গণতন্ত্ৰ দিৱসৰ প্ৰাকক্ষণত ৰাষ্ট্ৰপতি দ্ৰৌপদী মুৰ্মুৱে দেশবাসীক সম্বোধন কৰে । তেওঁ কয় যে, আমাৰ সংবিধান বিশ্ব ইতিহাসৰ সৰ্ববৃহৎ গণতান্ত্ৰিক গণৰাজ্যৰ মূল গ্ৰন্থ ।
গণতন্ত্ৰ দিৱসৰ প্ৰাকক্ষণত দেওবাৰে বিয়লি ৰাষ্ট্ৰপতি দ্ৰৌপদী মুৰ্মুৱে দেশবাসীক সম্বোধন কৰে । গণতন্ত্ৰ দিৱসৰ পবিত্ৰ উদযাপনে আমাক আমাৰ দেশৰ অতীত, বৰ্তমান, ভৱিষ্যতৰ অৱস্থা আৰু দিশৰ ওপৰত চিন্তা কৰাৰ সুযোগ প্ৰদান কৰে বুলি কয় ৰাষ্ট্ৰপতি মুৰ্মুৱে । তেওঁ কয় যে, ১৯৪৭ চনৰ ১৫ আগষ্টত স্বাধীনতা সংগ্ৰামৰ বলত আমাৰ দেশৰ ভাগ্য সলনি হৈছিল । ভাৰত স্বাধীন হ’ল আৰু আমি হৈ পৰিলোঁ আমাৰ ৰাষ্ট্ৰীয় নিয়তিৰ স্থপতি ।
ৰাষ্ট্ৰপতি মুৰ্মুৱে কয়, “১৯৫০ চনৰ ২৬ জানুৱাৰীৰ পৰা আমি আমাৰ গণৰাজ্যখনক সাংবিধানিক আদৰ্শৰ দিশত আগুৱাই নিবলৈ আৰম্ভ কৰো । আজিৰ দিনটোতে আমাৰ সংবিধান সম্পূৰ্ণ কাৰ্যকৰী হয় । গণতন্ত্ৰৰ মাতৃভূমি ভাৰত ঔপনিৱেশিক শাসনৰ পৰা মুক্ত হ’ল আৰু আমাৰ গণতান্ত্ৰিক গণৰাজ্যৰ সৃষ্টি হ’ল ।”
ৰাষ্ট্ৰপতিগৰাকীয়ে কয়-“আমাৰ সংবিধান বিশ্ব ইতিহাসৰ সৰ্ববৃহৎ গণতান্ত্ৰিক গণৰাজ্যৰ মূল গ্ৰন্থ । সংবিধানত সন্নিৱিষ্ট ন্যায়, স্বাধীনতা, সমতা আৰু ভ্ৰাতৃত্ববোধৰ আদৰ্শই আমাৰ গণতন্ত্ৰৰ সংজ্ঞা দিয়ে । এই আদৰ্শসমূহেই হৈছে সংবিধানৰ প্ৰতিষ্ঠাপকসকলৰ আত্মা আৰু ৰাষ্ট্ৰৰ ঐক্যৰ শক্তিশালী ভেটি ।”
তেওঁ পুনৰ কয়- ভাৰতৰ লৌহ পুৰুষ চৰ্দাৰ বল্লভভাই পেটেলৰ ১৫০ সংখ্যক জন্ম জয়ন্তী উদযাপন কৰে ৰাষ্ট্ৰই । আজিও তেখেতৰ ১৫০ সংখ্যক জন্ম জয়ন্তীৰ সৈতে জড়িত স্মৃতিচাৰণ অনুষ্ঠান অনুষ্ঠিত হৈ আছে । এনে উদযাপনে দেশবাসীৰ মাজত ৰাষ্ট্ৰীয় ঐক্যৰ মনোভাৱ আৰু অধিক শক্তিশালী কৰে ।
ৰাষ্ট্ৰপতি মুৰ্মুৱে কয়- উত্তৰৰ পৰা দক্ষিণলৈ আৰু পূবৰ পৰা পশ্চিমলৈ আমাৰ প্ৰাচীন সাংস্কৃতিক ঐক্যৰ বস্ত্ৰখন আমাৰ পূৰ্বপুৰুষসকলে বৈছিল । এই সাংস্কৃতিক ঐক্যই আমাৰ গণতন্ত্ৰক সজীৱ কৰি তুলিছে আৰু প্ৰতিজন ভাৰতীয়ক একত্ৰিত কৰি ৰাখিছে ।
ৰাষ্ট্ৰপতি মুৰ্মুৱে উল্লেখ কৰে যে যোৱা বছৰৰ ৭ নৱেম্বৰৰ পৰা আমাৰ ৰাষ্ট্ৰীয় গীত বন্দে মাতৰম ৰচনাৰ ১৫০ বছৰীয়া জয়ন্তী উপলক্ষে উদযাপন চলি আছে । ভাৰত মাতৃৰ মূৰ্ত ৰূপৰ গীতটিয়ে প্ৰতিজন ব্যক্তিৰ মনত দেশপ্ৰেমৰ জগাই তুলিছে ।
শেষত তেওঁ কয় যে, ২৩ জানুৱাৰীত নেতাজী সুভাষ চন্দ্ৰ বসুৰ জন্ম জয়ন্তী উপলক্ষে শ্ৰদ্ধাঞ্জলি জ্ঞাপন কৰি দেশবাসীয়ে স্মৰণ কৰিছিল । ২০২১ চনৰ পৰা নেতাজীৰ জন্ম বাৰ্ষিকী ‘পৰাক্ৰম দিৱস’ হিচাপে পালন কৰি আহিছে যাতে দেশবাসীয়ে বিশেষকৈ যুৱক-যুৱতীসকলে তেওঁৰ অদম্য দেশপ্ৰেমৰ পৰা প্ৰেৰণা লাভ কৰিব পাৰে । নেতাজী সুভাষ চন্দ্ৰ বসুৰ “জয় হিন্দ” শ্লোগান আমাৰ ৰাষ্ট্ৰীয় গৌৰৱৰ ঘোষণা ।
লগতে পঢ়ক : ভোটদান এক ডাঙৰ দায়িত্বঃ ৰাষ্ট্ৰীয় ভোটাৰ দিৱসত প্ৰধানমন্ত্ৰী মোদীৰ বাৰ্তা
