‘ভাৰতৰ সৈতে সম্পৰ্ক বিঘ্নিত কৰাৰ প্ৰয়াস…’আমেৰিকাৰ প্ৰতিৰক্ষা মন্ত্ৰালয়ৰ প্ৰতিবেদনক তীব্ৰ সমালোচনা চীনৰ
আমেৰিকাৰ এই প্ৰতিবেদনে ভুৱা আখ্যান ৰচনা কৰি দেশসমূহৰ মাজত অবিশ্বাস আনিবলৈ চেষ্টা কৰিছে বুলি কয় চীনে । এনে প্ৰতিবেদন আঞ্চলিক শান্তি আৰু স্থিতিশীলতাৰ বাবে ক্ষতিকাৰক বুলি উল্লেখ কৰে চীনে ।
আমেৰিকাৰ এক প্ৰতিবেদনক লৈ তীব্ৰ প্ৰতিক্ৰিয়া প্ৰকাশ কৰিছে চীনে । পেন্টাগনৰ প্ৰতিবেদনত উত্থাপিত অভিযোগ নাকচ কৰি চীনে কয় যে এই প্ৰতিবেদনে ভুৱা আখ্যান ৰচনা কৰি দেশসমূহৰ মাজত অবিশ্বাস আনিবলৈ চেষ্টা কৰিছে । বেইজিঙে অভিযোগ কৰে যে আমেৰিকাই সামৰিক আধিপত্যৰ নীতিক ন্যায্যতা প্ৰদান কৰিবলৈ এনে প্ৰতিবেদন ব্যৱহাৰ কৰে ।
চীনৰ বৈদেশিক মন্ত্ৰালয়ে স্পষ্টভাৱে কয় যে পেন্টাগনৰ প্ৰতিবেদনে চীনৰ প্ৰতিৰক্ষা নীতিক বিকৃত কৰি চীন আৰু ভাৰতকে ধৰি অন্যান্য দেশৰ মাজত কুটিলতা সৃষ্টি কৰাৰ চেষ্টা কৰিছে । চীনে ভাৰতৰ সৈতে নিজৰ সম্পৰ্কক দীৰ্ঘম্যাদী আৰু কৌশলগত দৃষ্টিকোণৰ পৰা চোৱা বুলিও উল্লেখ কৰে ।
চীনৰ বৈদেশিক মন্ত্ৰালয়ৰ মুখপাত্ৰ লিন জিয়ানে কয় যে এই প্ৰতিবেদনত চীনৰ সামৰিক নীতিক ভুলকৈ উপস্থাপন কৰা হৈছে । আন্তঃৰাষ্ট্ৰীয় সম্প্ৰদায়ক বিপথে পৰিচালিত কৰাৰ লগতে সংঘাতপূৰ্ণ ৰাজনীতিৰ প্ৰচাৰৰ বাবে আমেৰিকাই বাৰে বাৰে এনে প্ৰতিবেদন জাৰি কৰে বুলিও তেওঁ কয় ।
ভাৰত-চীন সম্পৰ্কত চীনৰ স্থিতি-
ভাৰতৰ সৈতে আলোচনা বৃদ্ধি, পাৰস্পৰিক বিশ্বাস শক্তিশালী আৰু শান্তিপূৰ্ণভাৱে মতানৈক্য সমাধানৰ বাবে সাজু বুলি চীনে উল্লেখ কৰে । সীমা বিবাদ সন্দৰ্ভত চীনে পুনৰ কয় যে বিষয়টো কেৱল ভাৰত আৰু চীনৰ মাজৰ আৰু বৰ্তমানৰ পৰিস্থিতি স্বাভাৱিক আৰু সুস্থিৰ ।
এল এ চি আৰু ব্ৰিকছৰ বৈঠকৰ কথা উল্লেখ-
পেন্টাগনৰ প্ৰতিবেদনত ব্ৰিকছ সন্মিলনৰ সময়ত ছি জিনপিং আৰু নৰেন্দ্ৰ মোদীৰ মাজত হোৱা বৈঠকৰ উদ্ধৃতি দিয়া হৈছে । প্ৰতিবেদন অনুসৰি এই বৈঠকৰ ফলত এল এ চিৰ কাষত উত্তেজনা হ্ৰাস কৰাৰ চুক্তি হয় আৰু দুয়োখন দেশৰ মাজত উচ্চ পৰ্যায়ৰ আলোচনা হয় ।
উল্লেখ্য যে, এনে প্ৰতিবেদন আঞ্চলিক শান্তি আৰু স্থিতিশীলতাৰ বাবে ক্ষতিকাৰক বুলি উল্লেখ কৰি চীনে আমেৰিকাক মিছা অভিযোগ বন্ধ কৰি সংঘাতৰ পৰিৱৰ্তে সহযোগিতাৰ পথ গ্ৰহণ কৰিবলৈ আহ্বান জনাইছে ।
লগতে পঢ়ক : শ্বেখ হাছিনাৰ আৱামি লীগৰ ওপৰত নিষেধাজ্ঞা… অংশগ্ৰহণ কৰিব নোৱাৰিব নিৰ্বাচনত