কলকাতাৰ ছল্টলেকস্থিত প্ৰদেশ বিজেপি কাৰ্যালয়ত বংগ বিজেপিৰ সভাপতি শমিক ভট্টাচাৰ্যৰ উপস্থিতিত তিনিওগৰাকী নেতাই আনুষ্ঠানিকভাৱে গেৰুৱা বসন পিন্ধে

পশ্চিমবংগত বিজেপিৰ চৰকাৰ গঠন হোৱাৰ পিছৰে পৰা ৰাজ্যখনৰ ৰাজনৈতিক সমীকৰণ অতি দ্ৰুতগতিত সলনি হ’বলৈ ধৰিছে । শেহতীয়াকৈ মমতা বেনাৰ্জীৰ তৃণমূল কংগ্ৰেছ দলত এক ডাঙৰ খহনীয়া সৃষ্টি কৰি দলটোৰ তিনিগৰাকী প্ৰাক্তন ৰাজ্যসভাৰ সাংসদে বৃহস্পতিবাৰে ভাৰতীয় জনতা পাৰ্টীত যোগদান কৰে । বিজেপিত যোগদান কৰা এই জ্যেষ্ঠ নেতা তিনিগৰাকী হ’ল- সুখেন্দু শেখৰ ৰায়, সুস্মিতা দেৱ আৰু প্ৰকাশ চিক বৰাইক ।

বৃহস্পতিবাৰে কলকাতাৰ ছল্টলেকস্থিত প্ৰদেশ বিজেপি কাৰ্যালয়ত বংগ বিজেপিৰ সভাপতি শমিক ভট্টাচাৰ্যৰ উপস্থিতিত তিনিওগৰাকী নেতাই আনুষ্ঠানিকভাৱে গেৰুৱা বসন পিন্ধে । উল্লেখযোগ্য যে বংগ বিধানসভা নিৰ্বাচনত তৃণমূল কংগ্ৰেছৰ শোচনীয় পৰাজয় আৰু দলৰ ভিতৰত সৃষ্টি হোৱা তীব্ৰ বিদ্ৰোহৰ মাজতে যোৱা মাহত এই তিনিওগৰাকী নেতাই ৰাজ্যসভাৰ সদস্যপদ আৰু তৃণমূল কংগ্ৰেছ দল- দুয়োটাৰে পৰা পদত্যাগ কৰিছিল ।

বিজেপিয়ে প্ৰক্ষেপ কৰিলে ৰাজ্যসভা উপ-নিৰ্বাচনৰ প্ৰাৰ্থী

বিজেপিত যোগদান কৰাৰ মাত্ৰ কেইঘণ্টামান পিছতে দলটোৱে তিনিওগৰাকী নেতাকে এক ডাঙৰ পুৰস্কাৰ প্ৰদান কৰে । বৃহস্পতিবাৰে পলমকৈ সন্ধিয়া বিজেপিয়ে বংগত খালী হোৱা ৰাজ্যসভাৰ তিনিখন আসনৰ বাবে হ’বলগীয়া উপ-নিৰ্বাচনত এই তিনিওজনকে নিজৰ প্ৰাৰ্থী হিচাপে ঘোষণা কৰে । এই তিনিখন আসনৰ বাবে অহা ২৪ জুলাইত উপ-নিৰ্বাচন অনুষ্ঠিত হ’ব আৰু ইয়াৰ বাবে ১৪ জুলাইলৈকে মনোনয়ন দাখিল কৰিব পৰা যাব ।

নিৰ্বাচন আয়োগে উপ-নিৰ্বাচনৰ অধিসূচনা জাৰি কৰাৰ মাত্ৰ দুদিন পিছতে এই ৰাজনৈতিক ঘটনা সংঘটিত হৈছে । বংগ বিধানসভাত বৰ্তমান বিজেপিৰ যি শক্তি বা বিধায়কৰ সংখ্যা আছে, সেই অনুসৰি তিনিওগৰাকী প্ৰাৰ্থীৰে জয় একপ্ৰকাৰ নিশ্চিত বুলি ধৰা হৈছে ।

সংখ্যাত বংগ বিধানসভা আৰু ৰাজ্যসভাৰ অংক:

বংগত মুঠ বিজেপি বিধায়কৰ সংখ্যা: ২০৮ গৰাকী

ৰাজ্যসভাৰ এখন আসনৰ বাবে প্ৰয়োজনীয় ভোট: ৬৯ ৰ পৰা ৭০ টা

বিজয়ৰ পিছত ৰাজ্যসভাত বিজেপিৰ স্থিতি: এই তিনিখন আসনত জয়লাভ কৰাৰ পিছত বংগৰ পৰা ৰাজ্যসভাত বিজেপি সাংসদৰ সংখ্যা ৫ গৰাকীলৈ বৃদ্ধি পাব । বৰ্তমান ৰাজ্যসভাত বংগৰ পৰা বিজেপিৰ দুগৰাকী সদস্য আছে- শমিক ভট্টাচাৰ্য আৰু ৰাহুল সিনহা ।

তৃণমূলত তীব্ৰ ভাঙোন: এনচিপিআই লৈ গ’ল ২০ সাংসদ

বংগত মমতা বেনাৰ্জীৰ শিবিৰত কেৱল বিধায়ক বা ৰাজ্যসভাৰ সাংসদৰে খহনীয়া হোৱা নাই, বৰঞ্চ লোকসভাতো ইয়াৰ ডাঙৰ প্ৰভাৱ পৰিছে । ইয়াৰ পূৰ্বে তৃণমূলৰ ২৮ গৰাকী লোকসভা সাংসদৰ ভিতৰত ২০ গৰাকীয়ে ইতিমধ্যে কাকলি ঘোষ দস্তিদাৰৰ নেতৃত্বত ‘নেচনেলিষ্ট চিটিজেনছ পাৰ্টী অৱ ইণ্ডিয়া’ত যোগদান কৰি এনডিএ-ৰ মিত্ৰদল হিচাপে চামিল হৈছে । আনহাতে, বিদ্ৰোহী গোটৰ নেতা ঋতব্ৰত বেনাৰ্জীৰ নেতৃত্বত তৃণমূলৰ ৮০ গৰাকী বিধায়কৰ ভিতৰত ৬০ গৰাকীতকৈও অধিক বিধায়কে এটা সুকীয়া গোট গঠন কৰি মমতা বেনাৰ্জীৰ সংগ ত্যাগ কৰিছে ।

লগতে পঢ়ক : মমতা বেনাৰ্জীক মোক্ষম আঘাত; বিজেপিত যোগদান সুস্মিতা দেৱৰ

নিৰ্বাচনী বিপৰ্যয়ৰ পিছতে ইটোৰ পিছত সিটো আঘাতৰ সন্মুখীন হৈছে পশ্চিমবংগৰ প্ৰাক্তন মুখ্যমন্ত্ৰী তথা তৃণমূল কংগ্ৰেছৰ প্ৰতিষ্ঠাপক মমতা বেনাৰ্জী । এইবাৰ মমতা বেনাৰ্জীক দলৰ অধ্যক্ষ পদৰ পৰা অপসাৰণ কৰা বুলি ঘোষণা কৰিছে এটা বিদ্ৰোহী গোটে ।

পশ্চিমবংগৰ ৰাজনীতিত এক অভূতপূৰ্ব ঐতিহাসিক জোকাৰণি! তৃণমূল কংগ্ৰেছৰ অভ্যন্তৰত সৃষ্টি হোৱা এক তীব্ৰ বিদ্ৰোহৰ ফলস্বৰূপে দলৰ প্ৰতিষ্ঠাপক তথা অন্যতম শক্তিশালী নেত্ৰী মমতা বেনাৰ্জীক দলৰ অধ্যক্ষ পদৰ পৰা “অপসাৰণ” কৰা বুলি ঘোষণা কৰিছে এটা বিদ্ৰোহী গোটে । কেৱল ইমানেই নহয়, এই গোটটোৱে দলৰ এটা সমান্তৰাল নেতৃত্বও গঠন কৰি উলিয়াইছে ।

পঞ্চতাৰকা হোটেলত গোপন বৈঠক

পশ্চিমবংগ বিধানসভাত নতুনকৈ গঠন হোৱা বিজেপি চৰকাৰে নিজৰ প্ৰথমখন বাজেট উত্থাপন কৰাৰ দিনাই এই সমগ্ৰ ঘটনাৱলী পোহৰলৈ আহে । বিধানসভাৰ বাজেটৰ ঠিক পিছতেই তৃণমূলৰ বিদ্ৰোহী বিধায়ক আৰু নেতাসকলে কলকাতাৰ নিউ টাউন অঞ্চলৰ এখন পঞ্চতাৰকা হোটেলত এখন বিশেষ জৰুৰী বৈঠকত মিলিত হয় ।

বিৰোধী দলপতি ঋতব্ৰত বেনাৰ্জীৰ নেতৃত্বত অনুষ্ঠিত এই বৈঠকত দলৰ কেইবাজনো জ্যেষ্ঠ নেতা, বৰ্তমানৰ আৰু প্ৰাক্তন বিধায়ক, জিলা সভাপতি তথা কাউঞ্চিলৰসহ প্ৰায় ৫০০ গৰাকী তৃণমূল কৰ্মকৰ্তাই অংশগ্ৰহণ কৰে । এই গোটটোৰ দাবী যে তেওঁলোকৰ সৈতে তৃণমূলৰ এক বৃহৎ অংশৰ বিধায়ক আৰু কৰ্মকৰ্তাৰ সমৰ্থন আছে ।

১৯৯৮ চনত মমতা বেনাৰ্জীয়ে প্ৰতিষ্ঠা কৰা দলটোৰ নিয়ন্ত্ৰণ এতিয়া নিজৰ হাতলৈ নিবলৈ উঠি-পৰি লাগিছে এই বিদ্ৰোহী গোটটো । বৈঠকৰ সিদ্ধান্ত মৰ্মে মৌখিক ভোটৰ জৰিয়তে বিধায়ক অৰূপ ৰায়ক নতুন ‘প্ৰকৃত’ তৃণমূলৰ অধ্যক্ষ হিচাপে নিৰ্বাচিত কৰা হৈছে । লগতে মমতা বেনাৰ্জীৰ অত্যন্ত ঘনিষ্ঠ হিচাপে পৰিচিত কলকাতাৰ প্ৰাক্তন মেয়ৰ ফিৰহাদ হাকিম, অৰূপ বিশ্বাস, ৰথীন ঘোষ আৰু চবিনা ইয়াছমিনক উপ-সভাপতিৰ দায়িত্ব দিয়া হৈছে । ইফালে ঋতব্ৰত বেনাৰ্জী, জাভেদ খান আৰু সন্দীপন সাহাক সাধাৰণ সম্পাদক আৰু আখৰুজ্জামান আনছাৰীক কোষাধ্যক্ষ হিচাপে মনোনীত কৰা হৈছে ।

নোহোৱা হ’ল মমতা-অভিষেকৰ ছবি

এই বিশেষ বৈঠকৰ আটাইতকৈ লক্ষ্যণীয় দিশটো আছিল যে মঞ্চত তৃণমূলৰ দলীয় প্ৰতীক জিলিকি আছিল যদিও, তাত মমতা বেনাৰ্জী আৰু তেওঁৰ ভতিজা অভিষেক বেনাৰ্জীৰ কোনো ছবি বা পোষ্টাৰ নাছিল ।

বিদ্ৰোহী নেতাসকলৰ মতে, দলৰ ভিতৰত এক ডাঙৰ “সাংবিধানিক সংকট” দেখা দিছিল । দলৰ সংবিধান অনুসৰি প্ৰতি তিনি বছৰৰ মূৰে মূৰে এখন ৰাষ্ট্ৰীয় কাৰ্যনিৰ্বাহক কমিটি পুনৰ গঠন কৰাটো বাধ্যতামূলক । কিন্তু ২০২২ চনৰ ফেব্ৰুৱাৰী মাহৰ পিছত এই কমিটিৰ কোনো নৱীকৰণ কৰা হোৱা নাছিল । সেয়েহে তেওঁলোকে এখন নতুন ৩০ জনীয়া ৰাষ্ট্ৰীয় কাৰ্যনিৰ্বাহক কমিটি গঠন কৰিছে আৰু দলৰ বিত্তীয় দিশসমূহ পৰীক্ষা কৰিবলৈ এজন হিচাপ পৰীক্ষক নিযুক্তি দিয়াৰো সিদ্ধান্ত লৈছে ।

সৰৱ মূল তৃণমূল : বিদ্ৰোহী নেতালৈ কাৰণ দৰ্শোৱাৰ জাননী

বিদ্ৰোহীসকলে নিজৰ নতুন কমিটি ঘোষণা কৰাৰ লগে লগে অফিচিয়েল বা মূল তৃণমূল কংগ্ৰেছৰ নেতৃত্বও সক্ৰিয় হৈ পৰিছে । দলৰ অনুশাসন কমিটিয়ে ইয়াক তীব্ৰ গৰিহণা দিছে ।

“ইচ্ছাপূৰ্বকভাৱে দলবিৰোধী কাৰ্যকলাপত লিপ্ত হোৱা”ৰ গুৰুতৰ অভিযোগ উত্থাপন কৰি দলৰ অনুশাসন কমিটিয়ে ইতিমধ্যে ফিৰহাদ হাকিম, অৰূপ বিশ্বাস, অৰূপ ৰায়, জাভেদ খান, ৰথীন ঘোষ, বিপ্লৱ মিত্ৰ, স্নেহাশীষ চক্ৰৱৰ্তী আৰু চবিনা ইয়াছমিনসহ সকলো বিদ্ৰোহী নেতালৈ কাৰণ দৰ্শোৱাৰ জাননী জাৰি কৰিছে ।

লগতে পঢ়ক : পুনৰ অসমৰ ৰাজনীতিত বদৰুদ্দিন আজমল; বিধায়কৰূপে ললে শপত

আদালতৰ পৰৱৰ্তী নিৰ্দেশ নহা পৰ্যন্ত অধ্যক্ষৰ সিদ্ধান্ত বাহাল থাকিব আৰু ঋতব্ৰত বেনাৰ্জীয়েই বিৰোধী দলপতি হৈ থাকিব

তৃণমূল কংগ্ৰেছৰ ভিতৰচ’ৰাত চলি থকা তীব্ৰ বিদ্ৰোহ আৰু খহনীয়াৰ মাজতে কলকাতা উচ্চ ন্যায়ালয়ে এক গুৰুত্বপূৰ্ণ ৰায়দান কৰিছে । তৃণমূল কংগ্ৰেছৰ বিদ্ৰোহী নেতা ঋতব্ৰত বেনাৰ্জীক পশ্চিম বংগ বিধানসভাৰ বিৰোধী দলপতি হিচাপে নিযুক্তি দিয়া অধ্যক্ষৰ সিদ্ধান্তক প্ৰত্যাহ্বান জনাই তৰা গোচৰত কোনো অন্তৱৰ্তীকালীন স্থগিতাদেশ জাৰি কৰিবলৈ অস্বীকাৰ কৰিছে উচ্চ ন্যায়ালয়ে ।

অৰ্থাৎ, আদালতৰ পৰৱৰ্তী নিৰ্দেশ নহা পৰ্যন্ত অধ্যক্ষৰ সিদ্ধান্ত বাহাল থাকিব আৰু ঋতব্ৰত বেনাৰ্জীয়েই বিৰোধী দলপতি হৈ থাকিব ।

আদালতৰ মজিয়াত কি হ’ল ?

গোচৰটোৰ শুনানি গ্ৰহণ কৰি জ্যেষ্ঠ ন্যায়াধীশ কৃষ্ণ ৰাৱে আটাইকেইটা পক্ষকে ৩ সপ্তাহৰ ভিতৰত বিৰোধিতাৰ শপতনামাহ আৰু পৰৱৰ্তী ২ সপ্তাহৰ ভিতৰত ইয়াৰ প্ৰত্যুত্তৰ দাখিল কৰিবলৈ কঠোৰ নিৰ্দেশ দিছে । গোচৰটোৰ পৰৱৰ্তী শুনানি অহা ২৮ জুলাইত অনুষ্ঠিত হ’ব ।

আদালতৰ এই স্থিতিক লৈ প্ৰতিক্ৰিয়া প্ৰকাশ কৰি টিএমচিৰ সাংসদ তথা জ্যেষ্ঠ অধিবক্তা কল্যাণ বেনাৰ্জীয়ে কয় :

“উচ্চ ন্যায়ালয়ে কোনো অন্তৱৰ্তীকালীন আদেশ দিয়া নাই ঠিকেই, কিন্তু আবেদনখন খাৰিজ নকৰি গ্ৰহণ কৰিছে । শপতনামাহ দাখিলৰ নিৰ্দেশ দিয়া হৈছে আৰু জুলাই মাহতেই ইয়াৰ চূড়ান্ত শুনানি হ’ব ।”

বিধানসভা আৰু লোকসভাত টিএমচিৰ মোক্ষম আঘাত

উল্লেখ্য যে, তৃণমূল কংগ্ৰেছৰ মুঠ ৫৮ গৰাকী বিধায়কে ইতিমধ্যে দল ত্যাগ কৰি বিধানসভাৰ ভিতৰতে এটা সুকীয়া গোট গঠন কৰিছে । অধ্যক্ষ ৰথীন্দ্ৰ বোসে এই বিদ্ৰোহী গোটটোৰ নেতা ঋতব্ৰত বেনাৰ্জীক বিৰোধী দলপতি হিচাপে আনুষ্ঠানিক স্বীকৃতিও প্ৰদান কৰিছে ।

কেৱল ৰাজ্যতেই নহয়, দিল্লীৰ সংসদতো মমতা বেনাৰ্জীৰ দললৈ সংকট নামিছে । লোকসভাত কাকলি ঘোষ দস্তিদাৰৰ নেতৃত্বত দলটোৰ দুই-তৃতীয়াংশ (২/৩) সাংসদে ত্ৰিপুৰাভিত্তিক ‘নেচনেলিষ্ট চিটিজেন্স পাৰ্টি অৱ ইণ্ডিয়া’ (NCPI)-ৰ সৈতে একত্ৰিত হৈছে । তেওঁলোকে নিম্ন সদনত সুকীয়া বহাৰ ব্যৱস্থা কৰাৰ বাবে লোকসভাৰ অধ্যক্ষ ওম বিৰলালৈ পত্ৰও প্ৰেৰণ কৰিছে ।

ৰাজ্যখনৰ এই অভূতপূৰ্ব ৰাজনৈতিক উত্থান-পতনৰ মাজতে এক নাটকীয় মোৰ দি বহিষ্কৃত নেতা ঋতব্ৰত বেনাৰ্জীয়ে বিধানসভাত আস্থা ভোট অনুষ্ঠিত কৰাৰ দাবী জনাইছে । তেওঁ স্পষ্টকৈ কয় যে ইয়াৰ দ্বাৰা চলি থকা সকলো জল্পনা-কল্পনা আৰু ভুৱা দাবীৰ অন্ত পৰিব ।

এতিয়া সকলোৰে চকু অহা ২৮ জুলাইৰ আদালতৰ শুনানি আৰু বিধানসভাৰ মজিয়াত হ’বলগীয়া সম্ভাৱ্য শক্তি প্ৰদৰ্শনৰ ওপৰত ।

লগতে পঢ়ক : সংসদত সুকীয়া আসনৰ ব্যৱস্থাৰ দাবী : ওম বিৰলাৰ বাসগৃহত তৃণমূলৰ বিদ্ৰোহী সাংসদ

দেওবাৰে বিদ্ৰোহী সাংসদ কাকলী ঘোষ দস্তিদাৰ, সুদীপ বন্দ্যোপাধ্যায়, শতাব্দী ৰায় আৰু অন্যান্য নেতাসকল নতুন দিল্লীত লোকসভাৰ অধ্যক্ষ ওম বিৰলাৰ বাসগৃহত উপস্থিত হয়

তৃণমূল কংগ্ৰেছৰ অভ্যন্তৰীণ গৃহকন্দলে এতিয়া চৰম পৰ্যায় পাইছেগৈ । দলটোৰ ভিতৰত চলি থকা তীব্ৰ মতানৈক্যৰ মাজতে দেওবাৰে ৰাষ্ট্ৰীয় ৰাজধানী নতুন দিল্লীত এক ডাঙৰ ৰাজনৈতিক উখল-মাখল দেখিবলৈ পোৱা গৈছে । লোকসভাৰ ভিতৰত সুকীয়া বহাৰ ব্যৱস্থা দাবী কৰি তৃণমূলৰ একাংশ বিদ্ৰোহী সাংসদে লোকসভাৰ অধ্যক্ষ ওম বিৰলাৰ দ্বাৰস্থ হৈছে ।

দিল্লীৰ পৰা কলকাতালৈ বৈঠকৰ ধুমহা

প্ৰাপ্ত খবৰ অনুযায়ী, দেওবাৰে বিদ্ৰোহী সাংসদ কাকলী ঘোষ দস্তিদাৰ, সুদীপ বন্দ্যোপাধ্যায়, শতাব্দী ৰায় আৰু অন্যান্য নেতাসকল নতুন দিল্লীত লোকসভাৰ অধ্যক্ষ ওম বিৰলাৰ বাসগৃহত উপস্থিত হয় । তেওঁলোকে সদনত সুকীয়া বহাৰ ব্যৱস্থা কৰিবলৈ অধ্যক্ষৰ ওচৰত দাবী জনায় ।

অধ্যক্ষক সাক্ষাৎ কৰাৰ পূৰ্বে বিদ্ৰোহী টিএমচি সাংসদ সায়নী ঘোষ, মালা ৰায়, শতাব্দী ৰায়, অৰূপ চক্ৰৱৰ্তী আৰু কাকলী ঘোষে কেন্দ্ৰীয় পৰিৱেশ মন্ত্ৰী ভূপেন্দ্ৰ যাদৱকো তেওঁৰ বাসগৃহত সাক্ষাৎ কৰে ।

আনহাতে, দিল্লীত এই তৎপৰতা চলি থকাৰ মাজতে কলকাতাতো সংকট মোচনৰ বাবে আলোচনা অব্যাহত আছে । টিএমচি নেতা গৌতম দেৱ আৰু চন্দ্রিমা ভট্টাচাৰ্যই দলৰ প্ৰধান তথা পশ্চিম বংগৰ মুখ্যমন্ত্ৰী মমতা বেনাৰ্জীৰ বাসগৃহত উপস্থিত হৈ এক গুৰুত্বপূৰ্ণ বৈঠকত মিলিত হয় ।

এনডিএ-ক সমৰ্থন কৰিব বিদ্ৰোহী শিবিৰে!

ইতিমধ্যে দলৰ পৰা নিলম্বিত হোৱা টিএমচি নেতা ৰিজু দত্তই এক বিস্ফোৰক মন্তব্য কৰিছে । তেওঁ দাবী কৰা মতে, তেওঁলোকৰ শিবিৰত বিদ্ৰোহী সাংসদৰ সংখ্যা ২০ জনৰ পৰা ২২ জনলৈ বৃদ্ধি পাব পাৰে ।

নিলম্বিত টিএমচি নেতা ৰিজু দত্তই কয়- “বিদ্ৰোহী সাংসদসকল আজি দিল্লী অভিমুখে ৰাওনা হৈছে । মই তেওঁলোকৰ একাংশৰ সৈতে ব্যক্তিগতভাৱে কথা পাতিছোঁ । সোমবাৰে আটাইকেইজন বিদ্ৰোহী সাংসদে অধ্যক্ষক সাক্ষাৎ কৰিব । কেৱল সংসদে নহয়, বিধানসভাতো তেওঁলোকে এজন সুকীয়া বিৰোধী দলৰ নেতাৰ প্ৰস্তাৱ দিব পাৰে । তেওঁলোকে স্পষ্টকৈ জানিবলৈ দিছে যে তেওঁলোকে বিজেপি নেতৃত্বাধীন এনডিএ-ক সমৰ্থন কৰিব ।”

বিদ্ৰোহীসকলৰ এই পদক্ষেপক তীব্ৰ সমালোচনা কৰিছে তৃণমূল কংগ্ৰেছৰ ৰাজ্যসভাৰ সাংসদ সাগৰিকা ঘোষে । ছ’চিয়েল মিডিয়া প্লেটফৰ্ম এক্স-ত এটা পোষ্ট শ্বেয়াৰ কৰি তেওঁ দল-ত্যাগ বিৰোধী আইনৰ কথা সোঁৱৰাই দিয়ে ।

কঁপিল তৃণমূলৰ ভেটি

বৰ্তমানৰ পৰিস্থিতি অনুসৰি, পশ্চিম বংগত বহিষ্কৃত বিধায়ক ঋতব্ৰত বেনাৰ্জীৰ নেতৃত্বত ৫৮ জন বিধায়কে আৰু লোকসভাত কাকলী ঘোষ দস্তিদাৰৰ নেতৃত্বত ২০ জন সাংসদে দলৰ বিৰুদ্ধে বিদ্ৰোহ ঘোষণা কৰিছে । ইয়াৰ উপৰিও, সুখেন্দু শেখৰ ৰায়, সুস্মিতা দেৱ আৰু প্ৰকাশ বাৰাইককে ধৰি তিনিগৰাকী ৰাজ্যসভাৰ সাংসদে ইতিমধ্যে উচ্চ সদন আৰু দলৰ প্ৰাথমিক সদস্যপদৰ পৰা পদত্যাগ কৰিছে ।

লগতে পঢ়ক : ‘সাংসদ-বিধায়কক ক্ৰয় কৰি তল পেলাব নোৱাৰে’; টিএমচিত বিভাজন সন্দৰ্ভত অভিষেক বেনাৰ্জীৰ প্ৰতিক্ৰিয়া

তৃণমূল কংগ্ৰেছৰ সাংসদ অভিষেক বেনাৰ্জীৰ ওপৰত আক্ৰমণৰ ঘটনা সংঘটিত হৈছে

পশ্চিম বংগৰ সোনাৰপুৰত নিৰ্বাচনৰ পৰৱৰ্তী হিংসাৰ ঘটনাৰ ভুক্তভোগীক সাক্ষাৎ কৰিবলৈ যোৱা তৃণমূল কংগ্ৰেছৰ সাংসদ অভিষেক বেনাৰ্জীৰ ওপৰত আক্ৰমণৰ ঘটনা সংঘটিত হৈছে । শনিবাৰে বিয়লি কামৰাবাদ অঞ্চলত এক উত্তপ্ত পৰিস্থিতিৰ সৃষ্টি হয়, য’ত প্ৰতিবাদকাৰীসকলে সাংসদগৰাকীক লক্ষ্য কৰি কেঁচা কণী নিক্ষেপ কৰাৰ লগতে মাৰপিট কৰাৰ অভিযোগ উত্থাপিত হৈছে ।

ঘটনাৰ বিৱৰণ-

শনিবাৰে আবেলি প্ৰায় চাৰে চাৰি বজাত অভিষেক বেনাৰ্জী তেওঁৰ দলৰ এগৰাকী মৃত কৰ্মীৰ পৰিয়ালক সাক্ষাৎ কৰিবলৈ কামৰাবাদত উপস্থিত হয় । তেওঁ অহাৰ পূৰ্বৰে পৰা অঞ্চলটোত বিজেপিৰ নেতা-কৰ্মীৰ লগতে একাংশ উত্তেজিত লোকৰ ভিৰ আছিল । প্ৰতিবাদকাৰীসকলে মহিলাসকলক সন্মুখত ৰাখি তেওঁৰ পথ আগচি ধৰে ।

তীব্ৰ প্ৰতিৰোধৰ সন্মুখীন হৈ অভিষেক বেনাৰ্জীয়ে তেওঁৰ চাৰিচকীয়া বাহন এৰি বাইকেৰে ভিতৰলৈ সোমাবলৈ চেষ্টা কৰে । কিন্তু ভুক্তভোগীৰ ঘৰৰ পৰা কিছু দূৰত প্ৰতিবাদকাৰীসকলে তেওঁক ৰখাই ‘চোৰ-চোৰ’ বুলি শ্লোগান দিবলৈ আৰম্ভ কৰে । এই সময়তে উত্তেজিত ভিৰটোৱে ৰাস্তাত মটৰচাইকেল পেলাই দি পৰিস্থিতি উত্তপ্ত কৰি তোলে । অৱশেষত নিৰাপত্তাৰক্ষীয়ে তৎপৰতা দেখুৱাই অভিষেক বেনাৰ্জীক হেলমেট পিন্ধাই সুৰক্ষিতভাৱে নিৰাপত্তা বেষ্টনীৰ মাজেৰে সেই স্থানৰ পৰা আঁতৰাই নিয়ে ।

কি কৈছে স্থানীয় ৰাইজে ?

এই আক্ৰমণৰ আঁৰত কোনো ৰাজনৈতিক দল নহয়, বৰঞ্চ স্থানীয় লোকৰ পুঞ্জীভূত ক্ষোভহে প্ৰতিফলিত হোৱা বুলি দাবী কৰিছে একাংশ বাসিন্দাই । স্থানীয় লোকৰ অভিযোগ :

আন্তঃগাঁথনিৰ অভাৱ : দীৰ্ঘদিন ধৰি অঞ্চলটোৰ প্ৰায় এক কিলোমিটাৰ ৰাস্তা অতি শোচনীয় অৱস্থাত আছে। বৰষুণ দিলে কৃটিম বানপানীৰ সৃষ্টি হয় ।

উপেক্ষিত জনসাধাৰণ : মুখ্যমন্ত্ৰী মমতা বেনাৰ্জীৰ পৰা আৰম্ভ কৰি চৰকাৰলৈ বহুবাৰ আবেদন জনোৱাৰ পিছতো ৰাস্তা মেৰামতি আৰু পানীৰ ব্যৱস্থা উন্নত নহ’ল ।

ক্ষমতাত থাকিও উন্নয়নহীন : স্থানীয় ৰাইজৰ প্ৰশ্ন- ১৫ বছৰ ধৰি তৃণমূল ক্ষমতাত থকাৰ পিছতো কিয় এই অঞ্চলৰ উন্নয়ন নহ’ল ?

অভিষেক বেনাৰ্জীৰ প্ৰতিক্ৰিয়া-

নিজৰ ওপৰত হোৱা আক্ৰমণৰ বাবে অভিষেক বেনাৰ্জীয়ে পোনপটীয়াকৈ বিজেপিক দায়ী কৰিছে । তেওঁ কয়, “এইটো সম্পূৰ্ণৰূপে বিজেপি প্ৰায়োজিত আক্ৰমণ । এয়াই তেওঁলোকৰ গণতন্ত্ৰৰ নমুনা । আটাইতকৈ দুৰ্ভাগ্যজনক কথাটো হ’ল, এই ঘটনাৰ সময়ত ঘটনাস্থলীত কোনো পুলিচ উপস্থিত নাছিল ।”

বৰ্তমানৰ পৰিস্থিতি-

এই ঘটনাক লৈ সমগ্ৰ সোনাৰপুৰ অঞ্চলত তীব্ৰ উত্তেজনা বিৰাজ কৰিছে । তৃণমূলে ইয়াক বিৰোধীৰ এক পৰিকল্পিত ষড়যন্ত্ৰ বুলি অভিহিত কৰাৰ বিপৰীতে বিজেপিয়ে ইয়াক স্থানীয় ৰাইজৰ স্বতঃস্ফূৰ্ত ক্ষোভ বুলি দাবী কৰিছে । বৰ্তমান অঞ্চলটোত আৰক্ষীৰ নিৰাপত্তা বৃদ্ধি কৰা হৈছে যদিও দুয়োটা ৰাজনৈতিক দলৰ মাজত বাকযুদ্ধ তুংগত উঠিছে ।

লগতে পঢ়ক : কৰ্ণাটকত ‘শিৱকুমাৰৰ’ নামত আজি লাগিব মোহৰ; ৩ জুনত শপত গ্ৰহণৰ সম্ভাৱনা