সূৰ্যকুমাৰৰ স্থানত এই গুৰুত্বপূৰ্ণ ভ্ৰমণৰ বাবে মিডল অৰ্ডাৰ বেটাৰ শ্ৰেয়াছ আয়াৰক দলৰ নতুন অধিনায়ক হিচাপে নিযুক্তি দিয়া হৈছে
ভাৰতীয় ক্ৰিকেট নিয়ন্ত্ৰণ ব’ৰ্ডে (BCCI) শনিবাৰে আগন্তুক ইংলেণ্ড আৰু আয়াৰলেণ্ড ভ্ৰমণৰ বাবে ভাৰতৰ শক্তিশালী টি-২০ দল ঘোষণা কৰিছে । এই দল ঘোষণাত আটাইতকৈ ডাঙৰ আচৰিত কৰা সিদ্ধান্তটো হ’ল শেহতীয়াকৈ ভাৰতক ২০২৬ চনৰ টি-২০ বিশ্বকাপ উপহাৰ দিয়া তাৰকা বেটাৰ তথা অধিনায়ক সূৰ্যকুমাৰ যাদৱক দলৰ পৰা বাদ দিয়া হৈছে । সূৰ্যকুমাৰৰ স্থানত এই গুৰুত্বপূৰ্ণ ভ্ৰমণৰ বাবে মিডল অৰ্ডাৰ বেটাৰ শ্রেয়াছ আয়াৰক দলৰ নতুন অধিনায়ক হিচাপে নিযুক্তি দিয়া হৈছে । যুৱ খেলুৱৈ তিলক বাৰ্মাক দলৰ সহ-অধিনায়কৰ গুৰু দায়িত্ব দিয়া হৈছে ।
ভাৰতীয় দললৈ আই পি এলৰ তাৰকা বৈভৱ সূৰ্যবংশী-
চলিত বৰ্ষৰ ইণ্ডিয়ান প্ৰিমিয়াৰ লীগ (IPL 2026)ত নিজৰ ধুমুহা সদৃশ বেটিঙেৰে ক্ৰিকেট বিশ্বক চমকিত কৰা যুৱ বেটিং তাৰকা বৈভৱ সূৰ্যবংশীয়ে অৱশেষত লাভ কৰিছে প্ৰথমবাৰৰ বাবে ৰাষ্ট্ৰীয় দলৰ নিমন্ত্ৰণ । সূৰ্যবংশীয়ে আই পি এল ২০২৬ ত ২৩৭.৩০ ৰ এক অবিশ্বাস্য ষ্ট্ৰাইক ৰেটত ৭৭৬ ৰান সংগ্ৰহ কৰি বৰ্ষটোৰ সৰ্বাধিক ৰান সংগ্ৰহকাৰী (Orange Cap বিজয়ী) হৈছিল । তেওঁৰ লগতে ঘৰুৱা ক্ৰিকেট আৰু আই পি এলত গতিৰে আকৰ্ষিত কৰা যুৱ দ্ৰুতবেগী বলাৰ প্ৰিন্স যাদৱেও প্ৰথমবাৰৰ বাবে ভাৰতীয় দলত স্থান সুৰক্ষিত কৰিবলৈ সক্ষম হৈছে ।
বিস্ফোৰক টপ অৰ্ডাৰ আৰু সুষম মিডল অৰ্ডাৰ-
ঘোষিত দলটোৰ বেটিং বিভাগটো অত্যন্ত আক্ৰমণাত্মক হিচাপে সজোৱা হৈছে । দলৰ টপ অৰ্ডাৰত অভিষেক শৰ্মা, নৱাগত বৈভৱ সূৰ্যবংশী, উইকেটৰক্ষক বেটাৰ সঞ্জু চেমচন আৰু ঈশান কিষাণৰ দৰে বিস্ফোৰক খেলুৱৈ আছে । আনহাতে, মিডল অৰ্ডাৰৰ দায়িত্ব থাকিব অলৰাউণ্ডাৰ নীতিশ কুমাৰ ৰেড্ডী, অভিজ্ঞ ৱাশ্বিংটন সুন্দৰ আৰু বিধ্বংসী হাৰ্ড-হিটাৰ শিৱম ডুবেৰ কান্ধত ।
স্পীন আৰু পেচ ইউনিট: বুমৰাহক জিৰণি
অহা কেইটামান মাহৰ ব্যস্ত সূচীৰ প্ৰতি লক্ষ্য ৰাখি ভাৰতৰ মুখ্য দ্ৰুতবেগী বলাৰ যশপ্ৰীত বুমৰাহক আয়াৰলেণ্ড আৰু ইংলেণ্ড ভ্ৰমণৰ পৰা সম্পূৰ্ণ জিৰণি দিয়া হৈছে । বুমৰাহৰ অনুপস্থিতিত পেচ বিভাগটো পৰিচালনা কৰিব অৰ্শদীপ সিং, হৰ্ষিত ৰাণা, নতুন মুখ প্ৰিন্স যাদৱ আৰু মহম্মদ চিৰাজে । আনহাতে, স্পীন বিভাগত ৱাশ্বিংটন সুন্দৰৰ উপৰিও স্থান পাইছে অভিজ্ঞ অক্ষৰ পেটেল, মিষ্ট্ৰী স্পীনাৰ বৰুণ চক্ৰৱৰ্তী আৰু ৰবি বিষ্ণৈয়ে । উল্লেখযোগ্য যে, বিশ্বকাপ বিজয়ী দলৰ অংশ থকা ৰিংকু সিং আৰু কুলদীপ যাদৱকো এই ভ্ৰমণৰ দলৰ পৰা বাহিৰত ৰখা হৈছে ।
খেলৰ সূচী-
ভাৰতে এই ভ্ৰমণৰ আৰম্ভণি আয়াৰলেণ্ডৰ বিৰুদ্ধে কৰিব । বেলফাষ্টত ২৬ আৰু ২৮ জুনত দুখন টি-২০ মেচ খেলাৰ পিছত ভাৰতীয় দলটো ইংলেণ্ডলৈ ৰাওনা হ’ব । তাত ১ জুলাইৰ পৰা ১১ জুলাইলৈ ইংলেণ্ডৰ বিৰুদ্ধে ৫ খন মেচৰ টি-২০ শৃংখলাত অৱতীৰ্ণ হ’ব ভাৰতীয় দল ।
২০২৬ চনৰ ভ্ৰমণৰ সম্পূৰ্ণ স্কোয়াড:
ইংলেণ্ড ভ্ৰমণৰ বাবে ভাৰতীয় দল : শ্রেয়াছ আয়াৰ (অধিনায়ক), তিলক বাৰ্মা (সহ-অধিনায়ক), অভিষেক শৰ্মা, সঞ্জু চেমচন, ঈশান কিষাণ, শিৱম ডুবে, নীতিশ কুমাৰ ৰেড্ডী, প্ৰিন্স যাদৱ, ৱাশ্বিংটন সুন্দৰ, বৰুণ চক্ৰৱৰ্তী, ৰবি বিষ্ণৈ, মহম্মদ চিৰাজ, হৰ্ষিত ৰাণা, অৰ্শদীপ সিং আৰু বৈভৱ সূৰ্যবংশী ।
আয়াৰলেণ্ড ভ্ৰমণৰ বাবে ভাৰতীয় দল : শ্রেয়াছ আয়াৰ (অধিনায়ক), তিলক বাৰ্মা (সহ-অধিনায়ক), অভিষেক শৰ্মা, বৈভৱ সূৰ্যবংশী, সঞ্জু চেমচন, ঈশান কিষাণ, শিৱম ডুবে, নীতিশ কুমাৰ ৰেড্ডী, ৱাশ্বিংটন সুন্দৰ, অক্ষৰ পেটেল, বৰুণ চক্ৰৱৰ্তী, ৰবি বিষ্ণৈ, মহম্মদ চিৰাজ, হৰ্ষিত ৰাণা, অৰ্শদীপ সিং আৰু প্ৰিন্স যাদৱ ।
লগতে পঢ়ক : আফগানিস্তান শৃংখলাৰ পূৰ্বে টীম ইণ্ডিয়ালৈ ডাঙৰ আঘাত, বাহিৰ হ’ল বিৰাট কোহলী
