দিল্লী বিস্ফোৰণক লৈ গৃহমন্ত্ৰীৰ মন্তব্য

দিল্লী বিস্ফোৰণ সন্দৰ্ভত গৃহমন্ত্ৰী অমিত শ্বাহে এক ডাঙৰ মন্তব্য কৰিছে । ফৰিদাবাদত অনুষ্ঠিত নৰ্থান জ’নেল কাউন্সিলৰ বৈঠকৰ সময়ত তেওঁ উল্লেখ কৰে যে দিল্লী বিস্ফোৰণৰ দোষীক পাতালৰ পৰা হ’লেও বিচাৰি উলিওয়া হ’ব । সভাৰ আৰম্ভণিতে শেহতীয়াকৈ দিল্লীত সংঘটিত বোমা বিস্ফোৰণ আৰু জম্মু-কাশ্মীৰৰ নৌগাম থানাত হোৱা বিস্ফোৰণত নিহতসকলক শ্ৰদ্ধাঞ্জলি জনোৱা হয় আৰু দুই মিনিট মৌন প্ৰাৰ্থনা কৰা হয় ।

কেন্দ্ৰীয় গৃহমন্ত্ৰীয়ে উল্লেখ কৰে যে প্ৰধানমন্ত্ৰী নৰেন্দ্ৰ মোদীৰ নেতৃত্বত সন্ত্ৰাসবাদ নিৰ্মূল কৰাটো আমাৰ উল্লেখযোগ্য প্ৰতিশ্ৰুতি । মোদী চৰকাৰৰ এতিয়ালৈকে থকা ৰেকৰ্ড মতেই দিল্লী বিস্ফোৰণৰ দোষীয়ে সম্ভৱপৰ কঠোৰতম শাস্তি লাভ কৰিব ।

উল্লেখ্য যে দিল্লী আৰক্ষীৰ লগতে সমগ্ৰ দেশৰ আন কেইবাটাও বৃহৎ তদন্তকাৰী সংস্থাই দিল্লী বোমা বিস্ফোৰণৰ তদন্ত অব্যাহত ৰাখিছে । বিগত কিছুদিনত বিভিন্ন কেইবাখনো ৰাজ্যৰ পৰা কেইবাটাও সন্ত্ৰাসবাদী আৰু সন্দেহজনক লোকক গ্ৰেপ্তাৰ কৰা হৈছে । ধৃত এই সন্দেহযুক্ত লোকৰ জেৰা অব্যাহত আছে ।

ইফালে আজি শ্ৰীনগৰৰ পৰা NIA-এ গ্ৰেপ্তাৰ কৰে আন এটা সন্ত্ৰাসবাদীক । জানিব পৰা মতে ধৃত সন্ত্ৰাসবাদীটো দিল্লী বোমা বিস্ফোৰণৰ সৈতে জড়িত সন্ত্ৰাসবাদী উমৰৰ সহযোগী আছিল । উল্লেখ্য যে, দিল্লী বোমা বিস্ফোৰণত পোন্ধৰজন লোক নিহত হয় আৰু কেইবাজনো লোক সংকটজনক অৱস্থাত চিকিৎসালয়ত ভৰ্তি হৈ আছে ।

অমিত শ্বাহে ১৩ নৱেম্বৰত বিস্ফোৰণত জড়িত সন্ত্ৰাসবাদী সন্দৰ্ভত এক বিবৃতি প্ৰকাশ কৰে । সেই সময়ত তেওঁ কয় যে এই ঘটনাৰ লগত জড়িতসকলক ইমানেই কঠোৰ শাস্তি দিয়া হ’ব যে ভৱিষ্যতে এনে আক্ৰমণৰ চেষ্টা কৰাৰ আগতে দুবাৰ ভাবিব লাগিব । তেওঁ লগতে উল্লেখ কৰে যে দোষীক দিয়া শাস্তিয়ে বিশ্ববাসীৰ বাবেও বাৰ্তা হিচাপে কাম কৰিব । উল্লেখ্য যে শেহতীয়াকৈ দিল্লীত সংঘটিত বিস্ফোৰণৰ পিছৰে পৰা দিল্লীকে ধৰি দেশৰ বিভিন্ন ৰাজ্যৰ আৰক্ষীয়ে এই ঘটনাৰ তদন্ত আৰম্ভ কৰিছে ।

লগতে পঢ়ক : দিল্লী বিস্ফোৰণৰ গোচৰত আন এক সফলতা; শ্ৰীনগৰত গ্ৰেপ্তাৰ ওমৰৰ সহযোগী

দিল্লী বিস্ফোৰণৰ তদন্ত অব্যাহত

দিল্লীৰ বিস্ফোৰণৰ তদন্ত কৰি থকা ৰাষ্ট্ৰীয় অনুসন্ধান সংস্থা তথা এন আই এ ডাঙৰ সফলতা লাভ কৰিছে । সংস্থাই আত্মঘাতী বোমাৰুটোৰ সৈতে এই সন্ত্ৰাসবাদী আক্ৰমণৰ ষড়যন্ত্ৰ কৰা কাশ্মীৰী বাসিন্দাজনক গ্ৰেপ্তাৰ কৰিছে । উল্লেখ্য যে, এই আক্ৰমণত ১৩ জন নিৰীহ লোক নিহত হোৱাৰ বিপৰীতে প্ৰায় ৩২ জন লোক আহত হয় । এই গ্ৰেপ্তাৰৰ ফলত গোচৰৰ দিশ সলনি হ’ব পাৰে আৰু সন্ত্ৰাসবাদীৰ নেটৱৰ্ক উন্মোচন হোৱাত গুৰুত্বপূৰ্ণ বুলি প্ৰমাণিত হ’ব পাৰে ।

জানিব পৰা মতে ধৃত অভিযুক্ত আমিৰ ৰছিদ আলী হৈছে বিস্ফোৰণত আত্মঘাতী বোমাৰোৱে ব্যৱহাৰ কৰা গাড়ীখনৰ পঞ্জীয়নভুক্ত মালিক । প্ৰাথমিক তদন্তত প্ৰকাশ পাইছে যে অভিযুক্তই আক্ৰমণকাৰীৰ সৈতে সমগ্ৰ পৰিকল্পনা প্ৰস্তুত কৰিছিল । দিল্লী আৰক্ষীৰ পৰা গোচৰটো লোৱাৰ পিছতে তদন্তকাৰী সংস্থাই অভিযুক্তক বিচাৰি উলিয়াবলৈ ব্যাপক অভিযান আৰম্ভ কৰিছিল । অৱশেষত কেইবাখনো ৰাজ্যত চলোৱা অভিযানৰ অন্তত দিল্লীৰ পৰা গ্ৰেপ্তাৰ হ’ল আমিৰ ৰছিদ আলী ।

লগতে পঢ়ক : জম্মু-কাশ্মীৰৰ নাওগাম থানাত ভয়ংকৰ বিস্ফোৰণ; ৯ জনৰ মৃত্যু