গণতন্ত্ৰ দিৱস ২০২৬… আজি কৰ্তব্য পথত বিশ্বই দেখিব ভাৰতৰ শক্তি
সমগ্ৰ দেশে উলহ-মালহেৰে উদযাপন কৰিছে ৭৭ সংখ্যক গণতন্ত্ৰ দিৱস । কৰ্তব্য পথত আজি সমগ্ৰ বিশ্বই দেখিব ভাৰতৰ শক্তি আৰু অজেয় পৰাক্ৰম ।
আজি সমগ্ৰ দেশে উলহ-মালহেৰে উদযাপন কৰিছে ৭৭ সংখ্যক গণতন্ত্ৰ দিৱস । ৰাজধানী দিল্লী ৭৭ সংখ্যক গণৰাজ্য দিৱস উৎসাহ আৰু মৰ্যাদাৰে উদযাপন কৰিবলৈ সাজু হৈছে । ৰাজধানী দিল্লীৰ কৰ্তব্য পথত অনুষ্ঠিত হ’ব লগা গণতন্ত্ৰ দিৱসৰ বিশেষ অনুষ্ঠানত সমগ্ৰ বিশ্ব ভাৰতৰ চহকী গণতান্ত্ৰিক আৰু সাংস্কৃতিক ঐতিহ্যৰ সাক্ষী হ’ব । গ্ৰেণ্ড পেৰেডত সাংস্কৃতিক বৈচিত্ৰ্য, সামৰিক শক্তি আৰু গণতান্ত্ৰিক মূল্যবোধ প্ৰদৰ্শন কৰা হ’ব ।
এইবাৰৰ গণৰাজ্য দিৱসত মুখ্য অতিথি হিচাপে অংশগ্ৰহণ কৰিব ইউৰোপীয় সংঘৰ দুজন বিশিষ্ট নেতা : ইউৰোপীয় পৰিষদৰ সভাপতি এণ্টনিঅ’ কোষ্টা আৰু ইউৰোপীয় আয়োগৰ সভানেত্ৰী উৰ্চুলা ভন ডেৰ লেয়েনে । ট্ৰাম্পৰ শুল্ক সন্ত্ৰাসৰ মাজতে ভাৰতে ইউৰোপীয় সংঘৰ সৈতে “মাদাৰ অব্ অল ডীলছ” ৰূপায়ণ কৰিবলৈ সাজু হৈছে । গতিকে গণৰাজ্য দিৱসত ইউৰোপীয় ইউনিয়নৰ এই দুগৰাকী হেভিৱেট নেতাৰ উপস্থিতি তাৎপৰ্যপূৰ্ণ ।
এইবাৰৰ গণতন্ত্ৰ দিৱসৰ বিষয়বস্তু-
এইবাৰৰ গণৰাজ্য দিৱসৰ থিম তথা বিষয়বস্তু হৈছে “বন্দে মাতৰমৰ ১৫০ বছৰ ।” এই বিষয়বস্তুত ৰাষ্ট্ৰীয় গীতটোৰ ১৫০ বছৰীয়া তাৎপৰ্য আৰু ইয়াৰ দ্বাৰা অনুপ্ৰাণিত স্বাধীনতা, সাংস্কৃতিক চেতনা আৰু দেশপ্ৰেমক প্ৰতিফলিত কৰা হৈছে । বাংকিম চন্দ্ৰ চেটাৰ্জীয়ে ৰচনা কৰা এই গীতটো এইবাৰৰ পেৰেড, টেবল’ আৰু সাংস্কৃতিক অনুষ্ঠানৰ কেন্দ্ৰবিন্দু ।
এইবাৰৰ পেৰেডৰ আন এটা ডাঙৰ আকৰ্ষণ হৈছে প্ৰবীণ সৈনিকৰ টেবুল, যাৰ থিম হৈছে “সংগ্ৰামৰ পৰা ৰাষ্ট্ৰ নিৰ্মাণলৈকে ।” এই টেবুলত ঐতিহাসিক যুদ্ধ সঁজুলি আৰু অমৰ জৱান জ্যোতিৰ থ্ৰীডি মডেল প্ৰদৰ্শন কৰা হ’ব, য’ত টি-৫৫ আৰু বিজয়ন্তা টেংক, মিগ-২১, মিৰাজ আৰু জাগুৱাৰ বিমান, আই এন এছ মহীশূৰ আৰু আই এন এছ ৰাজপুত অন্তৰ্ভূক্ত হ’ব ।
ইয়াত ১৯৬৫ আৰু ১৯৭১ চনৰ যুদ্ধ আৰু ১৯৯৯ চনৰ কাৰ্গিল অপাৰেচন বিজয়ৰ ছবিও দেখুওৱা হ’ব । টেবুলখনৰ পিছফালৰ অংশত বান সাহায্য, চিকিৎসা সেৱা, শিক্ষা, আৰু ‘মেক ইন ইণ্ডিয়া’ পদক্ষেপৰ ক্ষেত্ৰত তেওঁলোকৰ অৱদানৰ ওপৰত আলোকপাত কৰা হ’ব ।
ৰাষ্ট্ৰ চেতনা প্ৰদৰ্শিত হ’ব ৩০খন টেবলত-
প্ৰতিৰক্ষা মন্ত্ৰালয়ৰ তথ্য অনুসৰি কৰ্তব্য পথত ১৭খন ৰাজ্য/কেন্দ্ৰীয় শাসিত অঞ্চল আৰু ১৩খন মন্ত্ৰালয়/বিভাগ/সেৱাকে ধৰি ৩০টা টেবুল প্ৰদৰ্শন কৰা হ’ব । “স্বাধীনতাৰ মন্ত্ৰ : বন্দে মাতৰম” আৰু “সমৃদ্ধিৰ মন্ত্ৰ: আত্মনিৰ্ভৰ ভাৰত” শীৰ্ষক বিষয়বস্তুৰ অধীনত এই টেবুলসমূহত ১৫০ বছৰীয়া “বন্দে মাতৰম” আৰু দেশৰ চহকী সাংস্কৃতিক বৈচিত্ৰ্য প্ৰদৰ্শিত কৰিব ।
১০ হাজাৰ বিশেষ অতিথি-
এইবাৰৰ গণতন্ত্ৰ দিৱসত প্ৰায় ১০ হাজাৰ বিশেষ অতিথিৰ ভিতৰত আছে বিজ্ঞানী, খেলুৱৈ, কৃষক, মহিলা উদ্যোগী, ষ্টাৰ্টআপ প্ৰতিষ্ঠাপক, শিপিনী, আত্মসহায়ক গোটৰ মহিলা, বিশেষভাৱে সক্ষম ব্যক্তি, জনজাতীয় প্ৰতিনিধি আৰু বিভিন্ন চৰকাৰী আঁচনিৰ হিতাধিকাৰী । পেৰেডৰ পিছত এই অতিথিসকলক ৰাষ্ট্ৰীয় যুদ্ধ স্মৃতিসৌধ, প্ৰধানমন্ত্ৰীৰ সংগ্ৰহালয় আৰু দিল্লীৰ অন্যান্য গুৰুত্বপূৰ্ণ স্থানসমূহ ভ্ৰমণ কৰোৱা হ’ব ।
পেৰেডত নেতৃত্ব দিব পেৰেড কমাণ্ডাৰ লেফটেনেণ্ট জেনেৰেল ভৱনীশ কুমাৰে, যি দিল্লী ক্ষেত্ৰৰ জেনেৰেল অফিচাৰ কমাণ্ডিং আৰু দ্বিতীয় প্ৰজন্মৰ বিষয়া । সৰ্বোচ্চ বীৰত্ব বঁটা লাভ কৰা বিশিষ্ট ব্যক্তিসকলেও এই পেৰেডত অংশগ্ৰহণ কৰিব । ইউৰোপীয় সংঘৰ (ইউৰোপীয় ইউনিয়ন)ৰ এটা সৰু দলেও অংশগ্ৰহণ কৰিব পেৰেডত ।
লগতে পঢ়ক : গণতন্ত্ৰ দিৱসে অতীত, বৰ্তমান আৰু ভৱিষ্যতক সংযোগ কৰে… দেশবাসীক সম্বোধন ৰাষ্ট্ৰপতি দ্ৰৌপদী মুৰ্মুৰ