৭.৫ প্ৰাবল্যৰ এক শক্তিশালী ভূমিকম্পই জোকাৰি যোৱাৰ পিছতে দেশখনত চুনামীৰ সতৰ্কবাণী জাৰী কৰা হৈছে
সোমবাৰে উত্তৰ-পূব আৰু উত্তৰ জাপানত ৭.৫ প্ৰাবল্যৰ এক শক্তিশালী ভূমিকম্পই জোকাৰি যায় আৰু ইয়াৰ পিছতে দেশখনত চুনামীৰ সতৰ্কবাণী জাৰী কৰা হৈছে । জাপান বতৰ বিজ্ঞান সংস্থাই জনোৱা মতে, ইৱাটে প্ৰিফেকচাৰৰ কুজি বন্দৰত ৮০ চেন্টিমিটাৰ উচ্চতাৰ চুনামী পৰিলক্ষিত হৈছে । সংবাদ মাধ্যম কিয়োডোৱে জাপান বতৰ বিজ্ঞান সংস্থাৰ উদ্ধৃতি দি জনাইছে যে বিয়লি ৪:৫৩ বজাত অহা এই ভূমিকম্পটোৰ গভীৰতা আছিল ১০ কিলোমিটাৰ আৰু জাপানৰ ভূমিকম্পৰ তীব্ৰতাৰ স্কেলত ইয়াৰ মাত্ৰা ‘আপাৰ ৫’ (upper 5) ৰেকৰ্ড কৰা হৈছে ।
আমেৰিকাৰ ভূতাত্ত্বিক জৰীপ সংস্থা-এ জনোৱা মতে, “এইটো এক উল্লেখনীয় ভূমিকম্প আছিল আৰু প্ৰাৰম্ভিক তথ্য অনুসৰি জাপানৰ মিয়াকোৰ পৰা ১০০ কিলোমিটাৰ উত্তৰ-পূবত ইয়াৰ প্ৰাবল্য আছিল ৭.৪ ।” ভূমিকম্পৰ প্ৰাবল্য প্ৰথমতে ৭.৪ বুলি অনুমান কৰা হৈছিল যদিও পিছলৈ ইয়াক সংশোধন কৰি বৃদ্ধি কৰা হয় । জাপান বতৰ বিজ্ঞান সংস্থাই আগন্তুক এসপ্তাহৰ বাবে একে ধৰণৰ প্ৰাবল্যৰ ভূমিকম্প হোৱাৰ সম্ভাৱনা থকা বুলি সতৰ্ক কৰি দিছে ।
ৰাজহুৱা সম্প্ৰচাৰক এন এইচ কে-এ জনোৱা মতে, এই ভূমিকম্পটো ১০ কিলোমিটাৰ গভীৰতাত সংঘটিত হৈছিল । জাপানী বতৰ বিজ্ঞান সংস্থাই হোক্কাইডো, আওমোৰী আৰু ইৱাটে প্ৰিফেকচাৰৰ প্ৰশান্ত মহাসাগৰীয় উপকূলীয় অঞ্চলৰ বাবে চুনামীৰ সতৰ্কবাণী জাৰী কৰিছে আৰু ৩ মিটাৰ পৰ্যন্ত উচ্চতাৰ চুনামী ঢৌ তাৎক্ষণিকভাৱে অহাৰ আগজাননী দিছে ।
কিয়োডো সংবাদ সংস্থাৰ মতে, পৰিচালনকাৰী কৰ্তৃপক্ষই জনাইছে যে আওমোৰী আৰু মিয়ায়ী প্ৰিফেকচাৰৰ হিগাশ্বিডোৰি আৰু ওনাগাৱা পাৰমাণৱিক প্ৰকল্পৰ লগতে ফুকুছিমাৰ দাইচি আৰু দাইনি পাৰমাণৱিক বিদ্যুৎ কেন্দ্ৰত কোনো অস্বাভাৱিকতা দেখা পোৱা নাই । জাপানৰ প্ৰধানমন্ত্ৰী ছানায়ে টাকাচিই তেওঁৰ কাৰ্যালয়ত সংবাদ মাধ্যমক সম্বোধন কৰি ভূমিকম্প প্ৰভাৱিত অঞ্চলৰ লোকসকলক ওখ ঠাইলৈ আশ্ৰয় ল’বলৈ আহ্বান জনায় । জে আৰ ইষ্টে জনোৱা মতে, টকিঅ’ আৰু শ্বিন-আওমোৰী ষ্টেচনৰ মাজত চলি থকা টোহোকু শিনকানচেন বুলেট ট্ৰেইন সেৱা সাময়িকভাৱে স্থগিত ৰখা হৈছে ।
লগতে পঢ়ক : ৭.৪ প্ৰাব্যলত কঁপি উঠিল জাপান: চুনামীৰ সতৰ্কবাণী
