উত্তৰাখণ্ডৰ চামোলীত মাজনিশা ডাৱৰ বিস্ফোৰণ

দেৱভূমি উত্তৰাখণ্ডৰ চামোলী জিলাৰ থাৰালী অঞ্চলত শুকুৰবাৰে মাজনিশা সংঘটিত হোৱা ডাৱৰ বিস্ফোৰণৰ ফলত ব্যাপক ধ্বংসলীলাৰ সৃষ্টি কৰে।

এই ডাৱৰ বিস্ফোৰণৰ বাবে থাৰালী চহৰ, আশে-পাশে থকা গাঁও আৰু বজাৰৰ জীৱন ব্যাহত হৈ পৰে।ধাৰাসাৰ বৰষুণ আৰু ধ্বংসাৱশেষৰ ফলত কেইবাটাও ঘৰ-দুৱাৰ, দোকান-পোহাৰ আৰু পথৰ ক্ষতিসাধন হৈছে।প্ৰশাসন আৰু এছডিআৰএফৰ দলসমূহে সাহায্য আৰু উদ্ধাৰৰ কামত নিয়োজিত হৈ আছে।

এই ঘটনাৰ সৰ্বোচ্চ প্ৰভাৱ থাৰালী বজাৰ, কোটদীপ আৰু তহচিল চৌহদত দেখা গৈছে। অঞ্চলটোত শ শ বাসগৃহ এতিয়া ধ্বংসাৱশেষ তলত আছে।

বহু বাহন ধ্বংসাৱশেষৰ তলত পুতি গৈছে। সগোৱাৰা গাঁৱত ধ্বংসাৱশেষৰ তলত পুত যোৱাৰ ফলত এগৰাকী কণমানিৰ মৃত্যু হয়।

এই ঘটনাই অঞ্চলটোত আতংকৰ সৃষ্টি কৰাৰ লগতে স্থানীয় লোক সকল নিৰাপদ স্থানলৈ ঢাপলি মেলিছে।লগে লগে আৰক্ষী আৰু প্ৰশাসনৰ দল উপস্থিত হৈ উদ্ধাৰ অভিযান আৰম্ভ কৰিছে।  

লগতে পঢ়ক: ‘বিহাৰ চাণক্য-চন্দ্ৰগুপ্তৰ ভূমি,সংকল্প অসাৰ নাযাব’;প্ৰধানমন্ত্ৰী মোদীৰ ডাঙৰ মন্তব্য

ধৰালীত ডাৱৰ বিস্ফোৰণত ব্যাপক ধ্বংসলীলা

দেৱভূমি উত্তৰাখণ্ডত প্ৰকৃতিৰ তাণ্ডৱ । উত্তৰকাশী জিলাৰ ধৰালীত ডাৱৰ বিস্ফোৰণৰ ফলত খীৰগংগাত প্ৰৱল বানপানীৰ সৃষ্টি হয় । পাহাৰৰ পৰা নামি অহা বোকা-পানীৰ ঢলে নামনি অঞ্চলত ব্যাপক ধ্বংসলীলাৰ সৃষ্টি কৰিছে । এই পৰ্যন্ত ধৰালী দুৰ্যোগত চাৰিজন লোকৰ মৃত্যু হৈছে । আনহাতে বহু লোক ধ্বংসাৱশেষৰ তলত আবদ্ধ হৈ থকাৰ খবৰ পোৱা গৈছে । বহু হোটেলত পানী আৰু ধ্বংসাৱশেষ প্ৰৱেশ কৰিছে । সম্পূৰ্ণৰূপে ধ্বংস হৈছে ধৰালী বজাৰ । বহু হোটেল আৰু দোকান ধ্বংসপ্ৰাপ্ত হৈছে । সেনা, আৰক্ষী, এছ ডি আৰ এফৰ দল উদ্ধাৰ কাৰ্যৰ বাবে ৰাওনা হৈছে ।

ধাৰাসাৰ বৰষুণে উত্তৰাখণ্ডত বিধ্বংসী ৰূপ ধাৰণ কৰিছে । মঙলবাৰে পুৱা উত্তৰকাশী বদকোটত এলেকাৰ বানাল পট্টিত প্ৰচণ্ড বৰষুণে প্ৰায় ডেৰ ডজন ছাগলী উটুৱাই লৈ যায় । কুড গাডেৰা উফন্দি উঠাৰ লগে লগে চৌদিশে আতংকৰ সৃষ্টি হয় । বতৰ বিজ্ঞান কেন্দ্ৰৰ সঞ্চালক ৰোহিত থাপলিয়ালে কয় যে, ১০ আগষ্টলৈকে সমগ্ৰ ৰাজ্যতে ধাৰাসাৰ বৰষুণৰ সম্ভাৱনা আছে । বিশেষকৈ পাহাৰীয়া অঞ্চলত ধাৰাসাৰ বৰষুণৰ সম্ভাৱনা আছে । একে সময়তে বৰষুণৰ বাবে সুৰক্ষাৰ প্ৰতি লক্ষ্য ৰাখি মঙলবাৰেও ডেৰাডুন, পৌৰী, তেহৰী আৰু হৰিদ্বাৰত বিদ্যালয় বন্ধ থাকিব ।

শোক প্ৰকাশ মুখ্যমন্ত্ৰী ধামীৰ-

ধৰালী উত্তৰকাশী অঞ্চলত ডাৱৰ বিস্ফোৰণৰ ফলত হোৱা প্ৰচণ্ড ক্ষতিক লৈ গভীৰ শোক প্ৰকাশ কৰে মুখ্যমন্ত্ৰী ধামীয়ে । তেওঁ কয় যে এছ ডি আৰ এফ, এন ডি আৰ এফ, জিলা প্ৰশাসন আৰু অন্যান্য আনুষংগিক দলসমূহ সাহায্য আৰু উদ্ধাৰ অভিযানৰ বাবে যুদ্ধকালীন গতিত সাজু হৈছে । এই সন্দৰ্ভত তেওঁ অহৰহ জ্যেষ্ঠ বিষয়াসকলৰ সৈতে যোগাযোগত আছে বুলি মন্তব্য কৰে ।

উত্তৰকাশীত ডাৱৰ বিস্ফোৰণ সন্দৰ্ভত প্ৰাথমিক তথ্য লাভ কৰিছে ৰাজ্যিক জৰুৰীকালীন অভিযান কেন্দ্ৰই । উত্তৰাখণ্ড দুৰ্যোগ ব্যৱস্থাপনা বিভাগে ভাৰত চৰকাৰক সাহায্য আৰু উদ্ধাৰ অভিযানৰ বাবে দুখন এম আই আৰু এখন চিনুক হেলিকপ্টাৰ প্ৰদান কৰিবলৈ অনুৰোধ জনাইছে ।

যমুনোত্ৰী ঘাইপথঃ স্যানাচট্টীৰ সমীপত ২৫ মিটাৰ পথ ভাঙি পৰিল

দেওবাৰে নিশাৰ পৰা জিলাখনত হোৱা বৰষুণৰ বাবে স্যানাচট্টীৰ সমীপৰ যমুনোত্ৰী ঘাইপথৰ প্ৰায় ২৫ মিটাৰ ভাঙি গৈছে, যাৰ বাবে যাতায়ত বন্ধ হৈ পৰিছে । একে সময়তে শ্যানচট্টীৰ এফালে পাহাৰৰ পৰা শিলগুটি বাগৰি পৰিছে । আনহাতে, পুৱাৰে পৰা বিয়লিলৈকে বহু ঠাইত গংগোত্ৰী ঘাইপথ আৱদ্ধ হৈ থাকে । এইবাৰৰ বাৰিষাৰ বৰষুণৰ বাবে যমুনোত্ৰী ঘাইপথৰ সমস্যাই বন্ধ হোৱাৰ নাম লোৱা নাই । দেওবাৰে নিশাৰ পৰা হোৱা বৰষুণৰ বাবে স্যানাচট্টীৰ ওজৰি ডাবৰকোটৰ সমীপত ধ্বংসাৱশেষ আৰু শিলগুটি বাগৰি পৰাৰ বাবে পথটোৰ চলাচল বন্ধ হৈ পৰে । একে সময়তে স্যানচট্টীৰ সিটো পাৰে কুপডা মটৰ পথৰ সমীপত প্ৰায় ২৫ মিটাৰ পথ ভাঙি যোৱাৰ ফলত সমস্যা অধিক বৃদ্ধি পাইছে ।

লগতে পঢ়ক : অশান্তজৰ্জৰ মণিপুৰত এডিজি বিএছএফ ইষ্টাৰ্ণ কমাণ্ডৰ মহেশ কুমাৰ আগৰৱাল…

হৰিদ্বাৰৰ মনসা দেৱী মন্দিৰত ভয়ংকৰ অঘটন

হৰিদ্বাৰৰ মনসা দেৱী মন্দিৰত সংঘটিত হৈছে এক ভয়ংকৰ ঘটনা । ব্যাপক ভিৰত হোৱা দৌৰা দৌৰিত ৬জন ভক্তৰ মৃত্যু হোৱাৰ বিপৰীতে বহুকেইজন গুৰুতৰভাৱে আহত হৈছে । ঘটনাস্থলীত আবদ্ধ হৈ থকা লোকসকলক উলিয়াই অনাৰ কাম অব্যাহত আছে । বৰ্তমান আৰক্ষীয়ে আহতসকলক উলিয়াই নিৰাপদে চিকিৎসালয়লৈ নিয়াৰ কামত ব্যস্ত হৈ আছে ।

প্ৰাথমিক তথ্য অনুসৰি মন্দিৰৰ পথত হাই ভল্টেজৰ বিদ্যুতৰ তাঁৰ ছিঙি পৰাৰ বাতৰি বিয়পি পৰে আৰু ইয়াৰ হোৱা দৌৰা দৌৰিত এই ঘটনা সংঘটিত হয় । বহু সংখ্যক ভক্ত দৰ্শনৰ বাবে মন্দিৰত উপস্থিত হৈছিল । তাঁৰ ছিঙি যোৱাৰ ফলত হঠাতে সৃষ্টি হোৱা আতংকৰ বাবে পৰিস্থিতি নিয়ন্ত্ৰণৰ বাহিৰলৈ যায় ।

তথ্য অনুসৰি দেওবাৰে হৰিদ্বাৰৰ মনসা দেৱী মন্দিৰৰ পথত হঠাৎ হাই ভল্টেজৰ বৈদ্যুতিক তাঁৰ বাগৰি পৰাত বিশৃংখলতাৰ সৃষ্টি হয় । এই ঘটনাৰ পিছত তাত উপস্থিত ভক্তসকলৰ মাজত দৌৰা দৌৰিৰ সৃষ্টি হয় । এই ঘটনাত৬ জন লোকৰ মৃত্যু হয় ।

তথ্য লাভ কৰাৰ লগে লগে আৰক্ষী আৰু প্ৰশাসনৰ দল ঘটনাস্থলীত উপস্থিত হৈ সাহায্য আৰু উদ্ধাৰৰ কাম আৰম্ভ কৰে । আহতসকলক নিকটৱৰ্তী চিকিৎসালয়ত ভৰ্তি কৰোৱা হৈছে । পৰিস্থিতি নিয়ন্ত্ৰণত আছে যদিও দুৰ্ঘটনাটোৰ বাবে অঞ্চলটোত আতংকময় পৰিৱেশে বিৰাজ কৰিছে ।

ইফালে এই ঘটনাক লৈ শোক প্ৰকাশ কৰিছে মুখ্যমন্ত্ৰী পুষ্কৰ সিং ধামীয়ে । তেওঁ লিখিছে যে হৰিদ্বাৰৰ মনসা দেৱী মন্দিৰ পথত হোৱা ভয়াবহ ঘটনাক লৈ অতি দুখজনক খবৰ পোৱা গৈছে । SDRF, স্থানীয় আৰক্ষী আৰু অন্যান্য উদ্ধাৰকাৰী দলে সেই স্থানত উপস্থিত হৈ সাহায্য আৰু উদ্ধাৰ অভিযানত লিপ্ত হৈছে । এই ক্ষেত্ৰত মই স্থানীয় প্ৰশাসনৰ সৈতে অহৰহ যোগাযোগত আছো আৰু পৰিস্থিতি অহৰহ নিৰীক্ষণ কৰি আছো । সকলো ভক্তৰ সুৰক্ষাৰ বাবে মাতা ৰাণীৰ ওচৰত প্ৰাৰ্থনা জনাইছো ।

লগতে পঢ়ক : তামিলনাডুৰ অভূতপূৰ্ব অগ্ৰগতি বিকশিত ভাৰতৰ চালিকা শক্তি… ৪,৯০০ কোটি টকাৰ উপহাৰ দি মন্তব্য প্ৰধানমন্ত্ৰী মোদীৰ