একানা ক্ৰিকেট ষ্টেডিয়ামত অনুষ্ঠিত টুৰ্নামেণ্টৰ ৬৮ নম্বৰ মেচখনত পঞ্জাবে ঘৰুৱা দল লক্ষ্ণৌ ছুপাৰ জায়েণ্টছক ৭ উইকেটত পৰাস্ত কৰে
ইণ্ডিয়ান প্ৰিমিয়াৰ লীগ (IPL) ২০২৬-ৰ এখন গুৰুত্বপূৰ্ণ মেচত পঞ্জাব কিংছে এক আকৰ্ষণীয় জয় সাব্যস্ত কৰিছে । শনিবাৰে (২৩ মে’) লক্ষ্ণৌৰ ভাৰত ৰত্ন শ্ৰী অটল বিহাৰী বাজপেয়ী একানা ক্ৰিকেট ষ্টেডিয়ামত অনুষ্ঠিত টুৰ্নামেণ্টৰ ৬৮ নম্বৰ মেচখনত পঞ্জাবে ঘৰুৱা দল লক্ষ্ণৌ ছুপাৰ জায়েণ্টছক (LSG) ৭ উইকেটত পৰাস্ত কৰে । অধিনায়ক শ্ৰেয়াছ আয়াৰৰ শতকীয় ইনিংছৰ বলত পঞ্জাবে লক্ষ্ণৌৱে ধাৰ্য কৰি দিয়া ১৯৭ ৰাণৰ লক্ষ্য মাত্ৰ ১৮ অভাৰতে অতিক্ৰম কৰিবলৈ সক্ষম হয় ।
আয়াৰ-প্ৰভিসিমৰণৰ মেচ বিজয়ী যুটি-
লক্ষ্ণৌৰ ১৯৬ ৰাণৰ প্ৰত্যুত্তৰত বেটিং কৰিবলৈ নামি পঞ্জাব কিংছৰ আৰম্ভণি একেবাৰেই ভাল হোৱা নাছিল । ইনিংছৰ প্ৰথমটো বলতে মহম্মদ ছামীয়ে প্ৰিয়াংশ আৰ্য্যক অৰ্জুন টেণ্ডুলকাৰৰ হাতত কেচ আউট কৰায় । ইয়াৰ পিছতে ছামীয়ে ফৰ্মত থকা বেটাৰ কুপাৰ ক’নোলী (১৮ ৰাণ)কো পেভিলিয়নৰ পথ দেখুৱায় ।
মাত্ৰ কেইৰাণমানতে ২ টা উইকেট হেৰুৱাই দলটো সংকটত পৰাৰ সময়তে ক্ৰীড়াংগনত ধুমুহাৰ সৃষ্টি কৰে অধিনায়ক শ্ৰেয়াছ আয়াৰ আৰু প্ৰভিসিমৰণ সিঙে । দুয়োজনে তৃতীয় উইকেটৰ যুটিত ১৪০ ৰাণৰ এক মেচ বিজয়ী পাৰ্টনাৰশ্বিপ গঢ়ি তোলে । প্ৰভিসিমৰণে ৩৯ টা বলত ৭ টা চাৰি আৰু ২ টা ছয়েৰে ধুমুহাময় ৬৯ ৰাণ কৰে । আনহাতে, অধিনায়ক আয়াৰে ৫১ টা বলত ১১ টা চাৰি আৰু ৫ টা ছয়েৰে ১০০ ৰাণ কৰি অপৰাজিত হৈ থাকে ।
লক্ষ্ণৌৰ ইনিংছ: ইংলিছ আৰু বদোনীৰ সংগ্ৰাম
ইয়াৰ পূৰ্বে, টছত হাৰি প্ৰথমে বেটিং কৰিবলৈ নামি লক্ষ্ণৌ ছুপাৰ জায়েণ্টছে নিৰ্ধাৰিত ২০ অভাৰত ৬ উইকেট হেৰুৱাই ১৯৬ ৰাণ সংগ্ৰহ কৰে । দলৰ আৰম্ভণি বেয়া আছিল । অৰ্শিন কুলকাৰ্ণীয়ে খাতা নোখোলাকৈয়ে আজমতুল্লাহ ওমৰজাইৰ বলত আউট হয় । তাৰ পিছতে মাৰ্কো জানচেনে নিকোলাছ পুৰানক (২ ৰাণ) বোল্ড কৰে ।
দলীয় সংকটৰ সময়ত আয়ুষ বদোনী আৰু জশ ইংলিছৰ মাজত তৃতীয় উইকেটৰ বাবে ৪৯ ৰাণৰ পাৰ্টনাৰশ্বিপ হয় । বদোনীয়ে মাত্ৰ ১৮ টা বলত ৪৩ ৰাণ (৫ টা চাৰি, ৩ টা ছয়) কৰি যুজবেন্দ্ৰ চহালৰ চিকাৰ হয় । ইয়াৰ পিছত জশ ইংলিছে অধিনায়ক ঋষভ পণ্টৰ সৈতে চতুৰ্থ উইকেটৰ বাবে ৬৫ ৰাণ যোগ কৰে । পণ্ট ২৬ ৰাণত আউট হোৱাৰ বিপৰীতে ইংলিছে ৪৪ টা বলত ৭২ ৰাণৰ (৯ টা চাৰি, ২ টা ছয়) এক সুন্দৰ ইনিংছ খেলে । শেষৰ পিনে আব্দুল সমদে ২০ টা বলত অপৰাজিত ৩৭ ৰাণ কৰি দলৰ স্ক’ৰ ১৯৬ লৈ লৈ যায় । পঞ্জাবৰ হৈ চহাল আৰু জানচেনে ২টি কৈ উইকেট লাভ কৰে ।
পঞ্জাবৰ প্লে-অফৰ সমীকৰণ-
এই জয়ৰ সৈতে পঞ্জাব কিংছে ১৪ খন মেচৰ ৭ খনত জয়লাভ কৰি ১৫ পইণ্টেৰে প্লে-অফৰ দৌৰত নিজৰ আশা সজীৱ কৰি ৰাখিছে । এতিয়া যদি অন্তিমখন মেচত ৰাজস্থান ৰয়েলছ আৰু কলকাতা নাইট ৰাইডাৰ্ছ (KKR) পৰাস্ত হয়, তেন্তে পঞ্জাব পোনপটীয়াভাৱে প্লে-অফত প্ৰৱেশ কৰিব । অৱশ্যে কে চি আৰ জিকিলে বিষয়টো নেট ৰান ৰেটৰ ওপৰত নিৰ্ভৰ কৰিব । আনহাতে, ১৪ খন মেচৰ পৰা মাত্ৰ ৮ পইণ্ট লাভ কৰা লক্ষ্ণৌ ছুপাৰ জায়েণ্টছ ইতিমধ্যে প্লে-অফৰ দৌৰৰ পৰা বাহিৰ হৈছে ।
লগতে পঢ়ক : আই পি এল ২০২৬ : অন্তিম ৫খন খেল আৰু প্লে-অফৰ উত্তেজনাময় অংক
