গণৰাজ্য দিৱস উপলক্ষে কৰ্তব্য পথত অনুষ্ঠিত হ’বলগীয়া পেৰেডৰ সাক্ষী হ’বলৈ প্ৰায় ১০ হাজাৰ বিশেষ অতিথিক আমন্ত্ৰণ জনোৱা হৈছে ।
এইবাৰ ৭৭ সংখ্যক গণৰাজ্য দিৱস উপলক্ষে নতুন দিল্লীৰ কৰ্তব্য পথত অনুষ্ঠিত হ’বলগীয়া পেৰেডৰ সাক্ষী হ’বলৈ বিভিন্ন ক্ষেত্ৰৰ পৰা প্ৰায় ১০ হাজাৰ বিশেষ অতিথিক আমন্ত্ৰণ জনোৱা হৈছে । আমন্ত্ৰিত অতিথিসকলৰ ভিতৰত আছে আয় আৰু নিয়োগ সৃষ্টিৰ ক্ষেত্ৰত অনুকৰণীয় কাম কৰা, শ্ৰেষ্ঠ উদ্ভাৱক, গৱেষক আৰু ষ্টাৰ্টআপ, আত্মসহায়ক গোট আৰু চৰকাৰী ডাঙৰ ডাঙৰ পদক্ষেপৰ অধীনত সৰ্বোত্তম প্ৰদৰ্শন কৰাসকল ।
প্ৰতিৰক্ষা মন্ত্ৰালয়ৰ আনুষ্ঠানিক বিবৃতি অনুসৰি তেওঁলোকক ৰাষ্ট্ৰ নিৰ্মাণৰ ক্ষেত্ৰত আগবঢ়োৱা অৱদানক সন্মান জনোৱাৰ লগতে ৰাষ্ট্ৰীয় গুৰুত্বপূৰ্ণ অনুষ্ঠানত জনসাধাৰণৰ অংশগ্ৰহণ বৃদ্ধিৰ বাবে আমন্ত্ৰণ জনোৱা হৈছে । এই বিশেষ অতিথিসকলক লাইন অৱ ডিউটিৰ বিশিষ্ট স্থানত বহিবলৈ দিয়া হ’ব । অনুষ্ঠানৰ উপৰিও বিশেষ অতিথিসকলক ৰাষ্ট্ৰীয় যুদ্ধ স্মৃতিসৌধ, প্ৰধানমন্ত্ৰী সংগ্ৰহালয় আৰু দিল্লীৰ অন্যান্য বিশিষ্ট স্থানসমূহ ভ্ৰমণৰ ব্যৱস্থা কৰা হ’ব । লগতে সংশ্লিষ্ট মন্ত্ৰীসকলৰ সৈতে মত বিনিময়ৰ সুযোগ পাব তেওঁলোকে ।
ইফালে, ৭৭ সংখ্যক গণৰাজ্য দিৱস উদযাপনৰ পূৰ্বে চোৰাংচোৱা সংস্থাসমূহৰ পৰা লাভ কৰা একাধিক সন্ত্ৰাসবাদী ভাবুকিৰ তথ্যৰ পৰিপ্ৰেক্ষিতত দিল্লী আৰক্ষীয়ে কৰ্তব্য পথ আৰু সমগ্ৰ নতুন দিল্লীত এক ব্যাপক, প্ৰযুক্তিভিত্তিক নিৰাপত্তা ব্যৱস্থা স্থাপন কৰিছে । এইবাৰ গণৰাজ্য দিৱস উদযাপনৰ বহা ঠাইৰ নাম ভাৰতীয় নদীৰ নামেৰে ৰখা হৈছে ।
অতিথিসকলৰ সুবিধা আৰু সুৰক্ষা নিশ্চিত কৰিবলৈ সুৰক্ষা নিয়োগসমূহত কেইবাটাও উল্লেখযোগ্য পৰিৱৰ্তন কৰা হৈছে । তদুপৰি সকলো আমন্ত্ৰিত অতিথি আৰু টিকটধাৰীক আমন্ত্ৰণ পত্ৰত থকা তথ্য ভালদৰে পঢ়ি নিৰ্দিষ্ট পথসমূহ মানি চলিবলৈ আৰক্ষীয়ে আহ্বান জনাইছে । পথ, পাৰ্কিং আৰু নিৰ্দিষ্ট স্থান সম্পৰ্কীয় সম্পূৰ্ণ তথ্য প্ৰতিৰক্ষা মন্ত্ৰালয় আৰু দিল্লী আৰক্ষীৰ ৱেবছাইটত উপলব্ধ ।
লগতে পঢ়ক : ‘নীতিন নৱীন মোৰ বছ, মই কাৰ্যকৰ্তা’… বিজেপিৰ নতুন সভাপতিক অভিনন্দন প্ৰধানমন্ত্ৰী মোদীৰ
