ৰোমাঞ্চকৰ মেচত চেন্নাই ছুপাৰ কিঙছে লক্ষ্ণৌ ছুপাৰ জায়ণ্টছক ৫ উইকেটত পৰাস্ত কৰে
ইণ্ডিয়ান প্ৰিমিয়াৰ লীগ ২০২৬-ৰ দেওবাৰৰ এখন ৰোমাঞ্চকৰ মেচত চেন্নাই ছুপাৰ কিঙছে লক্ষ্ণৌ ছুপাৰ জায়ণ্টছক ৫ উইকেটত পৰাস্ত কৰে । এম.এ. চিদাম্বৰম ষ্টেডিয়ামত অনুষ্ঠিত এই খেলখনত জয়লাভ কৰি ঘৰুৱা দল চেন্নাইয়ে প্লে-অফৰ যুঁজত নিজৰ স্থান মজবুত কৰাৰ বিপৰীতে লক্ষ্ণৌৰ বাবে শেষ ৰাস্তাও প্ৰায় বন্ধ হৈ পৰিল ।
উৰ্বিলৰ অভিলেখ সৃষ্টিকাৰী ইনিংছ-
২০৪ ৰাণৰ এক বৃহৎ লক্ষ্য অনুসৰণ কৰিবলৈ নামি চেন্নাইৰ হৈ বেটছমেন উৰ্বিল পেটেলে ইতিহাস ৰচনা কৰে । মাত্ৰ ১৩ বলত অৰ্ধশতক অৰ্জন কৰি তেওঁ আই পি এলৰ ইতিহাসত যশস্বী জয়ছোৱালৰ দ্ৰুততম অৰ্ধশতকৰ অভিলেখ স্পৰ্শ কৰে । উৰ্বিলে নিজৰ ৬৩ ৰাণৰ ইনিংছত ৮ টা ছিক্সাৰ আৰু ২ টা চাৰি কোবায় । তেওঁৰ এই ধুমুহাৰ বাবেই চেন্নায়ে ৪ বল বাকী থকা অৱস্থাতে ২০৮ ৰাণ সংগ্ৰহ কৰি জয় সাব্যস্ত কৰে ।
ইনিংছৰ আৰম্ভণিতে সঞ্জু চেমচন (২৮) আৰু ঋতুৰাজ গাইকোৱাডে (৪২) দলক এক সুন্দৰ ভেটি প্ৰদান কৰিছিল । মাজভাগত কিছু উইকেট হেৰুৱালেও শিৱম ডুবে আৰু প্ৰশান্ত বীৰে ঠাণ্ডা মগজুৰে দলক বিজয়ী লক্ষ্যত উপনীত কৰায় ।
জচ ইংলিছৰ সংগ্ৰাম অথলে-
ইয়াৰ পূৰ্বে, টছত হাৰি বেটিং কৰিবলৈ নামি লক্ষ্ণৌ ছুপাৰ জায়ণ্টছে ২০৩ ৰাণৰ বিশাল স্ক’ৰ থিয় কৰাইছিল । লক্ষ্ণৌৰ হৈ জচ ইংলিছে মাত্ৰ ৩৩ বলত ৮৫ ৰাণৰ এক বিস্ফোৰক ইনিংছ খেলে । তেওঁৰ ইনিংছত ১০ টা চাৰি আৰু ৬ টা ছিক্সাৰ অন্তৰ্ভুক্ত আছিল । অৱশেষত শ্বাহবাজ আহমেদৰ ৪৩ ৰাণৰ সহায়ত দলটোৱে ৮ উইকেট হেৰুৱাই ২০০ ৰাণৰ সীমা অতিক্ৰম কৰে ।
চেন্নাইৰ হৈ বলিং বিভাগত জেমি অভাৰটনে সুন্দৰ প্ৰদৰ্শন কৰি ৩ টা উইকেট দখল কৰে ।
পইণ্ট তালিকাৰ অৱস্থা-
এই জয়ৰ সৈতে চেন্নাই ছুপাৰ কিঙচৰ ১১ খন খেলত ১২ পইণ্ট হ’ল । আনহাতে, ১১ খন খেলৰ ভিতৰত মাত্ৰ ৩ খনত জয়লাভ কৰা লক্ষ্ণৌ ছুপাৰ জায়ণ্টছ ৬ পইণ্টৰ সৈতে তালিকাৰ তলৰ ফালে আছে, যাৰ ফলত তেওঁলোকৰ প্লে-অফৰ সম্ভাৱনা প্ৰায় নাইকিয়া হৈ পৰিছে ।
লগতে পঢ়ক : ক’ত অনুষ্ঠিত হ’ব আই পি এলৰ ফাইনেল মেচ? বিচিচিআইৰ ডাঙৰ ইউ-টাৰ্ণ
