এই গুৰুত্বপূৰ্ণ শৃংখলাটো আৰম্ভ হোৱাৰ পূৰ্বে টীম ইণ্ডিয়াৰ তাৰকা অলৰাউণ্ডাৰ হাৰ্দিক পাণ্ডিয়া-ৰোহিত শৰ্মাই নিজৰ ফিটনেছ প্ৰমাণ কৰিব লাগিব
আফগানিস্তানৰ বিৰুদ্ধে আগন্তুক তিনিখনীয়া এদিনীয়া শৃংখলাক কেন্দ্ৰ কৰি ক্ৰীড়ামহলাত এতিয়া ব্যাপক চৰ্চা চলিছে । এই গুৰুত্বপূৰ্ণ শৃংখলাটো আৰম্ভ হোৱাৰ পূৰ্বে টীম ইণ্ডিয়াৰ তাৰকা অলৰাউণ্ডাৰ হাৰ্দিক পাণ্ডিয়াই নিজৰ ফিটনেছ প্ৰমাণ কৰিব লাগিব । ভাৰতীয় ক্ৰিকেট নিয়ন্ত্ৰণ ব’ৰ্ড চমুকৈ BCCI-য়ে স্পষ্ট কৰি দিছে যে চূড়ান্ত একাদশত স্থান লাভ কৰাৰ পূৰ্বে তেওঁ বেংগালুৰুস্থিত ‘চেণ্টাৰ অৱ এক্সেলেন্স’ অৰ্থাৎ CoE-ৰ পৰা ফিটনেছ ক্লিয়াৰেন্স লাভ কৰাটো বাধ্যতামূলক ।
আফগানিস্তানৰ বিৰুদ্ধে এদিনীয়া শৃংখলাৰ বাবে ঘোষিত ভাৰতীয় দলত হাৰ্দিক পাণ্ডিয়াক অন্তৰ্ভুক্ত কৰা হৈছে যদিও তেওঁৰ নামৰ সৈতে এই বিশেষ ফিটনেছৰ চৰ্তটো যোগ কৰি দিয়া হৈছে । প্ৰাপ্ত প্ৰতিবেদন অনুসৰি, হাৰ্দিক ইতিমধ্যে ২ জুনত বেংগালুৰুৰ চেণ্টাৰ অৱ এক্সেলেন্সত উপস্থিত হৈছে । শৃংখলাটো আৰম্ভ হোৱাৰ পূৰ্বে তেওঁ তাত এসপ্তাহতকৈও অধিক সময় অতিবাহিত কৰিব । এই সময়ছোৱাত ৩২ বছৰীয়া অলৰাউণ্ডাৰগৰাকীয়ে বিভিন্ন ফিটনেছ ড্ৰিল আৰু কঠোৰ শাৰীৰিক মূল্যায়নৰ মাজেৰে পাৰ হ’ব লাগিব । সকলো নিৰ্ধাৰিত মাপদণ্ডত উত্তীৰ্ণ হ’লেহে তেওঁ ‘ৰিটাৰ্ণ টু প্লে’ চমুকৈ RTP মঞ্জুৰী লাভ কৰিব আৰু তাৰ পিছতহে আফগানিস্তানৰ বিৰুদ্ধে তেওঁৰ খেলাক লৈ চূড়ান্ত সিদ্ধান্ত লোৱা হ’ব ।
হাৰ্দিকৰ বাবে এই ফিটনেছ টেষ্ট অতি গুৰুত্বপূৰ্ণ বিবেচিত হৈছে, কিয়নো সদ্যসমাপ্ত IPL 2026-ত মুম্বাই ইণ্ডিয়ানছৰ অধিনায়কত্ব কৰাৰ সময়ত তেওঁ পিঠিৰ বিষৰ সমস্যাত ভুগিছিল । এই শাৰীৰিক সমস্যাৰ বাবেই তেওঁ টুৰ্নামেণ্টখনৰ কেইখনমান মেচত অংশ লব পৰা নাছিল । উল্লেখ্য যে, তেওঁ খেলা শেষ এদিনীয়া মেচখন আছিল ICC চেম্পিয়নছ ট্ৰফী ২০২৫-ৰ ফাইনেলত নিউজীলেণ্ডৰ বিৰুদ্ধে ।
কেৱল হাৰ্দিক পাণ্ডিয়াই নহয়, টীম ইণ্ডিয়াৰ প্ৰাক্তন অধিনায়ক ৰোহিত শৰ্মাকো BCCI-য়ে চেণ্টাৰ অৱ এক্সেলেন্সত ৰিপৰ্ট কৰিবলৈ নিৰ্দেশ দিছে । ৰোহিতো IPL 2026-ৰ সময়ত হেমষ্ট্ৰিংৰ আঘাতৰ সৈতে যুঁজি আছিল । এই বাবেই আফগানিস্তান শৃংখলাৰ বাবে ঘোষিত ভাৰতীয় দলত ৰোহিত শৰ্মাৰ নামৰ আগতো ফিটনেছ সম্পৰ্কীয় চৰ্ত আৰোপ কৰা হৈছে । অৱশ্যে মুম্বাই ইণ্ডিয়ানছৰ মুখ্য প্ৰশিক্ষক মাহেলা জয়বৰ্ধনেই শেহতীয়াকৈ দাবী কৰিছে যে ৰোহিত সম্পূৰ্ণ সুস্থ । জয়বৰ্ধনেৰ মতে, ৰোহিতক আঘাতৰ পৰা পৰিত্ৰাণ পাবলৈ পৰ্যাপ্ত সময় দিয়া হৈছিল আৰু মেডিকেল টিমে তেওঁক এশ শতাংশ ফিট বুলি ঘোষণা কৰিছে । তেওঁ লগতে স্পষ্ট কৰে যে IPL-ত ৰোহিতক ‘ইম্পেক্ট প্লেয়াৰ’ হিচাপে ব্যৱহাৰ কৰাটো দলৰ এক ৰণনীতিহে আছিল, ইয়াৰ সৈতে খেলুৱৈগৰাকীৰ ফিটনেছৰ কোনো সম্পৰ্ক নাছিল ।
ভাৰত আৰু আফগানিস্তানৰ মাজত হ’বলগীয়া এই তিনিখনীয়া এদিনীয়া শৃংখলাটি অহা ১৩ জুনৰ পৰা ধৰমশালাৰ HPCA ষ্টেডিয়ামত আৰম্ভ হ’ব । শৃংখলাৰ দ্বিতীয়খন মেচ ১৭ জুনত লক্ষ্ণৌৰ একানা ষ্টেডিয়ামত খেলা হ’ব আৰু তৃতীয় তথা অন্তিমখন এদিনীয়া মেচ ২০ জুনত চেন্নাইত অনুষ্ঠিত হ’ব ।
এই শৃংখলাটোৰ বাবে ঘোষিত ভাৰতীয় দলটোক নেতৃত্ব দিব শুভমন গীলে । দলৰ বাকী সদস্যসকল হ’ল ৰোহিত শৰ্মা, বিৰাট কোহলী, সহ-অধিনায়ক শ্ৰেয়াছ আয়াৰ, উইকেটকীপাৰ কে এল ৰাহুল আৰু ইশান কিষাণ, হাৰ্দিক পাণ্ডিয়া, নীতিশ কুমাৰ ৰেড্ডী, ৱাশ্বিংটন সুন্দৰ, কুলদীপ যাদৱ, অৰ্শদীপ সিং, প্ৰসিদ্ধ কৃষ্ণা, প্ৰিন্স যাদৱ, গুৰনুৰ ব্ৰাৰ আৰু হৰ্ষ ডুবে । ইয়াৰে ৰোহিত শৰ্মা আৰু হাৰ্দিক পাণ্ডিয়াৰ অংশগ্ৰহণ সম্পূৰ্ণৰূপে ফিটনেছ ক্লিয়াৰেন্সৰ ওপৰত নিৰ্ভৰ কৰিব । বৰ্তমান ক্ৰীড়াপ্ৰেমী তথা নিৰ্বাচক সকলোৰে চকু এই দুই তাৰকা খেলুৱৈৰ ফিটনেছ ৰিপৰ্টৰ ওপৰত নিবদ্ধ হৈছে । যদি দুয়ো সময়মতে সেউজ সংকেত লাভ কৰে, তেন্তে আফগানিস্তানৰ বিৰুদ্ধে ভাৰতীয় দলটো বহুত বেছি শক্তিশালী হৈ পৰিব ।
লগতে পঢ়ক : বিচিচিআইৰ ডাঙৰ ঘোষণা: টিম ইণ্ডিয়া শিবিৰত প্ৰৱেশ আকিব নবী
