‘কান্তৰা অধ্যায় ১’ সন্দৰ্ভত মন্তব্যৰ পিছত ক্ষমা খুজিও ৰক্ষা পোৱা নাই ৰণবীৰ সিঙে।অভিযোগ দাখিল
বলীউডৰ অভিনেতা ৰণবীৰ সিং ডাঙৰ বিপদত পৰিছে।তেওঁ এখন চলচ্চিত্ৰ মহোৎসৱত দক্ষিণ তাৰকা ঋষভ শেট্টীৰ ছবি ‘কান্তৰা অধ্যায় ১’ সন্দৰ্ভত মন্তব্য কৰিছিল।
এই ছবিখনত ঋষভে দেৱী চামুণ্ডেশ্বৰীৰ চৰিত্ৰত অভিনয় কৰিছিল,যাক লৈ ৰণবীৰ সিঙে ঠাট্টা কৰিছিল।ইয়াৰ পিছতে ৰণবীৰ সিঙে সমালোচনাৰ সন্মুখীন হ’বলগীয়া হৈছিল।
ইয়াৰ বাবে তেওঁ ছ’চিয়েল মিডিয়াৰ জৰিয়তেও ক্ষমা বিচাৰিছে। অৱশ্যে এতিয়ালৈকে অভিনেতাজনক বিপদে লগ এৰা নাই।
ধৰ্মীয় আৱেগক আঘাত কৰা, দৈৱ পৰম্পৰাক অপমান কৰি হিন্দু বিশ্বাসক উপহাস কৰাৰ বাবে প্ৰশান্ত মেথাল নামৰ এজন অধিবক্তাই ৰণবীৰৰ বিৰুদ্ধে এজাহাৰ দাখিল কৰিছে।
অভিনেতা ৰণবীৰৰ বিৰুদ্ধে বেংগালুৰুৰ হাই গ্ৰাউণ্ডছ থানাত প্ৰশান্ত মেথালে ভাৰতীয় দণ্ডবিধিৰ (আই পি চি) ২০২৩ৰ ২৯৯, ৩০২ আৰু ১৯৬ ধাৰাত এজাহাৰ দাখিল কৰিছে ।
তেওঁ নিজৰ অভিযোগত লিখিছে,’মই উপৰোক্ত ঠিকনাৰ বাসিন্দা আৰু ভাৰতৰ আইন-শৃংখলা পালনকাৰী নাগৰিক আৰু এজন অধিবক্তা’।
‘মই এই অভিযোগটো বলীউডৰ অভিনেতা ৰণবীৰৰ দ্বাৰা ৰ অবৈধ আৰু আপত্তিজনক কাৰ্যক আপোনালোকৰ তৎকালীন জাননীলৈ অনাৰ বাবে দাখিল কৰিছো,যাৰ বাবে মোৰ আৰু লাখ লাখ হিন্দু বিশেষকৈ কৰ্ণাটকৰ তুলু ভাষী সম্প্ৰদায়ৰ ধৰ্মীয় আৱেগ গভীৰভাৱে আহত হৈছে।’
তেওঁ লগতে কয় যে, ‘অভিযুক্তজন লাখ লাখ অনুগামী থকা ৰাজহুৱা ব্যক্তি। আন্তঃৰাষ্ট্ৰীয় মঞ্চত এনে কাৰ্টুন নিৰ্মাণ কৰি তেওঁ কেৱল কন্তৰা ছবিখনকে অপমান কৰাই নহয়,বৰঞ্চ ই তুলু পৰম্পৰাৰ গভীৰ আধ্যাত্মিক বিশ্বাসক উপহাস কৰিছে’।
‘সমাজৰ ধৰ্মীয় আৱেগক আঘাত দিয়াৰ ইচ্ছাকৃত উদ্দেশ্যেৰে এই কাৰ্য সংঘটিত কৰা হৈছে। যাৰ বাবে দৈৱ ভক্ত আৰু সাধাৰণ জনতাৰ মাজত তীব্ৰ মানসিক যন্ত্ৰণা, খং আৰু অসন্তুষ্টি বিয়পি পৰিছে।ইয়াৰ ফলত জনশান্তি বিঘ্নিত হোৱাৰ সম্ভাৱনা আছে আৰু বিভিন্ন সম্প্ৰদায়ৰ মাজত শত্ৰুতা বৃদ্ধি পাব।’
লগতে পঢ়ক: ছানী দেউলৰ পুত্ৰই হৰিদ্বাৰত বিসৰ্জন দিলে ধৰ্মেন্দ্ৰৰ অস্থি; উচুপি উঠিল ববি দেউল
