অসম কৃষি বিশ্ববিদ্যালয় আৰু ৰাজ্যিক কৃষি বিভাগৰ যৌথ উদ্যোগত আয়োজিত এই কৃষি খণ্ডৰ অন্তৰ্নিহিত বৈঠকত মন্ত্ৰী পীযুষ হাজৰীকাই অসমৰ কৃষি খণ্ডৰ আধুনিকীকৰণৰ ওপৰত বিশেষ গুৰুত্ব আৰোপ কৰে

“কৃষি খণ্ডৰ উপাৰ্জন উল্লেখনীয়ভাৱে বৃদ্ধি নকৰাকৈ অসমে কেতিয়াও ক্ষিপ্ৰ প্ৰগতি আৰু সামগ্ৰিক উন্নয়ন লাভ কৰিব নোৱাৰে ।”- ২৫ জুনত খানাপাৰাস্থিত অসম প্ৰশাসনিক পদাধিকাৰী মহাবিদ্যালয়ত অনুষ্ঠিত এক গুৰুত্বপূৰ্ণ বৈঠকত অংশগ্ৰহণ কৰি ৰাজ্যৰ কৃষি মন্ত্ৰী পীযুষ হাজৰীকাই এইদৰে মন্তব্য কৰে ।

অসম কৃষি বিশ্ববিদ্যালয় আৰু ৰাজ্যিক কৃষি বিভাগৰ যৌথ উদ্যোগত আয়োজিত এই ‘কৃষি খণ্ডৰ অন্তৰ্নিহিত বৈঠক’ত মন্ত্ৰীগৰাকীয়ে অসমৰ কৃষি খণ্ডৰ আধুনিকীকৰণৰ ওপৰত বিশেষ গুৰুত্ব আৰোপ কৰে ।

৭০% লোক জড়িত, তথাপিও আমদানিৰ ওপৰত নিৰ্ভৰশীল অসম

ভাষণ প্ৰসংগত মন্ত্ৰী পীযুষ হাজৰীকাই এক উদ্বেগজনক পৰিসংখ্যা দাঙি ধৰে । তেওঁ কয় যে অসমৰ ৭০ শতাংশতকৈও অধিক লোক প্ৰত্যক্ষ বা পৰোক্ষভাৱে কৃষি কাৰ্যৰ সৈতে জড়িত । কিন্তু ইমান বৃহৎ সংখ্যক লোক কৃষিত নিয়োজিত থকাৰ পিছতো অসমে আজিও খাদ্য শস্য আৰু অন্যান্য অত্যাৱশ্যকীয় খাদ্য সামগ্ৰীৰ বাবে বুজন পৰিমাণে বহিঃৰাজ্যৰ আমদানিৰ ওপৰত নিৰ্ভৰ কৰিবলগীয়া হৈছে । এই নিৰ্ভৰশীলতা হ্ৰাস কৰিবলৈ চৰকাৰী বিভাগ, বিজ্ঞানী আৰু গৱেষকসকলক একগোট হৈ কাম কৰিবলৈ তেওঁ আহ্বান জনায় ।

জলসিঞ্চনৰ অভাৱ: পঞ্জাৱ-মধ্যপ্ৰদেশৰ তুলনাত পিছপৰা অসম

ৰাজ্যৰ কৃষিভূমিৰ জলসিঞ্চনৰ দুৰ্বল অৱস্থাৰ কথা উল্লেখ কৰি মন্ত্ৰীগৰাকীয়ে কয় যে বৰ্তমান অসমৰ মাত্ৰ ২৪ শতাংশ কৃষিভূমিতহে জলসিঞ্চনৰ সুবিধা উপলব্ধ আছে । ইয়াৰ বিপৰীতে পঞ্জাৱত প্ৰায় ১০০% কৃষিভূমিত জলসিঞ্চনৰ ব্যৱস্থা আছে । মধ্যপ্ৰদেশত ৭৫% কৃষিভূমি জলসিঞ্চনৰ আওতাত আছে ।

মন্ত্ৰীগৰাকীৰ মতে, এই প্ৰত্যাহ্বানৰ মোকাবিলা কৰিবলৈ হ’লে ব্যাপক অংশগ্ৰহণ, কৌশলগত পৰিকল্পনা আৰু বৈজ্ঞানিক গৱেষণাৰ প্ৰসাৰ ঘটোৱাটো অত্যন্ত জৰুৰী ।

তেওঁ কয়- “উৎপাদন বৃদ্ধি কৰা আৰু কৃষকসকলৰ বাবে উন্নত লাভালাভ নিশ্চিত কৰাটো বিশ্ববিদ্যালয়, গৱেষণা প্ৰতিষ্ঠান আৰু চৰকাৰী বিভাগসমূহকে ধৰি সকলো অংশীদাৰৰ বাবে প্ৰথম অগ্ৰাধিকাৰ হ’ব লাগিব । শক্তিশালী গৱেষণাৰ সমৰ্থন অবিহনে বহনক্ষম কৃষিৰ বিকাশ অসম্ভৱ ।”

লগতে পঢ়ক : ‘ৰাহুল গান্ধীয়ে হাতত লৈ থকা সংবিধানখনত ইন্দিৰা গান্ধীৰ কাৰ্যকলাপৰ কথা আছে’; মুখ্যমন্ত্ৰী

মন্ত্ৰী পীযুষ হাজৰীকাই দেওবাৰে জিলা কৃষি বিষয়াসকলৰ সৈতে এক গুৰুত্বপূৰ্ণ পৰ্যালোচনা বৈঠকত মিলিত হয়

অসমৰ কৃষি, জলসিঞ্চন মন্ত্ৰী পীযুষ হাজৰীকাই দেওবাৰে জিলা কৃষি বিষয়াসকলৰ সৈতে এক গুৰুত্বপূৰ্ণ পৰ্যালোচনা বৈঠকত মিলিত হয় । গুৱাহাটীৰ খনাপাৰাস্থিত অসম প্ৰশাসনিক পদাধিকাৰী মহাবিদ্যালয়ত অনুষ্ঠিত এই বৈঠকত মন্ত্ৰীগৰাকীয়ে ৰাজ্যখনত চলি থকা বিভিন্ন কৃষিভিত্তিক আঁচনিৰ ৰূপায়ণৰ খতিয়ান লয় ।

কৃষক পঞ্জীয়নত সৰ্বোচ্চ অগ্ৰাধিকাৰ, চলিব বিশেষ অভিযান

মন্ত্ৰী হাজৰীকাৰ কাৰ্যালয়ৰ পৰা প্ৰকাশিত এক চৰকাৰী বিবৃতি অনুসৰি, বৈঠকত কৃষক পঞ্জীয়ন প্ৰক্ৰিয়াক সৰ্বোচ্চ অগ্ৰাধিকাৰ দিবলৈ সকলো ক্ষেত্ৰভিত্তিক কাৰ্যালয়কে নিৰ্দেশ দিয়া হৈছে । মন্ত্ৰীগৰাকীয়ে উল্লেখ কৰে যে অসমৰ প্ৰায় ৫০ লাখ পৰিয়াল জীৱিকাৰ বাবে কৃষিৰ ওপৰত নিৰ্ভৰশীল যদিও বৰ্তমান মাত্ৰ ২৪ লাখমান কৃষকেহে চৰকাৰীভাৱে পঞ্জীয়ন কৰিছে । এই বৃহৎ ব্যৱধান দূৰ কৰিবলৈ অহা ছমাহত অতিৰিক্ত ৫ ৰ পৰা ৭ লাখ কৃষকক পঞ্জীয়ন কৰাৰ লক্ষ্যৰে বিভাগক এক বিশেষ অভিযান চলাবলৈ তেওঁ নিৰ্দেশ দিয়ে, যাতে অধিক যোগ্য হিতাধিকাৰীয়ে চৰকাৰী সুবিধা লাভ কৰিব পাৰে ।

পি এম-কিষাণ আঁচনিৰ সম্প্ৰসাৰণ আৰু আই ডি সৃষ্টি

অধিকসংখ্যক কৃষকক ‘প্ৰধানমন্ত্ৰী কিষাণ সন্মান নিধি’ আঁচনিৰ আওতালৈ অনাৰ ওপৰত মন্ত্ৰীগৰাকীয়ে গুৰুত্ব আৰোপ কৰে । ইয়াৰ বাবে যোগ্য হিতাধিকাৰীসকলৰ আইডি সৃষ্টিৰ প্ৰক্ৰিয়া অধিক খৰতকীয়া কৰিবলৈ তেওঁ বিষয়াসকলক নিৰ্দেশ দিয়ে ।

কৰ্মসংস্কৃতি আৰু জবাবদিহিতাত কঠোৰ স্থিতি

কৃষি আৰু জলসিঞ্চন বিভাগক কৃষকৰ কল্যাণৰ সৈতে পোনপটীয়াকৈ জড়িত বিভাগ বুলি অভিহিত কৰি মন্ত্ৰী হাজৰীকাই কয় যে সকলো বিষয়াই ক্ষেত্ৰ পৰ্যায়ত সক্ৰিয়ভাৱে কাম কৰিব লাগিব । কৰ্মসংস্কৃতি, জবাবদিহিতা আৰু সেৱা প্ৰদানৰ ক্ষেত্ৰত চৰকাৰে কোনো ধৰণৰ আপোচ নকৰে বুলি তেওঁ স্পষ্ট কৰি দিয়ে । লগতে, কোনো বিষয়াই পূৰ্বৰ জাননী আৰু কৰ্তৃপক্ষৰ অনুমোদন অবিহনে নিজৰ কৰ্তব্যৰত স্থান এৰি যাব নোৱাৰিব বুলিও কঠোৰ নিৰ্দেশ জাৰি কৰা হৈছে ।

নিম্নমানৰ বীজ যোগানকাৰী আৰু সাৰৰ ক’লা বজাৰৰ বিৰুদ্ধে হুংকাৰ

খেতিৰ বতৰ আৰম্ভ হোৱাৰ অন্ততঃ এটা মাহ পূৰ্বেই যাতে কৃষকসকলে উন্নত মানদণ্ডৰ বীজ লাভ কৰিব পাৰে, তাৰ বাবে ব্যৱস্থা গ্ৰহণ কৰিবলৈ তেওঁ নিৰ্দেশ দিয়ে । শেহতীয়াকৈ ডিমৰীয়া ভ্ৰমণৰ সময়ত কৃষকসকলে উত্থাপন কৰা সমস্যাৰ কথা উল্লেখ কৰি মন্ত্ৰীগৰাকীয়ে সকীয়াই দিয়ে যে নিম্নমানৰ বাবে পলমকৈ বীজ যোগান ধৰা সংস্থাসমূহৰ বিৰুদ্ধে ফৌজদাৰী কাৰ্যবিধি, ক’লা তালিকাভুক্ত কৰা আৰু অনুজ্ঞাপত্ৰ বাতিলৰ দৰে কঠোৰ আইনী ব্যৱস্থা লোৱা হ’ব । একেদৰে, সাৰৰ ক’লা বজাৰৰ সৈতে জড়িত লোকৰো অনুজ্ঞাপত্ৰ বাতিল কৰা হ’ব । সকলো জিলাতে যাতে সাৰৰ সমবিতৰণ আৰু পৰ্যাপ্ত উপলব্ধতা থাকে, তাক নিশ্চিত কৰিবলৈও তেওঁ কয় ।

লগতে পঢ়ক : গুৱাহাটীৰ আন্তঃগাঁথনি আৰু উন্নয়নমূলক প্ৰকল্পৰ পৰ্যালোচনা মুখ্যমন্ত্ৰী ড০ হিমন্ত বিশ্ব শৰ্মাৰ