বাংলাদেশক আইচিচিয়ে বান্ধি দিয়া সময়সীমা আজি উকলিব । কিন্তু এতিয়াও এই সন্দৰ্ভত কোনো সদুত্তৰ দিয়া নাই বিচিবিয়ে ।

২০২৬ চনৰ টি-২০ বিশ্বকাপত অংশগ্ৰহণৰ বাবে বাংলাদেশক বান্ধি দিয়া সময়সীমা বুধবাৰে সমাপ্ত হ’ব । ১৭ জানুৱাৰীত ঢাকাত অনুষ্ঠিত এখন বৈঠকত আইচিচিয়ে বাংলাদেশ ক্ৰিকেট ব’ৰ্ডক ২১ জানুৱাৰীৰ ভিতৰত চূড়ান্ত সিদ্ধান্ত ঘোষণা কৰিবলৈ নিৰ্দেশ দিছিল । এই সময়সীমা এতিয়া শেষ হোৱাৰ উপক্ৰম হৈছে যদিও বাংলাদেশ ক্ৰিকেটে এতিয়াও কোনো সিদ্ধান্ত গ্ৰহণ কৰিব পৰা নাই । তেওঁলোক এতিয়াও মৌন হৈ আছে আৰু এই মৌনতা অব্যাহত থাকিলে ২০২৬ চনৰ টি-২০ বিশ্বকাপৰ পৰা বাংলাদেশ বাদ পৰিব পাৰে ।

চূড়ান্ত সিদ্ধান্ত কি হ’ব ?

আইচিচিৰ সৈতে হোৱা অন্তিমখন বৈঠকত বাংলাদেশ ক্ৰিকেট ব’ৰ্ডে নিজৰ দাবীক লৈ অটল আছিল । ইয়াত উল্লেখ কৰা হৈছিল যে তেওঁলোকে প্ৰতিযোগিতাখনত খেলিব বিচাৰে, কিন্তু এই চৰ্তত যে ইয়াৰ মেচসমূহ ভাৰতৰ বাহিৰত, প্ৰতিযোগিতাখনৰ দ্বিতীয় আয়োজক শ্ৰীলংকাত অনুষ্ঠিত হ’ব । সেই বৈঠকত বাংলাদেশে ভাৰতত খেলিব নোৱাৰাৰ কাৰণ হিচাপে নিজৰ খেলুৱৈৰ সুৰক্ষাৰ কথা উল্লেখ কৰিছিল ।

তদুপৰি বাংলাদেশে আইচিচিৰ গ্ৰুপিং সলনি কৰিবলৈয়ো দাবী জনায় । আয়াৰলেণ্ডৰ সৈতে গ্ৰুপ সলনি কৰাটো বিচাৰিছিল বিচিবিয়ে । বাংলাদেশ গ্ৰুপ চিত থকাৰ বিপৰীতে আয়াৰলেণ্ড গ্ৰুপ বিত আছে, যিয়ে শ্ৰীলংকাত সকলো খেল খেলিব লাগিব । এই কাৰণেই বাংলাদেশে এই দাবী উত্থাপন কৰিছিল ।

উকলিব আইচিচিৰ সময়সীমা-

কিন্তু বাংলাদেশৰ এই দাবীত কোনো প্ৰভাৱিত কৰা নাই আইচিচিক । আন্তঃৰাষ্ট্ৰীয় ক্ৰিকেট সংস্থাই লগে লগে স্পষ্ট কৰি দিয়ে যে সূচী বা গ্ৰুপিং দুয়োটাৰে কোনো পৰিৱৰ্তন নহ’ব । ইয়াৰ পিছতেই আইচিচিয়ে বিচিবিক ২১ জানুৱাৰীৰ ভিতৰত চূড়ান্ত সিদ্ধান্তত উপনীত হ’বলৈ নিৰ্দেশ জাৰি কৰে ।

যদি বাংলাদেশ নহয়, তেন্তে কোন ?

এতিয়া প্ৰশ্ন হয় বাংলাদেশ যদি এই প্ৰতিযোগিতাৰ পৰা বাদ পৰে তেন্তে কাক স্থলাভিষিক্ত কৰা হ’ব ?  আজি বাংলাদেশ ক্ৰিকেট দলৰ বাবে সিদ্ধান্তৰ দিন আৰু যদি সিদ্ধান্ত তেওঁলোকৰ পক্ষত নহয় তেন্তে স্কটলেণ্ডক খেলাৰ সুযোগ দিয়া হ’ব পাৰে । নিজৰ ৰেংকিঙৰ ভিত্তিত ২০২৬ চনৰ টি-২০ বিশ্বকাপত বাংলাদেশৰ ঠাই ল’ব পাৰে স্কটলেণ্ডে । অৱশ্যে এই সন্দৰ্ভত আইচিচিয়ে এতিয়াও স্কটিছ ক্ৰিকেট ব’ৰ্ডৰ সৈতে যোগাযোগ কৰা নাই বুলি বাতৰি প্ৰকাশ পাইছে ।

লগতে পঢ়ক : উত্তৰ দিয়াটো নিৰাপদ নহয়… ভাৰতত টি-২০ বিশ্বকাপ খেলাক লৈ মৌনতা ভংগ বাংলাদেশৰ অধিনায়কৰ

ভাৰতত অনুষ্ঠিত হ’বলগীয়া টি-২০ বিশ্বকাপ সন্দৰ্ভত বাংলাদেশ ক্ৰিকেট ব’ৰ্ডৰ সিদ্ধান্তত দৃঢ়।ইফালে ICC এ স্থান সলনি কৰাৰ দাবী নাকচ কৰিছে।

ভাৰত-বাংলাদেশৰ বিবাদৰ মাজতে টি-২০ বিশ্বকাপ সন্দৰ্ভত আন্তঃৰাষ্ট্ৰীয় ক্ৰিকেট পৰিষদ (ICC) ৰ বাবে নতুন অসুবিধাৰ সৃষ্টি হৈছে।

ভাৰতীয় ক্ৰিকেট নিয়ন্ত্ৰণ ব’ৰ্ডে কলকাতা নাইট ৰাইডাৰ্ছে ক্ৰয় কৰা বাংলাদেশী খেলুৱৈ মুস্তাফিজুৰ ৰহমানক আই পি এলৰ পৰা বাদ দিয়াৰ পিছত উত্তেজনা বৃদ্ধি পাইছে।

বাংলাদেশে বিশ্বৰ সৰ্ববৃহৎ লীগৰ সম্প্ৰচাৰ নিষিদ্ধ কৰি এতিয়া ভাৰতত টি-২০ বিশ্বকাপৰ মেচ খেলিবলৈ অস্বীকাৰ কৰিছে।

ইয়াৰ মেচসমূহ শ্ৰীলংকালৈ স্থানান্তৰিত কৰিবলৈ ICC লৈ পত্ৰ লিখিছিল,কিন্তু তেওঁলোকৰ দাবী সম্পূর্ণৰূপে নাকচ কৰিলে বৃহত্তম ক্ৰিকেট সংস্থাটোৱে।

বাংলাদেশ চৰকাৰৰ ক্ৰীড়া উপদেষ্টা আজিফ নাজৰুলে কয় যে দেশৰ সন্মানৰ মূল্যত দলটোৱে টি-২০ বিশ্বকাপত অংশগ্ৰহণ নকৰে।

বুধবাৰে অনুষ্ঠিত হোৱা বৈঠকৰ অন্তত নজৰুলে কয় ‘আমি BCB ৰ পৰিচালক – বুলবুল (আমিনুল ইছলাম) ভাই, ফাৰুক ভাই আৰু সকলোৰে সৈতে বহিলোঁ’।

‘আজি আমি পৰিস্থিতিৰ বিষয়ে আলোচনা কৰিলোঁ আৰু আমি সকলোৱে একমত হ’লোঁ যে বাংলাদেশে কঠোৰ পৰিশ্ৰমেৰে টি-২০ বিশ্বকাপৰ বাবে যোগ্যতা অৰ্জন কৰিছে।আমি ক্ৰিকেটৰ উন্মাদ জাতি আৰু আমি নিশ্চিতভাৱে খেলিব বিচাৰো।

তেওঁ লগতে কয় যে, “আমি জাতীয় অপমান, আমাৰ ক্ৰিকেটাৰ, দৰ্শক আৰু সাংবাদিকৰ সুৰক্ষাৰ মূল্যত বা দেশৰ মৰ্যাদাৰ মূল্যত বিশ্বকাপ খেলিব নিবিচাৰো”।

“আজি আই চি চিৰ পৰা পোৱা পত্ৰখন পঢ়ি আমি অনুভৱ কৰিলোঁ যে তেওঁলোকে বাংলাদেশী ক্ৰিকেটাৰৰ বাবে ভাৰতৰ ভয়াৱহ নিৰাপত্তা পৰিস্থিতি সম্পূৰ্ণৰূপে বুজি পোৱা নাই”।

“বাংলাদেশে নিজৰ স্থিতিত দৃঢ়তাৰে থিয় দিছে আৰু বৃহস্পতিবাৰ বা শুকুৰবাৰে আইচিচিলৈ আন এখন পত্ৰ প্ৰেৰণ কৰিব”।

বিচিবিৰ অধ্যক্ষগৰাকীয়ে নিজৰ বিবৃতিত কয় যে আইচিচিয়ে তেওঁলোকৰ দাবী মানি ল’বলৈ অস্বীকাৰ কৰাটো অপপ্ৰচাৰ আৰু ভুৱা বাতৰি।

মই জনাত – আইচিচিয়ে বিচিবিলৈ লিখিছে যে তেওঁলোকে অতিৰিক্ত নিৰাপত্তা প্ৰদান কৰিব,সেয়ে তেওঁলোকে কোনো কথাতে চিন্তা কৰিব নালাগে আৰু ভাৰতত খেলিব নোৱাৰাৰ সিদ্ধান্ত পুনৰ বিবেচনা কৰিব লাগে।

লগতে পঢ়ক: টি-২০ বিশ্বকাপৰ বাবে আহিবই লাগিব ভাৰত, অন্যথা… বাংলাদেশৰ দাবী নাকচ আই চি চিৰ