এক প্ৰতিবেদন অনুসৰি ব’ৰ্ডে বৰ্তমানৰ টি-২০ অধিনায়ক সূৰ্যকুমাৰ যাদৱক অধিনায়কত্বৰ পৰা আঁতৰোৱাৰ সিদ্ধান্ত লৈছে
ভাৰতীয় টি-২০ ক্ৰিকেট দলত এক ডাঙৰ সালসলনি হোৱাৰ সম্ভাৱনা দেখা দিছে । আয়াৰলেণ্ড আৰু ইংলেণ্ড ভ্ৰমণৰ বাবে টীম ইণ্ডিয়াই এজন নতুন টি-২০ অধিনায়ক লাভ কৰাৰ পূৰ্ণ সম্ভাৱনা আছে । প্ৰকাশিত এক প্ৰতিবেদন অনুসৰি, ব’ৰ্ডে বৰ্তমানৰ টি-২০ অধিনায়ক সূৰ্যকুমাৰ যাদৱক অধিনায়কত্বৰ পৰা আঁতৰোৱাৰ সিদ্ধান্ত লৈছে ।
বাছনি সমিতি আৰু হেড কোচ গৌতম গম্ভীৰে মিলি এই গুৰুত্বপূৰ্ণ সিদ্ধান্ত গ্ৰহণ কৰিছে । জানিব পৰা মতে, সূৰ্যকুমাৰ যাদৱৰ অধিনায়কত্বত টীম ইণ্ডিয়াই টি-২০ বিশ্বকাপ জয় কৰিছিল যদিও, তেওঁৰ সাম্প্ৰতিক ফৰ্ম আৰু ভৱিষ্যতৰ পৰিকল্পনাক লক্ষ্য কৰি এতিয়া এজন নতুন অধিনায়ক বাছনি কৰাৰ সময় আহি পৰিছে ।
বৰ্তমান টীম ইণ্ডিয়াৰ ক্ৰিকেট টিমৰ নেতৃত্ব ল’বলৈ ৫ গৰাকী শক্তিশালী দাবীদাৰ খেলুৱৈৰ নাম চৰ্চালৈ আহিছে :
শ্ৰেয়াছ আয়াৰ (আটাইতকৈ আগশাৰীৰ দাবীদাৰ)
নতুন টি-২০ অধিনায়ক হোৱাৰ দৌৰত শ্ৰেয়াছ আয়াৰৰ নাম আটাইতকৈ আগত আছে । আয়াৰে পূৰ্বতে নিজৰ নেতৃত্বত কলকাতা নাইট ৰাইডাৰ্ছ (KKR)-ক চেম্পিয়ন কৰাইছিল আৰু দিল্লী কেপিটেলছকো প্ৰথমবাৰৰ বাবে ফাইনেললৈ লৈ গৈছিল । আনকি ২০২৫ চনৰ ফাইনেলতো পঞ্জাব কিংছে তেওঁৰ অধিনায়কত্বত চমকপ্ৰদ প্ৰদৰ্শন কৰিছিল । উল্লেখ্য যে, যেতিয়া KKR-এ খিতাপ জিকিছিল, তেতিয়া বৰ্তমানৰ হেড কোচ গৌতম গম্ভীৰ সেই দলৰ মেণ্টৰ আছিল । শেহতীয়াকৈ এদিনীয়া দলৰ সহ-অধিনায়কৰ দায়িত্ব পোৱা আয়াৰে সূৰ্যকুমাৰৰ স্থানত চতুৰ্থ নম্বৰতো বেটিং কৰিব পাৰে ।
শুভমন গীল-
ভাৰতৰ টেষ্ট আৰু এদিনীয়া দলৰ অধিনায়ক শুভমন গীলো এই দৌৰৰ এজন অন্যতম বলীষ্ঠ প্ৰাৰ্থী । তেওঁৰ অধিনায়কত্বতে গুজৰাট টাইটানছ আইপিএল ২০২৬-ৰ ফাইনেলত উপনীত হৈছিল । টি-২০ ফৰ্মেটত নিয়মীয়াকৈ খেলা গীল অলপতে সমাপ্ত হোৱা আইপিএলত দ্বিতীয় সৰ্বাধিক ৰান সংগ্ৰহকাৰী বেটছমেন আছিল ।
ৰজত পাটিদাৰ-
সকলোকে আচৰিত কৰি এই দৌৰত নতুনকৈ সংযোজিত হৈছে ৰজত পাটিদাৰৰ নাম । যদিও তেওঁ এতিয়ালৈকে কোনো আন্তঃৰাষ্ট্ৰীয় টি-২০ মেচ খেলা নাই, তথাপিও আইপিএলত আৰচিবী (RCB)-ক তেওঁৰ প্ৰথম বছৰতে চেম্পিয়ন কৰাই ইতিহাস ৰচনা কৰিছিল । এইবাৰো বেংগালুৰু তেওঁৰ নেতৃত্বতে চেম্পিয়ন হৈ একেৰাহে দুবাৰকৈ খিতাপ দখল কৰা ইতিহাসৰ তৃতীয়টো দল হিচাপে পৰিগণিত হৈছে ।
তিলক বাৰ্মা-
অতি কম সময়ৰ ভিতৰতে নিজৰ দক্ষতা প্ৰমাণ কৰা যুৱ খেলুৱৈ তিলক বাৰ্মাও মেনেজমেণ্টৰ বাবে এক আকৰ্ষণীয় বিকল্প হ’ব পাৰে । যদিও তেওঁক দায়িত্ব দিয়াটো এক বিপদাশংকা হ’ব পাৰে, কিন্তু গৌতম গম্ভীৰ এনেধৰণৰ সাহসী সিদ্ধান্ত ল’বলৈ জনাজাত । চাপৰ সময়ত সূক্ষ্মতাৰে খেলা তিলকক ভৱিষ্যতৰ বাবে প্ৰস্তুত কৰিব পাৰে মেনেজমেণ্টে ।
হাৰ্দিক পাণ্ডিয়া-
ৰোহিত শৰ্মাৰ অৱসৰৰ পিছত হাৰ্দিক পাণ্ডিয়া অধিনায়কত্বৰ প্ৰথম পছন্দ আছিল যদিও পৰৱৰ্তী সময়ত সূৰ্যকুমাৰক দায়িত্ব দিয়া হৈছিল । হাৰ্দিকৰ ফিটনেছ আৰু কৰ্মভাৰ মেনেজমেণ্টৰ বাবে তেওঁক পূৰ্ণকালীন অধিনায়ক কৰাটো অলপ কঠিন হ’ব পাৰে, তথাপিও তেওঁৰ দাবীদাৰীক সম্পূৰ্ণৰূপে নুই কৰিব নোৱাৰি । বিগত আইপিএলত মুম্বাই ইণ্ডিয়ানছৰ অধিনায়ক হিচাপে তেওঁৰ প্ৰদৰ্শন যথেষ্ট হতাশাজনক আছিল ।
এতিয়া সমগ্ৰ দেশৰে চকু থাকিব বিচিচিআইৰ আনুষ্ঠানিক ঘোষণাৰ ওপৰত, যে আয়াৰলেণ্ড আৰু ইংলেণ্ড ভ্ৰমণত টীম ইণ্ডিয়াক কোনে নেতৃত্ব প্ৰদান কৰে ।
লগতে পঢ়ক : প্ৰথমে ফিটনেছ, তাৰ পিছতহে দলত স্থান! হাৰ্দিক পাণ্ডিয়া-ৰোহিত শৰ্মাক BCCI-ৰ আল্টিমেটাম
