ক্ৰিমিয়ান উপদ্বীপত ৰাছিয়াৰ এখন এন-২৬ সামৰিক বিমান দুৰ্ঘটনাগ্ৰস্ত হয়। দুৰ্ঘটনাটোৰ সময়ত বিমানখনত ২৯ গৰাকীকৈ লোক আছিল।

ক্ৰিমিয়াত দুৰ্ঘটনাগ্ৰস্ত হৈছে ৰাছিয়াৰ এন-২৬ সামৰিক বিমান। ক্ৰিমিয়া উপদ্বীপৰ ওপৰেৰে এণ্টন’ভ এন-২৬ বিমান উৰি হৈ থকাৰ সময়তে এই দুৰ্ঘটনাটো সংঘটিত হয়।ৰাছিয়াৰ সংবাদ সংস্থা টাছে প্ৰতিৰক্ষা মন্ত্ৰালয়ৰ উদ্ধৃতিৰে প্ৰকাশ কৰা অনুসৰি বিমানখনত মুঠ ২৯ জন লোক আছিল, তাৰে ২৩ গৰাকী যাত্ৰী আৰু ৬ জন ক্ৰু সদস্যকে। দুৰ্ঘটনাটোৰ ফলত ২৯ গৰাকীকৈ লোকৰ মৃত্যু হৈছে।

তথ্য অনুসৰি এই সামৰিক পৰিবহণ বিমানখনে ৩১ মাৰ্চত মস্কোৰ সময় অনুসৰি সন্ধিয়া প্ৰায় ৬ বজাত উৰণ আৰম্ভ কৰিছিল।ঠিক তেতিয়াই ক্ৰিমিয়াৰ ওপৰত এয়াৰ ট্ৰেফিক কণ্ট্ৰ’ল (এটিচি)ৰ সৈতে বিমানখনৰ যোগাযোগ বিচ্ছিন্ন হৈ পৰিল।ইয়াৰ পিছতে বিমানখন দুৰ্ঘটনাগ্ৰস্ত হয়।

প্ৰতিবেদন অনুসৰি,ক’লা সাগৰত অৱস্থিত ক্ৰিমিয়ান উপদ্বীপৰ পাহাৰত খুন্দা মৰাৰ ফলত বিমানখন দুৰ্ঘটনাগ্ৰস্ত হয়। এই দুৰ্ঘটনাত বিমানখনত থকা ২৯ জন লোকৰ আটাইকেইজন লোকৰে মৃত্যু হয়।ক্ৰিমিয়া হৈছে সেইটো অঞ্চল,যিটো ৰাছিয়াই ২০১৪ চনত ইউক্ৰেইনৰ পৰা জব্দ কৰিছিল।

ৰাছিয়াৰ প্ৰতিৰক্ষা মন্ত্ৰালয়ে জনোৱা মতে, এটা অনুসন্ধান আৰু উদ্ধাৰকাৰী দলে ইতিমধ্যে দুৰ্ঘটনাস্থলীৰ সন্ধান উলিয়াইছে।এন-২৬ হৈছে ১৯৬০ চনৰ শেষৰ ফালে প্ৰৱৰ্তন কৰা এখন লঘু কৌশলগত পৰিবহণ বিমান।ইয়াক সামৰিক আৰু অসামৰিক দুয়োটা কামতে ব্যাপকভাৱে ব্যৱহাৰ কৰা হয়।

লগতে পঢ়ক: বিত্তীয় বৰ্ষৰ প্ৰথম দিনটোতেই মাধমাৰ; বৃদ্ধি পালে বাণিজ্যিক চিলিণ্ডাৰৰ দাম