জুবিন গাৰ্গ ঘটনাৰ গোচৰৰ সকলো অভিযুক্তৰ বিৰুদ্ধে আনুষ্ঠানিকভাৱে অভিযোগ গঠন তথা চাৰ্জ ফ্ৰেম কৰে ফাষ্ট-ট্ৰেক আদালতে

সোমবাৰে ফাষ্ট-ট্ৰেক আদালতে জুবিন গাৰ্গ ঘটনাৰ গোচৰৰ সকলো অভিযুক্তৰ বিৰুদ্ধে আনুষ্ঠানিকভাৱে অভিযোগ গঠন তথা চাৰ্জ ফ্ৰেম কৰে । আটাইতকৈ গুৰুত্বপূৰ্ণ কথাটো হ’ল, মূল অভিযুক্ত হিচাপে চিহ্নিত চাৰিজন ব্যক্তিৰ বিৰুদ্ধে ভাৰতীয় ন্যায় সংহিতা (BNS)-ৰ অধীনত পোনপটীয়াকৈ হত্যাৰ গোচৰত অভিযুক্ত কৰা হৈছে ।

ন্যায়াধীশ শৰ্মিলা ভূঞাৰ নেতৃত্বত বহা বিশেষ আদালতে গোচৰটোৰ তদন্তকাৰীকাৰী দলে দাখিল কৰা অভিযোগনামা (Chargesheet) পৰীক্ষা কৰি সকলো সাতজন অভিযুক্তৰ বিৰুদ্ধেই আইনগত ব্যৱস্থা গ্ৰহণৰ প্ৰক্ৰিয়া ক্ষীপ্ৰ কৰি তুলিছে ।

কাক, কি ধাৰাত অভিযুক্ত কৰা হৈছে ?

আদালতৰ শুনানিৰ অন্তত বিশেষ চৰকাৰী অধিবক্তা জিয়াউল কামাৰে সাংবাদিকৰ আগত সমগ্ৰ আইনী প্ৰক্ৰিয়াটো দাঙি ধৰে । অভিযোগকাৰী পক্ষৰ তথ্য অনুসৰি অভিযুক্তসকলৰ বিৰুদ্ধে থকা ধাৰাসমূহ তলত উল্লেখ কৰা হ’ল :

-হত্যা আৰু ষড়যন্ত্ৰৰ গোচৰ (ধাৰা ১০৩, ৩ আৰু ৬১): শ্যামকানু মহন্ত, জুবিন গাৰ্গৰ মেনেজাৰ সিদ্ধাৰ্থ শৰ্মা, বেণ্ডৰ সতীৰ্থ শেখৰ জ্যোতি গোস্বামী আৰু সহ-গায়িকা অমৃতপ্ৰভা মহন্ত ।

অতিৰিক্ত গুৰুতৰ অভিযোগসমূহ :

-শ্যামকানু মহন্ত : ধাৰা ৩০৮ (জবৰদস্তি ধন আদায়), ৩১৮ (প্ৰতাৰণা), আৰু ২৩৮ (প্ৰমাণ নষ্ট কৰা)।

-সিদ্ধাৰ্থ শৰ্মা আৰু শেখৰ জ্যোতি গোস্বামী: ধাৰা ৩১৬ (অপৰাধমূলক বিশ্বাসভংগ)।

-অমৃতপ্ৰভা মহন্ত: ধাৰা ২৩৮ (প্ৰমাণ নষ্ট কৰা)।

-অন্যান্য সহযোগী অভিযুক্ত: জুবিনৰ সম্বন্ধীয় ভাতৃ সন্দীপন গাৰ্গৰ বিৰুদ্ধে ধাৰা ১০৫ আৰু তেওঁৰ দুই ব্যক্তিগত নিৰাপত্তাৰক্ষী নন্দেশ্বৰ বৰা আৰু প্ৰবীণ বৈশ্যক ধাৰা ৬১ (ষড়যন্ত্ৰ) আৰু ৩১৬ (বিশ্বাসভংগ)-ৰ অধীনত অভিযুক্ত কৰা হৈছে ।

বিশেষ চৰকাৰী অধিবক্তাৰ অনুসৰি – “আজি আদালতে অভিযোগনামাত নাম থকা সকলো অভিযুক্তৰে বিৰুদ্ধে ধাৰা স্পষ্ট কৰি অভিযোগ গঠন প্ৰক্ৰিয়া সম্পূৰ্ণ কৰিছে । অহা ৮ জুনৰ পৰা এই সমগ্ৰ গোচৰটোৰ মূল বিচাৰ প্ৰক্ৰিয়া (Trial) আনুষ্ঠানিকভাৱে আৰম্ভ হ’ব ।”

লগতে পঢ়ক : “তেওঁলোকৰ মুখৰ পৰা ‘মায়াবিনী’ নহয়, ‘দয়াবিনী’হে ওলাল”- জুবিনক লৈ বিৰোধীক তীব্ৰ আক্ৰমণ হিমন্ত বিশ্ব শৰ্মাৰ

জুবিন গাৰ্গৰ মৃত্যুৰ গোচৰৰ সন্দৰ্ভত এক গুৰুত্বপূৰ্ণ আপডেট প্ৰকাশ পাইছে

জনপ্ৰিয় শিল্পী জুবিন গাৰ্গৰ মৃত্যুৰ গোচৰৰ সন্দৰ্ভত এক গুৰুত্বপূৰ্ণ আপডেট প্ৰকাশ পাইছে । এই গোচৰৰ অন্যতম অভিযুক্ত শ্যামকানু মহন্তৰ জামিন আবেদনৰ ওপৰত গুৱাহাটী উচ্চ ন্যায়ালয়ে নিজৰ ৰায়দান অহা ২৯ মে’লৈ সংৰক্ষিত ৰাখিছে ।

সমগ্ৰ ৰাজ্যবাসীৰ তীক্ষ্ণ নজৰ থকা এই হাই-প্ৰফাইল গোচৰটোৰ শুনানি শেহতীয়াকৈ উচ্চ ন্যায়ালয়ৰ ন্যায়াধীশ মিতালী ঠাকুৰীয়াৰ আদালত কক্ষত অনুষ্ঠিত হয় । উল্লেখযোগ্য যে, গোচৰটোৰ এইয়া আছিল তৃতীয় পৰ্যায়ৰ শুনানি । ইয়াৰ পূৰ্বে যোৱা ১৫ মে’ আৰু ২২ মে’ত অনুষ্ঠিত হোৱা শুনানিত অভিযুক্ত মহন্তৰ আইনী প্ৰতিনিধিয়ে জামিন লাভৰ বাবে আদালতত কেইবাখনো অতিৰিক্ত নথিপত্ৰ দাখিল কৰাৰ লগতে বিতং যুক্তি দাঙি ধৰিছিল ।

আদালতত শ্যামকানু মহন্তৰ হৈ প্ৰতিৰক্ষা পক্ষৰ জ্যেষ্ঠ অধিবক্তা প্ৰাণ বৰাই তৰ্কত অৱতীৰ্ণ হয় । তেওঁ আদালতক জনায় যে জুবিন গাৰ্গৰ মৃত্যু এক অতি দুৰ্ভাগ্যজনক দুৰ্ঘটনাৰ বাবেহে হৈছিল, ই কোনো ধৰণৰ পৰিকল্পিত বা উদ্দেশ্যপ্ৰণোদিত কাৰ্য নাছিল । গতিকে এই ঘটনাৰ বাবে মহন্তক অপৰাধমূলকভাৱে জগৰীয়া কৰিব নোৱাৰি । অধিবক্তাগৰাকীয়ে বিশেষ তদন্তকাৰী দল (SIT)-ৰ সন্মুখত লিপিবদ্ধ কৰা কেইবাজনো ব্যক্তিৰ ভাষ্য উদ্ধৃত কৰি মহন্ত যে নিৰ্দোষী, সেই কথা প্ৰমাণ কৰিবলৈ চেষ্টা কৰে । ইয়াৰ উপৰিও পূৰ্বৰ অনুৰূপ গোচৰৰ ন্যায়িক নজিৰ দাঙি ধৰি তেওঁ আদালতৰ পৰা জামিন মঞ্জুৰ কৰিবলৈ অনুৰোধ জনায় ।

আনহাতে, ৰাজ্য চৰকাৰৰ তৰফৰ পৰা এই জামিন আবেদনৰ তীব্ৰ বিৰোধিতা কৰা হয় । চৰকাৰী পক্ষৰ হৈ জ্যেষ্ঠ অধিবক্তা দেবাজিৎ লন শইকীয়া আদালতত উপস্থিত থাকি আবেদনখন খাৰিজ কৰিবলৈ দাবী জনায় । চৰকাৰে এই সমগ্ৰ গোচৰটোক কিমান গুৰুত্বসহকাৰে লৈছে, সেই কথা তেওঁ যুক্তিৰ জৰিয়তে আদালতৰ সমুখত ডাঙি ধৰে ।

উভয় পক্ষৰ দীঘলীয়া যুক্তি-তৰ্ক অন্ত পৰাৰ পিছত উচ্চ ন্যায়ালয়ে জামিন সন্দৰ্ভত চূড়ান্ত সিদ্ধান্ত গ্ৰহণ কৰি অহা ২৯ মে’ত ৰায়দান কৰিব বুলি স্পষ্ট কৰি দিয়ে ।

লগতে পঢ়ক : ৰাজ্যৰ প্ৰতিখন বিদ্যালয়লৈ জৰুৰী জাননী, শিক্ষাৰ্থীৰ সুৰক্ষাক লৈ জাৰি কঠোৰ গাইডলাইন

এই ঘটনাৰ অন্যতম প্ৰধান অভিযুক্ত শ্যামকানু মহন্তৰ জামিন আৱেদন খাৰিজ কৰে আদালতে

জুবিন গাৰ্গৰ মৃত্যুৰ ঘটনাৰ গোচৰক লৈ গুৱাহাটীৰ বিশেষ ফাষ্ট ট্ৰেক আদালতে ৩০ এপ্ৰিলত এক গুৰুত্বপূৰ্ণ ৰায় প্ৰদান কৰিছে । এই ঘটনাৰ অন্যতম প্ৰধান অভিযুক্ত শ্যামকানু মহন্তৰ জামিন আৱেদন খাৰিজ কৰে আদালতে ।

জামিন আবেদনৰ ওপৰত দুদিনীয়া শুনানিৰ অন্তত আদালতে পূৰ্বে ৰায়দান সংৰক্ষিত কৰি ৰখাৰ পিছত আজি এই ৰায় প্ৰদান কৰে । বিচাৰ প্ৰক্ৰিয়া চলি থকাৰ সময়তে জামিন বিচাৰি আদালতৰ দ্বাৰস্থ হৈছিল শ্যামকানু । আনহাতে, চৰকাৰী পক্ষই জামিন আবেদনৰ তীব্ৰ বিৰোধিতা কৰি শুনানিৰ সময়ত আদালতত লিখিত আপত্তি দাখিল কৰিছিল ।

যোৱা সপ্তাহত অনুষ্ঠিত হোৱা শুনানিৰ সময়ত মহন্তৰ অধিবক্তাই জামিনৰ সপক্ষে যুক্তি আগবঢ়াইছিল । গোচৰটোৰ সংবেদনশীলতা আৰু জনসাধাৰণৰ দৃষ্টি আকৰ্ষণৰ বাবে ফাষ্ট ট্ৰেক আদালতে নিয়মিতভাৱে এই বিষয়টো গ্ৰহণ কৰি আহিছিল । উভয় পক্ষৰ শুনানিৰ অন্তত আদালতে ৰায়দান সংৰক্ষিত ৰাখিছিল আৰু ৰায় ঘোষণাৰ বাবে ৩০ এপ্ৰিলৰ দিনটো ধাৰ্য কৰিছিল ।

উল্লেখ্য য়ে, জুবিন গাৰ্গৰ ৰহস্যজনক মৃত্যুৱে সমগ্ৰ ৰাজ্যতে ব্যাপক ক্ষোভ আৰু নিৰপেক্ষ তদন্তৰ দাবীৰ সৃষ্টি কৰিছিল । বিশেষ তদন্তকাৰী দলৰ (SIT) তদন্তৰ পাছত শ্যামকানু মহন্তকে ধৰি কেইবাজনো অভিযুক্তৰ বিৰুদ্ধে অভিযোগনামা দাখিল কৰা হৈছিল । তেতিয়াৰ পৰাই এই গোচৰটোৱে ৰাজহুৱা চৰ্চা লাভ কৰি আহিছে ।

জামিন আৱেদন খাৰিজ হোৱাৰ ফলত মহন্তই এতিয়াও ন্যায়িক জিম্মাতে থাকিব লাগিব আৰু গোচৰটোৰ পৰৱৰ্তী আইনী প্ৰক্ৰিয়া আগবাঢ়িব ।

লগতে পঢ়ক : ড্ৰেচিং ৰুমত ৰিয়ান পৰাগৰ ধুমপান! বিচিচিআই এ ল’ব নেকি এক্সন, ভাইৰেল ভিডিঅ’