গ্ৰুপ কেপ্টেইন শুভাংশু শুক্লাক তেওঁৰ ব্যতিক্ৰমী সাহস আৰু অৱদানৰ বাবে দেশৰ সৰ্বোচ্চ শান্তিকালীন বীৰত্ব বঁটা অশোক চক্ৰৰে সন্মানিত কৰা হৈছে ।
ভাৰতৰ মহাকাশ ইতিহাসত এক নতুন সোণালী অধ্যায় সংযোজন কৰা গ্ৰুপ কেপ্টেইন শুভাংশু শুক্লাক তেওঁৰ ব্যতিক্ৰমী সাহস আৰু অৱদানৰ বাবে দেশৰ সৰ্বোচ্চ শান্তিকালীন বীৰত্ব বঁটা অশোক চক্ৰৰে সন্মানিত কৰা হৈছে । ২০২৫ চনৰ জুন মাহত ঐতিহাসিক এক্সিয়াম মিছন-৪ৰ সময়ত তেওঁৰ গুৰুত্বপূৰ্ণ ভূমিকাৰ বাবে তেওঁ এই সন্মান লাভ কৰিছে । এই মিছনৰ জৰিয়তে বিগত চাৰি দশকৰ পিছত এজন ভাৰতীয় আন্তঃৰাষ্ট্ৰীয় মহাকাশ কেন্দ্ৰ (আই এছ এছ)লৈ যোৱাটো সম্ভৱ হৈ উঠিছিল ।
এক্স-৪ অভিযানত অতুলনীয় সাহস প্ৰদৰ্শন-
২০২৫ চনৰ ২৫ জুনত স্পেচএক্সৰ ড্ৰেগন মহাকাশযান “গ্ৰেচ”ত যোৱা শুভাংশু শুক্লাই ১৮ দিন মহাকাশত কটায় । মহাকাশত তেওঁ ৬০টাতকৈও অধিক বৈজ্ঞানিক পৰীক্ষাত অংশগ্ৰহণ কৰে, ইয়াৰে ৭টা ভাৰতীয় মহাকাশ গৱেষণা সংস্থা (ISRO)ৰ নেতৃত্বত কৰা হয় । এই অভিযানৰ সময়ত তেওঁ পাইলট হিচাপে জটিল কক্ষপথৰ কৌশল, ডকিং অপাৰেচন আৰু মাইক্ৰ’গ্ৰেভিটিত কাম কৰা আদি উচ্চ বিপদজনক কাম সফলতাৰে সম্পন্ন কৰে ।
Axe-4 অভিযানত ভাৰতৰ লগতে পোলেণ্ড আৰু হাংগেৰীৰ মহাকাশচাৰীও আছিল । ২৬ ঘণ্টীয়া যাত্ৰাৰ অন্তত এই মহাকাশযানখনে আই এছ এছত সফলতাৰে ডক কৰে । এই অভিযানৰ পৰা লাভ কৰা অভিজ্ঞতা আৰু তথ্য ভাৰতৰ অভিলাষী গগণযান অভিযান (২০২৭)ৰ বাবে অতি গুৰুত্বপূৰ্ণ বুলি বিবেচিত হৈছে ।
ৰাকেশ শৰ্মাৰ পিছত মহাকাশত জিলিকিল শুভাংশু শুক্লা-
লক্ষ্ণৌৰ বাসিন্দা ৩৯ বছৰীয়া শুভাংশু শুক্লা ভাৰতীয় বায়ুসেনাৰ বিষয়া । ২০১৯ চনত গগণযান অভিযানৰ বাবে নিৰ্বাচিত হোৱা শুভাংশু শুক্লাই ৰাছিয়াৰ ইউৰি গাগাৰিন মহাকাশচাৰী প্ৰশিক্ষণ কেন্দ্ৰত কঠোৰ প্ৰশিক্ষণ গ্ৰহণ কৰিছিল । ২০২৫ চনৰ ১৫ জুলাইত তেওঁৰ নিৰাপদে উভতি অহাৰ লগে লগে মহাকাশ ভ্ৰমণ কৰা দ্বিতীয়জন ভাৰতীয় হিচাপে তেওঁ ইতিহাসত ৰচে ।
প্ৰধানমন্ত্ৰী নৰেন্দ্ৰ মোদীয়েও শুভাংশু শুক্লাৰ এই কৃতিত্বক প্ৰশংসা কৰি মহাকাশত ভাৰতৰ আকাংক্ষাক উন্নীত কৰিছে বুলি কয় । এই অভিযানত ইছৰোৰ বিনিয়োগক ভৱিষ্যতৰ ভাৰতীয় মানৱ মহাকাশ উৰণ কাৰ্যসূচীৰ বাবে এক শক্তিশালী ভেটি হিচাপে বিবেচিত হৈছে । অশোক চক্ৰৰে সন্মানিত হৈ শুভাংশু শুক্লাই এতিয়া সেই নিৰ্বাচিত মহাকাশ নায়কৰ দলত যোগদান কৰিছে যিয়ে কেৱল বিজ্ঞানকে নহয়, ৰাষ্ট্ৰীয় গৌৰৱকো নতুন উচ্চতালৈ উন্নীত কৰিছে ।
লগতে পঢ়ক : ৰোহিত শৰ্মা আৰু হৰমনপ্ৰীত কৌৰক পদ্মশ্ৰী বঁটা… ক্ৰীড়া জগতৰ এইসকল কিংবদন্তিলৈ পদ্ম সন্মান
