পাকিস্তানত প্ৰকৃতিৰ বিভীষিকা

পাকিস্তানত এতিয়া প্ৰকৃতিৰ বিভীষিকা । পাকিস্তানৰ খাইবাৰ পাখতুনখোৱাত বৰষুণে বিধ্বংসী ৰূপ ধাৰণ কৰিছে । কেইবাদিনো ধৰি হোৱা প্ৰচণ্ড বৰষুণৰ ফলত হোৱা বানপানী আৰু ভূমিস্খলনে এতিয়ালৈকে অঞ্চলটোত ৩০০ৰো অধিক লোকৰ প্ৰাণ কাঢ়ি নিছে ।

প্ৰাদেশিক দুৰ্যোগ ব্যৱস্থাপনা কৰ্তৃপক্ষই প্ৰকাশ কৰা প্ৰতিবেদনত কোৱা হৈছে যে এই বানত ৩০৭ জন লোকৰ মৃত্যু হৈছে, ইয়াৰে বুনাৰত কমেও ১৮৪ জন লোকৰ মৃত্যু হৈছে । শ্বাংলাত ৩৬ জন লোকৰ মৃত্যু হোৱাৰ বিপৰীতে মানছেহৰাত ২৩ জন, শ্বাটত ২২ জন, বাজাউৰত ২১ জন, বট্টাগ্ৰামত ১৫ জন, ল’ৱাৰ ডিৰত ৫ জন লোকৰ মৃত্যু হোৱাৰ বিপৰীতে এবটাবাদত এটি শিশুৰ পানীত পৰি মৃত্যু হয় ।

শুকুৰবাৰে হোৱা ভয়াৱহ বানপানীয়ে পথ, দলং, অট্টালিকা, বিদ্যুৎ সংযোগকে ধৰি আন্তঃগাঁথনিৰ ভয়াৱহ ক্ষতিসাধন কৰিছে । ডনে প্ৰকাশ কৰা অনুসৰি বানপানীৰ সময়ত নিৰুদ্দেশ হোৱা লোকৰ সংখ্যা পানী হ্ৰাস পোৱাৰ পিছতহে জানিব পৰা যাব বুলি বিষয়াসকলে কয় ।

পি ডি এম এই ক্ষয়-ক্ষতিৰ মূল্যায়ন অব্যাহত ৰাখি কয় যে ৭টা ঘৰ ধ্বংস হোৱাৰ লগতে ৩৮টা ঘৰ ক্ষতিগ্ৰস্ত হৈছে, বেছিভাগেই শ্বাট জিলাত । পি ডি এম এই আৰু কয় যে তিনিখন বিদ্যালয় ধ্বংস হোৱাৰ লগতে আন তিনিখন বিদ্যালয়ৰ ক্ষতিসাধন হৈছে । ডনে প্ৰকাশ কৰা অনুসৰি ২১ আগষ্টলৈকে প্ৰদেশখনৰ বিভিন্ন ঠাইত বৰষুণ অব্যাহত থাকিব বুলি কৰ্তৃপক্ষই সকীয়াই দিছে ।

ইফালে বানপানী অহাৰ পিছত বুনেৰ জিলাৰ উদ্ধাৰকাৰী দলে ৩০০ স্কুলীয়া ছাত্ৰ-ছাত্ৰীকে ধৰি আৱদ্ধ হৈ থকা ২০৭১ জন লোকক সুৰক্ষিত স্থানলৈ উদ্ধাৰ কৰে । লগতে দুৰ্যোগপীড়িত অঞ্চলসমূহত উদ্ধাৰ অভিযান চলি থকাৰ বাবে সমগ্ৰ জিলাখনত জৰুৰীকালীন অৱস্থা ঘোষণা কৰা হৈছে । আনহাতে এবটাবাদ চহৰখন বানত বেয়াকৈ প্ৰভাৱিত হৈছে, প্ৰায় সকলো মূল পথ ডুব গৈছে ।

লগতে পঢ়ক : সমাধান নোলাল ইউক্ৰেইন যুদ্ধৰ… তিনি ঘন্টা ধৰি চলিল ট্ৰাম্প-পুটিনৰ ৰুদ্ধদ্বাৰ বৈঠকৰ

বিফল পাকিস্তানৰ মিছাইল পৰীক্ষণ

শেহতীয়াকৈ পাকিস্তানী সেনাই শ্বাহীন-৩ মিছাইল পৰীক্ষণ কৰে । কিন্তু পৰীক্ষণ দুৰ্ভাগ্যজনকভাৱে বিফল হয় । এই ক্ষেপণাস্ত্ৰ পাৰমাণৱিক অস্ত্ৰ কঢ়িয়াব পৰাকৈ সক্ষম । বেলুচিস্তানৰ ডেৰা গাজী খান অঞ্চলৰ পৰা নিক্ষেপ কৰা এই ক্ষেপণাস্ত্ৰ অসামৰিক এলেকাৰ সমীপত পৰে । মঙলবাৰে এই তথ্য প্ৰদান কৰে বেলুচ নেতা মিৰ য়াৰ বালোচে ।

বেলুচ বিদ্ৰোহীয়ে বেলুচিস্তানক পাকিস্তানৰ অংশ বুলি গণ্য নকৰে আৰু পাকিস্তানে এই অঞ্চল দখল কৰাৰ বিৰোধিতা কৰে । বেলুচ নেতা মিৰ য়াৰ বালোচে এক্সত এটা পোষ্টত লিখিছে, “বেলুচ গণৰাজ্যই পাকিস্তানৰ বাৰে বাৰে ব্যৰ্থ ক্ষেপণাস্ত্ৰ পৰীক্ষাক তীব্ৰ গৰিহণা দিয়ে । পাকিস্তানে বেলুচিস্তানৰ ভূখণ্ডৰ অখণ্ডতা অহৰহ উলংঘা কৰি সাধাৰণ নাগৰিকৰ জীৱন বিপন্ন কৰি আহিছে ।”

তেওঁ কয়, ২২ জুলাইত পাকিস্তানৰ দখলদাৰী সেনাই ৰিপাব্লিক অৱ বেলুচিস্তানত ব্যৰ্থ মিছাইল পৰীক্ষণ চলাইছিল । স্থানীয় লোকে জনোৱা মতে, বেলুচিস্তানৰ ডেৰা গাজী খান অঞ্চলৰ পৰা এই ক্ষেপণাস্ত্ৰ নিক্ষেপ কৰা হৈছিল, যিটো ক্ষেপণাস্ত্ৰ অসামৰিক অঞ্চলৰ সমীপত লুপ ছাহৰানী লেভি ষ্টেচনৰ পৰা মাত্ৰ ৫০০ মিটাৰ উত্তৰত ভূপতিত হয় । যদিহে ক্ষেপণাস্ত্ৰটো সামান্যভাৱেও বিচ্যুত হ’লহেঁতেন তেন্তে ইয়াৰ ফলত যথেষ্ট লোকৰ মৃত্যু হোৱাৰ লগতে সা-সম্পত্তিৰ বিপুল ক্ষতি হোৱাৰ সম্ভাৱনা আছিল ।

তেওঁ কয়, এয়া একমাত্ৰ ঘটনা নহয় । পাকিস্তানী সেনাই দীৰ্ঘদিন ধৰি ক্ষেপণাস্ত্ৰ পৰীক্ষণক অজুহাত হিচাপে লৈ ডেৰা বুগটি, কাহান আৰু ইয়াৰ আশে-পাশে থকা কৌশলগত অঞ্চলৰ পৰা বেলুচ লোকসকলক বলপূৰ্বকভাৱে আঁতৰাই আহিছে । স্থানীয় লোকে ভয়-ভাবুকিৰ ঘটনাৰ খবৰ দিছে, যিয়ে এক অতি চিন্তনীয় দিশ আঙুলিয়াই দিয়ে । বলপূৰ্বক স্থানচ্যুতিৰ নীতি চৰকাৰী পৰ্যায়ত চলি আছে, যাতে সম্পদৰ শোষণৰ মুকলি হয় ।

লগতে পঢ়ক : হামাছৰ কামাণ্ডাৰ বশৰ থাবেটক হত্যা ইজৰাইলৰ; ৭৫টা সন্ত্ৰাসবাদীৰ স্থানত আক্ৰমণ