শ্বেখ হাছিনাৰ মৃত্যুদণ্ডৰ ৰায়দানৰ পিছত ভাৰতৰ প্ৰতিক্ৰিয়া
আন্তঃৰাষ্ট্ৰীয় অপৰাধ ন্যায়াধিকৰণে বাংলাদেশৰ প্ৰাক্তন প্ৰধানমন্ত্ৰী শ্বেখ হাছিনাক দিয়া মৃত্যুদণ্ডৰ ৰায়ক লৈ ভাৰতে প্ৰথমটো প্ৰতিক্ৰিয়া প্ৰকাশ কৰিছে । ভাৰতে এই ৰায়ৰ ওপৰত তীক্ষ্ণ দৃষ্টি ৰাখিছে আৰু বাংলাদেশৰ স্বাৰ্থৰ প্ৰতি সম্পূৰ্ণৰূপে দায়বদ্ধ হৈ আছে বুলি উল্লেখ কৰিছে । ভাৰত চৰকাৰে জাৰি কৰা এক বিবৃতিত কোৱা হৈছে যে বাংলাদেশৰ “আন্তঃৰাষ্ট্ৰীয় অপৰাধ ন্যায়াধিকৰণ”এ শ্বেখ হাছিনাৰ বিৰুদ্ধে দিয়া ৰায়দান লক্ষ্য কৰিছে ।
শান্তি, গণতন্ত্ৰ, আৰু স্থিতিশীলতাৰ ওপৰত ভাৰতৰ গুৰুত্ব-
ভাৰতে উল্লেখ কৰে যে এক ঘনিষ্ঠ প্ৰতিবেশী হিচাপে দেশখন বাংলাদেশৰ জনসাধাৰণৰ স্বাৰ্থৰ প্ৰতি দায়বদ্ধ । বৈদেশিক পৰিক্ৰমা মন্ত্ৰালয়ে আৰু কয় যে বাংলাদেশত শান্তি, গণতন্ত্ৰ, অন্তৰ্ভুক্তি আৰু স্থিতিশীলতা বজাই ৰখাটো অতি প্ৰয়োজনীয় আৰু ভাৰতে এই মূল্যবোধসমূহৰ সমৰ্থনত সদায় থিয় দিব । বিবৃতিটোত লগতে উল্লেখ কৰা হৈছে যে ভাৰতে ভৱিষ্যতেও বাংলাদেশৰ সকলো অংশীদাৰৰ সৈতে গঠনমূলক আলোচনা অব্যাহত ৰাখিব যাতে দেশখনত স্থিতিশীলতা আৰু গণতান্ত্ৰিক পৰিৱেশ সুনিশ্চিত কৰিব পাৰে ।
আন্তঃৰাষ্ট্ৰীয় অপৰাধ ন্যায়াধিকৰণৰ মৃত্যুদণ্ডৰ ৰায়দান-
যোৱা বছৰৰ জুলাই মাহত বাংলাদেশ চৰকাৰৰ বিৰুদ্ধে ব্যাপক প্ৰতিবাদৰ সময়ত সংঘটিত হোৱা মানৱতাৰ বিৰুদ্ধে অপৰাধৰ বাবে সোমবাৰে বিশেষ ন্যায়াধিকৰণে মৃত্যুদণ্ডৰ শাস্তি প্ৰদান কৰে বাংলাদেশৰ পদচ্যুত প্ৰধানমন্ত্ৰী শ্বেখ হাছিনাক । যোৱা বছৰৰ ৫ আগষ্টত চৰকাৰ পতনৰ পিছত ভাৰতত আশ্ৰয় লৈ থকা ৭৮ বছৰীয়া হাছিনাক আন্তৰ্জাতিক অপৰাধ ন্যায়াধিকৰণ-বাংলাদেশ (আইচিটি-বিডি)এ শাস্তি প্ৰদান কৰে । পূৰ্বে আদালতে তেওঁক পলাতক বুলি ঘোষণা কৰিছিল ।
প্ৰতিবাদৰ মাৰাত্মক দমনৰ আঁৰত আছিল হাছিনা- আইচিটি
আদালত কক্ষত ৰায়দান পঢ়ি ন্যায়াধিকৰণে কয় যে যোৱা বছৰৰ ১৫ জুলাইৰ পৰা ১৫ আগষ্টৰ ভিতৰত ছাত্ৰ নেতৃত্বাধীন প্ৰতিবাদৰ ওপৰত চলোৱা মাৰাত্মক দমনৰ আঁৰত নিসন্দেহে হাছিনাৰ হাত আছিল । ৰাষ্ট্ৰসংঘৰ মানৱ অধিকাৰ কাৰ্যালয়ৰ এক প্ৰতিবেদনত অনুমান কৰা হৈছে যে “জুলাই বিদ্ৰোহ” নামেৰে জনাজাত মাহজোৰা এই আন্দোলনত ১৪০০ লোকৰ মৃত্যু হৈছে । নিৰস্ত্ৰ প্ৰতিবাদকাৰীৰ বিৰুদ্ধে মাৰাত্মক শক্তি ব্যৱহাৰৰ নিৰ্দেশ দিয়া, উচতনিমূলক বক্তব্য দিয়া, ঢাকা আৰু ইয়াৰ আশে-পাশে কেইবাজনো ছাত্ৰ-ছাত্ৰীক হত্যা কৰা অভিযানৰ অনুমতি দিয়াৰ অপৰাধত হাছিনাক মৃত্যুদণ্ডৰ শাস্তি প্ৰদান কৰা হয় ।
লগতে পঢ়ক : জাতিবাদৰ বিষক প্ৰত্যাখান কৰিলে বিহাৰে… কংগ্ৰেছক লক্ষ্য কৰি প্ৰধানমন্ত্ৰী মোদীৰ মন্তব্য
