১২ জুনৰ পৰা ৫ জুলাইলৈ চলিব মহিলা টি-২০ বিশ্বকাপৰ দশম সংস্কৰণ ।

১২ জুনৰ পৰা আৰম্ভ হ’ব মহিলা টি-২০ বিশ্বকাপ ২০২৬ । খিতাপৰ বাবে এই সংস্কৰণত বাৰটা দলে প্ৰতিদ্বন্দ্বিতা কৰিব । এয়া প্ৰতিযোগিতাখনৰ দশমটো সংস্কৰণ হ’ব । উদ্বোধনী খেলখন অনুষ্ঠিত হ’ব আয়োজক ইংলেণ্ড আৰু শ্ৰীলংকাৰ মাজত ।

১২ জুনৰ পৰা ৫ জুলাইলৈ চলিব মহিলা টি-২০ বিশ্বকাপৰ দশম সংস্কৰণ । বাংলাদেশ, আয়াৰলেণ্ড, স্কটলেণ্ড আৰু নেদাৰলেণ্ডে কোৱালিফায়াৰৰ জৰিয়তে মূল ড্ৰ’ৰ বাবে যোগ্যতা অৰ্জন কৰে । ১৩ জুনত অল্ড ট্ৰেফৰ্ড ক্ৰিকেট খেলপথাৰত অনুষ্ঠিত হ’ব আয়াৰলেণ্ড আৰু স্কটলেণ্ডৰ সংঘৰ্ষ । ২০ জুনত ইংলেণ্ড আৰু স্কটলেণ্ডে প্ৰথমবাৰৰ বাবে ইংৰাজ মাটিত হেডিংলিত আইচিচিৰ ইভেণ্টত মুখামুখি হ’ব ।

৫ জুলাইত বিশ্বৰ আটাইতকৈ সন্মানীয় ক্ৰিকেট খেলপথাৰ লৰ্ডছ ক্ৰিকেট খেলপথাৰত অনুষ্ঠিত হ’ব এই প্ৰতিযোগিতাৰ ফাইনেল । এই প্ৰতিযোগিতাত অভিষেক ঘটোৱা নেদাৰলেণ্ডে বাংলাদেশৰ বিৰুদ্ধে অভিযান আৰম্ভ কৰিব । ১৪ জুনত এডগবাষ্টনত ভাৰত আৰু পাকিস্তানৰ হাই ভল্টেজ মেচ অনুষ্ঠিত হ’ব ।

মহিলা টি-২০ বিশ্বকাপ ২০২৬ৰ গ্ৰুপ-

গ্ৰুপ এ : অষ্ট্ৰেলিয়া, দক্ষিণ আফ্ৰিকা, ভাৰত, পাকিস্তান, বাংলাদেশ, নেদাৰলেণ্ড

গ্ৰুপ বি : ৱেষ্ট ইণ্ডিজ, ইংলেণ্ড, নিউজীলেণ্ড, শ্ৰীলংকা, আয়াৰলেণ্ড, স্কটলেণ্ড

আইচিচি মহিলা টি-২০ বিশ্বকাপ ২০২৬ৰ সম্পূৰ্ণ সূচী-

১২ জুন (শুকুৰবাৰ): ইংলেণ্ড বনাম শ্ৰীলংকা

১৩ জুন (শনিবাৰ): স্কটলেণ্ড বনাম আয়াৰলেণ্ড, অষ্ট্ৰেলিয়া বনাম দক্ষিণ আফ্ৰিকা, ৱেষ্ট ইণ্ডিজ বনাম নিউজীলেণ্ড

১৪ জুন (দেওবাৰ): ভাৰত বনাম পাকিস্তান, বাংলাদেশ বনাম নেদাৰলেণ্ড

১৬ জুন (মঙলবাৰ): নিউজীলেণ্ড বনাম শ্ৰীলংকা, ইংলেণ্ড বনাম আয়াৰলেণ্ড

১৭ জুন (বুধবাৰ): ভাৰত বনাম নেদাৰলেণ্ড, অষ্ট্ৰেলিয়া বনাম বাংলাদেশ, দক্ষিণ আফ্ৰিকা বনাম পাকিস্তান

১৮ জুন (বৃহস্পতিবাৰ): ৱেষ্ট ইণ্ডিজ বনাম স্কটলেণ্ড

১৯ জুন (শুকুৰবাৰ): নিউজীলেণ্ড বনাম আয়াৰলেণ্ড

২০ জুন (শনিবাৰ): অষ্ট্ৰেলিয়া বনাম নেদাৰলেণ্ড, পাকিস্তান বনাম বাংলাদেশ, ইংলেণ্ড বনাম স্কটলেণ্ড

২১ জুন (দেওবাৰ): দক্ষিণ আফ্ৰিকা বনাম ভাৰত, ৱেষ্ট ইণ্ডিজ বনাম শ্ৰীলংকা

২৩ জুন (মঙলবাৰ): নিউজীলেণ্ড বনাম স্কটলেণ্ড, শ্ৰীলংকা বনাম আয়াৰলেণ্ড, অষ্ট্ৰেলিয়া বনাম পাকিস্তান

২৪ জুন (বুধবাৰ): ইংলেণ্ড বনাম ৱেষ্ট ইণ্ডিজ

২৫ জুন (বৃহস্পতিবাৰ): ভাৰত বনাম বাংলাদেশ, দক্ষিণ আফ্ৰিকা বনাম নেদাৰলেণ্ড

২৬ জুন (শুকুৰবাৰ): শ্ৰীলংকা বনাম স্কটলেণ্ড

২৭ জুন (শনিবাৰ): পাকিস্তান বনাম নেদাৰলেণ্ড, ৱেষ্ট ইণ্ডিজ বনাম আয়াৰলেণ্ড, ইংলেণ্ড বনাম নিউজীলেণ্ড

২৮ জুন (দেওবাৰ): অষ্ট্ৰেলিয়া বনাম ভাৰত, দক্ষিণ আফ্ৰিকা বনাম বাংলাদেশ

নকআউট মেচ-

৩০ জুন (মঙলবাৰ): ছেমি ফাইনেল ১

২ জুলাই (বৃহস্পতিবাৰ): ছেমি ফাইনেল ২

৫ জুলাই (দেওবাৰ): ফাইনেল

লগতে পঢ়ক : ভাৰতৰ বাবে কঠিন ছেমি ফাইনেলৰ পথ, দক্ষিণ আফ্ৰিকাৰ বিৰুদ্ধে পৰাজয়ৰ পিছত কি হ’ব সমীকৰণ ?

ছুপাৰ-৮ৰ এইখনেই আছিল ভাৰতৰ প্ৰথমখন মেচ আৰু পৰাজয়ৰ পিছত দলটোৰ ছেমি ফাইনেলত প্ৰৱেশৰ সম্ভাৱনা এতিয়া ধূসৰ হৈ পৰিছে ।

ভাৰতীয় দলে টি-২০ বিশ্বকাপ ২০২৬ৰ ছুপাৰ-৮ত দক্ষিণ আফ্ৰিকাৰ বিৰুদ্ধে পৰাজয়ৰ সন্মুখীন হয় । দেওবাৰে আহমেদাবাদৰ নৰেন্দ্ৰ মোদী ষ্টেডিয়ামত অনুষ্ঠিত হোৱা মেচখনত দক্ষিণ আফ্ৰিকাই ভাৰতক ৭৬ ৰানত পৰাস্ত কৰে । ছুপাৰ-৮ৰ এইখনেই আছিল মেন ইন ব্লুৰ প্ৰথমখন মেচ আৰু পৰাজয়ৰ পিছত দলটোৰ ছেমি ফাইনেলত প্ৰৱেশৰ সম্ভাৱনা এতিয়া ধূসৰ হৈ পৰিছে । গতিকে সূৰ্যকুমাৰ যাদৱৰ নেতৃত্বৰ টিম ইণ্ডিয়াই এতিয়া কেনেদৰে ছেমি ফাইনেলৰ পথ প্ৰশস্ত কৰিব তাকে লৈ প্ৰশ্নৰ উদয় হৈছে ।

ভাৰতীয় দলে এতিয়া ২৬ ফেব্ৰুৱাৰীত জিম্বাবুৱে আৰু ১ মাৰ্চত ৱেষ্ট ইণ্ডিজৰ বিৰুদ্ধে ছুপাৰ-৮ত পৰৱৰ্তী দুখন মেচ খেলিব লাগিব । ছেমি ফাইনেলৰ আশা সজীৱ ৰাখিবলৈ সূৰ্য ব্ৰিগেডে প্ৰথমে বাকী থকা দুয়োখন মেচতে জয়লাভ কৰিব লাগিব । তেতিয়াহে যিকোনো সমীকৰণে তেওঁলোকক ছেমি ফাইনেললৈ লৈ যাব পাৰিব ।

সমীকৰণ কি ?

ভাৰতীয় দল ছেমিফাইনেললৈ যোৱাৰ পথ দক্ষিণ আফ্ৰিকাই বাকী থকা দুয়োখন মেচতে জয়লাভ কৰাৰ ওপৰত ভিত্তি কৰিয়েই গঢ় লৈ উঠিছে । এইদৰে ভাৰতীয় দলটোৱে গ্ৰুপৰ আন দুটা দল জিম্বাবুৱে আৰু ৱেষ্ট ইণ্ডিজতকৈ আগুৱাই যাব পাৰে ।

নেট ৰান ৰেট অতি গুৰুত্বপূৰ্ণ-

দক্ষিণ আফ্ৰিকাৰ বিৰুদ্ধে প্ৰথমখন মেচত পৰাস্ত হোৱাৰ পিছত ভাৰতৰ নেট ৰান ৰেট যথেষ্ট হ্ৰাস পাই -৩.৮০০ হৈছে । গতিকে নেট ৰান ৰেটৰ বাবে আৰু যিকোনো সমস্যাৰ পৰা হাত সাৰিবলৈ বাকী থকা দুয়োখন মেচত বৃহৎ ব্যৱধানত জয়ী হ’ব লাগিব টিম ইণ্ডিয়া । যদি ভাৰতীয় দলটোৱে এনে পৰিস্থিতিত উপনীত হয় য’ত দুয়োটা দল পইণ্টৰ ক্ষেত্ৰত সমতাত থাকে আৰু নেট ৰান ৰেটৰ ওপৰত ভিত্তি কৰি সিদ্ধান্ত লোৱা হয় তেন্তে মেন ইন ব্লু লাভৱান হ’ব ।

এখন মেচত জয়ৰ সৈতে কি হ’ব সমীকৰণ ?

যদিহে ভাৰতীয় দলটোৱে ছুপাৰ-৮ৰ বাকী দুখন মেচৰ ভিতৰত এখন খেলত জয়লাভ কৰে তেন্তে ছেমিফাইনেলত প্ৰৱেশ কৰাটো কাৰ্যতঃ অসম্ভৱ হৈ পৰিব । বাকী দুখন মেচত ভাৰতীয় দলটোৱে কেনেদৰে জয়লাভ কৰে তাৰ বাবে অধীৰ আগ্ৰহেৰে বাট চাইছে অনুৰাগীয়ে ।

লগতে পঢ়ক : ছুপাৰ-৮ৰ পৰৱৰ্তী মেচৰ বাবে চেন্নাইত উপস্থিত টিম ইণ্ডিয়া, প্ৰেয়সীৰ সৈতে দেখা গ’ল হাৰ্দিক পাণ্ডিয়াক

পৰৱৰ্তী মেচৰ বাবে চেন্নাইত উপস্থিত হৈছে সূৰ্যকুমাৰ যাদৱৰ অধিনায়কত্ব থকা টিম ইণ্ডিয়া ।

দেওবাৰে দক্ষিণ আফ্ৰিকাৰ বিৰুদ্ধে টি-২০ বিশ্বকাপৰ প্ৰথমখন ছুপাৰ-৮ মেচত বেটিং ব্যৰ্থতাৰ বাবে পৰাস্ত হয় টিম ইণ্ডিয়া । যাৰ বাবে ছেমি ফাইনেলৰ পথ এতিয়া দলটোৰ বাবে কঠিন হৈ পৰিছে । এতিয়া পৰৱৰ্তী মেচৰ বাবে চেন্নাইত উপস্থিত হৈছে সূৰ্যকুমাৰ যাদৱৰ অধিনায়কত্ব থকা টিম ইণ্ডিয়া । এই সময়তে হাৰ্দিক পাণ্ডিয়াক প্ৰেয়সী মহিকা শৰ্মাৰ সৈতে বিমানবন্দৰত দেখা যায় । মেন ইন ব্লুৱে পৰৱৰ্তী সময়ত ছুপাৰ ৮ত জিম্বাবুৱেৰ বিৰুদ্ধে খেলিব ।

ভাৰতীয় দলটো চেন্নাইত উপস্থিত হোৱাৰ এটা ভিডিঅ’ প্ৰকাশ পাইছে । ভিডিঅ’টোত হাৰ্দিকক প্ৰেয়সীৰ সৈতে দেখা গৈছে। এই দৃশ্যই সকলোৰে দৃষ্টি আকৰ্ষণ কৰে । দলটোৰ বাকী সদস্যসকলকো হাৰ্দিকৰ পিছে পিছে বিমানবন্দৰৰ পৰা ওলাই অহা দেখা গৈছে । বিমানবন্দৰৰ পৰা ওলাই অহাৰ পিছত খেলুৱৈসকলে দলীয় বাছত উঠে । কেপ্তেইন সূৰ্যকুমাৰ যাদৱক তেওঁৰ পত্নী দেৱীশা শেট্টীৰ সৈতে দেখা যায় ।

২৬ ফেব্ৰুৱাৰী, বৃহস্পতিবাৰে চেন্নাইৰ এম এ চিদাম্বৰম ষ্টেডিয়ামত অনুষ্ঠিত হ’ব ভাৰত আৰু জিম্বাবুৱেৰ ছুপাৰ-৮ৰ খেলখন । সন্ধিয়া ৭:০০ বজাৰ পৰা আৰম্ভ হ’ব এই মেচ । ছেমি ফাইনেলৰ আশা সজীৱ কৰি ৰাখিবলৈ টিম ইণ্ডিয়াৰ বাবে এই মেচত জয়লাভ কৰাটো অতি গুৰুত্বপূৰ্ণ হ’ব ।

উল্লেখ্য যে আহমেদাবাদৰ নৰেন্দ্ৰ মোদী ষ্টেডিয়ামত দক্ষিণ আফ্ৰিকাৰ বিৰুদ্ধে টিম ইণ্ডিয়াই প্ৰথমখন ছুপাৰ ৮ মেচ খেলিছিল । দক্ষিণ আফ্ৰিকাই টছত জয়লাভ কৰি বেটিং কৰিবলৈ সিদ্ধান্ত লয় আৰু ২০ অভাৰত ১৮৭/৭ ৰান সংগ্ৰহ কৰে । দলটোৰ হৈ ডেভিদ মিলাৰে সৰ্বাধিক ৩৫টা বলত ৬৩ ৰান সংগ্ৰহ কৰে, য’ত ৭টা চাৰি আৰু তিনিটা ছয় আছিল ।

লক্ষ্যৰ অনুসৰণ কৰি টিম ইণ্ডিয়াই ১৮.৫ অভাৰত মাত্ৰ ১১১ ৰানতে আটাইকেইটা উইকেট হেৰুৱাই । শিৱম ডুবেই ৪২ ৰানৰ ইনিংছৰে দলটোক নেতৃত্ব দিয়ে । আনকি আন কোনো বেটছমেনে ২০ ৰানৰ ঘৰতো উপনীত হোৱাত ব্যৰ্থ হয় । ফলস্বৰূপে ছুপাৰ-৮ৰ প্ৰথমখন মেচত ৭৬ ৰানত পৰাজয়ৰ সন্মুখীন হ’বলগীয়া হয় মেন ইন ব্লু ।

লগতে পঢ়ক : সলনি হ’ব ভাৰতীয় দলৰ মূল একাদশ, জিম্বাবৱেৰ বিৰুদ্ধে সুযোগ পাব এই ১১ গৰাকীয়ে

দক্ষিণ আফ্ৰিকাৰ বিৰুদ্ধে পৰাজয়ৰ পিছত এতিয়া ছেমি ফাইনেলৰ বাট অনিশ্চিত হৈ পৰিছে ভাৰতীয় দলৰ । ইফালে দলটোৰ পৰৱৰ্তী মেচত চলিত টি-২০ বিশ্বকাপত অঘটন ঘটাই ছুপাৰ-৮ত প্ৰৱেশ কৰা জিম্বাবৱেৰ বিৰুদ্ধে আছে ।

চলিত টি-২০ বিশ্বকাপৰ ছুপাৰ-৮ পৰ্যায়ৰ প্ৰথমখন মেচত পৰাজয়ৰ সন্মুখীন হয় টিম ইণ্ডিয়া । দেওবাৰে আহমেদাবাদৰ নৰেন্দ্ৰ মোদী ষ্টেডিয়ামত দক্ষিণ আফ্ৰিকাই ভাৰতীয় দলক ৭৬ ৰানত পৰাস্ত কৰে । এইখন মেচত পৰাস্ত হোৱাৰ পিছত এতিয়া ভাৰতে ছেমি ফাইনেলত প্ৰৱেশ কৰিবলৈ বাকী থকা দুয়োখন মেচতে জয়লাভ কৰিব লাগিব । দক্ষিণ আফ্ৰিকাৰ বিৰুদ্ধে পৰাজয়ৰ পিছত ভাৰতীয় দলৰ মূল একাদশত কিছু পৰিৱৰ্তন হ’ব পাৰে ।

ছুপাৰ-৮ পৰ্যায়ত ভাৰতৰ পৰৱৰ্তী মেচ জিম্বাবৱেৰ বিৰুদ্ধে । এই খেলখন চেন্নাইৰ এম এ চিদাম্বৰম ষ্টেডিয়ামত অনুষ্ঠিত হ’ব । এই মেচৰ বাবে ইতিমধ্যে চেন্নাই উপস্থিত হৈছে ভাৰতীয় দল । যদিও জিম্বাবুৱে এটা সৰু দল, তথাপিও প্ৰতিযোগিতাখনত অষ্ট্ৰেলিয়া আৰু শ্ৰীলংকাৰ দৰে ডাঙৰ দলক পৰাস্ত কৰি ছুপাৰ-৮ পৰ্যায়ত উপনীত হৈছে দলটো । গতিকে জিম্বাবুৱেৰ বিৰুদ্ধে ভাৰতীয় দলৰ অভিযান সহজ নহ’ব ।

চেন্নাইৰ এম এ চিদাম্বৰম ষ্টেডিয়ামৰ খেলপথাৰ স্পীনাৰৰ বাবে অনুকূল বুলি বিবেচিত হৈছে । ইয়াত স্পীনাৰসকলে আধিপত্য বিস্তাৰ কৰে । গতিকে টিম ইণ্ডিয়াই তিনিজন স্পীনাৰ খেলপথাৰত নমাব পাৰে । তদুপৰি অক্ষৰ পেটেল দললৈ ঘূৰি অহাৰ সম্ভাৱনা আছে । ৱাশ্বিংটন সুন্দৰক অক্ষৰৰ সলনি অন্তৰ্ভূক্ত কৰা হৈছিল যদিও দক্ষিণ আফ্ৰিকাৰ বিৰুদ্ধে পৰাজয়ৰ পিছত এতিয়া দলৰ মূল একাদশলৈ ‘বাপু’ৰ প্ৰত্যাৱৰ্তন নিশ্চিত বুলি বিবেচিত হৈছে ।

ইফালে চলিত টি-২০ বিশ্বকাপ অভিষেক শৰ্মাৰ বাবে দুঃস্বপ্ন হিচাবে বিবেচিত হৈছে । এতিয়ালৈকে তেওঁ আশা কৰা ধৰণে প্ৰদৰ্শন কৰিব পৰা নাই । এতিয়া অভিষেকৰ ঠাইত সঞ্জু চেমচনক পৰৱৰ্তী মেচত অন্তৰ্ভূক্ত কৰাৰ বাবে চৰ্চা চলিছে । অৱশ্যে দল পৰিচালনা সমিতিয়ে অভিষেকৰ ওপৰত নিৰ্ভৰ কৰিব পাৰে, যাৰ ফলত চেমচনে অপেক্ষা কৰিব লাগিব । পৰৱৰ্তী মেচত ভাৰতীয় দলত দুটা পৰিৱৰ্তন হোৱাৰ সম্ভাৱনা আছে । অক্ষৰ পেটেল আৰু কুলদীপ যাদৱ মূল একাদশলৈ ঘূৰি অহাৰ সম্ভাৱনা আছে ।

জিম্বাবুৱেৰ বিৰুদ্ধে ভাৰতৰ সম্ভাৱ্য মূল একাদশ-

অভিষেক শৰ্মা, ঈশান কিষাণ, তিলক বাৰ্মা, সূৰ্যকুমাৰ যাদৱ (অধিনায়ক), শিৱম ডুবে, হাৰ্দিক পাণ্ডিয়া, অক্ষৰ পেটেল, কুলদীপ যাদৱ/ৱাশ্বিংটন সুন্দৰ, বৰুণ চক্ৰৱৰ্তী, অৰ্শদীপ সিং আৰু যশপ্ৰীত বুমৰাহ ।

লগতে পঢ়ক : টি-২০ বিশ্বকাপত থমকিল ভাৰতৰ বিজয় ৰথ, ছুপাৰ-৮ত দক্ষিণ আফ্ৰিকাৰ বিৰুদ্ধে শোচনীয় পৰাজয়

দক্ষিণ আফ্ৰিকাই নিজৰ মূল একাদশত চাৰিটা পৰিৱৰ্তন কৰি ভাৰতৰ বিৰুদ্ধে অৱতীৰ্ণ হৈছে ।

আহমেদাবাদৰ নৰেন্দ্ৰ মোদী ষ্টেডিয়ামত ভাৰত আৰু দক্ষিণ আফ্ৰিকাৰ মাজত অনুষ্ঠিত হৈছে টি-২০ বিশ্বকাপৰ ছুপাৰ ৮ৰ মেচ । দক্ষিণ আফ্ৰিকাই টছত জয়লাভ কৰি প্ৰথমে বেটিং কৰিবলৈ সিদ্ধান্ত লৈছে । মূল একাদশত কোনো পৰিৱৰ্তন অৱিহনে খেলপথাৰত প্ৰৱেশ কৰিছে ভাৰতে । ইফালে দক্ষিণ আফ্ৰিকাই নিজৰ মূল একাদশত চাৰিটা পৰিৱৰ্তন কৰি ভাৰতৰ বিৰুদ্ধে অৱতীৰ্ণ হৈছে ।

চলিত টি-২০ বিশ্বকাপত ভাৰতে ছুপাৰ ৮লৈ শক্তিশালী দৌৰ আগবঢ়াইছে । আমেৰিকাৰ বিৰুদ্ধে দলটো হেঁচাত পৰা যেন দেখা গৈছিল যদিও তাৰ পিছত উল্লেখযোগ্য প্ৰত্যাৱৰ্তন ঘটাইছিল । নামিবিয়াক ৯৩ ৰানত পৰাস্ত কৰি ভাৰতে নিজৰ উদ্দেশ্য স্পষ্ট কৰি দিয়ে । পাকিস্তানৰ বিৰুদ্ধে হাই ভল্টেজ মেচখনো ভাৰতৰ বাবে সহজ বুলি প্ৰমাণিত হ’ল । তদুপৰি গ্ৰুপ পৰ্যায়ৰ অন্তিমখন খেলত নেদাৰলেণ্ডক ১৭ ৰাণত পৰাস্ত কৰাৰ পাছত দলটোৱে চাৰিওখন মেচতে জয়লাভ কৰি শীৰ্ষস্থান দখল কৰে ।

ভাৰতে লক্ষ্য ৰক্ষা কৰি চাৰিওখন মেচতে জয়লাভ কৰি মাত্ৰ এবাৰহে টছত জয়লাভ কৰিছে । নেদাৰলেণ্ডৰ বিৰুদ্ধে দলটোৱে টছত জয়লাভ কৰে । ইফালে বেটিঙত ঈশান কিষানে চাৰিখন মেচত ১৭৬ ৰান আৰু ২০২.৩০ ষ্ট্ৰাইক ৰেটেৰে আগবাঢ়ি আছে । বৰুণ চক্ৰৱৰ্তীয়ে গড়ে ৬.৮৯ত ৯টা উইকেট দখল কৰি দলটোৰ সৰ্বাধিক সফল বলাৰ হিচাপে পৰিগণিত হৈছে ।

ভাৰতে এই পৰ্যন্ত মুঠ ৩৫ টা উইকেট দখল কৰিছে, ১৮ গৰাকী বেগী বলাৰ আৰু ১৭ গৰাকী স্পীনাৰে উইকেট দখল কৰিছে । মন কৰিবলগীয়া যে অভিষেক শৰ্মাই এতিয়াও এই প্ৰতিযোগিতাত কোনো ৰান সংগ্ৰহ কৰিব পৰা নাই । তথাপিও দলটোৰ প্ৰদৰ্শন আকৰ্ষণীয় ।

ভাৰতৰ মূল একাদশ : অভিষেক শৰ্মা, ঈশান কিষাণ, তিলক বাৰ্মা, সূৰ্যকুমাৰ যাদৱ, হাৰ্দিক পাণ্ডিয়া, শিৱম ডুবে, ৰিংকু সিং, ৱাশ্বিংটন সুন্দৰ, অৰ্শদীপ সিং, যশপ্ৰীত বুমৰাহ, বৰুণ চক্ৰৱৰ্তী ।

লগতে পঢ়ক : ধাৰাবাহিকভাৱে দ্বিতীয়বাৰৰ বাবে চেম্পিয়ন ভাৰতীয় দল, বাংলাদেশক পৰাস্ত কৰি জিনিলে খিতাপ

কলম্বোত পাকিস্তান আৰু নিউজীলেণ্ডৰ মাজত অনুষ্ঠিত হ’ব লগা মেচখন ধাৰাসাৰ বৰষুণৰ বাবে বাতিল হয় ।

আই চি চি টি-২০ বিশ্বকাপৰ উত্তেজনা এতিয়া চুপাৰ এইটৰ পৰ্যায়ত উপনীত হৈছে । অৱশ্যে চুপাৰ-৮ৰ প্ৰথমখন মেচ বৰষুণৰ বাবে পৰিত্যক্ত ঘোষণা কৰা হয় । শনিবাৰে কলম্বোত পাকিস্তান আৰু নিউজীলেণ্ডৰ মাজত অনুষ্ঠিত হ’ব লগা মেচখন ধাৰাসাৰ বৰষুণৰ বাবে বাতিল হয় । টছ অনুষ্ঠিত হয় যদিও বৰষুণৰ বাবে মেচখন বাতিল হয় । টছত জয়ী হৈ পাকিস্তানে প্ৰথমে বেটিং কৰিবলৈ সিদ্ধান্ত লৈছিল । কিন্তু প্ৰচণ্ড বৰষুণৰ বাবে এটাও বল নপৰিল ।

মেচ বাতিলৰ বাবে এতিয়া দুয়োটা দলে ১ পইণ্টকৈ সন্তুষ্ট হ’ব লাগিব । মেচ বাতিলৰ ফলত দুয়োটা দলৰ ওপৰত প্ৰভাৱ পৰিব । যদিও দুয়োটা দলে এটাকৈ পইণ্ট লাভ কৰিছে, তথাপিও প্ৰতিটো দলে চুপাৰ ৮ত মুঠ ৩খন মেচ খেলিব লাগিব । সেয়েহে প্ৰতিটো দলে যিমান পাৰি সিমান মেচত জয়ী হ’ব বিচাৰিব । কিন্তু বিষয়টো জটিল হৈ পৰিলে এই বৰষুণৰ সিদ্ধান্তই দল দুটাৰ ক্ষতি কৰিব পাৰে ।

উল্লেখ্য যে, পাকিস্তানৰ পৰৱৰ্তী মেচ ২৪ ফেব্ৰুৱাৰীত ইংলেণ্ডৰ বিৰুদ্ধে আছে । পাকিস্তানৰ চুপাৰ ৮ৰ অন্তিমখন খেল ২৮ ফেব্ৰুৱাৰীত শ্ৰীলংকাৰ বিৰুদ্ধে অনুষ্ঠিত হ’ব । দুয়োটা দল উৎকৃষ্ট ফৰ্মত আছে । গতিকে এই বৰষুণে পাকিস্তানৰ বাবে এক উল্লেখযোগ্য সমস্যাৰ সৃষ্টি কৰিব পাৰে ।

ইফালে নিউজীলেণ্ডৰ পৰৱৰ্তী মেচ ২৫ ফেব্ৰুৱাৰীত শ্ৰীলংকাৰ বিৰুদ্ধে, আনহাতে তেওঁলোকৰ অন্তিমখন চুপাৰ-৮ মেচ ২৭ ফেব্ৰুৱাৰীত ইংলেণ্ডৰ বিৰুদ্ধে অনুষ্ঠিত হ’ব । দুয়োটা দল এতিয়া কেনেদৰে আগবাঢ়িব সেয়া হ’ব লক্ষ্যণীয় ।

লগতে পঢ়ক : দক্ষিণ আফ্ৰিকাৰ বিৰুদ্ধে বাদ পৰিব নেকি অভিষেক শৰ্মা ? দুৰ্বল ফৰ্মক লৈ অধিনায়ক সূৰ্যকুমাৰ যাদৱে দিলে প্ৰতিক্ৰিয়া

সংবাদমেলৰ সময়ত ভাৰতীয় দলৰ অধিনায়ক সূৰ্যকুমাৰ যাদৱক অভিষেক শৰ্মাৰ দুৰ্বল ফৰ্মৰ বিষয়ে সোধা হৈছিল । অভিষেক গ্ৰুপ পৰ্যায়ৰ তিনিওখন খেলতে শূন্যত আউট হৈছে ।

টি-২০ বিশ্বকাপ ২০২৬ৰ ভাৰতৰ প্ৰথমখন ছুপাৰ ৮ মেচ ২২ ফেব্ৰুৱাৰী দেওবাৰে দক্ষিণ আফ্ৰিকাৰ বিৰুদ্ধে অনুষ্ঠিত হ’ব । ইয়াৰ পূৰ্বে শনিবাৰৰ সংবাদমেলৰ সময়ত ভাৰতীয় দলৰ অধিনায়ক সূৰ্যকুমাৰ যাদৱক অভিষেক শৰ্মাৰ দুৰ্বল ফৰ্মৰ বিষয়ে সোধা হৈছিল । অভিষেক গ্ৰুপ পৰ্যায়ৰ তিনিওখন খেলতে শূন্যত আউট হৈছে । অৱশ্যে অধিনায়ক সূৰ্যই কয় যে তেওঁ অ’পেনিং বেটছমেনক লৈ চিন্তিত নহয়, বৰঞ্চ বিপক্ষৰ দলটোক চিন্তিত ।

দেওবাৰে আহমেদাবাদৰ নৰেন্দ্ৰ মোদী ষ্টেডিয়ামত অনুষ্ঠিত হ’ব ভাৰত বনাম দক্ষিণ আফ্ৰিকা টি-২০ বিশ্বকাপ ২০২৬ ছুপাৰ ৮ৰ খেলখন । একেখন খেলপথাৰতে ভাৰতে নেদাৰলেণ্ডক পৰাস্ত কৰিছিল লগতে এই মেচতো একেৰাহে তৃতীয়বাৰৰ বাবে শূণ্যত আউট হৈছিল অভিষেক । ইয়াৰ পূৰ্বে তেওঁ আমেৰিকা আৰু পাকিস্তানৰ বিৰুদ্ধে শূণ্যত পেভিলিয়নমুখী হৈছিল । যদিও ভাৰত এতিয়ালৈকে প্ৰতিযোগিতাখনত পৰাস্ত হোৱা নাই, তথাপিও তেওঁৰ ফৰ্ম নিশ্চিতভাৱে চিন্তাৰ বিষয় । অৱশ্যে অধিনায়ক সূৰ্যকুমাৰ যাদৱে অভিষেকৰ ফৰ্মক লৈ চিন্তিত নহয় বুলি উল্লেখ কৰে ।

দক্ষিণ আফ্ৰিকাৰ বিৰুদ্ধে খেলখনৰ পূৰ্বে শনিবাৰে এখন সংবাদমেলত সূৰ্যকুমাৰে কয় যে, “অভিষেকক লৈ চিন্তিত হোৱাসকলৰ বাবে মই চিন্তিত । ভৱিষ্যতে অভিষেক শৰ্মাই কোনবোৰ দলৰ বিৰুদ্ধে খেলিব সেইবোৰৰ বাবে মই অধিক চিন্তিত । যোৱা বছৰ তেওঁ সকলো কৰিছিল, এতিয়া তেওঁৰ অৱদানৰ বাবে আমি তেওঁক পুৰস্কৃত কৰাৰ সময় আহি পৰিছে ।”

সূৰ্যকুমাৰ যাদৱে কয় যে প্ৰতিবাৰেই ২৫০ ৰান সংগ্ৰহ কৰাটো প্ৰয়োজনীয় নহয় । তেওঁ কয় যে উইকেটবোৰ অলপ বেলেগ । আগন্তুক মেচসমূহত আমি খেলপথাৰৰ প্ৰত্যাহ্বানৰ সন্মুখীন হ’ম । উল্লেখ্য যে দক্ষিণ আফ্ৰিকাৰ বিৰুদ্ধে ছুপাৰ ৮ৰ খেলখন অনুষ্ঠিত হ’বলগীয়া নৰেন্দ্ৰ মোদী ষ্টেডিয়ামত । নেদাৰলেণ্ডৰ বিৰুদ্ধে এই খেলপথাৰতে ভাৰতে জয়লাভ কৰে । অৱশ্যে দক্ষিণ আফ্ৰিকাইও চলিত সংস্কৰণত এই খেলপথাৰত দুখন মেচ খেলি দুয়োখন খেলতে জয়লাভ কৰিছে ।

লগতে পঢ়ক : ঘৰৰ মাটিতে ভাৰতৰ বিৰুদ্ধে টি-২০ শৃংখলা হেৰুৱালে অষ্ট্ৰেলিয়াই, স্মৃতি মন্ধানাই ভংগ কৰিলে ছবছৰীয়া অভিলেখ

দেওবাৰে ছুপাৰ এইটৰ নিজৰ প্ৰথমখন মেচত দক্ষিণ আফ্ৰিকাৰ মুখামুখি হ’ব ভাৰতীয় দল

চলিত টি-২০ বিশ্বকাপত গ্ৰুপ পৰ্য়ায়ৰ আটাইকেইখন মেচতে জয়লাভ কৰি ছুপাৰ এইটত প্ৰৱেশ কৰিছে সূৰ্যকুমাৰ যাদৱ নেতৃত্বাধীন ভাৰতীয় দল । দেওবাৰে ছুপাৰ এইটৰ নিজৰ প্ৰথমখন মেচত দক্ষিণ আফ্ৰিকাৰ মুখামুখি হ’ব ভাৰতীয় দল । কিন্তু গুৰুত্বপূৰ্ণ এই মেচখনৰ পূৰ্বে কিছু সমস্যাত পৰিছে দলটো । অনুশীলনৰ সময়ত আঘাতপ্ৰাপ্ত হৈছে দলৰ তাৰকা বলাৰ মহম্মদ চিৰাজ । চিৰাজৰ এই আঘাতে চিন্তা বৃদ্ধি কৰিছে মেনেজমেন্টৰ ।

প্ৰকাশিত এক প্ৰতিবেদন অনুসৰি শুকুৰবাৰে অনুশীলনৰ সময়ত আঘাতপ্ৰাপ্ত হয় বেগী বলাৰগৰাকী । নেটত অনুশীলনৰ সময়ত অলৰাউণ্ডাৰ হাৰ্দিক পাণ্ডিয়াৰ এটা বলে তীব্ৰ বেগত চিৰাজক আঁঠুত আঘাত কৰে আৰু তেওঁ লগে লগে মাটিত বহি পৰে । আঘাতৰ পিছতে চিৰাজে খেলপথাৰো ত্যাগ কৰে । চিৰাজৰ এই আঘাতে এতিয়া দলৰ চিন্তা বৃদ্ধি কৰিছে ।

উল্লেখ্য যে, হৰ্ষিত ৰানা আঘাতপ্ৰাপ্ত হৈ বাহিৰ হোৱাৰ পিছত ভাৰতৰ টি-২০ বিশ্বকাপৰ দলত অন্তিম পৰ্যায়ত স্থান লাভ কৰিছিল মহম্মদ চিৰাজে । চলিত প্ৰতিযেগিতাখনত এতিয়ালৈকে চিৰাজে কেৱল এখন মেচ খেলিছে যদিও ছুপাৰ এইট পৰ্যায়ৰ বাবে তেওঁ সুস্থ হৈ উঠাটো অত্যন্ত জৰুৰী ।

ইউ এছ এৰ বিৰদ্ধে অনুষ্ঠিত গ্ৰুপ পৰ্যায়ৰ খেলখনত দলত স্থান লাভ কৰা চিৰাজে মেচখনত ২৯ ৰানৰ বিনিময়ত তিনিটা উইকেট দখল কৰিছিল ।

লগতে পঢ়ক : অভিষেক শৰ্মা নে তিলক বৰ্মা? দক্ষিণ আফ্ৰিকাৰ বিৰুদ্ধে টিম ইণ্ডিয়াৰ প্লেইং ১১ৰ পৰা কাক দিয়া হ’ব বাদ?

যদি অনুমান কৰা সমীকৰণ সঁচা হয় তেন্তে চলিত টি-২০ বিশ্বকাপত অনুগাৰীসকল পুনৰ ভাৰত-পাকিস্তান মেচৰ সাক্ষী হ’ব পাৰে ।

টি-২০ বিশ্বকাপ ২০২৬ক লৈ অনুৰাগীৰ মাজৰ উত্তেজনা এতিয়া তুংগত উঠিছে । এতিয়ালৈকে এই বিশ্বকাপত কেইবাখনো উতেতজনাপূৰ্ণ তথা হাইভল্টেজ খেল দেখা গৈছে । ২০২১ চনৰ চেম্পিয়ন অষ্ট্ৰেলিয়া গ্ৰুপ পৰ্যায়ৰ পৰা বাহিৰ হোৱাটো আছিল চলিত এই প্ৰতিযগিতাৰ আটাইতকৈ ডাঙৰ অঘটন । ইফালে জিম্বাবুৱেই নিজৰ প্ৰদৰ্শনেৰে সকলোকে আপ্লুত কৰিছে । বহু দলে ছুপাৰ এইটৰ বাবে যোগ্যতা অৰ্জন কৰা নাছিল যদিও তেওঁলোকৰ খেলুৱৈসকলে বেট আৰু বল দুয়োটাৰে শিৰোনাম দখল কৰিছে । প্ৰতিযোগিতা আৰম্ভ হোৱাৰ পূৰ্বে কেইবাটাও বিতৰ্কৰ সৃষ্টি হৈছিল যদিও এই সকলোবোৰ ভাৰত আৰু পাকিস্তানৰ মাজত হোৱা মেচখনেৰে নিষ্পত্তি হৈছিল ।

ইফালে গ্ৰুপ এৰ এখন খেলত তীব্র প্ৰতিদ্বন্দ্বী পাকিস্তানক ৬১ ৰাণত পৰাস্ত কৰি টিম ইণ্ডিয়াই চবুৰীয়া দেশখনৰ দৰ্প চূৰ্ণ কৰে । প্ৰতিযোগিতা আৰম্ভ হোৱাৰ পূৰ্বে পাকিস্তানে ভাৰতৰ বিৰুদ্ধে খেলখন বৰ্জন কৰাৰ কথা ঘোষণা কৰিছিল, যাৰ বাবে ক্ৰিকেট পণ্ডিত আৰু অনুৰাগীৰ ব্যাপক সমালোচনাৰ সৃষ্টি হৈছিল । আই চি চিৰ ধমকৰ আশংকাত পাকিস্তানে প্ৰতিযোগিতা আৰম্ভ হোৱাৰ ঠিক আগতেই ইউ টাৰ্ণ মাৰি ভাৰতৰ বিৰুদ্ধে খেলিবলৈ সন্মত হয় ।

গ্ৰুপ পৰ্যায়ত ভাৰতে পাকিস্তানক পৰাস্ত কৰে যদিও এতিয়া পুনৰ চিৰ প্ৰতিদ্বন্দ্বি এই দুয়োখন দেশৰ মাজত টি-২০ বিশ্বকাপ ২০২৬ত মুখামুখি হোৱাৰ সম্ভাৱনা ব্যক্ত কৰিছে একাংশ বিশেষজ্ঞই । যদি অনুমান কৰা সমীকৰণ সঁচা হয় তেন্তে চলিত টি-২০ বিশ্বকাপত অনুগাৰীসকল পুনৰ ভাৰত-পাকিস্তান মেচৰ সাক্ষী হ’ব পাৰে ।

গ্ৰুপ পৰ্যায়ৰ শীৰ্ষত ভাৰত, দ্বিতীয় স্থানত পাকিস্তান-

ভাৰতীয় দলটোৱে গ্ৰুপ এৰ সকলো খেলতে জয়লাভ কৰি পইণ্ট তালিকাৰ শীৰ্ষত স্থান লাভ কৰিছে । ইফালে পাকিস্তানে গ্ৰুপ এত চাৰিখন খেলৰ তিনিখন খেলত জয়লাভ কৰি দ্বিতীয় স্থান দখল কৰে । ছুপাৰ এইটত প্ৰৱেশ কৰিবলৈ যথেষ্ট কষ্ট কৰিছিল যদিও নামিবিয়াৰ বিৰুদ্ধে অন্তিমখন খেলত জয়লাভ কৰি ছুপাৰ এইটৰ বাবে যোগ্যতা অৰ্জন কৰিবলৈ সক্ষম হৈছিল দলটোৱে । ২০০৯ চনৰ টি-২০ চেম্পিয়ন পাকিস্তানে অসংখ্য ত্ৰুটি প্ৰদৰ্শন কৰিছিল আৰু প্ৰথম মেচতে নেদাৰলেণ্ডৰ হাতত পৰাস্ত হোৱা হ’লে প্ৰতিযোগিতাৰ পৰা বাহিৰ হ’লহেঁতেন । পাকিস্তানে নেদাৰলেণ্ডৰ বিৰুদ্ধে গ্ৰুপ এ মেচত তিনিটা বল বাকী থকা অৱস্থাত জয়লাভ কৰে ।

আকৌ হ’ব নেকি ভাৰত-পাকিস্তান মেচ ?

এই প্ৰতিযোগিতাত ২০ টা দলে অংশগ্ৰহণ কৰিছে । সকলো দলকে পাঁচটাকৈ দলৰ চাৰিটা গোটত ভাগ কৰা হৈছিল । প্ৰতিটো গ্ৰুপৰ পৰা শীৰ্ষ দুটা দলে ছুপাৰ এইট ৰাউণ্ডৰ বাবে যোগ্যতা অৰ্জন কৰে । ছুপাৰ এইট ৰাউণ্ডত এতিয়া চাৰিটাকৈ দলৰ দুটা গ্ৰুপ আছে আৰু আইচিচিয়ে ইতিমধ্যে প্ৰস্তুত তালিকা অনুসৰি দল নিৰ্ধাৰণ কৰা হৈছে । ছুপাৰ এইট ৰাউণ্ডত ভাৰতক গ্ৰুপ ১ত স্থান দিয়াৰ বিপৰীতে পাকিস্তানক গ্ৰুপ ২ত স্থান দিয়া হৈছে । টিম ইণ্ডিয়াৰ গ্ৰুপত ৱেষ্ট ইণ্ডিজ, দক্ষিণ আফ্ৰিকা আৰু জিম্বাবুৱে অন্তৰ্ভুক্ত আছে । পাকিস্তানৰ গ্ৰুপত ইংলেণ্ড, নিউজিলেণ্ড আৰু শ্ৰীলংকা আছে ।

ছুপাৰ এইট ৰাউণ্ডত প্ৰতিটো গ্ৰুপৰ পৰা এটা দলে নিজৰ গ্ৰুপৰ বাকী তিনিটা দলৰ বিৰুদ্ধে এখন মেচ খেলিব । যিহেতু ভাৰত আৰু পাকিস্তান দুটা বেলেগ বেলেগ গোটত আছে, গতিকে দল দুটা মুখামুখি নহয় । ছুপাৰ এইটৰ দুয়োটা গ্ৰুপৰ শীৰ্ষ দুটা দলে ছেমি ফাইনেলত প্ৰৱেশ কৰিব । অৱশ্যে ছেমি ফাইনেলত ভাৰত আৰু পাকিস্তানৰ মাজত সংঘৰ্ষৰ সম্ভাৱনা নথকা নহয় । যদি ভাৰত আৰু পাকিস্তানে নিজ নিজ গ্ৰুপত শীৰ্ষ দুটা স্থানত অন্ত পেলায় তেন্তে ছেমি ফাইনেলত সংঘৰ্ষ হ’ব পাৰে ।

ছেমিফাইনেল মেচৰ সমীকৰণ-

ছেমিফাইনেল ফৰ্মেটটো এটা ক্ৰছ অভাৰ ব্যৱস্থাৰ ওপৰত ভিত্তি কৰি তৈয়াৰ কৰা হৈছে :

গ্ৰুপ ১ৰ শীৰ্ষ দল বনাম গ্ৰুপ ২ৰ দ্বিতীয় স্থানৰ দল ।

গ্ৰুপ ২ৰ শীৰ্ষ দল বনাম গ্ৰুপ ১ৰ দ্বিতীয় স্থানৰ দল ।

ভাৰত-পাকিস্তানে কেনেকৈ ছেমি ফাইনেল খেলিব ?

প্ৰথম সমীকৰণ-

-নিজৰ গ্ৰুপত প্ৰথম স্থান দখল কৰিছে ভাৰতে ।

-এই গ্ৰুপত দ্বিতীয় স্থান লাভ কৰিছে পাকিস্তানে ।

-এনে ক্ষেত্ৰত দুয়োটা দল ছেমি ফাইনেলত মুখামুখি হ’ব পাৰে ।

দ্বিতীয় সমীকৰণ-

নিজৰ গ্ৰুপত প্ৰথম স্থানত আছে পাকিস্তান ।

-তেওঁলোকৰ গ্ৰুপত দ্বিতীয় স্থান লাভ কৰিছে ভাৰতে ।

-তেতিয়াও ছেমিফাইনেলত সংঘৰ্ষ সম্ভৱপৰ ।

দুয়োটা ছেমি ফাইনেল কেতিয়া নহয় ?

-যদি দুয়োটা দলে নিজৰ নিজৰ গ্ৰুপত প্ৰথম স্থান লাভ কৰে ।

-যদি দুয়োটা দলে নিজ নিজ গ্ৰুপত দ্বিতীয় স্থান লাভ কৰে ।

-এনে ক্ষেত্ৰত ছেমি ফাইনেলত ইটোৱে সিটো দলৰ বিৰুদ্ধে খেলিব নোৱাৰিব ।

একেটা স্থানত ফাইনেলত সংঘৰ্ষৰ পথ মুকলি কৰিব-

যদি দুয়োটা দলে একেটা স্থানতে ছুপাৰ ৮ স্থানত অন্ত পেলায় (যেনে, দুয়োটা প্ৰথম বা দুয়োটা দ্বিতীয়), তেন্তে তেওঁলোকে পৃথক ছেমি ফাইনেল খেলিব । যদি দুয়োজনে নিজ নিজ ছেমি ফাইনেলত জয়লাভ কৰে তেন্তে ফাইনেলখন হ’ব পাৰে ভাৰত বনাম পাকিস্তানৰ গ্ৰেণ্ড প্ৰতিযোগিতা ।

লগতে পঢ়ক : ৰোমাঞ্চকৰ পৰ্যায়ত টি-২০ বিশ্বকাপঃ ছুপাৰ ৮ত মুখামুখি হ’ব তালিকাৰ শীৰ্ষ চাৰি দল