বৃহস্পতিবাৰে স্থানীয় সময় পুৱা ৪:৫০ বজাত ইৰানৰ ৰিভল্যুশ্বনেৰী গাৰ্ডছে আমেৰিকাৰ এটা এয়াৰবেছক লক্ষ্য কৰি প্ৰত্যুত্তৰমূলক আক্ৰমণ চলায়

আমেৰিকা যুক্তৰাষ্ট্ৰ আৰু ইৰানৰ মাজত চলি থকা শান্তি আলোচনা ধাৰাবাহিকভাৱে ব্যৰ্থ হোৱাৰ দিশে অগ্ৰসৰ হৈছে । ইয়াৰ মাজতে মধ্যপ্ৰাচ্যত যুদ্ধসদৃশ পৰিস্থিতিৰ সৃষ্টি কৰি ইৰানৰ ইছলামিক ৰিভল্যুশ্বনেৰী গাৰ্ড কৰ্পছে (IRGC) আমেৰিকাৰ সামৰিক ঘাটিত এক ডাঙৰ আক্ৰমণ চলোৱাৰ দাবী কৰিছে । আনহাতে, এই সামৰিক সংঘাতৰ প্ৰভাৱ এতিয়া চুবুৰীয়া দেশসমূহৰ ওপৰতো পৰা দেখা গৈছে । কুৱেইটৰ প্ৰতিৰক্ষা মন্ত্ৰালয়ে জনোৱা মতে, তেওঁলোকৰ আকাশমাৰ্গলৈ অহা কেইবাটাও মিছাইল আৰু ড্ৰ’ন তেওঁলোকে আকাশতে প্ৰতিৰোধ কৰি ধ্বংস কৰিবলৈ সক্ষম হৈছে ।

বন্দৰ আব্বাছ বন্দৰত আমেৰিকাৰ আক্ৰমণৰ প্ৰত্যুত্তৰ ইৰানৰ-

ইৰানৰ অৰ্ধ-চৰকাৰী সংবাদ প্ৰতিষ্ঠান ‘তাচনিম নিউজ এজেঞ্চী’ৰ এক প্ৰতিবেদন অনুসৰি, বৃহস্পতিবাৰে স্থানীয় সময় পুৱা ৪:৫০ বজাত ইৰানৰ ৰিভল্যুশ্বনেৰী গাৰ্ডছে আমেৰিকাৰ এটা এয়াৰবেছক লক্ষ্য কৰি প্ৰত্যুত্তৰমূলক আক্ৰমণ চলায় । আইআৰজিচিয়ে জনোৱা মতে, বুধবাৰে নিশা ইৰানৰ গুৰুত্বপূৰ্ণ ‘বন্দৰ আব্বাছ’ৰ ওচৰত আমেৰিকাই চলোৱা বিমান আক্ৰমণৰ প্ৰতিশোধ ল’বলৈহে তেওঁলোকে এই ব্যৱস্থা গ্ৰহণ কৰিছে । অৱশ্যে, সুৰক্ষাৰ স্বাৰ্থত ইৰানে আমেৰিকাৰ কোনটো সামৰিক ঘাটিত এই আক্ৰমণ চলাইছে, সেই কথা এতিয়াও প্ৰকাশ কৰা নাই ।

আমেৰিকাক চৰম সকীয়নি-

এই আক্ৰমণৰ পিছতেই ইৰানৰ ৰিভল্যুশ্বনেৰী গাৰ্ডছে আমেৰিকাক পোনপটীয়াকৈ এক চৰম আৰু কঠোৰ সকীয়নি প্ৰদান কৰিছে । ইৰানে স্পষ্ট কৰি দিছে যে যদি আমেৰিকাই পুনৰ এনেধৰণৰ আক্ৰমণ কৰাৰ দুঃসাহস কৰে, তেন্তে ইয়াৰ পৰিণতি ইয়াতকৈও ভয়াবহ আৰু মাৰাত্মক হ’ব । ভৱিষ্যতে হ’বলগীয়া যিকোনো ধৰণৰ ক্ষয়-ক্ষতিৰ বাবে কেৱল আক্ৰমণকাৰী আমেৰিকাই দায়ী থাকিব বুলিও ইৰানে হুংকাৰ দিয়ে ।

আত্মৰক্ষাৰ বাবে আক্ৰমণ চলোৱা হৈছিল : আমেৰিকা

আনহাতে, সমগ্ৰ ঘটনা সন্দৰ্ভত এগৰাকী আমেৰিকান সামৰিক বিষয়াই আন্তঃৰাষ্ট্ৰীয় সংবাদ সংস্থা ‘ৰয়টাৰ্ছ’ক জনোৱা মতে, বুধবাৰে নিশা প্ৰায় ১:৩০ বজাত ইৰানৰ বান্দৰ আব্বাছ চহৰৰ পূব অংশত আমেৰিকান সেনাই এক বৃহৎ অভিযান চলাইছিল। উক্ত স্থানত তিনিটা ডাঙৰ বিস্ফোৰণৰ শব্দ শুনা গৈছিল ।

আমেৰিকাৰ দাবী অনুসৰি, ইৰানৰ সেই সামৰিক ঘাটিটোৱে ‘ষ্ট্ৰেইট অৱ হৰমুজ’ জলপথত নিয়োজিত আমেৰিকান সেনা আৰু বাণিজ্যিক জাহাজসমূহৰ নিৰাপত্তাৰ বাবে ডাঙৰ ভাবুকিৰ সৃষ্টি কৰিছিল । সেয়েহে, সম্পূৰ্ণ আত্মৰক্ষাৰ স্বাৰ্থতহে আমেৰিকাই এই সামৰিক পদক্ষেপ গ্ৰহণ কৰিছিল ।

কুৱেইটত হাই-এলাৰ্ট-

এই ভয়াৱহ সামৰিক সংঘৰ্ষৰ বাবে এতিয়া সমগ্ৰ অঞ্চলটোত তীব্ৰ আতংকই বিৰাজ কৰিছে । কুৱেইট চৰকাৰে আধিকাৰিকভাৱে ঘোষণা কৰিছে যে দেশখনৰ নিৰাপত্তা সুৰক্ষিত কৰিবলৈ তেওঁলোকৰ প্ৰতিৰক্ষা বাহিনীয়ে ২৪ ঘণ্টাই সষ্টম হৈ আছে । আকাশমাৰ্গ উলংঘা কৰি ধেঁই অহা যিকোনো মিছাইল বা ড্ৰ’ন তৎক্ষণাত চিনাক্ত কৰি আকাশতে ধ্বংস কৰাৰ বাবে কুৱেইটে বিশেষ প্ৰতিৰক্ষা ব্যৱস্থা সক্ৰিয় কৰি তুলিছে ।

লগতে পঢ়ক : ঈদৰ আনন্দৰ মাজতে মধ্যপ্ৰাচ্যত যুদ্ধৰ জোকাৰণি, ইৰানৰ ভূখণ্ডত আমেৰিকাৰ বিধ্বংসী এয়াৰষ্ট্ৰাইক

ইৰানৰ সৈতে সম্ভাৱ্য চুক্তি আৰু মধ্যপ্ৰাচ্যত দীৰ্ঘম্যাদী সুস্থিৰতা অনাৰ উদ্দেশ্যে ৰাষ্ট্ৰপতি ট্ৰাম্পে শনিবাৰে কেইবাখনো শক্তিশালী মুছলিম দেশৰ শীৰ্ষ পৰ্যায়ৰ নেতাসকলৰ সৈতে এক গুৰুত্বপূৰ্ণ বৈঠকত মিলিত হয়

ইৰানৰ সৈতে চলি থকা গুৰুত্বপূৰ্ণ কূটনৈতিক আলোচনাক লৈ এক ডাঙৰ আৰু তাৎপৰ্যপূৰ্ণ মন্তব্য কৰিছে আমেৰিকাৰ ৰাষ্ট্ৰপতি ডোনাল্ড ট্ৰাম্পে । ইছলামিক ৰিপাব্লিক অৱ ইৰানৰ সৈতে চলি থকা বাৰ্তালাপ বৰ্তমান অতি সুন্দৰভাৱে আগবাঢ়িছে বুলি উল্লেখ কৰি ট্ৰাম্পে সকীয়াই দিয়ে যে, এই আলোচনা হয় সকলোৰে বাবে এক ঐতিহাসিক চুক্তি হিচাপে প্ৰমাণিত হ’ব, নতুবা বিশ্বই পুনৰবাৰ এক বিধ্বংসী যুদ্ধৰ সন্মুখীন হ’ব লাগিব ।

এক বিবৃতিত ৰাষ্ট্ৰপতি ট্ৰাম্পে কয়, “এইখন হয় সকলোৰে বাবে এক অতি ডাঙৰ চুক্তি হ’ব, নতুবা কোনো চুক্তিয়েই নহ’ব । আৰু যদি চুক্তি নহয়, তেন্তে পৰিস্থিতি এনে পৰ্যায় পাবগৈ যে বিশ্ব পুনৰ যুদ্ধক্ষেত্ৰলৈ উভতি যাব । আগতকৈও অতি বৃহৎ পৰিসৰত গুলীয়াগুলী তথা যুদ্ধ আৰম্ভ হ’ব পাৰে, যিটো আচলতে কোনেও নিবিচাৰে ।” অৱশ্যে আমেৰিকাই ইৰানৰ সৈতে এক স্থায়ী সমাধানলৈ আহিবলৈ অহৰহ প্ৰচেষ্টা চলাই থকা বুলিও তেওঁ সদৰী কৰে ।

মধ্যপ্ৰাচ্যৰ সুস্থিৰতাৰ বাবে মুছলিম দেশসমূহৰ সৈতে জৰুৰী বৈঠক-

ইৰানৰ সৈতে সম্ভাৱ্য চুক্তি আৰু মধ্যপ্ৰাচ্যত দীৰ্ঘম্যাদী সুস্থিৰতা অনাৰ উদ্দেশ্যে ৰাষ্ট্ৰপতি ট্ৰাম্পে শনিবাৰে কেইবাখনো শক্তিশালী মুছলিম দেশৰ শীৰ্ষ পৰ্যায়ৰ নেতাসকলৰ সৈতে এক গুৰুত্বপূৰ্ণ বৈঠকত মিলিত হয় । এই সন্দৰ্ভত তেওঁ দাবী কৰে যে আমেৰিকাই অঞ্চলটোৰ শান্তিৰ বাবে ধাৰাবাহিকভাৱে মিত্ৰদেশসমূহৰ সৈতে যোগাযোগ ৰক্ষা কৰি চলিছে ।

ট্ৰাম্পে বাৰ্তালাপ কৰা নেতাসকলৰ ভিতৰত আছিল :

চৌদি আৰৱ: যুৱৰাজ মহম্মদ বিন চলমান আল চৌদ ।

সংযুক্ত আৰৱ আমিৰশ্বাহী (UAE): ৰাষ্ট্ৰপতি মহম্মদ বিন জায়েদ আল নাহিয়ান ।

কাটাৰ: আমিৰ তমিম বিন হমদ বিন খলিফা আল থানী, প্ৰধানমন্ত্ৰী মহম্মদ বিন আব্দুল ৰহমান বিন জচিম বিন জাবেৰ আল থানী আৰু মন্ত্ৰী আলী আল-থাৱাদী ।

পাকিস্তান: ফিল্ড মাৰ্ছল চৈয়দ আচিম মুনিৰ আহমেদ শ্বাহ ।

তুৰস্ক: ৰাষ্ট্ৰপতি ৰেচেপ তায়িপ এৰডোগান ।

ইজিপ্ত: ৰাষ্ট্ৰপতি আবদেল ফাটাহ আল-চিচি ।

জৰ্ডান: ৰজা আব্দুল্লাহ দ্বিতীয় ।

বাহৰেইন: ৰজা হমদ বিন ইছা আল খলিফা ।

‘আব্ৰাহাম চুক্তি’ত স্বাক্ষৰ কৰিবলৈ আহ্বান-

এই বৈঠকতে ৰাষ্ট্ৰপতি ট্ৰাম্পে সকলো মুছলিম দেশকে এক বিশেষ অনুৰোধ জনায় । তেওঁ সকলোকে ঐতিহাসিক ‘আব্ৰাহাম চুক্তি’ (Abraham Accords)-ত স্বাক্ষৰ কৰিবলৈ আহ্বান জনায় । ট্ৰাম্পে কয় যে মধ্যপ্ৰাচ্যৰ এই জটিল পৰিস্থিতি সমাধানৰ বাবে আমেৰিকাই কৰা সকলো প্ৰচেষ্টাৰ পিছত এতিয়া আন দেশসমূহেও আগবাঢ়ি আহি এই চুক্তিৰ অংশ হোৱাটো অত্যন্ত জৰুৰী । উল্লেখ্য যে, ইউ.এ.ই. আৰু বাহৰেইন ইতিমধ্যে এই চুক্তিৰ সক্ৰিয় অংশীদাৰ ।

ট্ৰাম্পে কয়, “হ’ব পাৰে কোনো এটা বা দুটা দেশৰ হাতত এই চুক্তিত অংশ নল’বলৈ নিজা কাৰণ থাকিব পাৰে আৰু তাক সন্মান জনোৱা হ’ব । কিন্তু বেছিভাগ দেশেই ইৰানৰ সৈতে হ’বলগীয়া এই চুক্তিক এক ঐতিহাসিক ঘটনাত পৰিণত কৰিবলৈ সাজু আৰু ইচ্ছুক হোৱা উচিত ।”

আব্ৰাহাম চুক্তিৰ সফলতাৰ দাবী-

ডোনাল্ড ট্ৰাম্পৰ মতে, আব্ৰাহাম চুক্তিত অন্তৰ্ভুক্ত হোৱা দেশসমূহে বিত্তীয়, অৰ্থনৈতিক আৰু সামাজিক ক্ষেত্ৰত অভূতপূৰ্ব লাভ অৰ্জন কৰিছে । আনকি শেহতীয়া যুদ্ধৰ পৰিস্থিতিৰ পিছতো কোনো এখন দেশে এই চুক্তিৰ পৰা ওলাই অহাৰ কথা চিন্তা কৰা নাই । ইয়াক বিশ্বৰ আটাইতকৈ গুৰুত্বপূৰ্ণ আৰু সন্মানীয় চুক্তি বুলি অভিহিত কৰি ট্ৰাম্পে আশা প্ৰকাশ কৰে যে চৌদি আৰৱ আৰু কাটাৰে তৎকালিনভাৱে ইয়াত স্বাক্ষৰ কৰি এক নতুন আৰম্ভণি কৰিব আৰু বাকী দেশসমূহেও তেওঁলোকক অনুসৰণ কৰিব ।

আন এক তাৎপৰ্যপূৰ্ণ বিষয় হিচাপে ট্ৰাম্পে স্পষ্ট কৰি দিয়ে যে, যদি পৰিস্থিতি অনুকূল হয়, তেন্তে তেওঁ ইৰানকো এই ‘আব্ৰাহাম চুক্তি’ৰ অংশ কৰাৰ বিষয়টোক সম্পূৰ্ণ সমৰ্থন কৰিব ।

লগতে পঢ়ক : মাত্ৰ কেইঘণ্টামানৰ ভিতৰতে বিশ্বই লাভ কৰিব ‘ভাল খবৰ’; আমেৰিকা-ইৰাণ যুদ্ধৰ সন্দৰ্ভত ৰুবিঅ’ই দিলে ইংগিত

ট্ৰাম্পে কয় মই অতি সোনকালে ইৰানে আমাক পঠোৱা পৰিকল্পনাটো পৰ্যালোচনা কৰিম কিন্তু মই কল্পনা কৰিব নোৱাৰো যে ই গ্ৰহণযোগ্য হ’ব

আমেৰিকাৰ ৰাষ্ট্ৰপতি ডনাল্ড ট্ৰাম্পে শনিবাৰে কয় যে তেওঁ ইৰানৰ পৰা শেহতীয়াকৈ লাভ কৰা এটা নতুন প্ৰস্তাৱ পৰ্যালোচনা কৰি আছে । অৱশ্যে ইয়াৰ ফলাফলক লৈ তেওঁ গভীৰ সন্দেহ প্ৰকাশ কৰি যুক্তি দিছে যে তেহৰানে নিজৰ অতীতৰ কৰ্মৰ বাবে এতিয়ালৈকে “উপযুক্ত মূল্য ভৰা নাই”।

ট্ৰুথ ছ’চিয়েলত কৰা এটা পোষ্টত ট্ৰাম্পে কয়, “মই অতি সোনকালে ইৰানে আমাক পঠোৱা পৰিকল্পনাটো পৰ্যালোচনা কৰিম, কিন্তু মই কল্পনা কৰিব নোৱাৰো যে ই গ্ৰহণযোগ্য হ’ব । কাৰণ যোৱা ৪৭ বছৰত তেওঁলোকে মানৱতা আৰু বিশ্বৰ প্ৰতি যি কৰিছে, তাৰ বাবে তেওঁলোকে এতিয়াও উপযুক্ত মূল্য ভৰা নাই ।”

ফ্ল’ৰিডাত এয়াৰ ফৰ্চ ৱানত উঠাৰ সময়ত সংবাদ মাধ্যমৰ সৈতে হোৱা কথা-বতৰাৰ কিছু সময়ৰ পিছতে এই পোষ্টটো পোহৰলৈ আহে । তাত সাংবাদিকসকলে তেওঁক এই ১৪ দফীয়া প্ৰস্তাৱটো দেখিছে নেকি বুলি সোধাত তেওঁ উত্তৰ দিয়ে, “নাই, মই দেখা নাই । মই ইয়াত (বিমানত) চাই আছো ।” তেওঁ লগতে কয়, “হয়, মই আপোনালোকক এই বিষয়ে পিছত জনাম ।”

ইৰানৰ সৈতে কোনো চুক্তিত আৱদ্ধ হোৱাতকৈ আমেৰিকাই ইয়াৰ পৰা আঁতৰি থকাই ভাল হ’ব বুলি তেওঁ পূৰ্বে কৰা মন্তব্যৰ কথা সাংবাদিকসকলে সোঁৱৰাই দিয়াত ট্ৰাম্পে সেই কথা অস্বীকাৰ কৰে । তেওঁ কয়, “মই তেনেদৰে কোৱা নাছিলোঁ । মই কৈছিলোঁ যে যদি আমি এতিয়া গুচি যাওঁ, তেন্তে তেওঁলোকক পুনৰ নিৰ্মাণ কৰিবলৈ ২০ বছৰ সময় লাগিব । কিন্তু আমি এতিয়াই গুচি যোৱা নাই । আমি এইটো এনেকৈ সমাধান কৰিম যাতে কোনেও ২ বছৰ বা ৫ বছৰৰ পিছত আকৌ ঘূৰি আহিবলগীয়া নহয় ।” প্ৰস্তাৱটোৰ বিষয়ে পুনৰ সোধাত তেওঁ কয়, “তেওঁলোকে মোক চুক্তিখনৰ ধাৰণাটোৰ বিষয়ে জনাইছে । এতিয়া তেওঁলোকে মোক ইয়াৰ সঠিক শব্দবোৰ দিব ।”

তথ্য অনুসৰি, ইৰানে আমেৰিকা যুক্তৰাষ্ট্ৰক এখন ১৪ দফীয়া আঁচনি দাখিল কৰিছে, য’ত লেবাননকে ধৰি সকলো মোৰ্চাতে “যুদ্ধ সমাপ্ত কৰা”ৰ লক্ষ্যৰে এক ব্যাপক গাঁথনিৰ ৰূপৰেখা দাঙি ধৰা হৈছে । এই প্ৰস্তাৱটো ৱাশ্বিংটনে পূৰ্বে প্ৰেৰণ কৰা ন দফীয়া আঁচনিৰ প্ৰত্যুত্তৰত আহিছে, য’ত কথিতভাৱে যুদ্ধবিৰতিৰ বাবে দুমাহৰ সময়সীমা অন্তৰ্ভুক্ত কৰা হৈছিল । অৱশ্যে ইৰানে কোনো বৰ্ধিত অন্তৱৰ্তীকালীন ব্যৱস্থা নাকচ কৰিছে বুলি কোৱা হৈছে । তেওঁলোকে ইয়াৰ পৰিৱৰ্তে ৩০ দিনৰ ভিতৰত এক পূৰ্ণাংগ সমাধান আৰু সাময়িক যুদ্ধবিৰতিৰ পৰিৱৰ্তে স্থায়ীভাৱে “যুদ্ধৰ অন্ত” পেলোৱাৰ ওপৰত জোৰ দিছে ।

প্ৰতিবেদন অনুসৰি, ইৰানৰ প্ৰস্তাৱত দৃঢ় সুৰক্ষা গেৰাণ্টি অন্তৰ্ভুক্ত কৰা হৈছে যিয়ে ইৰানৰ বিৰুদ্ধে ভৱিষ্যতে যিকোনো সামৰিক আগ্ৰাসন নিষিদ্ধ কৰিব আৰু ইৰানৰ “চুবুৰীয়া পৰিৱেশ”ৰ পৰা আমেৰিকাৰ সামৰিক বাহিনী প্ৰত্যাহাৰ কৰাৰ প্ৰয়োজন হ’ব । ইয়াত বিদ্যমান নৌ-নিষেধাজ্ঞা আৰু অৱৰোধ প্ৰত্যাহাৰ কৰাৰ লগতে বিদেশত থকা ইৰানৰ জব্দ কৰা সম্পত্তি মুকলি কৰি দিয়া আৰু নিষেধাজ্ঞা তথা সামৰিক চাপৰ বাবে হোৱা ক্ষতিৰ ক্ষতিপূৰণৰো দাবী জনোৱা হৈছে ।

অৰ্থনৈতিকভাৱে এই পৰিকল্পনাত ইৰানৰ ওপৰত আৰোপ কৰা আমেৰিকা আৰু আন্তঃৰাষ্ট্ৰীয় সকলো নিষেধাজ্ঞা সম্পূৰ্ণৰূপে আঁতৰোৱাৰ দাবী কৰা হৈছে । আঞ্চলিকভাৱে এই প্ৰস্তাৱটো ইৰান-আমেৰিকাৰ উত্তেজনাৰ বাহিৰলৈও বিস্তৃত হৈছে আৰু ইয়াত “সকলো মৰ্চাতে যুদ্ধ”ৰ সমাপ্তি ঘটাবলৈ কোৱা হৈছে, য’ত স্পষ্টভাৱে লেবাননৰ সংঘাতকো অন্তৰ্ভুক্ত কৰা হৈছে ।

লগতে পঢ়ক : ভুল কৰিলেই পুনৰ আৰম্ভ হ’ব আক্ৰমণঃ ইৰাণক ট্ৰাম্পৰ কঠোৰ সকীয়নি