NCRT ৰ অষ্টম শ্ৰেণীৰ গ্ৰন্থত ন্যায়পালিকাৰ সৈতে জড়িত কথিত ‘দুৰ্নীতি’ৰ বিষয়বস্তুক লৈ দেশত নতুন বিতৰ্কৰ সৃষ্টি হৈছে।ইয়াক লৈ ভাৰতৰ মুখ্য ন্যায়াধীশে তীব্ৰ অসন্তুষ্টি প্ৰকাশ কৰে।
দেশৰ শিক্ষা ব্যৱস্থা আৰু ন্যায়পালিকাৰ সন্দৰ্ভত এক বৃহৎ বিতৰ্কৰ সৃষ্টি হৈছে। বুধবাৰে ভাৰতৰ উচ্চতম ন্যায়ালয়ে NCRTৰ নতুন অষ্টম শ্ৰেণীৰ সমাজ বিজ্ঞান গ্ৰন্থৰ কিছু অংশক লৈ তীব্ৰ আপত্তি প্ৰকাশ কৰে।
গ্ৰন্থখনত উল্লেখ কৰা ধৰণে “ন্যায়পালিকাত দুৰ্নীতি”ৰ বিষয়টো অতি গুৰুতৰ বুলি আদালতে বিবেচনা কৰিছিল। এই বিষয়টো তেতিয়া আলোচনালৈ আহিছিল যেতিয়া জ্যেষ্ঠ অধিবক্তা কপিল ছিবালে আদালতত কয় যে কম বয়সীয়া ছাত্ৰ-ছাত্ৰীক ন্যায়পালিকাৰ দুৰ্নীতিৰ দৰে বিষয় শিকোৱা হৈছে,যিটো চিন্তাৰ বিষয়। তেওঁ কয় যে এই বিষয়ত সমগ্ৰ বাৰ (অধিবক্তা সমাজ) অশান্তিত পৰিছে।
বাৰ এণ্ড বেঞ্চত প্ৰকাশিত এক প্ৰতিবেদন অনুসৰি,এই বিষয়ত উত্তৰ দি ভাৰতৰ মুখ্য ন্যায়াধীশ সূৰ্য কান্তে স্পষ্টকৈ এই কথা কয় এই বিষয়ত আদালতে suo motu cognizance লৈছে।
তেওঁ কয় যে, “বাৰ আৰু বেঞ্চ দুয়োখনেই বিচলিত হৈ আছে। এই বিষয়টোক লৈ তেওঁ অহৰহ ফোন আৰু মেছেজ লাভ কৰি আছে। আনকি উচ্চ ন্যায়ালয়ৰ কেইবাজনো ন্যায়াধীশেও উদ্বেগ প্ৰকাশ কৰিছে। CJI এ স্পষ্টকৈ কৈছে যে মই কাকো ন্যায়পালিকাৰ অখণ্ডতাক লৈ প্ৰশ্ন উত্থাপন কৰিবলৈ বা বদনাম কৰিবলৈ অনুমতি নিদিওঁ। আইনে নিজৰ কাম কৰিব। এই বিষয়টো মই নিজেই চাম।
উল্লেখ্য যে, NCRTৰ নতুন কিতাপ “আমাৰ সমাজত ন্যায়পালিকাৰ ভূমিকা” অধ্যায়ত ন্যায় ব্যৱস্থাৰ প্ৰত্যাহ্বানসমূহৰ বিষয়ে উল্লেখ কৰা হৈছে।ইয়াত ন্যায়পালিকাৰ বিভিন্ন স্তৰৰ দুৰ্নীতি, বিচাৰধীন গোচৰৰ গধুৰ বোজা, ন্যায়াধীশৰ অভাৱ, জটিল আইনী প্ৰক্ৰিয়া আৰু দুৰ্বল আন্তঃগাঁথনিৰ দৰে সমস্যাৰ ওপৰত আলোকপাত কৰা হৈছে।
লগতে পঢ়ক: ‘আমাৰ দেশ বহুত শক্তিশালী,আমি আকৌ জয় কৰিম’; আমেৰিকাৰ কংগ্ৰেছত ড’নাল্ড ট্ৰাম্পৰ ডাঙৰ মন্তব্য
