ইতিমধ্যে শৃংখলা দখল কৰা ভাৰতীয় দলটোৱে এই মেচখনত ৬জনকৈ বিশেযজ্ঞ বেটছমনেক লৈ খেলাৰ সম্পৰীক্ষা কৰিছিল । অৱশ্যে ভাৰতীয় দলৰ এই সম্পৰীক্ষা সফল নহ’ল ।
বুধবাৰে বিশাখাপট্টনমত অনুষ্ঠিত হোৱা চতুৰ্থ টি-২০ মেচখনত নিউজীলেণ্ডে ভাৰতক ৫০ ৰানত পৰাস্ত কৰে । প্ৰথমে বেটিং কৰি নিউজীলেণ্ডে ২০ অভাৰত ৭ উইকেটত ২১৫ ৰান সংগ্ৰহ কৰে ।
প্ৰথমে বেটিঙৰ আমন্ত্ৰণ লাভ কৰা নিউজীলেণ্ডে বিস্ফোৰক আৰম্ভণি কৰে । অ’পেনাৰ টিম ছেইফাৰ্ট আৰু ডেভন কনৱেই ভাৰতীয় বলাৰসকলৰ ওপৰত হেঁচা প্ৰয়োগ কৰি মাত্ৰ ৮.২ অভাৰতে প্ৰথম উইকেটৰ বাবে ১০০ ৰান সংগ্ৰহ কৰে । ছেইফাৰ্টে ৩৬টা বলত ৬২ ৰান সংগ্ৰহ কৰাৰ বিপৰীতে কনৱেই ২৩টা বলত ৪৪ ৰান সংগ্ৰহ কৰে ।
অৱশ্যে ইয়াৰ পিছতে ভাৰতীয় বলাৰসকলে পুনৰ প্ৰত্যাৱৰ্তনৰ চেষ্টা চলাই । ভাৰতে অন্তিম ১০ অভাৰত ৰানৰ হাৰ কিছু পৰিমাণে ৰোধ কৰিবলৈ সক্ষম হয়। অৰ্শদীপ সিং আৰু কুলদীপ যাদৱে দুটাকৈ উইকেট দখল কৰে । ইয়াৰ পিছতো অৱশেষত ডেৰিল মিচেলে ১৮টা বলত ৩৯ ৰান সংগ্ৰহ কৰি নিউজীলেণ্ডক ২০০ ৰান অতিক্ৰম কৰাত সহায় কৰে ।
ইয়াৰ পিছতে ২১৬ ৰানৰ লক্ষ্য অনুসৰণ কৰা ভাৰতীয় দলে দুৰ্বল আৰম্ভণিৰে নিয়মীয়া ব্যৱধানত উইকেট হেৰুৱাই । শিৱম ডুবেই দলক উদ্ধাৰৰ দায়িত্ব কান্ধ পাতি লৈ ২৩টা বলত বিস্ফোৰক ৬৫ ৰান সংগ্ৰহ কৰাৰ বিপৰীতে ৰিংকু সিঙে ৩০ বলত ৩৯ ৰান সংগ্ৰহ কৰে । অৱশ্যে এই দুজনৰ বাহিৰে আন কোনো বেটছমেনে নিজৰ ইনিংছ দায়িত্ব সহকাৰে খেলাত ব্যৰ্থ হয় ।
বেটিং ব্যৰ্থতাৰ সন্মুখীন হৈ ১৮.৪ অভাৰত ১৬৫ ৰানত বল আউট হয় ভাৰতীয় দলটো । নিউজীলেণ্ডৰ অধিনায়ক মিচেল ছেণ্টনাৰে চাৰি অভাৰত ২৬ ৰানত খৰছ কৰি ভাৰতৰ তিনিটা গুৰুত্বপূৰ্ণ উইকেট দখল কৰি মেচখনৰ নায়ক হিচাপে প্ৰমাণিত হয় ।
ইতিমধ্যে পাঁচখন খেলৰ শৃংখলা দখল কৰা ভাৰতীয় দলটোৱে এই মেচখনত ৬জনকৈ বিশেযজ্ঞ বেটছমনেক লৈ খেলাৰ সম্পৰীক্ষা কৰিছিল । এই মেচত বলিং কৰা নাছিল যদিও বেটছমেন হিচাপে হাৰ্দিক পাণ্ডিয়াক অন্তৰ্ভুক্ত কৰা হৈছিল । হৰ্ষিত ৰানাক দলৰ সাত নম্বৰ স্থানত ৰখা হৈছিল, আনহাতে ভাৰতীয় দলৰ বেটিং ডেপথ সাধাৰণতে আঠ নম্বৰলৈকে থাকে । অৱশ্যে ভাৰতীয় দলৰ এই সম্পৰীক্ষা সফল নহ’ল । ফলত মেচখনত ৫০ ৰাণত পৰাস্ত হয় ভাৰতীয় দলটো ।
মেচৰ অন্তত অধিনায়ক সূৰ্যকুমাৰ যাদৱে কয়, “আমি ইচ্ছাকৃতভাৱে ৬জন বেটছমেনৰ সৈতে খেলাৰ সিদ্ধান্ত লৈছিলো । আমি পাঁচগৰাকী দক্ষ বলাৰ বিচাৰিছিলোঁ আৰু নিজক প্ৰত্যাহ্বান জনাব বিচাৰিছিলোঁ । যেনে ধৰক, যদি আমি ১৮০ বা ২০০ ৰান অনুসৰণ কৰিব লগা হয় আৰু আৰম্ভণিতে দুই বা তিনিটা উইকেট হেৰুৱাব লগা হয়, তেন্তে পৰিস্থিতি কেনেকুৱা হ’ব সেয়া আমি চাব বিচাৰিছিলোঁ ।”
তেওঁ আৰু কয়, “আমি বিশ্বকাপ দলৰ অংশ হোৱা সকলো খেলুৱৈক খেলাব বিচাৰিছিলো । নহ’লে আমাৰ হাতত আন বিকল্প আছিল ।”
টছত জয়ী হোৱাৰ পিছত প্ৰথমে বলিং কৰাৰ সিদ্ধান্ত সন্দৰ্ভত সূৰ্যকুমাৰে কয় যে দলটোৱে হেঁচাত পৰি নিজকে পৰীক্ষা কৰাৰ উদ্দেশ্য লৈছে । ‘আমি প্ৰথমে বেটিং কৰাৰ সময়ত ভাল প্ৰদৰ্শন কৰিছো । গতিকে, মই বিচাৰিছিলো যে খেলুৱৈসকলে দায়িত্ব ল’ব আৰু চাব যে আমি ১৮০ বা ২০০ ৰান অনুসৰণ কৰাৰ সময়ত দুটা বা তিনিটা উইকেট হেৰুওৱাৰ পিছত কেনেকৈ বেটিং কৰো । এয়া এক ভাল প্ৰত্যাহ্বান আছিল আৰু শিকাৰ এক সুযোগ আছিল ।“
লগতে পঢ়ক : ৫০ ৰানত পৰাস্ত টিম ইণ্ডিয়া; নিউজিলেণ্ডে ল’লে জয়ৰ প্ৰথমটো সোৱাদ
