বৰ্তমান অসম চৰকাৰ আৰু মুখ্যমন্ত্ৰী ড° হিমন্ত বিশ্ব শৰ্মাৰ বিশেষ সু-দৃষ্টিৰ বাবে সত্ৰখনৰ পুনৰ নিৰ্মাণ আৰু উন্নয়নৰ কাম পূৰ্ণ গতিত চলি আছে
বৰপেটা জিলাৰ পূব প্ৰান্তৰ সৰ্থেবাৰী ৰাজহ চক্ৰৰ অন্তৰ্গত ঐতিহাসিক কাপলা সত্ৰ এতিয়া পুনৰ নিৰ্মাণ আৰু সংৰক্ষণৰ বাবে এক নতুন ৰূপ ল’বলৈ আগবাঢ়িছে । অসমৰ বৈষ্ণৱ সাংস্কৃতিক ঐতিহ্যৰ অন্যতম গুৰুত্বপূৰ্ণ স্থান হিচাপে পৰিচিত এই সত্ৰখন দীৰ্ঘদিন ধৰি অৱহেলিত হৈ আছিল । বৰ্তমান অসম চৰকাৰ আৰু মুখ্যমন্ত্ৰী ড° হিমন্ত বিশ্ব শৰ্মাৰ বিশেষ সু-দৃষ্টিৰ বাবে সত্ৰখনৰ পুনৰ নিৰ্মাণ আৰু উন্নয়নৰ কাম পূৰ্ণ গতিত চলি আছে । ইতিমধ্যে সত্ৰখনৰ প্ৰায় ৮০ শতাংশ কাম সম্পূৰ্ণ হৈ উঠিছে বুলি জানিব পৰা গৈছে ।
ৰাজ্য চৰকাৰৰ লোকনিৰ্মাণ বিভাগে ৪,৩২,৮০,৫০০ টকাৰ এক বৃহৎ ব্যয়সাপেক্ষ আঁচনিৰ জৰিয়তে সত্ৰখনৰ সংৰক্ষণৰ কাম হাতত লৈছে । এই উন্নয়নমূলক কাৰ্যসূচীৰ বাবে সৰ্থেবাৰী আৰু কাপলা অঞ্চলৰ স্থানীয় ৰাইজ, দল-সংগঠন তথা ভকত-বৈষ্ণৱসকলৰ মাজত আনন্দ আৰু সন্তোষৰ ঢল বৈছে ।
সত্ৰৰ ঐতিহাসিক পটভূমি :
ইতিহাস অনুসৰি, ১৫৪৪ খ্ৰীষ্টাব্দৰ ৩০ মে’ তাৰিখে মহাপুৰুষ শ্ৰীমন্ত শংকৰদেৱ আৰু শ্ৰীশ্ৰী মাধৱদেৱে ব্ৰহ্মপুত্ৰৰ বুকুৱেদি ভটিয়াই আহি চাউলখোৱা নদীৰে সৰুক্ষেত্ৰী মৌজাৰ কাপলা বিলৰ পাৰত জিৰণি লৈছিল । পৰৱৰ্তী সময়ত দুয়োজনা গুৰুৱে এই স্থানতে সত্ৰ স্থাপন কৰি প্ৰায় ছয় মাহ কাল বাস কৰি বৈষ্ণৱ ধৰ্ম প্ৰচাৰ কৰিছিল ।
এই পবিত্ৰ স্থানখন আজিও ‘পাগদানি ভিঠা’ নামেৰে জনাজাত । এই ভিঠাত থকা এটা অতি প্ৰাচীন ‘হিদল গছ’ আজিও সেই ঐতিহাসিক স্মৃতিৰ নীৰৱ সাক্ষী হৈ থিয় দি আছে । বিশ্বাস কৰা হয় যে এই সত্ৰতে শ্ৰীশ্ৰী মাধৱদেৱৰ মাতৃ মনোৰমা আইৰ লগতে কেইবাজনো ভকতৰ দেহাৱসান ঘটিছিল ।
চলি থকা উন্নয়নমূলক কাৰ্যসূচী :
কাপলা সত্ৰ পৰিচালনা সমিতিৰ সভাপতি শান্ত কুমাৰ দাস আৰু সম্পাদক নবজিত নাথৰ তত্ত্বাৱধানত ‘পাগদানি ভিঠা’ৰ প্ৰায় ৩ বিঘা ৩ কথা মাটিত নিৰ্মাণ কাৰ্য চলি আছে । এই আঁচনিৰ অধীনত তলত উল্লেখ কৰা আন্তঃগাঁথনিসমূহ নিৰ্মাণ কৰা হৈছে :
- সুদৃশ্য নামঘৰ আৰু মণিকূট
- সভাঘৰ আৰু ভকতসকলৰ থকাৰ বাবে বাহা
- আকৰ্ষণীয় প্ৰৱেশ তোৰণ আৰু চৌহদৰ পকী বেৰ
- ৰাজহুৱা শৌচাগাৰ
- ভকত-বৈষ্ণৱসকলে হাত-ভৰি ধুব পৰাকৈ এটা সুকীয়া সৰু পুখুৰী
পৰ্যটনৰ অপাৰ সম্ভাৱনীয়তা :
ধৰ্মীয় গুৰুত্বৰ সমান্তৰালভাৱে কাপলা সত্ৰৰ ভৌগোলিক তথা প্ৰাকৃতিক পৰিৱেশ অত্যন্ত মনোৰম । সত্ৰৰ কাষতে লাগি থকা বিশাল কাপলা বিলৰ প্ৰাকৃতিক দৃশ্য, বনৰীয়া চৰাই আৰু ওচৰৰে পদুম ফুলেৰে ভৰা পুখুৰীটোৱে যিকোনো প্ৰকৃতিপ্ৰেমীকে হাতবাউলি দিয়ে । বিশেষকৈ শীতকালত বিভিন্ন পৰিভ্ৰমী চৰাইৰ আগমনে বিলখনক এক অনন্য ৰম্যভূমিলৈ ৰূপান্তৰ কৰে ।
স্থানীয় ৰাইজ আৰু প্ৰকৃতিপ্ৰেমীসকলে আশা প্ৰকাশ কৰিছে যে চৰকাৰৰ পৰ্যটন বিভাগে যদি কাপলা সত্ৰৰ লগতে কাপলা বিলকো অসমৰ পৰ্যটন মানচিত্ৰত অন্তৰ্ভুক্ত কৰে, তেন্তে ই এক ডাঙৰ ধৰ্মীয়-প্ৰাকৃতিক পৰ্যটন কেন্দ্ৰ হিচাপে গঢ়ি উঠিব । ইয়াৰ ফলত অঞ্চলটোৰ আৰ্থ-সামাজিক উন্নয়ন হ’ব আৰু ক্ষুদ্ৰ ব্যৱসায়, হস্তশিল্প, পৰিবহণ তথা পৰ্যটক আবাস আদিৰ এক নতুন দুৱাৰ মুকলি হ’ব ।
মুখ্যমন্ত্ৰীক আমন্ত্ৰণ ৰাইজৰ :
বছৰ বছৰ ধৰি স্থানীয় লোকে ইয়াত মহাপুৰুষ দুজনাৰ তিথি আৰু বুদ্ধ পূৰ্ণিমাৰ দিনা চাকি-বন্তি জ্বলাই নাম-কীৰ্তন কৰি আহিছে । সৰ্থেবাৰী তথা কাপলা অঞ্চলৰ সচেতন মহলে গভীৰ বিশ্বাস প্ৰকাশ কৰিছে যে এই উন্নয়ন কাৰ্যই সমগ্ৰ বৰপেটা জিলাৰ লগতে অসমৰে সাংস্কৃতিক মানচিত্ৰত এক নতুন পৰিচয় দাঙি ধৰিব । সমগ্ৰ অঞ্চলটোৰ ৰাইজে অত্যন্ত আগ্ৰহেৰে মুখ্যমন্ত্ৰী ড° হিমন্ত বিশ্ব শৰ্মাক এই ঐতিহাসিক সত্ৰখন আনুষ্ঠানিকভাৱে উদ্বোধন কৰি ৰাইজক উপহাৰ দিবলৈ আৰু পৰ্যটন বিভাগৰ সৈতে অঞ্চলটো পৰিদৰ্শন কৰিবলৈ আন্তৰিক আহ্বান জনাইছে ।
লগতে পঢ়ক : ২ লাখ চাকৰি আৰু বেদখলমুক্ত ভূমিৰ বাবে প্ৰতিশ্ৰুতিবদ্ধ অসম চৰকাৰ: মুখ্যমন্ত্ৰী
