অসম-মেঘালয় সীমা বিবাদ

অসম আৰু মেঘালয়ৰ মাজত দশক দশক পুৰণি সীমা বিবাদ সমাধানৰ উদ্দেশ্যে আন্তঃৰাজ্যিক সীমান্তৰ বিবাদিত অঞ্চলত প্ৰথমটো সীমা স্তম্ভ স্থাপন কৰা হৈছে । শুকুৰবাৰে এই কথা ঘোষণা কৰে অসমৰ মুখ্যমন্ত্ৰী হিমন্ত বিশ্ব শৰ্মাই । অৱশ্যে ইয়াৰ স্থান স্পষ্ট কৰা নাই । শৰ্মাই কয় যে, ১৯৭২ চনত যেতিয়া মেঘালয় অসমৰ পৰা পৃথক হৈ নতুন ৰাজ্যত পৰিণত হৈছিল, তেতিয়া ইয়াৰ সীমান্তৰ এক উল্লেখযোগ্য অংশ অস্পষ্ট হৈয়েই আছিল । ইয়াৰ ফলত বহু সময়ত দুয়োখন ৰাজ্যৰ মাজত বিশৃংখলতা আৰু উত্তেজনাৰ সৃষ্টি হৈ আহিছে ।

মেঘালয়ৰ মুখ্যমন্ত্ৰী কনৰাড চাংমাক টেগ কৰি মুখ্যমন্ত্ৰী ড০ শৰ্মাই ছ’চিয়েল মিডিয়াত লিখিছে, “প্ৰধানমন্ত্ৰী নৰেন্দ্ৰ মোদীৰ নেতৃত্বত আৰু গৃহমন্ত্ৰী অমিত শ্বাহৰ উপস্থিতিত দুয়োখন ৰাজ্যই গঠন হোৱাৰ ৫০ বছৰৰ পাছত ২০২২ চনত এক ঐতিহাসিক বুজাবুজি চুক্তি স্বাক্ষৰ কৰিছিল । এই চুক্তি ৰাষ্ট্ৰীয় ৰাজধানীত দুয়োখন ৰাজ্যই স্বাক্ষৰ কৰিছিল ।”

১২টা বিবাদিত এলেকাৰ ভিতৰত ছটা অঞ্চলৰ সমাধান-

সীমা বিবাদ নিষ্পত্তিৰ পদক্ষেপৰ অংশ হিচাপে হোৱা চুক্তিৰ অধীনত দুয়োখন ৰাজ্যৰ সীমা নিৰ্ধাৰণ কৰা হৈছিল । ১২টা বিবাদিত অঞ্চলৰ ভিতৰত ছটা অঞ্চলৰ সমস্যা সমাধান কৰি সেই চুক্তিৰ অধীনত সীমা স্তম্ভ স্থাপন কৰা হৈছে । উল্লেখ্য যে ২ জুনত দুয়োগৰাকী মুখ্যমন্ত্ৰীয়ে যৌথ সংবাদমেলত ঘোষণা কৰিছিল যে স্বাধীনতা দিৱসৰ ভিতৰত পাঁচটা বিবাদিত এলেকাত সীমা স্তম্ভ স্থাপন কৰা হ’ব ।

উল্লেখ্য যে ২০২২ চনৰ মাৰ্চ মাহত অসম আৰু মেঘালয়ৰ মাজত ৫০ বছৰীয়া সীমা বিবাদৰ অন্ত পৰে । কেন্দ্ৰীয় গৃহমন্ত্ৰী অমিত শ্বাহৰ উপস্থিতিত দিল্লীত দুয়োখন ৰাজ্যৰ মুখ্যমন্ত্ৰীয়ে চুক্তি স্বাক্ষৰ কৰে ।

চুক্তিৰ সবিশেষ প্ৰকাশ কৰি অমিত শ্বাহে কয়, “মই সুখী যে আজি অসম আৰু মেঘালয়ৰ মাজত বিবাদিত ১২ টা স্থানৰ ভিতৰত ৬ টা স্থানৰ চুক্তি কৰা হৈছে । সীমান্তৰ দৈৰ্ঘ্যৰ ক্ষেত্ৰত আজি প্ৰায় ৭০% সীমান্ত বিবাদমুক্ত হৈ পৰিছে । মই নিশ্চিত যে বাকী ৬ টা স্থান অদূৰ ভৱিষ্যতে আমি সমাধান কৰিম ।” শ্বাহৰ মতে, “আজি বিবাদমুক্ত উত্তৰ-পূৰ্বাঞ্চলৰ বাবে এক ঐতিহাসিক দিন । তেওঁ কয় যে মোদী দেশৰ প্ৰধানমন্ত্ৰী হোৱাৰ পিছৰে পৰা উত্তৰ-পূবৰ শান্তি প্ৰক্ৰিয়া, উন্নয়ন, সমৃদ্ধি আৰু উত্তৰ-পূবৰ সাংস্কৃতিক ঐতিহ্যৰ প্ৰসাৰৰ বাবে বহু প্ৰচেষ্টা চলোৱা হৈছে ।”

লগতে পঢ়ক : ৰাষ্ট্ৰীয় বিৰোধী ভাইৰেল ভিডিঅ’ আৰু কন্টেন্ট কৰা হ’ব ব্লক!চৰকাৰৰ ডাঙৰ সিদ্ধান্ত

এতিয়া অসমৰ ৰাজপথত অৱতৰণ কৰিব যুদ্ধ বিমান

বিগত কিছু সময়ৰ পৰা সীমান্তত অঞ্চলত অহৰহ প্ৰত্যাহ্বানৰ সন্মুখীন হৈ আহিছে ভাৰত । কেৱল পাকিস্তানেই নহয় চীনৰ পৰাও কঠোৰ প্ৰত্যাহ্বানৰ সন্মুখীন হৈছে দেশখন । ক্ৰমবৰ্ধমান প্ৰত্যাহ্বানৰ মাজতে ভাৰতীয় সেনাবাহিনীয়ে নিজকে উন্নীতকৰণৰ কামত ব্যস্ত হৈ পৰিছে । বাংলাদেশৰ সৈতে অৱনতি ঘটা সম্পৰ্ক আৰু চীনৰ কুৎসিত ষঢ়যন্ত্ৰৰ পৰিপ্ৰেক্ষিতত ভাৰত এতিয়া উত্তৰ-পূবৰ ৰাজ্যসমূহত নিজৰ কৌশলগত স্থিতি শক্তিশালী কৰাৰ কামত ব্যস্ত হৈ পৰিছে ।

উত্তৰ-পূবৰ ৰাজ্যসমূহক কৌশলগতভাৱে আৰু অধিক শক্তিশালী কৰাৰ বাবে ভাৰতে এতিয়া বৃহৎ প্রস্তুতি কৰিবলৈ ওলাইছে ৷ উত্তৰ-পূব অঞ্চলত চীন আৰু বাংলাদেশৰ সংমিশ্ৰণৰ সৈতে মোকাবিলা কৰিবলৈ ভাৰতে নিজৰ সীমান্ত শক্তিশালী কৰি তুলিছে । ইয়াৰ বাবে অসমত প্ৰথমবাৰৰ বাবে ভাৰতীয় বায়ুসেনাৰ যুদ্ধ বিমান আৰু অসামৰিক বিমানৰ জৰুৰী অৱতৰণৰ বাবে ৰাষ্ট্ৰীয় ঘাইপথ প্ৰস্তুত কৰা হৈছে ।

আকস্মিক পৰিস্থিতিৰ সৈতে মোকাবিলা কৰিবলৈ বিশেষ প্ৰস্তুতি-

ভাৰতীয় সেনাৰ এই প্ৰস্তুতিক প্ৰত্যক্ষভাৱে দেশৰ সীমান্ত সুৰক্ষিত ৰখা আৰু যিকোনো আকস্মিক পৰিস্থিতিৰ সৈতে মোকাবিলা কৰাৰ এক বিশেষ পৰিকল্পনা হিচাপে দেখা গৈছে । ডিব্ৰুগড়ৰ সমীপৰ মৰাণৰ পৰা নুমলীগড়লৈ নিৰ্মিত ৰাষ্ট্ৰীয় ঘাইপথৰ এটা অংশ ছুখয়-৩০ আৰু ৰাফেলৰ দৰে যুদ্ধ বিমানৰ জৰুৰী অৱতৰণৰ বাবে সাজু কৰি তোলা হৈছে ।

দেওবাৰে মুখ্যমন্ত্রী হিমন্ত বিশ্ব শর্মাই এই প্রস্তুতি পৰিদৰ্শন কৰি এই সন্দর্ভত কয়, “ৰাষ্ট্রীয় ঘাইপথত যুদ্ধ বিমান জৰুৰীকালীন অৱতৰণৰ প্রস্তুতি কৰা হৈছে । আমি অক্টোবৰৰ ভিতৰত এই সুবিধা আৰম্ভ কৰিব বিচাৰিছো । ভাৰতীয় বায়ুসেনাৰ বিষয়াসকলে অহৰহ নিৰীক্ষণ কৰি আছে আৰু এই সন্দৰ্ভত দ্ৰুত গতিত কাম চলি আছে ।”

উল্লেখ্য যে, উত্তৰ-পূব অঞ্চলত চীন নিৰন্তৰ সক্ৰিয় হৈ আছে । এনে পৰিস্থিতিত সীমান্তৰ সমীপৰ উত্তৰ-পূর্বাঞ্চলত এনে প্রস্তুতি কৌশলগত দৃষ্টিকোণৰ পৰা অতি গুৰুত্বপূর্ণ বুলি বিবেচিত হৈছে ৷ অৰুণাচলৰ সৈতে চীনৰ দীঘলীয়া সীমান্ত আৰু চীনৰ নিতৌ বৃদ্ধি পোৱা কাৰ্যকলাপৰ পৰিপ্ৰেক্ষিতত ভাৰতে এতিয়া আন্তঃগাঁথনিৰ জৰিয়তে নিজৰ কৌশলগত বিন্দুসমূহ শক্তিশালী কৰাৰ কৌশলৰ কাম কৰি আছে ।

প্ৰস্তুতি এনেদৰে চলোৱা হৈছে যে প্ৰয়োজন হ’লে কেৱল যুদ্ধ বিমানেই নহয়, অসামৰিক বিমানো এই ঘাইপথত অৱতৰণ কৰিব পাৰিব । ইয়াৰ উপৰিও আৰু দুটা স্থান নামনি অসম আৰু নগাঁও-লামডিঙৰ মাজত একেধৰণৰ ঘাইপথ নিৰ্মাণৰ বাবেও কেন্দ্ৰীয় চৰকাৰে অনুমোদন জনাইছে ।

লগতে পঢ়ক : ‘সংবিধানৰ পৰা সমাজবাদী, ধৰ্মনিৰপেক্ষতাক আঁতৰোৱাৰ সোণালী সময়’… ক’লে হিমন্ত বিশ্ব শৰ্মাই