২০২৬ৰ আই পি এলত প্ৰথমটো শতক অৰ্জন কৰিছে সঞ্জু চেমছনে

আই পি এল ২০২৬ৰ সংস্কৰণত শতক অৰ্জন কৰা প্ৰথমজন বেটছমেন হিচাপে পৰিগণিত হৈছে সঞ্জু চেমছন । শনিবাৰে দিল্লী কেপিটেলছৰ বিৰুদ্ধে অনুষ্ঠিত হোৱা মেচত তেওঁ এই কৃতিত্ব অৰ্জন কৰে । চেমছনে ৫২টা বলত শতক অৰ্জন কৰে, যিটো তেওঁৰ আই পি এল কেৰিয়াৰৰ আটাইতকৈ দ্ৰুততম শতক । আই পি এলত চেন্নাই ছুপাৰ কিংছৰ হৈ খেলি থকাৰ সময়ত এইবাৰ প্ৰথমবাৰৰ বাবে শতক অৰ্জন কৰিছে তেওঁ ।

আই পি এল ২০২৬ৰ প্ৰথমটো শতক-

২০২৬ৰ আই পি এলত প্ৰথমটো শতক অৰ্জন কৰিছে সঞ্জু চেমছনে । পূৰ্বতে চলিত ছিজনৰ সৰ্বোচ্চ স্ক’ৰ অৰ্জন কৰিছিল দিল্লী কেপিটেলছৰ কে এল ৰাহুলে, যিয়ে ৯২ ৰান সংগ্ৰহ কৰিছিল । দিল্লীৰ সমীৰ ৰিজভিয়েও ৯০ ৰান সংগ্ৰহ কৰিছিল যদিও এতিয়া চেমছনে প্ৰথমটো শতক অৰ্জন কৰি অভিলেখ গঢ়িছে ।

দ্ৰুততম শতকৰ অভিলেখ-

দিল্লী কেপিটেলছৰ বিৰুদ্ধে খেলখনত ৫২টা বলত শতক অৰ্জন কৰে সঞ্জু চেমছনে । ব্যক্তিগতভাৱে এইটোৱেই তেওঁৰ আই পি এলৰ আটাইতকৈ দ্ৰুততম শতক । তেওঁৰ পূৰ্বৰ আটাইতকৈ দ্ৰুততম শতক ৫৪টা বলত আছিল যিটো তেওঁ ২০১৯ৰ ছিজনত ৰাজস্থান ৰয়েলছৰ হৈ খেলি থকাৰ সময়তে পঞ্জাব কিংছৰ বিৰুদ্ধে শতক অৰ্জন কৰিছিল ।

𝐇.𝐔.𝐍.𝐃.𝐑.𝐄.𝐃 💯

First of #TATAIPL 2026 😍
First in yellow 💛

Sanju Samson, Take A Bow 🙇‍♂️

Updates ▶️ https://t.co/BzGc6O65jX #KhelBindaas | #CSKvDC | @IamSanjuSamson pic.twitter.com/s2Hq1vSMsr

— IndianPremierLeague (@IPL) April 11, 2026

আই পি এলত চেন্নাই ছুপাৰ কিংছৰ বাবেও এয়া পঞ্চমটো দ্ৰুততম শতক । ২০১০ চনত ৰাজস্থান ৰয়েলছৰ বিৰুদ্ধে ৪৬টা বলত শতক অৰ্জন কৰা মুৰালী বিজয়ে চি এছ কেৰ হৈ দ্ৰুততম শতক অৰ্জন কৰাৰ অভিলেখ গঢ়িবলৈ সক্ষম হৈছিল । বিগত ১৬ বছৰে এই অভিলেখ মুৰালী বিজয়ৰ হাতত আছে ।

উল্লেখ্য যে, আই পি এল ২০২৬ত চেন্নাই ছুপাৰ কিংছৰ হৈ তিনিটা ইনিংছত ৬, ৭, আৰু ৯ ৰান সংগ্ৰহ কৰি সেই তিনিটা ইনিংছত মাত্ৰ ২২ ৰান সংগ্ৰহ কৰাৰ বাবে সমালোচনাৰ সন্মুখীন হৈছিল সঞ্জু চেমছন । অৱশ্যে দিল্লী কেপিটেলছৰ বিৰুদ্ধে তেওঁৰ বিস্ফোৰক শতকে তেওঁৰ সমালোচকসকক যোগ্য প্ৰত্যুত্তৰ দিবলৈ সক্ষম হয় ।

১৮ কোটিত চেন্নাইলৈ-

চলিত ছিজনত ৰাজস্থান ৰয়েলছৰ পৰা চেন্নাই চুপাৰ কিংছলৈ ১৮ কোটি টকাত ট্ৰেডিং কৰা হৈছিল সঞ্জু চেমছনক । ইয়াৰ বিনিময়ত চি এছ কেয়ে ৰবীন্দ্ৰ জাডেজা আৰু ছেম কাৰানক ৰাজস্থান ৰয়েলছৰ সৈতে ট্ৰেডিং কৰিছিল । প্ৰথম তিনিখন মেচত চেমছনৰ প্ৰদৰ্শন দুৰ্বল আছিল যদিও এই শতকৰ জৰিয়তে তেওঁ দেখুৱাই দিলে নিজৰ শক্তি আৰু প্ৰতিভাক ।

সঞ্জু চেমছনৰ আই পি এলৰ শতক-

–১০২ (৬৩) বনাম আৰ পি এছ, পুনে, ২০১৭

–১০২ (৫৫) বনাম এছ আৰ এইচ, হায়দৰাবাদ, ২০১৯

-১১৯ (৬৩) বনাম পিবিকেএছ, ৱাংখেড়ে, ২০২১

-১০২ (৫২) বনাম ডি চি, চেন্নাই, ২০২৬

উল্লেখ্য য়ে, আই পি এলৰ পূৰ্বে অনুষ্ঠিত হোৱা টি-২০ বিশ্বকাপ ২০২৬তো চেমছন বিস্ফোৰক ফৰ্মত আছিল । প্ৰথম অৱস্থাত প্ৰথম কোনো মেচত সুযোগ পোৱা নাছিল আৰু কিছু মেচত ৰান সংগ্ৰহ কৰিব পৰা নাছিল তেওঁ ।

কিন্তু নকআউট মেচত তেওঁ বিস্ফোৰক প্ৰদৰ্শন আগবঢ়াইছিল । ৱেষ্ট ইণ্ডিজৰ বিৰুদ্ধে ৯৭*, ইংলেণ্ডৰ বিৰুদ্ধে ৮৯ আৰু ফাইনেলত নিউজীলেণ্ডৰ বিৰুদ্ধে ৮৯ ৰান সংগ্ৰহ কৰি দলৰ জয়ত গুৰুত্বপূৰ্ণ ভূমিকা লৈছিল । পাঁচটা ইনিংছত ৩২১ ৰান সংগ্ৰহ কৰিছিল তেওঁ । তেওঁৰ ৮০.২৫ গড় আৰু ষ্ট্ৰাইক ৰেট আছিল ১৯৯.৩৭ । এই প্ৰতিযোগিতাত তেওঁ প্লেয়াৰ অব্ দ্য চিৰিজ সন্মান লাভ কৰিছিল ।

লগতে পঢ়ক : মুল্লনপুৰত শ্ৰেয়াছ আয়াৰৰ ধুমুহা, বৃহৎ লক্ষ্য দিও পঞ্জাৱৰ হাতত ধৰাশায়ী হায়দৰাবাদ

ছানৰাইজাৰ্ছ হায়দৰাবাদক ৬ উইকেটত পৰাস্ত কৰে পঞ্জাৱ কিংছে

আই পি এল ২০২৬ৰ শনিবাৰে অনুষ্ঠিত হোৱা এখন মেচত ছানৰাইজাৰ্ছ হায়দৰাবাদক ৬ উইকেটত পৰাস্ত কৰে পঞ্জাৱ কিংছে । মেচখনত ছানৰাইজাৰ্ছ হায়দৰাবাদে বান্ধি দিয়া ২২০ ৰানৰ কঠিন লক্ষ্যত আনায়াসে উপনীত হয় পঞ্জাব কিংছ । ১৮.৫ অভাৰতে বিজয় লক্ষ্যত উপনীত হয় দলটো । পঞ্জাব কিংছৰ অধিনায়ক শ্ৰেয়াছ আয়াৰে ৩৩টা বলত অপৰাজিত ৬৯ ৰান সংগ্ৰহ কৰে । তেওঁৰ এই দৰ্শনীয় ইনিংছত ৫টা চাৰি আৰু ৫টা ছয় আছিল । চলিত ছিজনত পঞ্জাব কিংছৰ এয়া আছিল তৃতীয়টো জয় ।

চলিত আই পি এলত পঞ্জাৱ কিংছৰ আৰম্ভণি আছিল শক্তিশালী । গুজৰাট টাইটানছ আৰু চেন্নাই ছুপাৰ কিংছক পৰাস্ত কৰাৰ বিপৰীতে কলকাতা নাইট ৰাইডাৰ্ছ বিৰুদ্ধে খেলখন বৰষুণৰ বাবে পৰিত্যক্ত ঘোষণা কৰা হয় । আনহাতে, ছানৰাইজাৰ্ছ হায়দৰাবাদ ৰয়েল চেলেঞ্জাৰছ বেংগালুৰু আৰু লক্ষ্ণৌ ছুপাৰ জায়েন্টছৰ হাতত পৰাস্ত হোৱাৰ বিপৰীতে কলকাতা নাইট ৰাইডাৰ্ছক পৰাস্ত কৰিছে ।

পঞ্জাৱ কিংছৰ ইনিংছ-

২২০ ৰানৰ লক্ষ্য আগত লৈ পঞ্জাব কিংছে শক্তিশালী আৰম্ভণি কৰে । প্ৰিয়ংশ আৰ্য্য আৰু প্ৰভসিমৰন সিঙে ৩৮ বলত প্ৰথম উইকেটৰ বাবে ৯৯ ৰানৰ অংশীদাৰিত্ব গঢ়ে । এই অংশীদাৰিত্বৰ সময়ছোৱাত প্ৰিয়ংশে মাত্ৰ ১৬টা বলত নিজৰ অৰ্ধ শতক অৰ্জন কৰে । স্পীনাৰ শিৱাং কুমাৰে প্ৰিয়ংশক আউট কৰি এই অংশীদাৰিত্ব ভংগ কৰে । প্ৰিয়ংশে ২০টা বলত ৫টা ছয় আৰু ৫টা চাৰিৰ সহায়ত ৫৭টা ৰান সংগ্ৰহ কৰে ।

তাৰ পিছত শিৱাং কুমাৰে অৰ্ধশতক অৰ্জন কৰা প্ৰভসিমৰণ সিঙক পেভিলিয়নৰ বাট দেখুৱাই । প্ৰভসিমৰনে ২৫টা বলত ৪টা ছয় আৰু চাৰিটা চাৰিৰ সহায়ত ৫১ ৰান সংগ্ৰহ কৰে । ইয়াৰ পিছতে শিৱাং কুমাৰে কুপাৰ কনলি (১১)ক আউট কৰে ।

ইয়াৰ পিছতে অধিনায়ক শ্ৰেয়াছ আয়াৰ আৰু ‘ইমপেক্ট চাব’ নেহাল ৱাধেৰা (১৪ ৰান)য়ে চতুৰ্থ উইকেটৰ বাবে ৬৯ ৰানৰ অংশীদাৰিত্বৰে মেচখন সম্পূৰ্ণ পঞ্জাব কিংছৰ পক্ষলৈ আনে ।

হায়দৰাবাদৰ ইনিংছ-

মেচখনত ছানৰাইজাৰ্ছ হায়দৰাবাদে টছ হেৰুৱাই প্ৰথমে বেটিঙৰ আমন্ত্ৰণ লাভ কৰে । প্ৰথমে বেট ধৰি দলটোৱে ৬ উইকেটত ২১৯ ৰান সংগ্ৰহ কৰে । ছানৰাইজাৰ্ছ হায়দৰাবাদৰ আৰম্ভণি বিস্ফোৰক আছিল । অভিষেক শৰ্মা আৰু ট্ৰেভিছ হেডে ৪৯টা বলত ১২০ ৰানৰ অংশীদাৰিত্ব গঢ়ে । মাত্ৰ ১৮টা বলত ৫টা চাৰি আৰু ৫টা ছয়ৰ সহায়ত অভিষেকে অৰ্ধ শতক অৰ্জন কৰে । শশাংক সিঙে ট্ৰেভিছ হেডৰ উইকেট দখল কৰি এই অংশীদাৰিত্ব ভংগ কৰে । ৫টা চাৰি আৰু ৩টা ছয়ৰ সহায়ত ২৩টা বলত ৩৮ ৰান সংগ্ৰহ কৰে হেডে । ইয়াৰ পিছতে শশাংক সিঙে ৯ নং অভাৰত অভিষেক শৰ্মাক আউট কৰে ।

অভিষেক শৰ্মাই ২৮টা বলত ৭৪ ৰান সংগ্ৰহ কৰে, য’ত ৮টা ছয় আৰু ৫টা চাৰিটা আছিল । ইয়াৰ পিছতে হেনৰিখ ক্লাচেন আৰু অধিনায়ক ঈশান কিষানে তৃতীয় উইকেটৰ বাবে ৪৭ ৰানৰ অংশীদাৰিত্ব গঢ়ে । অৰ্শদীপ সিঙে ২৭ ৰানত আউট কৰে ঈশানক ।

সলিল অৰোৰাই ৯ ৰানত অৰ্শদীপ সিঙৰ হাতত নিজৰ উইকেট বিসৰ্জন দিয়ে । হেনৰিখ ক্লাচেন আউট হোৱা ষষ্ঠজন বেটছমেন আছিল । ক্লাচেনক শেষৰ অভাৰত জেভিয়াৰ বাৰ্টলেটে আউট কৰে । ক্লাচেনে ৩৩টা বলত ৩৯ ৰান সংগ্ৰহ কৰে, য’ত এটা চাৰি আৰু এটা ছয় আছিল । পঞ্জাৱ কিংছৰ হৈ অৰ্শদীপ সিং আৰু শশাংক সিঙে দুটাকৈ উইকেট দখল কৰে ।

লগতে পঢ়ক : মুম্বাই ইণ্ডিয়ানছত হিটমেনৰ ১৫ বছৰ… ভাইৰেল হাৰ্দিক পাণ্ডিয়াৰ প্ৰতিক্ৰিয়া

কলকাতা নাইট ৰাইডাৰ্ছ আৰু পঞ্জাব কিংছৰ মাজত অনুষ্ঠিত হ’ব লগা মেচখন বৰষুণৰ বাবে পৰিত্যক্ত ঘোষণা কৰা হয়

সোমবাৰে আই পি এল ২০২৬ৰ কলকাতা নাইট ৰাইডাৰ্ছ আৰু পঞ্জাব কিংছৰ মাজত অনুষ্ঠিত হ’ব লগা মেচখন বৰষুণৰ বাবে পৰিত্যক্ত ঘোষণা কৰা হয় । বৰষুণে বিধি-পথালি দিয়াত মেচখন বাতিল কৰিবলগীয়া হয় । ফলস্বৰূপে দুয়োটা দলে এটাকৈ পইণ্ট লাভ কৰে । কলকাতাৰ ইডেন গাৰ্ডেনত খেলখন অনুষ্ঠিত হৈছিল । টছত জয়ী হৈ কলকাতাই প্ৰথমে বেটিং কৰিবলৈ সিদ্ধান্ত লয় । অৱশ্যে বৰষুণ পুনৰ পোৱাৰ পূৰ্বে মাত্ৰ ৩.৪ অভাৰহে খেল হয় । নিশা ১০:৩০ মান বজাত বৰষুণ বন্ধ হয় যদিও সেমেকা মাটিৰ বাবে আম্পায়াৰসকলে মেচ বাতিল কৰাৰ সিদ্ধান্ত লয় ।

খেলখন বাতিল হোৱাৰ ফলত কলকাতাৰ পইণ্ট টেবুলত এটা পইণ্ট সংযোজন হৈছে । এই মেচৰ পূৰ্বে কেকেআৰে প্ৰথমটো জয়ৰ সন্ধানত আছিল, আৰম্ভণিৰ দুয়োখন মেচতে দলটো পৰাস্ত হৈছিল । ইফালে, পঞ্জাব কিংছে দুয়োখন উদ্বোধনী মেচতে জয়লাভ কৰি এতিয়া ৫ পইণ্ট লাভ কৰিছে ৷ পঞ্জাবে এতিয়া পইণ্ট তালিকাৰ শীৰ্ষত স্থান লাভ কৰিছে ।

প্ৰথমে বেটিং কৰি কেকেআৰ বিপৰ্যয়ৰ মুখত পৰে । দ্বিতীয় অভাৰত ফিন এলেনে মাত্ৰ ৮ ৰান সংগ্ৰহ কৰি উইকেট হেৰুৱাই । ইয়াৰ পিছতে কেমেৰুন গ্ৰীন ৪ ৰানত আউট হয় । ৰাহানে আৰু অংকৃশে ইনিংছটো সুস্থিৰ কৰিবলৈ চেষ্টা কৰে যদিও চতুৰ্থ অভাৰত বৰষুণ আহে আৰু মেচ বাতিল কৰিব লগা হয় ।

এই মেচৰ পিছত এতিয়া পঞ্জাবে ৩ খন মেচৰ পৰা ৫ পইণ্ট লাভ কৰি পইণ্ট তালিকাৰ শীৰ্ষত উপনীত হৈছে । ইফালে, ৩খন মেচৰ পৰা ১ পইণ্ট লাভ কৰি অষ্টম স্থানত আছে কলকাতা নাইট ৰাইডাৰ্ছ ।

লগতে পঢ়ক : গুজৰাটক পৰাস্ত কৰাৰ পিছত চৰ্চাত ৰিয়ান পৰাগৰ বিজয় উদযাপন

শনিবাৰে অনুষ্ঠিত হোৱা মেচখনত ৰিয়ান পৰাগৰ অধিনায়কত্বৰ সিদ্ধান্তসমূহ সঠিক আছিল বুলি প্ৰমাণিত হৈছে

যোৱা ছিজনত অধিনায়ক হিচাপে আঠখন মেচৰ ভিতৰত ছখনতে পৰাস্ত হোৱাৰ পিছত, ৰিয়ান পৰাগে চলিত ইণ্ডিয়ান প্ৰিমিয়াৰ লীগত ৰাজস্থান ৰয়েলছৰ পূৰ্ণকালীন অধিনায়ক হিচাপে ধাৰাবাহিক বিজয়ৰে যাত্ৰা আৰম্ভ কৰিছে । শনিবাৰে নিশা আহমেদাবাদৰ নৰেন্দ্ৰ মোদী ষ্টেডিয়ামত অনুষ্ঠিত হোৱা মেচখনত গুজৰাটক পৰাস্ত কৰে ৰাজস্থান ৰয়েলছে । ইয়াৰ পূৰ্বে গুৱাহাটীৰ বৰ্ষাপাৰা ক্ৰিকেট ষ্টেডিয়ামত অনুষ্ঠিত হোৱা এখন মেচত চেন্নাই ছুপাৰ কিংছক পৰাস্ত কৰিছিল ৰিয়ান পৰাগৰ দলটোৱে ।

শনিবাৰে অনুষ্ঠিত হোৱা মেচখনত ৰিয়ান পৰাগৰ অধিনায়কত্বৰ সিদ্ধান্তসমূহ সঠিক আছিল বুলি প্ৰমাণিত হৈছে । যাৰ ফলত ২১১ ৰান ৰক্ষা কৰি ৰাজস্থান ৰয়েলছে ৰোমাঞ্চকৰ অন্তিম অভাৰত গুজৰাট টাইটানছৰ বিৰুদ্ধে মাত্ৰ ছয় ৰানত বিজয় সাব্যস্ত কৰে । ভাৰতীয় দলৰ প্ৰাক্তন প্ৰশিক্ষক তথা বিশিষ্ট ধাৰাভাষ্যকাৰ ৰবি শাস্ত্ৰীয়ে ইয়াৰ পিছতে ৰিয়ান পৰাগৰ ধৈৰ্যৰ উচ্চ প্ৰশংসা কৰে । শাস্ত্ৰীয়ে এক্স-ত লিখিছে, “আইপিএল ইতিহাসৰ অন্যতম শ্ৰেষ্ঠ খেল । ইয়াক সংৰক্ষণ কৰি থৈ দিয়ক! ৰিয়ান পৰাগ, তোমাৰ সাহস অপৰিসীম আৰু নেতৃত্বৰ ভূমিকাত তোমাৰ ভৱিষ্যত অতি উজ্জ্বল । অসাধাৰণ মানসিক দৃঢ়তা । সুন্দৰ খেলিছা !”

Easily one of the best games in @IPL history. Archive this one! @ParagRiyan , you have got Balls of steel and a big future ahead, especially in a leadership role. Outstanding temperament. Well played! IPL Zindabad! @rajasthanroyals #GTvsRR #IPL2026 pic.twitter.com/Zc3mi0blak

— Ravi Shastri (@RaviShastriOfc) April 4, 2026

পূৰ্বৰ অধিনায়ক সঞ্জু চেমচনে ফ্ৰেঞ্চাইজিটো এৰি যোৱাৰ পিছত, ৰাজস্থান ৰয়েলছ কৰ্তৃপক্ষই দীৰ্ঘম্যাদী অধিনায়ক হিচাপে কেইটামান বিকল্পৰ ভিতৰত পৰাগক বাছনি কৰিছিল । অসমৰ সু-সন্তান গৰাকীয়ে অনুৰাগী তথা সমৰ্থকক হতাশ নকৰিলে আৰু বলিং পৰিবৰ্তনৰ ক্ষেত্ৰত নিখুঁত সিদ্ধান্ত গ্ৰহণ কৰিলে ।

উল্লেখ্য য়ে, ২০০ তকৈ অধিক ৰানৰ লক্ষ্য অনুসৰণ কৰি গুজৰাট টাইটানছে ৰছিদ খান আৰু কাগিছো ৰাবাডাৰ আগ্ৰাসী বেটিঙৰ সহায়ত সুন্দৰকৈ আগবাঢ়িছিল, য’ত তেওঁলোকে প্ৰায় ২০০ ষ্ট্ৰাইক ৰেটত ৰান সংগ্ৰহ কৰিছিল । অন্তিম দুই অভাৰত জয়ৰ বাবে মাত্ৰ ১৫ ৰানৰ প্ৰয়োজন আছিল । নিজৰ প্ৰথম তিনি অভাৰত গড়ে প্ৰায় ১১ ৰান দিয়াৰ পিছতো দ্বিতীয় অন্তিম অভাৰটো কৰিবলৈ জফ্ৰা আৰ্চাৰক দায়িত্ব দিয়া হৈছিল । ইংৰাজ বলাৰজনে মাত্ৰ চাৰিটা চিংগল ৰান দি নিজৰ অধিনায়কৰ বিশ্বাসৰ মৰ্যাদা ৰাখে আৰু গুজৰাট টাইটানছৰ বেটাৰসকলৰ ওপৰত পুনৰ চাপ সৃষ্টি কৰে । ইয়াৰ পিছতে অন্তিম অভাৰত পৰাগে সন্দীপ শৰ্মা আৰু নান্দ্ৰে বাৰ্গাৰৰ দৰে অভিজ্ঞ খেলুৱৈৰ পৰিৱৰ্তে তুষাৰ দেশপাণ্ডেৰ হাতত বল তুলি দি সকলোকে আচৰিত কৰি দিছিল ।

চিএছকেৰ প্ৰাক্তন বলাৰজনে হেঁচা থকা সত্ত্বেও ধাৰাবাহিকভাৱে ইয়ৰ্কাৰ প্ৰদান কৰি অধিনায়ক পৰাগৰ বিশ্বাসৰ প্ৰতিদান দিয়ে । অন্তিম ছটা বলত ১১ ৰানৰ প্ৰয়োজন হোৱা অৱস্থাত ৰছিদ আৰু ৰাবাডাই মাত্ৰ পাঁচ ৰানহে কৰিবলৈ সক্ষম হয় আৰু ৰাজস্থান ৰয়েলছে একেৰাহে দ্বিতীয়টো জয় নিশ্চিত কৰে ।

লগতে পঢ়ক : গুজৰাটক পৰাস্ত কৰাৰ পিছত চৰ্চাত ৰিয়ান পৰাগৰ বিজয় উদযাপন

গুজৰাট টাইটানছৰ বিুৰুদ্ধে ৬ ৰানত জয়লাভ কৰিছে ৰাজস্থান ৰয়েলছে

আই পি এল) ২০২৬ৰ শনিবাৰে অনুষ্ঠিত হোৱা এখন ৰোমাঞ্চকৰ মেচত গুজৰাট টাইটানছৰ বিুৰুদ্ধে ৬ ৰানত জয়লাভ কৰিছে ৰাজস্থান ৰয়েলছে । আহমেদাবাদৰ নৰেন্দ্ৰ মোদী ষ্টেডিয়ামত অনুষ্ঠিত হৈছিল মেচখন । জয়ী হ’বলৈ ২১১ ৰানৰ প্ৰয়োজন হোৱা গুজৰাট টাইটানছে ৮ উইকেটত মাত্ৰ ২০৪ ৰানহে কৰিবলৈ সক্ষম হয় ।

মেচখন শেষ অভাৰলৈ চলিছিল আৰু যথেষ্ট ৰোমাঞ্চকৰ আছিল । অন্তিম অভাৰত জয়ী হ’বলৈ গুজৰাট টাইটানছক প্ৰয়োজন হৈছিল ১১ ৰানৰ । অৱশ্যে সেই অভাৰত বেগী বলাৰ তুষাৰ দেশপাণ্ডেয়ে শক্তিশালী বলিঙৰে মাত্ৰ ৪ ৰানহে দিছিল আৰু লগতে অধিনায়ক ৰছিদ খানৰ উইকেট দখল কৰিছিল । ক্ৰীজত ৰছিদ খান আৰু কাগিছ’ ৰাবাদা স্থিৰ হৈ আছিল যদিও তুষাৰে অন্তিম অভাৰত দুয়োকে সম্পূৰ্ণৰূপে বান্ধি ৰাখে ।

চলিত ছিজনত এয়া আছিল ৰাজস্থান ৰয়েলছৰ ধাৰাবাহিক দ্বিতীয়টো জয় । ইফালে চলিত ছিজনৰ একেৰাহে দ্বিতীয়খন মেচত পৰাস্ত হৈছে গুজৰাট টাইটানছ । গুজৰাট টাইটানছৰ ছিজনৰ আৰম্ভণি বেয়া, প্ৰথমখন মেচত পঞ্জাব কিংছৰ হাতত তিনিটা উইকেটত পৰাস্ত হৈছিল দলটো । ইফালে ৰাজস্থান ৰয়েলছে ৫ বাৰৰ চেম্পিয়ন চেন্নাই ছুপাৰ কিংছক প্ৰথমখন খেলত ৮ উইকেটত পৰাস্ত কৰে ।

গুজৰাটৰ ইনিংছ-

গুজৰাট টাইটানছৰ লক্ষ্য অনুসৰণ কৰি এক সুন্দৰ আৰম্ভণি কৰে । কুমাৰ কুশগ্ৰা আৰু সাই সুদৰ্শনে প্ৰথম উইকেটত ৭৮ ৰান সংযোজন কৰে । কুশগ্ৰাই ১৮ ৰান সংগ্ৰহ কৰে । ৰাজস্থানৰ অধিনায়ক ৰিয়ান পৰাগে কুশগ্ৰাৰ উইকেট দখল কৰে । তাৰ পিছত সুদৰ্শনৰ ৰূপত গুজৰাট টাইটানছ আঘাতৰ সন্মুখীন হয় । সুদৰ্শনে ৪৪টা বলৰ মুখামুখি হৈ ৯টা চাৰি আৰু তিনিটা ছয়কে ধৰি ৭৩ ৰান সংগ্ৰহ কৰে । সুদৰ্শনক আউট কৰে স্পীনাৰ ৰবি বিষ্ণোই, যিয়ে ইমপেক্ট চাব হিচাপে খেলিছিল ।

ইয়াৰ পাছতে ৰবি বিষ্ণোইয়ে গ্লেন ফিলিপছ (৩ ৰান) আৰু ৱাশ্বিংটন সুন্দৰক (৪ ৰান) আউট কৰে । ভাল বেটিং কৰি থকা জোছ বাটলাৰে (২৬ ৰান) নন্দ্ৰে বাৰ্গাৰৰ হাততো উইকেট হেৰুৱাই গুজৰাট টাইটানছক বিপদত পেলায় । ইয়াৰ পিছতে ৰবি বিষ্ণইয়ে মাত্ৰ ১২ ৰানতে ৰাহুল তেৱতিয়াক আউট কৰে । শ্বাহৰুখ খানে ১১ ৰান সংগ্ৰহ কৰি ৰান আউট হয় । ইয়াৰ পিছতে কাগিছ’ ৰাবাদা (২৩ ৰান নট আউট) আৰু ৰছিদ খানে (২৪ ৰান) খেলখন ৰোমাঞ্চকৰ কৰি তুলিছিল ।

ৰাজস্থান ৰয়েলছৰ ইনিংছ-

ৰাজস্থান ৰয়েলছে টছত জয়লাভ কৰি প্ৰথমে বেটিং কৰিবলৈ সিদ্ধান্ত লয় আৰু ৬ উইকেটত ২১০ ৰান সংগ্ৰহ কৰে । ৰাজস্থান ৰয়েলছে শক্তিশালী আৰম্ভণি কৰে । বৈভৱ সূৰ্যবংশী আৰু যশস্বী জয়ছোৱালে ৭০ ৰানৰ অংশীদাৰিত্ব গঢ়ে । বৈভৱ সূৰ্যবংশীয়ে ১৮টা বলত ৩১ ৰান সংগ্ৰহ কৰে । অধিনায়ক ৰছিদ খানৰ বলত বৈভৱৰ উইকেটৰ পতন ঘটে । বৈভৱ আউট হোৱাৰ পাছত ধ্ৰুৱ জুৰেলৰ সৈতে যশস্বীয়ে দ্বিতীয় উইকেটত ৫৬ ৰান সংযোজন কৰে ।

যশস্বী জয়ছোৱালে ৩৬টা বলত ৫৫ ৰান সংগ্ৰহ কৰে । তেওঁক কাগিছ’ ৰাবাডাই এক চমৎকাৰ ডেলিভাৰীৰে ক্লীন বল্ড কৰে । অধিনায়ক ৰিয়ান পৰাগ (৮ ৰান), শ্বিমৰন হেটমায়াৰ (১৮ ৰান) আৰু ড’নভান ফেৰেইৰাই (১ ৰান) বিশেষ প্ৰভাৱ পেলোৱাত ব্যৰ্থ হয় ।

উইকেট পতনৰ মাজতে ক্ৰীজত থাকি ধ্ৰুৱ জুৰেলে উজ্জ্বল ইনিংছ খেলে । জুৰেলে ৪২টা বলত ৭৫ ৰান সংগ্ৰহ কৰে । গুজৰাট টাইটানছৰ হৈ কাগিছ’ ৰাবাদাই সৰ্বাধিক দুটা উইকেট দখল কৰে । ৰছিদ খান, প্ৰসিদ্ধ কৃষ্ণ, অশোক শৰ্মা আৰু মহম্মদ চিৰাজে এটাকৈ উইকেট দখল কৰে ।

এই মেচত গুজৰাট টাইটানছৰ অধিনায়কত্ব কৰিছিল ৰছিদ খানে । আঘাতৰ বাবে নিয়মীয়া অধিনায়ক শুভমন গীলে এই মেচত অংশ লোৱা নাছিল ।

লগতে পঢ়ক : ধুৰন্ধৰ মুডত সূৰ্যকুমাৰ যাদৱ; অক্ষয় খান্নাৰ জনপ্ৰিয় গীতত আইকনিক ষ্টেপ

দিল্লী কেপিটেলছে মুম্বাই ইণ্ডিয়ানছক ৬ উইকেটত পৰাস্ত কৰে

আই পি এল ২০২৬ৰ শনিবাৰে অনুষ্ঠিত হোৱা এখন মেচত দিল্লী কেপিটেলছে মুম্বাই ইণ্ডিয়ানছক ৬ উইকেটত পৰাস্ত কৰে । দিল্লীৰ অৰুণ জেটলী ষ্টেডিয়ামত অনুষ্ঠিত খেলখনত প্ৰথমে বেটিং কৰি মুম্বাইয়ে ১৬২ ৰান সংগ্ৰহ কৰে । ইয়াৰ প্ৰত্যুত্তৰত সমীৰ ৰিজৱীৰ ৯০ ৰানৰ সহায়ত ১৯ অভাৰত দিল্লীয়ে লক্ষ্যত উপনীত হয় । আই পি এল ২০২৬ত দিল্লীৰ এয়া একেৰাহে দ্বিতীয়টো জয় ।

সমীৰ ৰিজৱীৰ বেটিং ধুমুহা-

১৬৩ ৰানৰ লক্ষ্য অনুসৰণ কৰি আৰম্ভণিতে দিল্লী কেপিটেলছ শলঠেকত পৰে, কিয়নো অ’পেনাৰ কে এল ৰাহুল মাত্ৰ এটা ৰানতে পেভিলিয়নমুখী হোৱাৰ বিপৰীতে নীতিশ ৰাণাই নিজৰ একাউণ্ট খুলিবলৈয়ো সক্ষম নহ’ল ।

কিন্তু সমীৰ ৰিজৱীয়ে খেলপথাৰত নামিয়েই মুম্বাইৰ বলাৰৰ বিৰুদ্ধে তাণ্ডৱ আৰম্ভ কৰে । তেওঁ বিস্ফোৰক বেটিংঙৰ সহায়ত ৩১টা বলত অৰ্ধ শতক অৰ্জন কৰে । ইয়াৰ পিছতে ৰিজৱীৰ বেটে ধুমুহাৰ সৃষ্টি কৰে । তেওঁ ৭টা চাৰি আৰু ৭টা ছয়ৰ সহায়ত ৫১টা বলত ৯০ ৰান সংগ্ৰহ কৰে । চলিত আই পি এলত ৰিজভীয়ে মাত্ৰ ২খন মেচতে ১৬০ ৰান সংগ্ৰহ কৰিছে । ইয়াৰ পূৰ্বে লক্ষ্ণৌ ছুপাৰ জায়েন্টছৰ বিৰুদ্ধেও বিস্ফোৰক অৰ্ধশতক অৰ্জন কৰিছিল তেওঁ । ৰিজভীয়ে পাথুম নিছাংকাৰ সৈতে ৬৬ ৰানৰ অংশীদাৰিত্ব আৰু ডেভিদ মিলাৰৰ সৈতে ৭৮ ৰানৰ অংশীদাৰিত্ব গঢ়ে ।

ইফালে মুম্বাই ইণ্ডিয়ানছৰ নিয়মীয়া অধিনায়ক হাৰ্দিক পাণ্ডিয়াই অসুস্থতাৰ বাবে এই মেচত খেলা নাছিল । তেওঁৰ ঠাইত অধিনায়কৰ দায়িত্ব পালন কৰিছিল সূৰ্যকুমাৰ যাদৱে । তেওঁ ৫১ ৰানৰ ইনিংছ খেলে । ৰোহিত শৰ্মাইও ৩৫ ৰানৰ বৰঙণি আগবঢ়াইছিল যদিও সমীৰ ৰিজৱীৰ স্মৰণীয় ৯০ ৰানৰ ইনিংছত সকলো অথলে যায় ।

উল্লেখ্য যে, অক্ষৰ পেটেলৰ অধিনায়কত্বত দিল্লী কেপিটেলছে আই পি এল ২০২৬ৰ অভিযানত এক দৃষ্টিনন্দন আৰম্ভণি কৰিছে । প্ৰথমখন খেলত লক্ষ্ণৌ ছুপাৰ জায়েন্টছক ৬ উইকেটত পৰাস্ত কৰে দলটোৱে । এতিয়া মুম্বাই ইণ্ডিয়ানছক ৬ উইকেটত পৰাস্ত কৰি ছিজনৰ একেৰাহে দ্বিতীয়টো জয় পঞ্জীয়ন কৰিছে দিল্লীয়ে ।

লগতে পঢ়ক : আই পি এলক লৈ বিতৰ্ক; আদালতৰ দুৱাৰত টোকৰ তাৰকা খেলুৱৈৰ

ইডেন গাৰ্ডেনত কলকাতা নাইট ৰাইডাৰ্ছক ৬৫ ৰানত পৰাস্ত কৰে ছানৰাইজাৰ্ছ হায়দৰাবাদে

আই পি এল ২০২৬ৰ বৃহস্পতিবাৰে অনুষ্ঠিত হোৱা এখন মেচত ছানৰাইজাৰ্ছ হায়দৰাবাদ আৰু কলকাতা নাইট ৰাইডাৰ্ছ মুখামুখি হয় । কলকাতাৰ ইডেন গাৰ্ডেনত কলকাতা নাইট ৰাইডাৰ্ছক ৬৫ ৰানত পৰাস্ত কৰে ছানৰাইজাৰ্ছ হায়দৰাবাদে । ২২৭ ৰানৰ লক্ষ্য আগত লৈ আয়োজক দলটোৱে ১৬ অভাৰত ১৬১ ৰানতে আটাইকেইটা উইকেট হেৰুৱাই ।

চলিত ছিজনৰ এয়া আছিল ছানৰাইজাৰ্ছ হায়দৰাবাদৰ প্ৰথমটো জয় । উল্লেখ্য যে, ছানৰাইজাৰ্ছ হায়দৰাবাদে প্ৰথমখন মেচত ৰয়েল চেলেঞ্জাৰছ বেংগালুৰুৰ হাতত ৬ উইকেটত পৰাস্ত হয় । কলকাতা নাইট ৰাইডাৰ্ছো মুম্বাই ইণ্ডিয়ানছৰ হাতত ৬ উইকেটত পৰাস্ত হৈছিল । এতিয়া হায়দৰাবাদ দল পুনৰ বিজয় পথলৈ উভতি আহিছে ।

কলকাতা নাইট ৰাইডাৰ্ছৰ হৈ ৰান চেজত ফিন এলেনে বিস্ফোৰক আৰম্ভণি কৰে । মাত্ৰ ৭টা বলত ২৮ ৰান সংগ্ৰহ কৰে এলেনে । তেওঁ চাৰিটা চাৰি আৰু দুটা ছয় কোবাই । অৱশ্যে এলেনে নিজৰ ইনিংছ দিঘলীয়া কৰাত ব্যৰ্থ হয় আৰু হৰ্ষ ডুবেই তেওঁক পেভিলিয়নৰ বাট দেখুৱাই । অধিনায়ক অজিংক্য ৰাহানেৰ ইনিংছ ভাল হ’ব বুলি আশা কৰা হৈছিল যদিও তেওঁ ১০টা বলত মাত্ৰ ৮ ৰানহে কৰিবলৈ সক্ষম হয় । এই মেচত কেমেৰুন গ্ৰীণ (২ ৰান)ও ব্যৰ্থ হয় । গ্ৰীণক আউট কৰাৰ সময়ত কলকাতাৰ স্ক’ৰ আছিল ৭৪/৩ ।

অংকৃশ ৰঘুবংশীয়ে দলটোক স্থিৰ কৰিবলৈ চেষ্টা কৰিছিল । তেওঁ ২৭টা বলত পঞ্চাশ ৰান কৰে । অৱশ্যে ৰঘুবংশী অৰ্ধ শতকৰ কিছু সময়ৰ পাছতেই ৰান আউট হয় । ৰঘুবংশীয়ে ২৯টা বলত ৫২ ৰান সংগ্ৰহ কৰে, য’ত ৬টা চাৰি আৰু দুটা ছয় আছিল । অনুকুল ৰায় শূণ্যতে পেভিলিয়নমুখী হয় । ইয়াৰ পিছত নীতিশ ৰেড্ডীয়ে ইতিমধ্যে ক্ৰীজত থিতাপি লোৱা ৰিংকু সিঙক (৩৫) আউট কৰে ।

ইয়াৰ পিছতে মেচখন সম্পূৰ্ণৰূপে কলকাতা নাইট ৰাইডাৰ্ছৰ হাতৰ পৰা বাহিৰলৈ যায় । সুনীল নাৰিনে (১২ ৰান), ৰমনদীপ সিং (১০ ৰান), বৈভৱ অৰোৰা (৫ ৰান), আৰু বৰুণ চক্ৰৱৰ্তী (০ ৰান) আউট হৈছিল । ছানৰাইজাৰ্ছ হায়দৰাবাদৰ হৈ জয়দেৱ উনাদকাটে সৰ্বাধিক তিনিটা উইকেট দখল কৰে । ঈশান মালিংগা আৰু নীতিশ কুমাৰ ৰেড্ডীয়ে দুটাকৈ উইকেট দখল কৰে ।

হায়দৰাবাদৰ ইনিংছ-

টছ হেৰুৱাই প্ৰথমে বেটিং কৰাৰ পিছত ছানৰাইজাৰ্ছ হায়দৰাবাদে ৮ উইকেটত ২২৬ ৰান সংগ্ৰহ কৰে । ট্ৰেভিছ হেড আৰু অভিষেক শৰ্মাই মাত্ৰ ৫.৪ অভাৰত ৮২ ৰানৰ অংশীদাৰিত্ব গঢ়ে । হেডে ২১টা বলত ৪৬ ৰান সংগ্ৰহ কৰে, য’ত ৬টা চাৰি আৰু তিনিটা ছয় আছিল । হেডৰ উইকেট দখল কৰে কাৰ্তিক ত্যাগীয়ে ।

অধিনায়ক ঈশান কিষাণে ১৪ ৰান সংগ্ৰহ কৰে । নৱম অভাৰত অভিষেককো আউট কৰে মুজাৰাবানীয়ে । অভিষেকে ২১টা বলত ৪৮ ৰান সংগ্ৰহ কৰে, য’ত চাৰিটা ছয় আৰু চাৰিটা চাৰিটা আছিল । অভিষেকক আউট হোৱাৰ সময়ত হায়দৰাবাদৰ স্ক’ৰ আছিল ১১২/৩ ।

ইয়াৰ পিছতে অনিকেত বাৰ্মাই ১ ৰানত অনুকুল ৰয়ৰ হাতত উইকেট বিসৰ্জন দিয়ে । তাৰ পৰা হাইনৰিখ ক্লাচেন আৰু নীতিশ কুমাৰ ৰেড্ডীয়ে পঞ্চম উইকেটৰ বাবে ৮২ ৰানৰ অংশীদাৰিত্ব গঢ়ে । চাৰিটা চাৰি আৰু এটা ছয়ৰ সহায়ত ২৪টা বলত ৩৯ ৰানৰ বৰঙণি আগবঢ়ায় নীতিশে ।

নীতিশ কুমাৰ ৰেড্ডীক আউট হোৱাৰ পিছত সমগ্ৰ দায়িত্ব হাইনৰিখ ক্লাচেনৰ ওপৰত পৰে । ক্লাচেনে নিৰাশ কৰা নাছিল, তেওঁ অৰ্ধ শতক সম্পূৰ্ণ ৰে । ক্লাচেনে ৩৫টা বলত ৫২ ৰান সংগ্ৰহ কৰে । সলিল অৰোৰা (০ ৰান) আৰু শিৱাং কুমাৰ (৪ ৰান) আউট হয় । কলকাতা নাইট ৰাইডাৰ্ছৰ হৈ ব্লেছিং মুজাৰাবানীয়ে সৰ্বাধিক ৪টা উইকেট দখল কৰাৰ বিপৰীতে বৈভৱ অৰোৰাই দুটা উইকেট দখল কৰে ।

লগতে পঢ়ক : আই পি এলক লৈ বিতৰ্ক; আদালতৰ দুৱাৰত টোকৰ তাৰকা খেলুৱৈৰ