ঘৰুৱা মাটিত টি-২০ বিশ্বকাপ জয় কৰা প্ৰথমখন দেশ হিচাপে পৰিগণিত হৈছে ভাৰত। এই জয়ৰ পিছতে ভাৰতৰ প্ৰধানমন্ত্ৰী নৰেন্দ্ৰ মোদীয়ে দলটোক অভিনন্দন জনাইছে।
তৃতীয়বাৰৰ বাবে আইচিচি পুৰুষৰ টি-২০ বিশ্বকাপ ২০২৬ৰ চেম্পিয়ন হ’ল ভাৰত। আহমেদাবাদৰ নৰেন্দ্ৰ মোদী ষ্টেডিয়ামত অনুষ্ঠিত হোৱা টি-২০ বিশ্বকাপৰ ফাইনেলত ভাৰতে বিপুল ৯৬ ৰানত জয়লাভ কৰে।ভাৰতৰ বিজয়ৰ বাবে প্ৰধানমন্ত্ৰী নৰেন্দ্ৰ মোদীয়ে টিম ইণ্ডিয়াক অভিনন্দন জনাইছে।
প্ৰধানমন্ত্ৰী মোদীয়ে এক্সত পোষ্ট কৰি লিখিছে, ‘চেম্পিয়ন।আই চি চি পুৰুষৰ টি-২০ বিশ্বকাপ জয়ৰ বাবে ভাৰতীয় দললৈ আন্তৰিক অভিনন্দন।এই দৰ্শনীয় বিজয় অসাধাৰণ দক্ষতা, দৃঢ়তা আৰু দলীয় কামৰ প্ৰতীক।সমগ্ৰ প্ৰতিযোগিতাখনত তেওঁলোকে উৎকৃষ্ট সাহস প্ৰদৰ্শন কৰিছিল।এই বিজয়ে প্ৰতিজন ভাৰতীয়ৰ হৃদয় গৌৰৱ আৰু আনন্দৰে ভৰাই তুলিছে।চেল্যুট, টীম ইণ্ডিয়া।
কেন্দ্ৰীয় গৃহমন্ত্ৰী অমিত শ্বাহেও ভাৰতীয় ক্ৰিকেট দলক বিশ্বকাপ ২০২৬ খিতাপ দখল কৰাৰ বাবে অভিনন্দন জ্ঞাপন কৰে।এক্সত পোষ্ট কৰি গৃহমন্ত্ৰী গৰাকীয়ে কয়-‘কি আচৰিত জয়… বিশ্ব চেম্পিয়ন টিম ইণ্ডিয়ালৈ চেল্যুট।সমগ্ৰ প্ৰতিযোগিতাখনত আপোনাৰ ব্যতিক্ৰমী প্ৰদৰ্শন আৰু দৃঢ়তাই দেশলৈ গৌৰৱ আৰু সন্মান কঢ়িয়াই আনিছে।প্ৰতিজন ভাৰতীয়ক গৌৰৱান্বিত কৰাৰ বাবে সমগ্ৰ দলটোক অভিনন্দন।’
লগতে পঢ়ক: হাতত বিশ্বকাপৰ ট্ৰফী; জয় শ্বাহসহ খোজকাঢ়ি হনুমান মন্দিৰ পালেগৈ টীম ইণ্ডিয়া…
