টি ২০ বিশ্বকাপ ২০২৬ৰ ছুপাৰ ৮ৰ পৰা পাকিস্তান বাহিৰ হোৱাৰ পিছত পাকিস্তান ক্ৰিকেট ব’ৰ্ডে দলৰ প্ৰতিজন খেলুৱৈৰ বিৰুদ্ধে কঠোৰ ব্যৱস্থা গ্ৰহণ কৰিছে।
আইচিচি পুৰুষৰ টি-২০ বিশ্বকাপ ২০২৬ত দুৰ্বল প্ৰদৰ্শনৰ পৰিণতি এতিয়া পাকিস্তান দলৰ খেলুৱৈসকলে নিজৰ পকেটৰ পৰাই দিব লাগিব।
জানিব পৰা মতে, পাকিস্তান ক্ৰিকেট ব’ৰ্ডে কঠোৰ স্থিতি গ্ৰহণ কৰি দলৰ প্ৰতিজন খেলুৱৈৰ বিৰুদ্ধে জৰিমনা বিহাৰ সিদ্ধান্ত লৈছে।বিশ্বকাপৰ ছুপাৰ ৮ৰ পৰা বাহিৰ হোৱা আৰু গ্ৰুপ পৰ্যায়ত টিম ইণ্ডিয়াৰ বিৰুদ্ধে পৰাজয়ৰ সন্মুখীন হোৱাৰ পিছতে পাকিস্তান ক্ৰিকেট ব’ৰ্ডে এই ব্যৱস্থা গ্ৰহণ কৰিছে।
টি-২০ বিশ্বকাপত খেলা প্ৰতিজন পাকিস্তানী খেলুৱৈক ৫০ লাখ পাকিস্তানী টকা (প্ৰায় ১৬ লাখ ভাৰতীয় টকা) জৰিমনা বিহা হৈছে।এই ধনৰাশি খেলুৱৈৰ দৰমহা বা মেচ মাচুলৰ পৰা কৰ্তন কৰা হ’ব।
একেৰাহে চতুৰ্থবাৰৰ বাবে আই চি চি টুৰ্ণামেণ্টত পাকিস্তানৰ দলটোৱে ছেমি ফাইনেলত প্ৰৱেশ কৰিবলৈ ব্যৰ্থ হৈছে।এনে পৰিস্থিতিত ব’ৰ্ডে স্পষ্টকৈ কৈছে যে,দুৰ্বল প্ৰদৰ্শন এতিয়া পোনপটীয়াকৈ আৰ্থিক লোকচানলৈ পৰিণত হ’ব। ইয়াৰ পূৰ্বেও পাকিস্তান ক্ৰিকেটত ফলাফল সন্দৰ্ভত কঠোৰতা আছিল,কিন্তু এইবাৰ এই বিশাল জৰিমনাক লৈ চৰ্চাৰ বিষয় হৈ পৰিছে।
লগতে পঢ়ক: ‘বহুবাৰ নিজৰ ওপৰত সন্দেহ উপজিছিল’; জয়ৰ পিছত আৱেগিক সঞ্জু চেমছন
