ICC টি-২০ বিশ্বকাপ ২০২৬ অহা ৭ ফেব্ৰুৱাৰীৰ পৰা আৰম্ভ হ’ব। বিশ্বকাপৰ স্থান সন্দৰ্ভত এতিয়া বাংলাদেশলৈ যাব ICC ৰ প্ৰতিনিধি দল
ভাৰত আৰু শ্ৰীলংকাই যৌথভাৱে আয়োজন কৰা ICC টি-২০ বিশ্বকাপ ২০২৬ অহা ৭ ফেব্ৰুৱাৰীৰ পৰা আৰম্ভ হ’ব,যাৰ বাবে প্ৰস্তুতি তুংগত উঠিছে।
একে সময়তে বাংলাদেশ ক্ৰিকেট দলে এই মেগা ইভেণ্টত অংশগ্ৰহণ কৰিব নে নকৰে সেয়া এতিয়াও স্পষ্ট হোৱা নাই।
বি চি চি আইৰ ফালৰ পৰা মুস্তাফিজুৰ ৰহমানক আই পি এলৰ পৰা মুকলি কৰি দিয়াৰ সিদ্ধান্ত ঘোষণা হোৱাৰ পিছতে বিচিবিয়ে ইয়াক লৈ অতিশয় ক্ষোভ প্ৰকাশ কৰিছিল।
ইয়াৰ পিছত তেওঁলোকে নিজৰ খেলুৱৈসকলৰ সুৰক্ষাৰ কথা উল্লেখ কৰি আই চি চিক টি-২০ বিশ্বকাপৰ মেচসমূহ ভাৰতৰ পৰিৱৰ্তে আন কোনো স্থানলৈ স্থানান্তৰিত কৰিবলৈ অনুৰোধ জনাইছিল।
কিন্তু এতিয়ালৈকে এই সন্দৰ্ভত কোনো সিদ্ধান্ত লোৱা হোৱা নাই।এতিয়া ICC এ এই বিষয়ত বিচিবিৰ সৈতে পোনপটীয়াকৈ কথা পাতিব।
টি-২০ বিশ্বকাপ ২০২৬ৰ আনুষ্ঠানিক সূচী অনুসৰি বাংলাদেশৰ দলে ভাৰতত নিজৰ সকলো খেল খেলিব লাগিব।একে সময়তে আই চি চিৰ অনুৰোধত তেওঁলোকৰ খেলুৱৈৰ সুৰক্ষাৰ সম্পূৰ্ণ নিশ্চয়তাও দিয়া হৈছে।
কিন্তু ইয়াৰ পিছতো বাংলাদেশ ক্ৰিকেট ব’ৰ্ডে প্ৰতিযোগিতাখনত অংশগ্ৰহণৰ ক্ষেত্ৰত এতিয়াও সিদ্ধান্ত ল’ব পৰা নাই।
আইচিচিৰ এক সূত্ৰই এক বিবৃতিত প্ৰকাশ কৰি কৈছে যে,অহা কেইদিনমানৰ ভিতৰত আই চি চিয়ে শীঘ্ৰে বাংলাদেশলৈ প্ৰতিনিধি দল প্ৰেৰণ কৰিব,য’ত তেওঁলোকে টি-২০ বিশ্বকাপ সন্দৰ্ভত বিচিবিৰ বিষয়াসকলৰ সৈতে প্ৰত্যক্ষ আলোচনাত মিলিত হ’ব আৰু তাৰ পিছতহে কোনো সিদ্ধান্ত ঘোষণা কৰা হ’ব।
লগতে পঢ়ক: এক্সন মোডত বাংলাদেশ ক্ৰিকেট বৰ্ড ; উচ্চ পদৰ পৰা আঁতৰাই দিয়া হ’ল ‘বিতৰ্কিত’ নাজমুল ইছলামক
