গৰিমা শইকীয়া গাৰ্গৰ ফেচবুক পোষ্ট
১৫ অক্টোবৰ, বুধবাৰে বাক্সাৰ নিকাছীত সংঘটিত হয় এক অপ্ৰীতিকৰ পৰিস্থিতিৰ । শ্যামকানু মহন্ত, সিদ্ধাৰ্থ শৰ্মাসহ জুবিন গাৰ্গৰ মৃত্যুৰ ঘটনাৰ পাঁচ অভিযুক্তক বাক্সাৰ কাৰাগাৰলৈ নিয়াৰ সময়তে সৃষ্টি হয় উত্তেজনাময় পৰিস্থিতিৰ । এই পাঁচ অভিযুক্তক কাৰাগাৰলৈ নিয়াৰ সময়ত জুবিন গাৰ্গৰ মৃত্যুৰ ন্যায় বিচাৰি একাংশ লোকে সৃষ্টি কৰে উত্তপ্ত পৰিস্থিতিৰ । উত্তেজিত লোকে আৰক্ষীৰ লোকলৈ শিগুটি নিক্ষেপ কৰাৰ লগতে কেইবাখনো গধুৰ আৰু পাতলীয়া বাহনত অগ্নিসংযোগো কৰে । ঘটনাত কেইবাজনো আৰক্ষীৰ লোক আহত হোৱাৰ লগতে আহত হয় কেইবাগৰাকী সাংবাদিক আৰু প্ৰতিবাদকাৰী । এই ঘটনাক লৈ ৰাজ্যজুৰি তীব্ৰ প্ৰতিক্ৰিয়াৰ সৃষ্টি হয় ।
এই ঘটনাৰ পিছতে ফেচবুকযোগে বিশেষ পোষ্ট কৰে জুবিন গাৰ্গৰ পত্নী গৰিমা শইকীয়া গাৰ্গে । সামাজিক মাধ্যমত এই ঘটনাৰ প্ৰতিক্ৰিয়া প্ৰকাশ কৰি গৰিমা শইকীয়া গাৰ্গে কয়-“মই কেৱল মোৰ স্বামীক হেৰুওৱা নাই ..
প্ৰতিঘৰ অসমীয়াই নিজৰ এজন পুত্ৰ/ভাতৃ/বন্ধু/অভিভাৱক হেৰুৱাইছে । বিশ্বজুৰি তেওঁক ভালপোৱা বহুজনে আপোন এজনক হেৰুৱাইছে । সকলোৰে মন-মগজু,বিবেক,,, দুখ, কষ্ট আৰু বহু প্ৰশ্নৰে ভাৰাক্ৰান্ত হৈ আছে। এনে সময়ত সকলোৱে সকলোৰে মনঃস্তত্ব ভালদৰে বুজিবলৈ চেষ্টা কৰাটো আটাইতকৈ জৰুৰী কথা । কৃত্ৰিমতা আৰু মেৰপেচবোৰ এৰি সৰল , পোনপটীয়া কথাৰে সময়ক সহযোগ কৰাটো অত্যন্ত জৰুৰী । শান্তিৰ আৰু সম্প্ৰীতিৰ বাতাবৰণ অব্যাহত থাকক ,, আৰু কোনো হানি- বিঘিনিৰ খবৰ নালাগে প্ৰভু ।“
লগতে পঢ়ক : ‘বাক্সা জিলাত হোৱা ঘটনা অতি দুখজনক’; মুখ্যমন্ত্ৰী
