ক্ৰিকেটাৰ ৰিংকু সিঙৰ পিতৃ দেহাৱসান । গ্ৰেটাৰ নয়ডাৰ যথাৰ্থ হাস্পতালত শেষ নিশ্বাস ত্যাগ কৰে ক্ৰিকেটাৰগৰাকীৰ পিতৃয়ে ।
ভাৰতীয় ক্ৰিকেটাৰ ৰিংকু সিঙৰ পিতৃ দেহাৱসান । গ্ৰেটাৰ নয়ডাৰ যথাৰ্থ হাস্পতালত শেষ নিশ্বাস ত্যাগ কৰে ক্ৰিকেটাৰগৰাকীৰ পিতৃয়ে । ৰিংকু সিঙৰ পিতৃ খচন্দ্ৰ সিং ষ্টেজ-৪ লিভাৰ কেন্সাৰৰ সৈতে যুঁজি আছিল । শেহতীয়াকৈ তেওঁৰ স্বাস্থ্যৰ যথেষ্ট অৱনতি ঘটিছিল, যাৰ ফলত তেওঁক চিকিৎসালয়ত ভৰ্তি কৰোৱা হৈছিল । পিতৃৰ স্বাস্থ্যৰ অৱনতি ঘটাৰ কথা জানিব পাৰি ৰিংকু সিঙে জিম্বাবৱেৰ বিৰুদ্ধে মেচৰ পূৰ্বে হঠাতে টিম ইণ্ডিয়া এৰি ঘৰলৈ উভতি যাবলগীয়া হৈছিল । খচন্দ্ৰ সিঙে কেইবাদিনো মেকানিকেল ভেণ্টিলেটৰ চাপৰ্টত আছিল ।
টি-২০ বিশ্বকাপত টিম ইণ্ডিয়াৰ অন্যতম গুৰুত্বপূৰ্ণ খেলুৱৈ ৰিংকু সিঙে শেহতীয়াকৈ দল এৰি ঘৰলৈ উভতি অহাৰ বাতৰি প্ৰকাশ কৰিছে । মঙলবাৰে চেন্নাইৰ এম এ চিদাম্বৰম ষ্টেডিয়ামত টিম ইণ্ডিয়াই অনুশীলন কৰে যদিও ৰিংকু সিঙে অংশ লোৱা নাছিল । আন খেলুৱৈসকলক অনুশীলন কৰা দেখা গৈছিল । অলপ পিছতে খবৰ প্ৰকাশ পায় যে তেওঁৰ পিতৃ গুৰুতৰভাৱে অসুস্থ হৈ মৃত্যুৰে যুঁজি আছে । এই কাৰণেই ৰিংকুৱে ঘৰলৈ উভতি যাব লগা হৈছিল ।
অৱশ্যে জিম্বাবৱেৰ বিৰুদ্ধে বৃহস্পকিবাৰে অনুষ্ঠিত হোৱা মেচত পুনৰ দলত যোগদান কৰিছিল যদিও মূল একাদশৰ অংশ নাছিল ৰিংকু সিং ।
উল্লেখ্য যে, পৰিয়ালটোৰ বাবে ৰিংকু সিঙৰ পিতৃয়ে যথেষ্ঠ সংগ্ৰাম কৰিছিল । তেওঁ গেছ চিলিণ্ডাৰ ডেলিভাৰীমেন হিচাপে কাম কৰিছিল, ঘৰে ঘৰে গেছ চিলিণ্ডাৰ ডেলিভাৰী কৰিছিল, পুত্ৰৰ সপোনক সাকাৰ ৰূপ দিছিল । ৰিংকু সিঙৰ সফলতাৰ পিছতো দেউতাকে এই কাম এৰি দিয়া নাছিল ।
বুধবাৰৰ সংবাদমেলৰ সময়ত ভাৰতীয় দলৰ বেটিং প্ৰশিক্ষক সীতাংশু কোটাকে ৰিংকু সিঙৰ বিষয়ে আপডেট প্ৰদান কৰি পিতৃ অসুস্থ আৰু ঘৰলৈ উভতি যোৱা বুলি উল্লেখ কৰে । প্ৰশিক্ষকে আৰু কয় যে ৰিংকুৱে অতি সোনকালে দলত যোগদান কৰিব । অৱশ্যে এই দুখজনক খবৰৰ পিছত তেওঁ কেতিয়া টিম ইণ্ডিয়ালৈ ঘূৰি আহিব সেয়া স্পষ্ট নহয় ।
লগতে পঢ়ক : ছেমিফাইনেলৰ দিশে এখোজ টীম ইণ্ডিয়াৰ; সৰ্বোচ্চ স্ক’ৰ কৰাৰ পাছত ৭২ ৰানত জয়লাভ
