বৰমাৰ তুলসী ৰাভালৈ ডক্টৰেট উপাধি প্ৰদান
বৰমা উচ্চতৰ মাধ্যমিক বিদ্যালয়ৰ বিষয় শিক্ষক তুলসী ৰাভালৈ ডক্টৰেট উপাধি প্ৰদান । দিল্লীৰ মেজিক এণ্ড আৰ্ট বিশ্ববিদ্যালয়ৰ পৰা শিক্ষকগৰাকীয়ে লাভ কৰে ডক্টৰেট উপাধি ।
বাক্সা জিলাৰ বৰমাৰ বৰমা উচ্চতৰ মাধ্যমিক বিদ্যালয়ৰ বিষয় শিক্ষক তুলসী ৰাভালৈ ডক্টৰেট উপাধি প্ৰদান । দিল্লীৰ মেজিক এণ্ড আৰ্ট বিশ্ববিদ্যালয়ৰ পৰা শিক্ষকগৰাকীয়ে লাভ কৰে ডক্টৰেট উপাধি । যোৱা ১৩ ডিচেম্বৰত তেওঁক বিশ্ববিদ্যালয়খনে ডক্টৰেট উপাধি প্ৰদান কৰে ।
ড০ তুলসী ৰাভাক শিক্ষা আৰু সামাজিক কাম-কাজৰ বাবে এই সন্মানীয় ডক্টৰেট উপাধি প্ৰদান কৰা হৈছে । তেওঁক যোৱা ১৩ ডিচেম্বৰত দিল্লী এন চি আৰৰ ফৰিদাবাদস্থিত দ্য কাষ্টেল অৱ আৰ্ট থিয়েটাৰৰ প্ৰেক্ষাগৃহত এক বিশেষ অনুষ্ঠানত এই সন্মান প্ৰদান কৰা হয় । তেওঁ নিখিল ৰাভা ছাত্ৰ সন্থা তথা আৰছুৰ ১৯৯৬ চনৰ পৰা ২০০১ চনলৈ দুটা কাৰ্যকালৰ বাবে সভাপতি হিচাপে কাৰ্যনিৰ্বাহ কৰিছিল । সদৌ অসম জনজাতি ছাত্ৰ সন্থা তথা আটছুৰ যুটীয়া সম্পাদক হিচাপেও ১৯৮৫ চনৰ পৰা ১৯৮৮ চনলৈ কাযনিৰ্বাহ কৰিছিল ৰাভাই ।
লগতে তেওঁ ইণ্ডিজেনাছ ট্ৰাইবেল ফেডাৰেচনৰ ২০০৮ চনৰ পৰা ২০১০ চনলৈ সভাপতি, ইউ ডি পি এফ দলত ২০১০ চনৰ পৰা ২০১২লৈ সাধাৰণ সম্পাদকৰ দায়িত্ব লৈছিল । ১৯৯৫ চনত ৰাভা চুক্তিৰ জৰিয়তে ৰাভা হাছং স্বায়ত্ত পৰিষদ লাভ কৰাৰ অন্যতম ভূমিকা গ্ৰহণ কৰিছিল তুলসী ৰাভাই । তাৰোপৰি ১৯৮৯ চনত ৰাভা ভাষা স্বীকৃতি লাভ কৰা আন্দোলনৰো আগশাৰীত থাকি নেতৃত্ব বহন কৰিছিল ।
তেওঁ ১৯৯৫ ইং চনৰ পৰা বাক্সা জিলাৰ বৰমাস্থিত বৰমা উচ্চতৰ মাধ্যমিক বিদ্যালয়ত ৰাজনীতি বিজ্ঞান বিভাগৰ বিষয় শিক্ষক হিচাপে কাম কৰি আছে । উল্লেখ্য যে বৰমা উচ্চতৰ মাধ্যমিক বিদ্যালয়ত ভাৰপ্ৰাপ্ত অধ্যক্ষ হিচাপে ২০২৪ চনৰ আগষ্ট ৩০ পৰা ২৮/০৭/২০২৫ ৰ ২৮ জুলাইলৈ দায়িত্ব লৈছিল । তেওঁ বাক্সা জিলাৰ বৰমাৰ ওচৰৰ আলাগজাৰ গাৱঁৰ চাৰানপাৰা চুপাৰ হৰোৰাম ৰাভা আৰু বদলী ৰাভাৰ পুত্ৰ । ৰাভাই ২০২৩ চনত “কথা চিন্তাৰ তৰংগ” নামৰ এখন গ্ৰন্থও প্ৰকাশ কৰিছে । তেওঁক ২০১৫ চনত বাক্সা জিলা প্ৰশাসন আৰু বিদ্যালয়সমূহৰ পৰিদৰ্শকে “কৃতি শিক্ষক” বটা প্ৰদান কৰিছিল ।
লগতে পঢ়ক : ২০ সংখ্যক প্ৰতিষ্ঠা দিৱস উদযাপন কৃষ্ণকান্ত সন্দিকৈ ৰাজ্যিক মুক্ত বিশ্ববিদ্যালয়ৰ…
