টি-২০ বিশ্বকাপ ২০২৬ৰ ছুপাৰ-৮ মেচত জিম্বাবুৱেৰ বিৰুদ্ধে মৰণপণ যুঁজত মুখামুখি হ’ব ভাৰতীয় দল ।
আজি চেন্নাইৰ এম এ চিদাম্বৰম ষ্টেডিয়ামত টি-২০ বিশ্বকাপ ২০২৬ৰ ছুপাৰ-৮ মেচত জিম্বাবুৱেৰ বিৰুদ্ধে মৰণপণ যুঁজত মুখামুখি হ’ব ভাৰতীয় দল । দক্ষিণ আফ্ৰিকাৰ বিৰুদ্ধে ৭৬ ৰানৰ পৰাজয়ৰ পিছত এই মেচখন ভাৰতৰ বাবে ‘ডু অৰ ডাই’ পৰিস্থিতিত পৰিণত হৈছে । এনে পৰিস্থিতিত ভাৰতৰ টীম মেনেজমেন্টে মূল একাদশত যথেষ্ট পৰিৱৰ্তন কৰিব পাৰে ।
বাহিৰ হ’ব ৱাশ্বিংটন সুন্দৰ ?
শেষৰখন মেচত ৱাশ্বিংটন সুন্দৰক সুযোগ দিয়াৰ সিদ্ধান্ত দলটোৰ বাবে ব্যয়বহুল বুলি প্ৰমাণিত হ’ল । বেট-বল কোনোধৰণেৰে উল্লেখযোগ্য অৱদান আগবঢ়াব নোৱাৰিলে সুন্দৰে । তেওঁ মাত্ৰ ১১ ৰান সংগ্ৰহ কৰে আৰু বলিঙতো প্ৰভাৱ পেলোৱাত ব্যৰ্থ হয় । ফলস্বৰূপে আজিৰ খেলখনৰ মূল একাদশলৈ সহ-অধিনায়ক অক্ষৰ পেটেলৰ প্ৰত্যাৱৰ্তন প্ৰায় নিশ্চিত । ধাৰণা কৰা হৈছে যে অক্ষৰে সুন্দৰৰ ঠাইত পোনপটীয়াকৈ দললৈ প্ৰত্যাৱৰ্তন ঘটাব পাৰে । কিয়নো তেওঁৰ বেটিং আৰু স্পীন বলিং দুয়োটাকে শক্তিশালী কৰিব পৰাৰ ক্ষমতা আছে ।
মধ্যম ক্ৰমতো পৰিৱৰ্তন হোৱাৰ সম্ভাৱনা-
ভাৰতৰ মূল একাদশত মধ্যম ক্ৰমৰ ক্ষেত্ৰতো পৰিৱৰ্তন হোৱাৰ সম্ভাৱনা প্ৰবল । এই বিশ্বকাপত ফিনিছাৰ হিচাপে প্ৰভাৱ পেলাব পৰা নাই ৰিংকু সিঙে । শেহতীয়াকৈ তেওঁৰ স্ক’ৰ ৬, ১, ১১*, ৬* আৰু ০, যাৰ ফলত দলটোৱে চূড়ান্ত অভাৰত দ্ৰুত ৰান সংগ্ৰহ কৰাটো কঠিন হৈ পৰিছে । তদুপৰি তিলক বাৰ্মা আৰু অভিষেক শৰ্মাৰ প্ৰদৰ্শনৰ ওপৰতো প্ৰশ্ন উত্থাপন হৈছে । দুয়োজন বেটছমেনে ডাঙৰ স্ক’ৰ খেলিব পৰা নাই ৷ ফলস্বৰূপে এই তিনিজন খেলুৱৈৰ ভিতৰত অন্ততঃ দুজন খেলুৱৈ বাহিৰত বহিবলগীয়া হ’ব পাৰে ।
সঞ্জু চেমচনৰ প্ৰত্যাৱৰ্তন-
এই দৃশ্যপটত আজিৰ খেলখনত সঞ্জু চেমছনে সুযোগ পাব পাৰে । চেমছনে স্পীনৰ বিৰুদ্ধে ভাল বেটিং কৰে আৰু চেন্নাইৰ লেহেমীয়া খেলপথাৰত তেওঁৰ অভিজ্ঞতা দলটোৰ বাবে উপযোগী বুলি প্ৰমাণিত হ’ব পাৰে । তেওঁ ৩, ৪ বা ৫ নম্বৰত বেটিং কৰাৰ বিকল্পও আগবঢ়ায়, যিয়ে দলৰ সংমিশ্ৰণত নমনীয়তা যোগ কৰে ।
কুলদীপ যাদৱো হ’ব পাৰে ট্ৰাম্প কাৰ্ড-
তদুপৰি চেন্নাইৰ পিটচ বিবেচনা কৰিলে দলটোত অতিৰিক্ত স্পীনাৰো থাকিব পাৰে । এনে পৰিস্থিতিত কুলদীপ যাদৱে মূল একাদশত স্থান পাব পাৰে । কুলদীপৰ স্পীনে মাজৰ অভাৰত উইকেট লোৱাত সহায় কৰিব পাৰে ।
আজিৰ গুৰুত্বপূৰ্ণ খেলখনৰ বাবে ভাৰতৰ সম্ভাৱ্য মূল একাদশ-
সঞ্জু চেমচন, অভিষেক শৰ্মা, ঈশান কিষাণ (উইকেটকীপাৰ), সূৰ্যকুমাৰ যাদৱ (অধিনায়ক), শিৱম ডুবে, হাৰ্দিক পাণ্ডিয়া, অক্ষৰ পেটেল, কুলদীপ যাদৱ, ৰিংকু সিং, বৰুণ চক্ৰৱৰ্তী, যশপ্ৰীত বুমৰাহ, অৰ্শদীপ সিং ।
লগতে পঢ়ক : টি-২০ বিশ্বকাপত এই দিনটোত হ’ব ভাৰত-পাকিস্তানৰ যুঁজ, জানক সম্পূৰ্ণ সূচী
