কেৱল ৰোহিত-কোহলীয়েই নহয়… বৰ্তমানৰ প্ৰতিগৰাকী ভাৰতীয় খেলুৱৈক লৈ বিচিচিআইৰ কঠোৰ স্থিতি
বৰ্তমানৰ প্ৰতিগৰাকী ভাৰতীয় খেলুৱৈক লৈ কঠোৰ স্থিতি গ্ৰহণ কৰিছে ভাৰতীয় ক্ৰিকেট নিয়ন্ত্ৰণ বৰ্ডে । কেৱল ৰোহিত-কোহলীয়েই নহয় প্ৰতিগৰাকী ভাৰতীয় খেলুৱৈয়ে মানিব লাগিব এই নিৰ্দেশ ।
ভাৰতীয় ক্ৰিকেটাৰৰ বাবে ঘৰুৱা ক্ৰিকেটৰ ক্ষেত্ৰত কঠোৰ স্থিতি গ্ৰহণ কৰিছে বি চি চি আইয়ে । ব’ৰ্ডে স্পষ্ট কৰি দিছে যে ২৪ ডিচেম্বৰৰ পৰা আৰম্ভ হ’বলগীয়া আগন্তুক বিজয় হাজাৰে ট্ৰফীত বৰ্তমানৰ ৰাষ্ট্ৰীয় দলৰ সকলো খেলুৱৈয়ে কমেও দুখন খেল খেলিব লাগিব ।
১৯ ডিচেম্বৰত আহমেদাবাদত দক্ষিণ আফ্ৰিকাৰ বিৰুদ্ধে অনুষ্ঠিত হ’বলগীয়া চূড়ান্ত টি-২০ আৰু ২০২৬ চনৰ ১১ জানুৱাৰীৰ পৰা আৰম্ভ হ’বলগীয়া নিউজীলেণ্ডৰ বিৰুদ্ধে এদিনীয়া শৃংখলাৰ মাজত প্ৰায় তিনি সপ্তাহৰ ব্যৱধান আছে । বি চি চি আইয়ে এই সময়ছোৱা ব্যৱহাৰ কৰি ভাৰতীয় খেলুৱৈসকলক ঘৰুৱা ক্ৰিকেটত জড়িত কৰি ৰাখিব বিচাৰিছে ।
খেলুৱৈসকলক স্পষ্ট নিৰ্দেশনা বাছনি সমিতিৰ-
অজিত আগৰকাৰৰ নেতৃত্বত ৰাষ্ট্রীয় বাছনি সমিতিয়ে ভাৰতীয় খেলুৱৈসকলক এই নির্দেশ প্রদান কৰিছে ৷ এই সিদ্ধান্ত অষ্ট্ৰেলিয়াত অনুষ্ঠিত টেষ্ট শৃংখলাত দুৰ্বল প্ৰদৰ্শনৰ পিছত কৰা পৰ্যালোচনাৰ অংশ, য’ত সকলো ফৰ্মেটতে ঘৰুৱা ক্ৰিকেটক অগ্ৰাধিকাৰ দিয়াৰ পৰামৰ্শ দিয়া হৈছিল ।
ইতিমধ্যে ৰোহিত শৰ্মা আৰু বিৰাট কোহলীয়ে তেওঁলোকৰ উপলব্ধতা ঘোষণা কৰিছে । শুভমন গীল, যশপ্ৰীত বুমৰাহ, কে এল ৰাহুল, হাৰ্দিক পাণ্ডিয়া আৰু সূৰ্য্যকুমাৰ যাদৱৰ দৰে জ্যেষ্ঠ খেলুৱৈকো নিজ নিজ ৰাজ্যিক দলৰ হৈ কমেও দুখন মেচ খেলিবলৈ কোৱা হৈছে । ফিটনেছৰ সমস্যাৰ বাবে কেৱল শ্ৰেয়াছ আয়েৰে এই প্ৰতিযোগিতাত অংশ ল’ব নোৱাৰিব ।
বিচিচিআইৰ আনুষ্ঠানিক ঘোষণা-
বিচিচিআইৰ এজন জ্যেষ্ঠ বিষয়াই কয় যে বিজয় হাজাৰে ট্ৰফী ছটা ৰাউণ্ডত হ’ব আৰু খেলুৱৈ আৰু ৰাজ্যিক সংস্থাসমূহে কোন দুটা ৰাউণ্ডত খেলিব সেইটো নিৰ্ণয় কৰিব পাৰিব । অৱশ্যে এইটোও স্পষ্ট কৰা হৈছে যে বিজয় হাজাৰে ট্ৰফীত খেলাটো এতিয়া ঐচ্ছিক নহয় । চেণ্টাৰ অৱ এক্সেলেন্সে অযোগ্য ঘোষণা কৰা খেলুৱৈসকলকহে ৰেহাই দিয়া হ’ব ।
লগতে পঢ়ক : ৱাংখেড়েত শচীন আৰু মেছিৰ যুগলবন্দী… সোণালী মুহূৰ্ত বুলি অভিহিত মাষ্টাৰ ব্লাষ্টাৰৰ