেলপথাৰত নামি নিজৰ বেটিং দক্ষতা প্ৰদৰ্শন কৰে । অন্ধ্ৰ প্ৰদেশৰ বিৰুদ্ধে দিল্লীৰ হৈ বিৰাট কোহলীয়ে শতক অৰ্জন কৰাৰ বিপৰীতে ছিকিমৰ বিৰুদ্ধে মুম্বাইৰ জাৰ্চি পিন্ধা ৰোহিত শৰ্মাই বিস্ফোৰক শতক অৰ্জন কৰে ।
কোহলীৰ শতকেৰ সহায়ত অন্ধ্ৰপ্ৰদেশক পৰাস্ত কৰিলে দিল্লীয়ে-
বি চি চি আই চেণ্টাৰ অৱ এক্সেলেন্সত অনুষ্ঠিত হয় দিল্লী আৰু অন্ধ্ৰ প্ৰদেশৰ মাজৰ খেলখন । দিল্লীয়ে টছত জয়লাভ কৰি প্ৰথমে বলিং কৰিবলৈ সিদ্ধান্ত লয় । চলিত বিজয় হাজাৰেত বিৰাট কোহলী দিল্লী দলৰ অংশ কিন্তু দলটোৰ অধিনায়ক ঋষভ পন্ট । এই মেচখন প্ৰথমে বেংগালুৰুৰ এম চিন্নাস্বামী ষ্টেডিয়ামত অনুষ্ঠিত হোৱাৰ কথা আছিল যদিও শেষ মুহূৰ্তত খেলৰ স্থান সলনি কৰা হয় । ঘৰুৱা ক্ৰিকেটত কোহলীৰ উপস্থিতিয়ে যুৱ খেলুৱৈক অনুপ্ৰাণিত কৰিছে । অন্ধ্ৰ প্ৰদেশে ৫০ অভাৰত ৮টা উইকেট হেৰুৱাই ২৯৮ ৰান সংগ্ৰহ কৰে ।
ইয়াৰ উত্তৰত দিল্লীয়ে ৩৭.৪ অভাৰত ৬টা উইকেট হেৰুৱাই বিজয় লক্ষ্যত উপনীত হয় । ১৫ বছৰৰ পাছত বিজয় হাজাৰে ট্ৰফীলৈ ঘূৰি অহা কিং কোহলীয়ে ৮৪টা বলত শতক অৰ্জন কৰে । ১৪টা চাৰি আৰু তিনিটা ৬ৰ সহায়ত ১০১টা বলত ১৩১ ৰান সংগ্ৰহ কৰি আউট হয় কোহলী । তেওঁৰ ষ্ট্ৰাইক ৰেট আছিল ১২৯.৭০ । কোহলীয়ে এবিজয় হাজাৰেত শেষবাৰৰ বাবে ২০০৯/১০ ছিজনত অংশগ্ৰহণ কৰিছিল । ইয়াৰ উপৰিও প্ৰিয়ংশ আৰ্য্যই ৪৪টা বলত ৭৪ ৰানৰ ইনিংছ খেলে । নীতিশ ৰাণাই ৯টা চাৰি আৰু দুটা ৬ৰ সহায়ত ৫৫টা বলত ৭৭ ৰান সংগ্ৰহ কৰে । অধিনায়ক ঋষভ পন্ট ব্যৰ্থ হয় । তেওঁ মাত্ৰ পাঁচ ৰানহে সংগ্ৰহ কৰিবলৈ সক্ষম হয় ।
ছিক্কিমৰ বিৰুদ্ধে ৰোহিত শৰ্মাৰ বিস্ফোৰক শতক-
জয়পুৰৰ ছাৱাই মানসিং ষ্টেডিয়ামত অনুষ্ঠিত হয় মুম্বাই আৰু ছিকিমৰ মাজত খেলখন । ছিকিমে টছত জয়লাভ কৰি প্ৰথমে বেটিং কৰিবলৈ সিদ্ধান্ত লয় । চলিত বিজয় হাজাৰেত মুম্বাই দলৰ অংশ ৰোহিত শৰ্মা, দলটোৰ অধিনায়কৰ দায়িত্বত আছে শ্বাৰ্দুল ঠাকুৰ । ৰোহিতে বহুদিনৰ মূৰত ঘৰুৱা ক্ৰিকেট খেলিছে, অনুৰাগীয়ে তেওঁৰ পৰা এটা ডাঙৰ ইনিংছ আশা কৰিছিল । অৱশ্যে অনুৰাগীৰ আশা পূৰ্ণ কৰে হিটমেনে । ছিকিমে ৫০ অভাৰত ৭ উইকেটৰ বিনিময়ত ২৩৬ ৰান সংগ্ৰহ কৰে ।
প্ৰত্যুত্তৰত মুম্বাইয়ে ৩০.৩ অভাৰত দুটা উইকেট হেৰুৱাই বিজয় লক্ষ্যত উপনীত হয় । ৰোহিত শৰ্মাই আগ্ৰাসী বেটিং কৰে । ৮টা চাৰি আৰু আঠটা ৬ৰ সহায়ত ৬২টা বলত শতক অৰ্জন কৰে ৰোহিতে । ইয়াৰ পিছত তেওঁ ৯১টা বলত ১৫০ ৰান সম্পূৰ্ণ কৰে । ১৮টা চাৰি আৰু ৯টা ৬ৰ সহায়ত ৯৪টা বলত ১৫৫ ৰান সংগ্ৰহ কৰি আউট হয় ৰোহিত শৰ্মা । অংকৃশ ৰঘুবংশীয়ে ৫৮টা বলত ৩৮ ৰানৰ ইনিংছ খেলে । ইফালে, মুছিৰ খানে ২৬টা বলত ২৭ ৰান সংগ্ৰহ কৰি অপৰাজিত হৈ থাকে আৰু ছৰফৰাজ খানে ৫ বলত ৮ ৰান সংগ্ৰহ কৰি অপৰাজিত হৈ থাকে ।
কিয় ঘৰুৱা ক্ৰিকেটলৈ ঘূৰি আহিল বিৰাট-ৰোহিত ?
কেন্দ্ৰীয় চুক্তিবদ্ধ খেলুৱৈসকলে এই ছিজনত কমেও দুখন ঘৰুৱা মেচ খেলাটো বাধ্যতামূলক কৰিছে বি চি চি আইয়ে । এই নিয়মৰ অধীনত বিৰাট কোহলী আৰু ৰোহিত শৰ্মা ঘৰুৱা ক্ৰিকেটলৈ ঘূৰি আহিছে । সাধাৰণতে আন্তঃৰাষ্ট্ৰীয় ক্ৰিকেটত সীমাবদ্ধ এই দুজন খেলুৱৈয়ে এতিয়া ঘৰুৱা মঞ্চত যুৱসকলৰ সৈতে খেলি আছে, যিটো অনুৰাগীৰ বাবে এক বিৰল আৰু বিশেষ সুযোগ ।
লগতে পঢ়ক : স্মৃতি মন্ধানাই হেৰুৱালে প্ৰথম স্থান; দীপ্তি শৰ্মাই ৰচিলে ইতিহাস… আইচিচিৰ ৰেংকিঙত ডাঙৰ পৰিৱৰ্তন