আমেৰিকা যুক্তৰাষ্ট্ৰৰ ঐতিহাসিক স্মৃতিসৌধ মাউণ্ট ৰাছম’ৰত নিজৰ উত্তৰাধিকাৰক দাঙি ধৰাৰ উদ্দেশ্যে ট্ৰাম্পে এটা ডিজিটেলভাৱে প্ৰস্তুত কৰা ছবি শ্বেয়াৰ কৰিছে

নিজৰ একাংশ কাৰ্যকলাপৰ বাবে চৰ্চাত থকা মাৰ্কিন ৰাষ্ট্ৰপতি ড’নাল্ড ট্ৰাম্পে এইবাৰ ছচিয়েল মিডিয়াত এক ব্যতিক্ৰমী পোষ্ট কৰি খলকনি তুলিছে । আমেৰিকা যুক্তৰাষ্ট্ৰৰ ঐতিহাসিক স্মৃতিসৌধ ‘মাউণ্ট ৰাছম’ৰ‘ (Mount Rushmore)-ত নিজৰ উত্তৰাধিকাৰক দাঙি ধৰাৰ উদ্দেশ্যে ট্ৰাম্পে এটা ডিজিটেলভাৱে প্ৰস্তুত কৰা ছবি শ্বেয়াৰ কৰিছে ।

নিজৰ ছচিয়েল মিডিয়া প্লেটফৰ্ম ‘ট্ৰুথ ছ’চিয়েল’ত শ্বেয়াৰ কৰা এই ছবিখনত আমেৰিকাৰ ৪গৰাকী সৰ্বকালৰ মহান ৰাষ্ট্ৰপতিৰ কাষতে ট্ৰাম্পৰ মুখমণ্ডলকো খোদিত কৰা ৰূপত দেখুওৱা হৈছে । উল্লেখনীয় যে, ছবিখন প’ষ্ট কৰাৰ সময়ত ট্ৰাম্পে কোনো ধৰণৰ লিখিত মন্তব্য কৰা নাই ।

কি এই মাউণ্ট ৰাছম’ৰ ?

চাউথ ডাকোটাৰ কীষ্ট’নত থকা ব্লেক হিলছৰ গ্ৰেনাইট পাহাৰ কাটি নিৰ্মাণ কৰা ‘মাউণ্ট ৰাছম’ৰ নেচনেল মেম’ৰিয়েল’ আমেৰিকাৰ এক অন্যতম ঐতিহ্যবাহী স্থান । ইয়াৰ বিশাল পাহাৰত আমেৰিকাৰ ৪গৰাকী প্ৰাক্তন ৰাষ্ট্ৰপ্ৰধান- জৰ্জ ৱাশ্বিংটন, থমাছ জেফাৰছন, থিয়ড’ৰ ৰুজভেল্ট আৰু আব্ৰাহাম লিংকনৰ ৬০ ফুট ওখ মুখমণ্ডল খোদিত হৈ আছে । ভাস্কৰ্যশিল্পী গুটজন বৰ্গলমে আমেৰিকাৰ ইতিহাসৰ প্ৰথম ১৫০ বছৰৰ জন্ম, আঞ্চলিক সম্প্ৰসাৰণ, অৰ্থনৈতিক প্ৰগতি আৰু গাঁথনিগত স্থায়িত্বক প্ৰতিনিধিত্ব কৰিবলৈ এই চাৰিজন নেতাক বাছি লৈছিল ।

মাউণ্ট ৰাছম’ৰত ট্ৰাম্পৰ স্থানক লৈ চলিছে চৰ্চা :

ছবিখনে কেৱল ছচিয়েল মিডিয়াতে নহয়, বৰঞ্চ ৰাজনৈতিক মহলতো ব্যাপক চৰ্চা লাভ কৰিছে । ইতিহাসৰ কেইটামান গুৰুত্বপূৰ্ণ তথ্য অনুসৰি :

ট্ৰাম্পৰ সপোন :

২০১৮ চনতে ডনাল্ড ট্ৰাম্পে চাউথ ডাকোটাৰ ৰাজ্যপাল ক্ৰীষ্টি নোৱেমৰ ওচৰত এই স্মৃতিসৌধত নিজৰ মুখমণ্ডল স্থায়ীভাৱে খোদিত হোৱাটো তেওঁৰ এটা “সপোন” বুলি প্ৰকাশ কৰিছিল । পৰৱৰ্তী সময়ত তেওঁ নিজৰ শাসনকালৰ সফলতাসমূহৰ বাবে এই স্থান পোৱাৰ যোগ্য বুলি দাবী কৰি আহিছে ।

আইনী প্ৰস্তাৱ :

আনকি ২০২০ চনৰ এক ৰাজহুৱা ভাষণতো ট্ৰাম্পে এই প্ৰস্তাৱ উত্থাপন কৰিছিল । বৰ্তমান ফ্ল’ৰিডাৰ প্ৰতিনিধি আন্না পলীনা লুনাকে ধৰি একাংশ কংগ্ৰেছ সমৰ্থকে পাহাৰৰ গাত ট্ৰাম্পৰ প্ৰতিচ্ছবি খোদাই কৰাৰ বাবে গৃহ পৰিক্ৰমা বিভাগক নিৰ্দেশ দি আনুষ্ঠানিক আইনী প্ৰস্তাৱো আগবঢ়াইছে ।

পৰ্যাপ্ত স্থানৰ ইংগিত :

বৰ্তমানৰ গৃহ পৰিক্ৰমা সচিব ডগ বাৰ্গামকে ধৰি কেইবাগৰাকীও শীৰ্ষ কাৰ্যবাহী বিষয়াই এই ঐতিহাসিক স্থানটোত আন এটা মুখমণ্ডল অন্তৰ্ভুক্ত কৰিব পৰাকৈ পৰ্যাপ্ত গাঁথনিগত স্থান থকা বুলি প্ৰকাশ্যে ইংগিত দিছে ।

ট্ৰাম্পৰ এই নীৰৱ অথচ শক্তিশালী ডিজিটেল বাৰ্তাই এতিয়া সমগ্ৰ আমেৰিকাত এক নতুন বিতৰ্ক আৰু চৰ্চাৰ সূচনা কৰিছে ।

লগতে পঢ়ক : “চুক্তিৰ নিচেই কাষত”: ইৰাণৰ সৈতে চলি থকা আলোচনা সন্দৰ্ভত ট্ৰাম্পৰ ডাঙৰ মন্তব্য

ট্ৰাম্পে ইৰাণৰ সৈতে এক বৃহৎ শান্তি চুক্তি হোৱাৰ প্ৰবল সম্ভাৱনা থকা বুলি ইংগিত দিছে

আমেৰিকা যুক্তৰাষ্ট্ৰৰ ৰাষ্ট্ৰপতি ডোনাল্ড ট্ৰাম্পে ইৰাণৰ সৈতে এক বৃহৎ শান্তি চুক্তি হোৱাৰ প্ৰবল সম্ভাৱনা থকা বুলি ইংগিত দিছে । অৱশ্যে ইয়াৰ সমান্তৰালভাৱে তেওঁ হুংকাৰ দি কয় যে যদিহে এই আলোচনা কোনো কাৰণত বিফল হয়, তেন্তে আমেৰিকাই সামৰিক পদক্ষেপ ল’বলৈ অলপো কুণ্ঠাবোধ নকৰে । ফক্স নিউজৰ সৈতে হোৱা এক বিশেষ সাক্ষাৎকাৰত ৰাষ্ট্ৰপতি ট্ৰাম্পে স্পষ্ট কৰি দিয়ে যে যিকোনো চুক্তিৰ বাবে ইৰাণে পাৰমাণৱিক অস্ত্ৰ ত্যাগ কৰাৰ এক নিশ্চিত গেৰাণ্টী দিবই লাগিব ।

সাক্ষাৎকাৰত ট্ৰাম্পে কয়, “আমি এটা বৰ ভাল চুক্তি কৰাৰ দিশে আগবাঢ়িছো; অন্যথা আমি পুনৰ ঘূৰি যাম আৰু সামৰিকভাৱে ইয়াক শেষ কৰিম । আমি এটা অতি ভাল চুক্তিৰ কাষ চাপিছো আৰু যদি আমি ইয়াক ভাল কৰিব পাৰোঁ তেন্তে ঠিকেই আছে, নহ’লে আমি যুদ্ধ বিভাগৰ সৈতে কাম আৰম্ভ কৰিম ।”

ৰাষ্ট্ৰপতিগৰাকীয়ে ভেনিজুৱেলাকে ধৰি অতীতৰ কেইবাটাও সামৰিক অভিযানৰ উদাহৰণ দি সেইবোৰক “এদিনৰ জয়” বুলি অভিহিত কৰে । কিন্তু তেওঁ লগতে আশা প্ৰকাশ কৰে যে সামৰিক সংঘাতৰ পৰিৱৰ্তে আলোচনাৰ মাধ্যমেৰে এটা সন্তোষজনক চুক্তিত উপনীত হোৱাটোৱে হে তেওঁৰ প্ৰথম লক্ষ্য । ট্ৰাম্পৰ মতে, এই চুক্তি স্বাক্ষৰিত হোৱাৰ লগে লগে কৌশলগতভাৱে অতি গুৰুত্বপূৰ্ণ জলপ্ৰণালীসমূহ পুনৰ মুকলি কৰাৰ দৰে তাৎক্ষণিক লাভালাভ দেখিবলৈ পোৱা যাব ।

ইৰাণৰ সামৰিক শক্তিৰ সন্দৰ্ভত নিজৰ স্থিতি পুনৰবাৰ স্পষ্ট কৰি তেওঁ কয়, “আমি মূলতঃ তেওঁলোকৰ সামৰিক বাহিনীক পৰাভূত কৰিছো । মই বৰঞ্চ এটা চুক্তি কৰিবলৈহে ভাল পাম কাৰণ চুক্তি স্বাক্ষৰ হোৱাৰ লগে লগে আমি জলপ্ৰণালীটো মুকলি কৰিব পাৰিম । মোৰ ওচৰত থকা একমাত্ৰ গেৰাণ্টীটো হ’ল যে তাত কোনো পাৰমাণৱিক অস্ত্ৰ নাথাকিব আৰু ইৰাণেও এই কথাত সন্মতি প্ৰকাশ কৰিছে ।”

শান্তিপূৰ্ণ আলোচনাৰ প্ৰক্ৰিয়াটোক এক অত্যন্ত কঠিন আলোচনা বুলি অভিহিত কৰি তেওঁ কয় যে ইৰাণৰ মধ্যস্থতাকাৰীসকল বৰ টান । গতিকে এই ক্ষেত্ৰত তেওঁৰ কোনো খৰখেদা নাই । কাৰণ খৰখেদা কৰিলে কেতিয়াও এটা ভাল চুক্তি সম্ভৱ নহয় । কিন্তু তেওঁ সকীয়াই দিয়ে যে যদিহে আলোচনা সঠিক দিশত আগনাবাঢ়ে, তেন্তে আমেৰিকাই অন্য পথ বাচি ল’ব । ট্ৰাম্পৰ ভাষাত- “লাহে লাহে কিন্তু নিশ্চিতভাৱে আমি যি বিচাৰো তাক পাই আছোঁ আৰু যদি আমি আমাৰ মতে বস্তু নাপাওঁ, তেন্তে আমি ইয়াক এটা বেলেগ ধৰণে শেষ কৰিম ।”

আনহাতে, ‘এক্সিয়ছ’-ৰ এক শেহতীয়া প্ৰতিবেদনত প্ৰশাসনৰ জ্যেষ্ঠ বিষয়াৰ উদ্ধৃতি দি প্ৰকাশ পাইছে যে, যোৱা শুকুৰবাৰে হোৱা এখন গুৰুত্বপূৰ্ণ ‘চিটুৱেচন ৰুম’ বৈঠকত ৰাষ্ট্ৰপতি ট্ৰাম্পে তেওঁৰ দূতসকলে ইৰাণৰ সৈতে তৈয়াৰ কৰা খচৰা চুক্তিত কেইবাটাও গুৰুত্বপূৰ্ণ সংশোধনী আনিবলৈ নিৰ্দেশ দিছে ।

বিশেষকৈ ইৰাণৰ পাৰমাণৱিক সামগ্ৰী নিয়ন্ত্ৰণৰ বিষয়টো আৰু অধিক কঠোৰ কৰিবলৈ ট্ৰাম্পে ইচ্ছা প্ৰকাশ কৰিছে । ইয়াৰ উপৰিও হৰমুজ জলপ্ৰণালী পুনৰ মুকলি কৰাৰ সন্দৰ্ভত থকা কিছুমান চৰ্তৰ ভাষা সলনি কৰাৰ বাবেও তেওঁ নিৰ্দেশ দিছে । এই নতুন সংশোধনীসমূহক লৈ দুয়োটা পক্ষৰ মাজত পুনৰ এক আলোচনাৰ পৰ্ব আৰম্ভ হৈছে, যিটো পৰৱৰ্তী কেইবাদিনো ধৰি চলিব পাৰে বুলি ধাৰণা কৰা হৈছে ।

লগতে পঢ়ক : ট্ৰাম্পৰ ডাঙৰ সিদ্ধান্ত; উঠাই দিয়া হ’ল হৰমুজ অৱৰোধ,ঘৰলৈ উভতিল আমেৰিকান সৈনিক

বিত্ত সচিবে প্ৰকাশ কৰা অনুসৰি, ৰাষ্ট্ৰপতি ডনাল্ড ট্ৰাম্পৰ প্ৰতিকৃতি অংকিত ২৫০ ডলাৰৰ এখন নতুন নোট প্ৰৱৰ্তনৰ বাবে এক প্ৰাৰম্ভিক আৰ্হি কৰিছে বিত্ত বিভাগে

আমেৰিকাৰ মুদ্ৰাৰ ইতিহাসত এক গুৰুত্বপূৰ্ণ পৰিৱৰ্তন অনাৰ বাবে তৎপৰ হৈ পৰিছে বৰ্তমানৰ চৰকাৰ । আমেৰিকাৰ বিত্ত সচিব স্কট বেচেণ্টে প্ৰকাশ কৰা অনুসৰি, ৰাষ্ট্ৰপতি ডনাল্ড ট্ৰাম্পৰ প্ৰতিকৃতি অংকিত ২৫০ ডলাৰৰ এখন নতুন নোট প্ৰৱৰ্তনৰ বাবে এক প্ৰাৰম্ভিক আৰ্হি বা মক-আপ (Mock-up) প্ৰস্তুত কৰিছে বিত্ত বিভাগে ।

আইন সলনিৰ প্ৰচেষ্টা-

বৰ্তমানৰ আমেৰিকান আইন অনুসৰি, কোনো জীৱিত ব্যক্তিৰ ছবি আমেৰিকাৰ মুদ্ৰাত ব্যৱহাৰ কৰিব নোৱাৰি । এই প্ৰসংগত বিত্ত সচিব বেচেণ্টে হোৱাইট হাউচৰ এক ব্ৰিফিঙত কয়, “আমেৰিকান মুদ্ৰাৰ বাবে দুটা প্ৰধান বাধ্যবাধকতা আছে—প্ৰথমটো হ’ল মুদ্ৰাত কোনো জীৱিত ব্যক্তি থাকিব নোৱাৰে আৰু দ্বিতীয়টো হ’ল ইয়াত ‘In God We Trust’ লিখা থাকিব লাগিব ।”

তেওঁ লগতে জানিবলৈ দিয়ে যে, এই আইনৰ প্ৰথমটো চৰ্ত সলনি কৰিবলৈ বৰ্তমান হাউচ আৰু চেনেটত এখন বিধেয়ক উত্থাপন কৰা হৈছে । এই বিধেয়ক গৃহীত হ’লেহে ৰাষ্ট্ৰপতি ট্ৰাম্পৰ ছবি নোটত অন্তৰ্ভুক্ত কৰাটো সম্ভৱ হ’ব । বিত্ত বিভাগে আইনৰ মৰ্যাদা ৰক্ষা কৰি আগতীয়াকৈ এই প্ৰস্তুতি চলাই ৰাখিছে বুলিও তেওঁ উল্লেখ কৰে ।

বিভাগৰ ভিতৰত বিবাদ আৰু প্ৰশাসনিক সালসলনি-

এই নতুন নোটৰ ডিজাইনক কেন্দ্ৰ কৰি আমেৰিকাৰ বিত্ত বিভাগৰ ‘ব্যুৰ’ অৱ এনগ্ৰেভিং এণ্ড প্ৰিন্টিং’-ৰ ভিতৰত এক ধৰণৰ অস্থিৰতা আৰু বিতৰ্কৰ সৃষ্টি হৈছে । ইয়াৰ মাজতেই বিভাগটোৰ সঞ্চালক পে ট্ৰিচিয়া চলিমেনক হঠাতে তেওঁৰ পদৰ পৰা আঁতৰাই অন্য বিভাগলৈ বদলি কৰা হৈছে ।

নিজৰ এই বিদায়ৰ সন্দৰ্ভত চলিমেনে কয়, “এই স্থানান্তৰ মোৰ ইচ্ছা নাছিল । মই কেতিয়াও অনুষ্ঠানটোৰ মূল্যবোধৰ সৈতে আপোচ কৰা নাই ।” বিভাগটোৰ পৰা তেওঁৰ এনে অস্বাভাৱিক প্ৰস্থানক লৈ এতিয়া চৰ্চা চলিছে ।

ট্ৰাম্পৰ আগ্ৰহ আৰু পূৰ্বৰ বিতৰ্ক-

ৰাষ্ট্ৰপতি ট্ৰাম্পে নিজৰ কাৰ্যকালত আমেৰিকাৰ মুদ্ৰা আৰু অৰ্থনীতিৰ ওপৰত নিজৰ শক্তিশালী প্ৰভাৱ পেলাবলৈ বিভিন্ন সময়ত আগ্ৰহ প্ৰকাশ কৰি আহিছে । যোৱা বছৰো তেওঁৰ ছবি থকা স্মাৰক মুদ্ৰা মুকলি কৰা হৈছিল, যিটো পদক্ষেপে ১৮৬৬ চনৰ এক দীৰ্ঘদিনীয়া আইনক লৈ তীব্ৰ আইনী বিতৰ্কৰ সৃষ্টি কৰিছিল ।

এতিয়া ২৫০ ডলাৰৰ এই নতুন নোটৰ প্ৰস্তাৱে আমেৰিকান ৰাজনীতি আৰু অৰ্থনৈতিক বৃত্তত নতুনকৈ বিতৰ্কৰ সূত্ৰপাত ঘটাইছে । সমগ্ৰ প্ৰক্ৰিয়াটো কংগ্ৰেছৰ অনুমোদনৰ ওপৰত নিৰ্ভৰ কৰিব বুলি জানিব পৰা গৈছে ।

লগতে পঢ়ক : চন্দ্ৰত স্থায়ী ঘাটি নিৰ্মাণৰ বাবে NASA-ৰ বৃহৎ পৰিকল্পনা

ইৰানৰ সৈতে সম্ভাৱ্য চুক্তি আৰু মধ্যপ্ৰাচ্যত দীৰ্ঘম্যাদী সুস্থিৰতা অনাৰ উদ্দেশ্যে ৰাষ্ট্ৰপতি ট্ৰাম্পে শনিবাৰে কেইবাখনো শক্তিশালী মুছলিম দেশৰ শীৰ্ষ পৰ্যায়ৰ নেতাসকলৰ সৈতে এক গুৰুত্বপূৰ্ণ বৈঠকত মিলিত হয়

ইৰানৰ সৈতে চলি থকা গুৰুত্বপূৰ্ণ কূটনৈতিক আলোচনাক লৈ এক ডাঙৰ আৰু তাৎপৰ্যপূৰ্ণ মন্তব্য কৰিছে আমেৰিকাৰ ৰাষ্ট্ৰপতি ডোনাল্ড ট্ৰাম্পে । ইছলামিক ৰিপাব্লিক অৱ ইৰানৰ সৈতে চলি থকা বাৰ্তালাপ বৰ্তমান অতি সুন্দৰভাৱে আগবাঢ়িছে বুলি উল্লেখ কৰি ট্ৰাম্পে সকীয়াই দিয়ে যে, এই আলোচনা হয় সকলোৰে বাবে এক ঐতিহাসিক চুক্তি হিচাপে প্ৰমাণিত হ’ব, নতুবা বিশ্বই পুনৰবাৰ এক বিধ্বংসী যুদ্ধৰ সন্মুখীন হ’ব লাগিব ।

এক বিবৃতিত ৰাষ্ট্ৰপতি ট্ৰাম্পে কয়, “এইখন হয় সকলোৰে বাবে এক অতি ডাঙৰ চুক্তি হ’ব, নতুবা কোনো চুক্তিয়েই নহ’ব । আৰু যদি চুক্তি নহয়, তেন্তে পৰিস্থিতি এনে পৰ্যায় পাবগৈ যে বিশ্ব পুনৰ যুদ্ধক্ষেত্ৰলৈ উভতি যাব । আগতকৈও অতি বৃহৎ পৰিসৰত গুলীয়াগুলী তথা যুদ্ধ আৰম্ভ হ’ব পাৰে, যিটো আচলতে কোনেও নিবিচাৰে ।” অৱশ্যে আমেৰিকাই ইৰানৰ সৈতে এক স্থায়ী সমাধানলৈ আহিবলৈ অহৰহ প্ৰচেষ্টা চলাই থকা বুলিও তেওঁ সদৰী কৰে ।

মধ্যপ্ৰাচ্যৰ সুস্থিৰতাৰ বাবে মুছলিম দেশসমূহৰ সৈতে জৰুৰী বৈঠক-

ইৰানৰ সৈতে সম্ভাৱ্য চুক্তি আৰু মধ্যপ্ৰাচ্যত দীৰ্ঘম্যাদী সুস্থিৰতা অনাৰ উদ্দেশ্যে ৰাষ্ট্ৰপতি ট্ৰাম্পে শনিবাৰে কেইবাখনো শক্তিশালী মুছলিম দেশৰ শীৰ্ষ পৰ্যায়ৰ নেতাসকলৰ সৈতে এক গুৰুত্বপূৰ্ণ বৈঠকত মিলিত হয় । এই সন্দৰ্ভত তেওঁ দাবী কৰে যে আমেৰিকাই অঞ্চলটোৰ শান্তিৰ বাবে ধাৰাবাহিকভাৱে মিত্ৰদেশসমূহৰ সৈতে যোগাযোগ ৰক্ষা কৰি চলিছে ।

ট্ৰাম্পে বাৰ্তালাপ কৰা নেতাসকলৰ ভিতৰত আছিল :

চৌদি আৰৱ: যুৱৰাজ মহম্মদ বিন চলমান আল চৌদ ।

সংযুক্ত আৰৱ আমিৰশ্বাহী (UAE): ৰাষ্ট্ৰপতি মহম্মদ বিন জায়েদ আল নাহিয়ান ।

কাটাৰ: আমিৰ তমিম বিন হমদ বিন খলিফা আল থানী, প্ৰধানমন্ত্ৰী মহম্মদ বিন আব্দুল ৰহমান বিন জচিম বিন জাবেৰ আল থানী আৰু মন্ত্ৰী আলী আল-থাৱাদী ।

পাকিস্তান: ফিল্ড মাৰ্ছল চৈয়দ আচিম মুনিৰ আহমেদ শ্বাহ ।

তুৰস্ক: ৰাষ্ট্ৰপতি ৰেচেপ তায়িপ এৰডোগান ।

ইজিপ্ত: ৰাষ্ট্ৰপতি আবদেল ফাটাহ আল-চিচি ।

জৰ্ডান: ৰজা আব্দুল্লাহ দ্বিতীয় ।

বাহৰেইন: ৰজা হমদ বিন ইছা আল খলিফা ।

‘আব্ৰাহাম চুক্তি’ত স্বাক্ষৰ কৰিবলৈ আহ্বান-

এই বৈঠকতে ৰাষ্ট্ৰপতি ট্ৰাম্পে সকলো মুছলিম দেশকে এক বিশেষ অনুৰোধ জনায় । তেওঁ সকলোকে ঐতিহাসিক ‘আব্ৰাহাম চুক্তি’ (Abraham Accords)-ত স্বাক্ষৰ কৰিবলৈ আহ্বান জনায় । ট্ৰাম্পে কয় যে মধ্যপ্ৰাচ্যৰ এই জটিল পৰিস্থিতি সমাধানৰ বাবে আমেৰিকাই কৰা সকলো প্ৰচেষ্টাৰ পিছত এতিয়া আন দেশসমূহেও আগবাঢ়ি আহি এই চুক্তিৰ অংশ হোৱাটো অত্যন্ত জৰুৰী । উল্লেখ্য যে, ইউ.এ.ই. আৰু বাহৰেইন ইতিমধ্যে এই চুক্তিৰ সক্ৰিয় অংশীদাৰ ।

ট্ৰাম্পে কয়, “হ’ব পাৰে কোনো এটা বা দুটা দেশৰ হাতত এই চুক্তিত অংশ নল’বলৈ নিজা কাৰণ থাকিব পাৰে আৰু তাক সন্মান জনোৱা হ’ব । কিন্তু বেছিভাগ দেশেই ইৰানৰ সৈতে হ’বলগীয়া এই চুক্তিক এক ঐতিহাসিক ঘটনাত পৰিণত কৰিবলৈ সাজু আৰু ইচ্ছুক হোৱা উচিত ।”

আব্ৰাহাম চুক্তিৰ সফলতাৰ দাবী-

ডোনাল্ড ট্ৰাম্পৰ মতে, আব্ৰাহাম চুক্তিত অন্তৰ্ভুক্ত হোৱা দেশসমূহে বিত্তীয়, অৰ্থনৈতিক আৰু সামাজিক ক্ষেত্ৰত অভূতপূৰ্ব লাভ অৰ্জন কৰিছে । আনকি শেহতীয়া যুদ্ধৰ পৰিস্থিতিৰ পিছতো কোনো এখন দেশে এই চুক্তিৰ পৰা ওলাই অহাৰ কথা চিন্তা কৰা নাই । ইয়াক বিশ্বৰ আটাইতকৈ গুৰুত্বপূৰ্ণ আৰু সন্মানীয় চুক্তি বুলি অভিহিত কৰি ট্ৰাম্পে আশা প্ৰকাশ কৰে যে চৌদি আৰৱ আৰু কাটাৰে তৎকালিনভাৱে ইয়াত স্বাক্ষৰ কৰি এক নতুন আৰম্ভণি কৰিব আৰু বাকী দেশসমূহেও তেওঁলোকক অনুসৰণ কৰিব ।

আন এক তাৎপৰ্যপূৰ্ণ বিষয় হিচাপে ট্ৰাম্পে স্পষ্ট কৰি দিয়ে যে, যদি পৰিস্থিতি অনুকূল হয়, তেন্তে তেওঁ ইৰানকো এই ‘আব্ৰাহাম চুক্তি’ৰ অংশ কৰাৰ বিষয়টোক সম্পূৰ্ণ সমৰ্থন কৰিব ।

লগতে পঢ়ক : মাত্ৰ কেইঘণ্টামানৰ ভিতৰতে বিশ্বই লাভ কৰিব ‘ভাল খবৰ’; আমেৰিকা-ইৰাণ যুদ্ধৰ সন্দৰ্ভত ৰুবিঅ’ই দিলে ইংগিত