ছানী দেওলৰ ধমক

যোৱা কেইদিনমানৰ পৰা কঠিন সময়ৰ মাজেৰে পাৰ হৈছে দেওল পৰিয়াল । বলীউডৰ প্ৰবীণ অভিনেতা ধৰ্মেন্দ্ৰক স্বাস্থ্যজনিত সমস্যাৰ বাবে চিকিৎসালয়ত ভৰ্তি কৰা হৈছিল । ১০ নৱেম্বৰ সোমবাৰে ধৰ্মেন্দ্ৰক ব্ৰিচ কেণ্ডি হাস্পতালত ভৰ্তি কৰা হয় । তেতিয়াৰ পৰাই তেওঁৰ পৰিয়ালকে ধৰি আন বহু অভিনেতা-অভনেত্ৰী তেওঁৰ ওচৰলৈ আহিছে । ইফালে ১১ নৱেম্বৰত ধৰ্মেন্দ্ৰৰ মৃত্যুৰ ভুৱা খবৰ ভাইৰেল হৈছিল । ইয়াৰ পিছতে ঈশা দেওল আৰু হেমা মালিনীয়ে সংবাদ মাধ্যম আৰু পাপাৰাজ্জীৰ বিৰুদ্ধে তীব্ৰ ক্ষোভ উজাৰিছিল । ইয়াৰ পিছতে এতিয়া ছানী দেওলে নিজৰ মুম্বাইৰ ঘৰৰ বাহিৰত অপেক্ষাৰত ফটোগ্ৰাফাৰসকলৰ ওপৰত নিজৰ ক্ষোভ প্ৰকাশ কৰিছে ।

পাপাৰাজ্জীৰ বিৰুদ্ধে ক্ষোভ ছানী দেওলৰ-

ছ’চিয়েল মিডিয়াত ভাইৰেল হৈ পৰিছে ছানী দেওলৰ এটা ভিডিঅ’, য’ত তেওঁৰ খং উঠা দেখা গৈছে । ছানীয়ে ঘৰৰ বাহিৰত ৰৈ থকা ফটোগ্ৰাফাৰসকলক তেওঁ আৰু তেওঁৰ পৰিয়ালৰ গোপনীয়তাত অহৰহ হস্তক্ষেপ কৰাৰ বাবে তীব্ৰ সমালোচনা কৰা দেখা গৈছে । তেওঁ কোৱা শুনা গৈছে, “আপোনালোকৰ ঘৰত পিতৃ-মাতৃ আৰু সন্তান আছে । আপোনালোকে মূৰ্খৰ দৰে ভিডিঅ’ পঠিয়াইছে । লাজ নাই নেকি ?”  আনহাতে অনুৰাগী আৰু ছ’চিয়েল মিডিয়া ব্যৱহাৰকাৰীয়ে ছানীৰ ক্ষোভৰ ন্যায্যতা প্ৰদান কৰিছে ।

উল্লেখ্য যে, কিছুদিন চিকিৎসাৰ অন্তত ১২ নৱেম্বৰ বুধবাৰে পুৱা ধৰ্মেন্দ্ৰক চিকিৎসালয়ৰ পৰা মুকলি কৰি দিয়া হয় । দেওল পৰিয়ালৰ সদস্যৰ লগতে শ্বাহৰুখ খান, ছলমান খান, আমিৰ খান, গোবিন্দাৰ দৰে অভিনেতাই তেওঁক চিকিৎসালয়ত সাক্ষাৎ কৰে । ডিচচাৰ্জৰ পিছত পৰিয়ালে এক বিবৃতিযোগে নিশ্চিত কৰে যে ধৰ্মেন্দ্ৰই ঘৰতে চিকিৎসা লাভ কৰি থাকিব ।

লগতে পঢ়ক : পুত্ৰ ববীৰ সৈতে এম্বুলেন্সত উঠি ঘৰ পালেহি অভিনেতা ধৰ্মেন্দ্ৰ

হেমা মালিনীয়ে জনালে ধৰ্মেন্দ্ৰৰ স্বাস্থ্যৰ খবৰ

মুম্বাইৰ ব্ৰিচ কেণ্ডি হস্পিতালত ভৰ্তি হোৱাৰ পিছতে ৮৯ বছৰীয়া অভিনেতা ধৰ্মেন্দ্ৰৰ স্বাস্থ্যক লৈ সম্প্ৰতি অনুৰাগীসকল চিন্তিত হৈ পৰিছে । সোমবাৰে এই খবৰ বিয়পি পৰাৰ পিছৰে পৰা দেওল পৰিয়ালৰ সদস্যই প্ৰবীণ অভিনেতাগৰাকীক চিকিৎসালয়ত সাক্ষাৎ কৰিছে । ইফালে ধৰ্মেন্দ্ৰৰ স্বাস্থ্য সন্দৰ্ভত ছ’চিয়েল মিডিয়াতো বিভিন্ন উৰাবাতৰি প্ৰচাৰ হৈছে । ইয়াৰ মাজতে ধৰ্মেন্দ্ৰৰ পত্নী তথা অভিনেত্ৰী, সাংসদ হেমা মালিনীয়ে অভিনেতাগৰাকীৰ স্বাস্থ্য সন্দৰ্ভত প্ৰতিক্ৰিয়া প্ৰকাশ কৰিছে ।

ভেন্টিলেটৰত নাই ধৰ্মেন্দ্ৰ-

দেওল পৰিয়ালে জনাইছে যে ধৰ্মেন্দ্ৰ চিকিৎসালয়ত আছে, কিন্তু তেওঁৰ স্বাস্থ্যৰ উন্নতি ঘটিছে । অৱশ্যে এতিয়াও চিকিৎসকে তেওঁক ঘৰলৈ যাবলৈ পৰামৰ্শ দিয়া নাই । ৪৮ ঘণ্টা ধৰি তেওঁ পৰ্যবেক্ষণত থাকিব । তেওঁৰ অৱস্থাৰ উন্নতি হৈছে । তেওঁ এতিয়া ভেণ্টিলেটৰত নাই ।

কি ক’লে হেমা মালিনীয়ে ?

সাংসদ তথা অভিনেতা ধৰ্মেন্দ্ৰৰ পত্নী হেমা মালিনীয়ে নিজৰ ছ’চিয়েল মিডিয়া একাউণ্টত লিখিছে, “চিকিৎসালয়ত পৰ্যবেক্ষণত থকা ‘ধৰম জী’ক লৈ উদ্বেগ প্ৰকাশ কৰাৰ বাবে সকলোকে ধন্যবাদ জনাইছো । তেওঁক নিৰন্তৰ নিৰীক্ষণত ৰখা হৈছে আৰু আমি সকলোৱে তেওঁৰ লগত আছো । আপোনালোক সকলোকে অনুৰোধ জনাইছো যে তেওঁৰ মংগল আৰু সোনকালে আৰোগ্য লাভৰ বাবে প্ৰাৰ্থনা কৰক ।”

উল্লেখ্য যে, বাৰ্ধ্যকৰ সৈতে জড়িত জটিলতাৰ বাবে দ্বিতীয়বাৰৰ বাবে চিকিৎসালয়ত ভৰ্তি হৈছে কিংবদন্তি অভিনেতা ধৰ্মেন্দ্ৰ । ১০ দিন পূৰ্বেও তেওঁক চিকিৎসালয়ত ভৰ্তি কৰা হৈছিল । অনুৰাগীয়ে তেওঁৰ মংগল তথা আশু আৰোগ্যৰ বাবে প্ৰাৰ্থনা কৰিছে ।

লগতে পঢ়ক : গুৰুতৰভাৱে অসুস্থ প্ৰবীণ অভিনেতা ধৰ্মেন্দ্ৰ; চিকিৎসালয়ত ভৰ্তি