বিজেপিৰ ৪৬ সংখ্যক প্ৰতিষ্ঠা দিৱসত মুখ্যমন্ত্ৰী হিমন্ত বিশ্ব শৰ্মাই দলৰ শক্তিৰ ওপৰত গুৰুত্ব আৰোপ কৰে । তেওঁ কয় যে বিজেপিক দুৰ্বল কৰা মানে ভাৰতৰ বিশ্বব্যাপী নেতাৰ পদ অৰ্জনৰ পথত বাধাৰ সৃষ্টি কৰা । সূৰ্য-চন্দ্ৰ থকালৈকে বিজেপি দলে দেশৰ সেৱা কৰিব । যদি বিজেপি নাথাকিলহেঁতেন তেন্তে ৱাকফ বিলৰ দৰে ঐতিহাসিক আইন গৃহীত নহ’লহেঁতেন । যদি বিজেপি নাথাকিলহেঁতেন তেন্তে ৩৭০ অনুচ্ছেদ বিলুপ্ত নহ’লহেঁতেন বা সংখ্যালঘু মহিলাসকলে তিনি তালাকৰ পৰা ন্যায় নাপালেহেঁতেন ।

প্ৰতিষ্ঠা দিৱসৰ অনুষ্ঠানত মুখ্যমন্ত্ৰী শৰ্মাই কয় যে বিজেপিক দুৰ্বল কৰাৰ অৰ্থ কোনো ব্যক্তিক দুৰ্বল কৰা নহয় । ইয়াৰ উদ্দেশ্য হৈছে ৰাষ্ট্ৰীয় গৌৰৱক দুৰ্বল কৰা । বিজেপিক দুৰ্বল কৰা মানে ভাৰতবৰ্ষক বিশ্ব মঞ্চলৈ লৈ যোৱাৰ পথত বাধাৰ সৃষ্টি কৰা । শৰ্মাই প্ৰতিজন দলীয় কৰ্মীক ভাৰতক বিশ্বব্যাপী নেতা হিচাপে গঢ়ি তোলাৰ বাবে কাম কৰাৰ প্ৰতিশ্ৰুতি দিয়ে ।

তেওঁ কয় যে আগন্তুক সময়ত প্ৰগতি আৰু শক্তিৰ দিশত আগবাঢ়ি যোৱা দলটোক বহু শ্ৰেণীয়ে দুৰ্বল আৰু বদনাম কৰাৰ চেষ্টা কৰিব । চচিয়েল মিডিয়াৰ সহায়ত বিজেপিক বদনাম আৰু দুৰ্বল কৰিব পাৰে । গতিকে আমি ছ’চিয়েল মিডিয়াতো শক্তিশালী হ’ব লাগে যাতে আমি ৰাইজৰ মাজত ইতিবাচক কথা বিয়পাব পাৰো । শৰ্মাই কয় যে ৰাম মন্দিৰ নিৰ্মাণ কেৱল এটা সাধাৰণ মন্দিৰ নিৰ্মাণ প্ৰক্ৰিয়া নহয় বৰঞ্চ ৫০০ বছৰীয়া দাসত্বৰ পৰা নিজকে মুক্ত কৰাৰ নিদৰ্শন । ব্যক্তিগত আকাংক্ষাৰ আগত ৰাষ্ট্ৰ আহে আৰু ৰাষ্ট্ৰৰ স্বাৰ্থৰ আগত একো নাহে বুলি মন্তব্য কৰে মুখ্যমন্ত্ৰী ড০ শৰ্মাই ।

তেওঁ কয় যে যদি বিজেপি নাথাকিলহেঁতেন তেন্তে ৱাকফ বিলৰ দৰে ঐতিহাসিক আইন গৃহীত নহ’লহেঁতেন । যদি বিজেপি নাথাকিলহেঁতেন তেন্তে ৩৭০ অনুচ্ছেদ বিলুপ্ত নহ’লহেঁতেন বা সংখ্যালঘু মহিলাসকলে তিনি তালাকৰ পৰা ন্যায় নাপালেহেঁতেন । বিজেপি অবিহনে উত্তৰ-পূৰ্বাঞ্চলৰ উন্নয়ন হ’ব নোৱাৰে । অসমৰ জীৱনৰ প্ৰতিটো ক্ষেত্ৰতে বিজেপিয়ে ইতিবাচক প্ৰভাৱ পেলাবলৈ সক্ষম হৈছে । সেইবাবেই প্ৰতিখন স্বায়ত্তশাসিত পৰিষদ, পৌৰসভা আৰু পঞ্চায়তত বিজেপিৰ ক্ষমতা আছে । মুখ্যমন্ত্ৰী শৰ্মাই কয় যে বিজেপিয়ে সমাজৰ গৌৰৱ উন্নীত কৰি অসমীয়া সমাজখনক শক্তিশালী কৰাৰ বাবে কাম কৰি আছে ।

ইয়াৰ পূৰ্বে অসম বিজেপিৰ মুৰব্বী দিলীপ শইকীয়াৰ সৈতে মুখ্যমন্ত্ৰী হিমন্ত বিশ্ব শৰ্মাই ৰাজ্যিক মুখ্য কাৰ্যালয়ত জ্যেষ্ঠ নেতা আৰু সাধাৰণ সদস্যৰ উপস্থিতিত দলৰ পতাকা উত্তোলন কৰে । শৰ্মাই কয় যে ৰাষ্ট্ৰীয়তাবাদৰ বাবে নিজৰ জীৱন উৎসৰ্গা কৰা সেইসকল কৰ্মীলৈ মোৰ শ্ৰদ্ধাঞ্জলি । প্ৰধানমন্ত্ৰী নৰেন্দ্ৰ মোদীৰ নেতৃত্বত বিজেপি ভাৰতৰ প্ৰতিটো শ্ৰেণীৰ আকাংক্ষা পূৰণৰ লগতে ভাৰতৰ গৌৰৱ পুনৰ প্ৰতিষ্ঠা কৰাৰ মাধ্যমত পৰিণত হৈছে ।

বিজেপিৰ প্ৰতিষ্ঠা দিৱস উপলক্ষে দেওবাৰে প্ৰধানমন্ত্ৰী নৰেন্দ্ৰ মোদীয়ে কয় যে ৰাইজে দলটোৰ সুশাসন এজেণ্ডালৈ দেখিছে, যিটো বিগত কেইবছৰমানৰ পৰা লাভ কৰা ঐতিহাসিক জনাদেশত প্ৰতিফলিত হৈছে । ছ’চিয়েল মিডিয়া প্লেটফৰ্ম এক্সত শ্বেয়াৰ কৰা ধাৰাবাহিক পোষ্টত প্ৰধানমন্ত্ৰী মোদীয়ে কয়, ‘দলটোৰ প্ৰতিষ্ঠা দিৱসত সকলো বিজেপি কৰ্মীলৈ অভিনন্দন । যোৱা কেইবাটাও দশকত আমাৰ দলটোক শক্তিশালী কৰাৰ বাবে নিজকে উৎসৰ্গা কৰা সকলোকে আমি মনত পেলাইছো ।‘

‘আমাৰ চৰকাৰে সমাজৰ সৰ্বাংগীন উন্নয়ন সুনিশ্চিত কৰিব’

প্ৰধানমন্ত্ৰীয়ে কয় যে এই গুৰুত্বপূৰ্ণ দিনটোৱে ভাৰতৰ প্ৰগতিৰ বাবে কাম কৰাৰ লগতে উন্নত ভাৰতৰ সপোন বাস্তৱায়িত কৰাৰ প্ৰতিশ্ৰুতি পুনৰবাৰ প্ৰকাশ কৰিবলৈ বাধ্য কৰে । প্ৰধানমন্ত্ৰীয়ে কয়, ‘ভাৰতবাসীয়ে আমাৰ দলৰ সুশাসনৰ এজেণ্ডা দেখিছে, যিটো আমি বিগত কেইবছৰমানৰ পৰা লাভ কৰা ঐতিহাসিক জনাদেশতো প্ৰতিফলিত হৈছে, সেয়া লোকসভা নিৰ্বাচনেই হওক, বিভিন্ন ৰাজ্যৰ বিধানসভা নিৰ্বাচনেই হওক বা সমগ্ৰ দেশৰ বিভিন্ন স্থানীয় সংস্থাৰ নিৰ্বাচনেই হওক ।’

তেওঁ কয়, ‘আমাৰ চৰকাৰে সমাজৰ সেৱা আগবঢ়াই যাব আৰু সৰ্বাংগীন উন্নয়ন সুনিশ্চিত কৰিব । আমাৰ দলৰ মূল আমাৰ সকলো কঠোৰ পৰিশ্ৰমী কৰ্মীলৈ মোৰ শুভেচ্ছা থাকিল, কিয়নো তেওঁলোকে তৃণমূল পৰ্যায়ত সক্ৰিয়ভাৱে কাম কৰি আছে আৰু আমাৰ সুশাসনৰ এজেণ্ডা আগবঢ়াই লৈ গৈছে ।’

দলীয় কৰ্মীসকলক প্ৰশংসা কৰিলে প্ৰধানমন্ত্ৰীয়ে-

প্ৰধানমন্ত্ৰী মোদীয়ে কয় যে বিজেপি কৰ্মীসকলে দেশৰ প্ৰতিটো প্ৰান্তত ২৪ ঘণ্টাই কাম কৰি দৰিদ্ৰ, বঞ্চিত আৰু প্ৰান্তীয় লোকক সেৱা আগবঢ়াইছে বুলি গৌৰৱ অনুভৱ কৰে । তেওঁলোকৰ শক্তি আৰু উৎসাহ সঁচাকৈয়ে প্ৰেৰণাদায়ক বুলিও তেওঁ কয় । উল্লেখযোগ্য যে ১৯৮০ চনত তেতিয়াৰ ভাৰতীয় জনসংঘৰ নেতাসকলে বিজেপি প্ৰতিষ্ঠা কৰিছিল ।

১৯৮৪ চনত বিজেপিয়ে প্ৰতিদ্বন্দ্বিতা কৰা প্ৰথমটো সাধাৰণ নিৰ্বাচনত মাত্ৰ দুখন লোকসভাৰ আসনহে লাভ কৰিছিল । কিন্তু পৰৱৰ্তী সময়ত অটল বিহাৰী বাজপেয়ী আৰু এল কে আদৱানীৰ নেতৃত্বত দ্ৰুতগতিত আগবাঢ়িছিল আৰু ৯০ দশকত মিত্ৰজোঁটৰ চৰকাৰ গঠন কৰিছিল । ২০১৪ চনত প্ৰধানমন্ত্ৰী মোদীৰ নেতৃত্বত বিজেপিয়ে বিপুল সংখ্যাগৰিষ্ঠতা লাভ কৰিছিল, তেতিয়াৰ পৰা এই দলটোৱেই ক্ষমতাৰ কেন্দ্ৰবিন্দু ।