মধ্যপ্ৰাচ্যৰ তয়াময়া যুদ্ধৰ মাজতে এইবাৰ এই উত্তেজনাত প্ৰৱেশ ঘটিছে ইৰাণৰ ডান্সিং মিছাইলৰ । এই ক্ষেপণাস্ত্ৰ এতিয়া ইজৰাইল-আমেৰিকাৰ মূৰৰ কামোৰণি হৈ পৰিছে । আমেৰিকা-ইজৰাইলৰ অত্যধুনিক বায়ু প্ৰতিৰক্ষা প্ৰণালীকো এই মিছাইলে ধূলি দিবলৈ সক্ষম হৈছে ।

ইৰাণ, আমেৰিকা আৰু ইজৰাইলৰ মাজৰ সংঘাতত এটা নতুন অস্ত্ৰৰ আৱিৰ্ভাৱ হৈছে । ইৰাণৰ নতুন ব্ৰহ্মাস্ত্ৰ হিচাবে গণ্য কৰা এই ক্ষেপণাস্ত্ৰক ‘ডান্সিং মিছাইল’ বুলি অভিহিত কৰা হৈছে । চলি থকা যুদ্ধত ইৰাণে প্ৰথমবাৰৰ বাবে ইয়াক ব্যৱহাৰ কৰিছিল আৰু ই ইজৰাইল-আমেৰিকাৰ ঘাটিসমূহৰ যথেষ্ট ক্ষতিসাধন কৰিছিল । এই মিছাইলে তীব্ৰ বেগত ‘নাচি নাচি’ লক্ষ্যৰ দিশে আগবাঢ়ি যায়, যাৰ ফলত আধুনিক বায়ু প্ৰতিৰক্ষা ব্যৱস্থা, যেনে আইৰন ড’ম, পেট্ৰিয়াট বা থাড আদিয়ে ইয়াক বাধা দিয়াত অক্ষম হৈ পৰে । ইৰাণে ইয়াক ‘চেজিল-২’ বুলি উল্লেখ কৰিলেও বিশ্বই ইয়াক ‘ডান্সিং মিছাইল’ বুলি অভিহিত কৰিছে । এই মিছাইলৰ আগত আমেৰিকা আৰু ইজৰাইল সম্পূৰ্ণ অসহায় হৈ পৰা পৰিলক্ষিত হৈছে ।

উল্লেখ্য যে, চেজিল-২ হৈছে ইৰাণৰ থলুৱা প্ৰযুক্তি ব্যৱহাৰ কৰি নিৰ্মাণ কৰা দুটা ষ্টেজৰ চলিড অথবা গোটা ইন্ধনযুক্ত মধ্যম দূৰত্বৰ বেলিষ্টিক মিছাইল (এম আৰ বি এম)। ইয়াৰ দৈৰ্ঘ্য প্ৰায় ১৮ মিটাৰ আৰু ওজন প্ৰায় ২৩,৬০০ কিলোগ্ৰাম । ইয়াৰ ৰেঞ্জ ২০০০ কিলোমিটাৰ পৰ্যন্ত । ই ৭০০ৰ পৰা ১০০০ কিলোগ্ৰাম ওজনৰ ৱাৰহেড কঢ়িয়াব পাৰে, যি সাধাৰণ বা পাৰমাণৱিকো হ’ব পাৰে ।

ইয়াক মোবাইল লঞ্চাৰৰ পৰা নিক্ষেপ কৰিব পাৰি । যাৰ ফলত ইয়াক দ্ৰুতভাৱে আৰু যিকোনো স্থানৰ পৰা নিক্ষেপ কৰিব পৰা যায় । ইয়াৰ গোটা ইন্ধনৰ বাবেই ইয়াক উৎক্ষেপণৰ বাবে প্ৰস্তুতি চলাবলৈ মাত্ৰ কেইমিনিটমান সময় লাগে । আনহাতে পূৰ্বে পুৰণি প্ৰক্ৰিয়াত তৰল ইন্ধনযুক্ত ক্ষেপণাস্ত্ৰৰ বাবে ঘণ্টাৰ পিছত ঘণ্টা সময় লাগে । ইয়াৰ আটাইতকৈ স্বকীয় বৈশিষ্ট্য হ’ল ইয়াৰ মেনুভাৰেবল ৰি-এণ্ট্ৰি ভেহিকেল (MarRV), যি উৰণৰ সময়ত দিশ সলনি কৰিবলৈ সক্ষম ।

এই মিছাইল বতাহত নাচি নাচি যাত্ৰা কৰে বাবে ইয়াক ‘ডান্সিং মিছাইল’ বুলি অভিহিত কৰা হৈছে । বায়ুমণ্ডলত পুনৰ প্ৰৱেশ কৰাৰ লগে লগে ইয়াৰ ৱাৰহেডে তীব্ৰ বেগত দিশ সলনি কৰি ওপৰলৈ তললৈ, বাওঁ আৰু সোঁফালে ঘূৰি যায় । ফলস্বৰূপে বায়ু প্ৰতিৰক্ষা ব্যৱস্থাসমূহে প্ৰতিক্ৰিয়া প্ৰকাশ কৰিবলৈ মাত্ৰ কেইছেকেণ্ডমানহে সময় পায় ।

আইৰন ডম বা পেট্ৰিয়টৰ দৰে ব্যৱস্থাই ইয়াক অনুসৰণ কৰিব নোৱাৰে কাৰণ ই অভাৱনীয়ভাৱে গতি কৰে । ইৰাণৰ সংবাদ মাধ্যম আৰু বিশেষজ্ঞসকলে ইয়াক ‘অপ্ৰতিৰোধ্য’ বুলি অভিহিত কৰিছে । ইয়াৰ গতি অত্যন্ত বেছি—প্ৰায় ১৭,০০০ কিলোমিটাৰ প্ৰতি ঘণ্টা ।

চেজিল-২ৰ আক্ৰমণত ইজৰাইল আৰু আমেৰিকাৰ কেইবাটাও সামৰিক ঘাটিৰ ক্ষতিসাধন হৈছে । এই আঘাতে টেল আভিভক জোকাৰি যায় আৰু বিমানবন্দৰ আৰু ৰাডাৰ ব্যৱস্থাৰ ক্ষতিসাধন হয় । আমেৰিকাৰ ঘাটিসমূহো যথেষ্ট প্ৰভাৱিত হয় । এই মিছাইলৰ ক্ষমতাই ৯০%তকৈ অধিক এয়াৰ প্ৰতিৰক্ষা ব্যৱস্থাক ধূলি দিবলৈ সক্ষম ।

ইফালে এই মিছাইলৰ এটা ইউনিটৰ খৰচো অতি কম, তথাপিও ই ব্যয়বহুল প্ৰতিৰক্ষা ব্যৱস্থাক ধূলি দিবলৈ সক্ষম । ইয়াৰ ফলত ইৰাণৰ মনোবল বৃদ্ধি পাইছে, একে সময়তে আমেৰিকা আৰু ইজৰাইল ডাঙৰ লোকচানৰ সন্মুখীন হৈছে ।

লগতে পঢ়ক : অকলশৰীয়া হৈ পৰিল ট্ৰাম্প; সহায়ৰ বাবে অস্বীকাৰ জাপান-অষ্ট্ৰেলিয়াৰ

পশ্চিম এছিয়াৰত ইৰান আৰু আমেৰিকাৰ মাজত সামৰিক সংঘাতে তীব্ৰ ৰূপ লৈছে । ইয়াৰ মাজতে ইৰানে এক ডাঙৰ জাবী কৰিছে ।

পশ্চিম এছিয়াৰ জলসীমাত ইৰান আৰু আমেৰিকাৰ মাজত সামৰিক সংঘাত বিপজ্জনক স্তৰত উপনীত হৈছে । ইৰানৰ ইছলামিক ৰিভল্যুচনেৰী গাৰ্ড কৰ্পছে দাবী কৰিছে যে তেওঁলোকে আমেৰিকাৰ বিমানবাহী জাহাজ ইউ এছ এছ আব্ৰাহাম লিংকনৰ ওপৰত নিখুঁত মিছাইল আৰু ড্ৰোন আক্ৰমণ চলাই জাহাজখনৰ যথেষ্ট ক্ষতিসাধন কৰে । কিন্তু আমেৰিকাই এই দাবীক ব্যৰ্থ ভাবুকি আখ্যা দি সম্পূৰ্ণৰূপে নাকচ কৰিছে ।

ইৰানৰ চৰকাৰী সংবাদ মাধ্যম প্ৰেছ টিভিৰ মতে, আই আৰ জি চিয়ে ওমানৰ ওচৰৰ সাগৰত এই অভিযান চলাইছিল । ইৰানৰ দাবী যে তেওঁলোকৰ উন্নত অস্ত্ৰই ইৰানৰ সীমান্তৰ পৰা ৩৪০ কিলোমিটাৰ দূৰত্বত অৱস্থিত যুদ্ধজাহাজখনক লক্ষ্য কৰি লৈছিল ।

আই আৰ জি চিৰ বিবৃতিত কোৱা হৈছে যে এই আক্ৰমণৰ ফলত আব্ৰাহাম লিংকন নামৰ যুদ্ধ জাহাজখন অক্ষম হৈ পৰে আৰু তীব্ৰ বেগত অঞ্চলটোৰ পৰা আঁতৰি আহিবলগীয়া হয় । ইৰানে বাহৰেইনত থকা আমেৰিকাৰ মিনা ছলমান নৌসেনা ঘাটিতো ড্ৰোন আক্ৰমণ সংঘটিত কৰাৰ দাবী উত্থাপন কৰে ।

ইফালে আমেৰিকাই ইৰানৰ এই দাবীক কল্পনাপ্ৰসূত আৰু ভুৱা বুলি দাবী কৰিছে ।

লগতে পঢ়ক : যুদ্ধৰ মাজতে পুনৰ মোক্ষম আঘাত; দুৰ্ঘটনাত পতিত আমেৰিকাৰ সামৰিক ইন্ধন ভৰোৱা বিমান

শনিবাৰে গভীৰ নিশা আমেৰিকা আৰু ইজৰাইলৰ সামৰিক বাহিনীয়ে ইৰাণৰ ৰাজধানী তেহৰাণত ব্যাপক বিমান আক্ৰমণ চলায়

মধ্যপ্ৰাচ্যত চলি থকা যুদ্ধই এতিয়া আটাইতকৈ বিধ্বংসী ৰূপ ধাৰণ কৰিছে । শনিবাৰে গভীৰ নিশা আমেৰিকা আৰু ইজৰাইলৰ সামৰিক বাহিনীয়ে ইৰাণৰ ৰাজধানী তেহৰাণত ব্যাপক বিমান আক্ৰমণ চলায় । এইবাৰ আক্ৰমণৰ মূল লক্ষ্য আছিল ইৰাণৰ জীৱনৰেখা বুলি গণ্য কৰা তেল ডিপো আৰু শক্তিৰ আন্তঃগাঁথনি ।

আক্ৰমণৰ পিছত সমগ্ৰ ৰাজধানীত বিস্ফোৰণৰ শব্দ শুনা যায় আৰু দূৰ-দূৰণিৰ পৰাও জুইৰ শিখা আৰু ধোঁৱা দেখা যায় । ইৰাণৰ চৰকাৰী সংবাদ সংস্থাই প্ৰকাশ কৰা তথ্য অনুসৰি দক্ষিণ তেহৰাণৰ তেল ডিপো আৰু উত্তৰ-পশ্চিম অঞ্চলৰ শ্বাহৰাণ তেল ডিপোত ক্ষেপণাস্ত্ৰ আক্ৰমণ কৰা হৈছে ।

আক্ৰমণ ইমানেই নিখুঁত আৰু বিধ্বংসী আছিল যে চুবুৰীয়া চহৰ কাৰাজলৈকে বিস্ফোৰণৰ শব্দ শুনা গৈছিল । ছ’চিয়েল মিডিয়াৰ ফুটেজত দেখা গৈছে যে তেহৰাণৰ আকাশ বিশাল জুইৰ গোলক আৰু ক’লা ধোঁৱাৰ ঢৌৱে আৱৰি ধৰিছে ।

ইজৰাইলৰ সেনাই এই আক্ৰমণৰ দায়িত্ব স্বীকাৰ কৰি দাবী কৰিছে যে ইৰাণৰ সশস্ত্ৰ বাহিনীয়ে ব্যৱহাৰ কৰি থকা ইন্ধন সংৰক্ষণ কেন্দ্ৰসমূহক লক্ষ্য কৰি লোৱা হৈছে । তেহৰাণৰ সমীপৰ ‘শ্বাহৰ-ই-ৰে’ জিলাৰ মূল শোধনাগাৰ আৰু আলবৰ্জ প্ৰদেশৰ কেইবাটাও তেল ডিপো আক্ৰমণৰ সন্মুখীন হৈছে ।

বিশেষজ্ঞসকলৰ মতে শক্তিৰ সুবিধাসমূহৰ ওপৰত এই প্ৰত্যক্ষ আক্ৰমণ ইৰাণৰ অৰ্থনীতি আৰু সামৰিক সামৰ্থ্যক ক্ষতিগ্ৰস্ত কৰাৰ এক ইচ্ছাকৃত কৌশল । বিগত সপ্তাহৰ সংঘাতত ইৰাণৰ শক্তি আন্তঃগাঁথনিক এই পৰিসৰত লক্ষ্য কৰি লোৱা হৈছে ।

লগতে পঢ়ক : ক্ষমা খোজাৰ পাছতো অব্যাহত আক্ৰমণ, ডুবাইৰ মেৰিনা টাৱাৰত ইৰাণী ড্ৰোনৰ আঘাত