আজি মঙলবাৰে গুৱাহাটীত এক ভব্য অনুষ্ঠানৰ জৰিয়তে ড° হিমন্ত বিশ্ব শৰ্মাৰ নেতৃত্বত নতুন চৰকাৰখনে শপত গ্ৰহণ কৰিব
অসমত ধাৰাবাহিকভাৱে তৃতীয়টো কাৰ্যকালৰ বাবে শাসনৰ বাঘজৰী ল’বলৈ সাজু হৈছে বিজেপিৰ নেতৃত্বাধীন এন ডি এ জোঁট । আজি মঙলবাৰে গুৱাহাটীত এক ভব্য অনুষ্ঠানৰ জৰিয়তে ড° হিমন্ত বিশ্ব শৰ্মাৰ নেতৃত্বত নতুন চৰকাৰখনে শপত গ্ৰহণ কৰিব । এই গুৰুত্বপূৰ্ণ ক্ষণৰ পূৰ্বে বিজেপিৰ সভাপতি নীতিন নবীনে পৰিয়ালসহ মা কামাখ্যা মন্দিৰত পূজা-অৰ্চনা কৰে ।
সাংবাদিকৰ সৈতে হোৱা কথা-বতৰাত নবীনে কয় যে মা কামাখ্যাৰ আশীৰ্বাদ আৰু প্ৰধানমন্ত্ৰী নৰেন্দ্ৰ মোদী তথা হিমন্ত বিশ্ব শৰ্মাৰ বলিষ্ঠ নেতৃত্বৰ প্ৰতি ৰাইজে দেখুওৱা বিশ্বাসৰ বাবেই এই ঐতিহাসিক বিজয় সম্ভৱ হৈছে ।
শপত গ্ৰহণৰ বিশেষ আকৰ্ষণ-
আজি ১২ মে’ত অনুষ্ঠিত হ’বলগীয়া এই শপত গ্ৰহণ অনুষ্ঠানত ৰাষ্ট্ৰীয় ৰাজনীতিৰ বহু হেভিৱেইট নেতা উপস্থিত থাকিব । প্ৰধানমন্ত্ৰী নৰেন্দ্ৰ মোদীৰ লগতে কেন্দ্ৰীয় গৃহমন্ত্ৰী অমিত শ্বাহ, প্ৰতিৰক্ষা মন্ত্ৰী ৰাজনাথ সিং আৰু কেইবাখনো ৰাজ্যৰ মুখ্যমন্ত্ৰীয়ে এই অনুষ্ঠানত অংশগ্ৰহণ কৰিব ।
নতুন কেবিনেটৰ মুখসমূহ-
মুখ্যমন্ত্ৰী হিচাপে ড° হিমন্ত বিশ্ব শৰ্মাই শপত লোৱাৰ লগতে আজি কেইবাজনো মন্ত্ৰীয়েও শপত গ্ৰহণ কৰিব । ড০ শৰ্মাই ইতিমধ্যে সামাজিক মাধ্যমযোগে ঘোষণা কৰিছে যে তেওঁৰ সৈতে ৰামেশ্বৰ তেলী, অতুল বৰা, চৰণ বড়ো আৰু অজন্তা নেওগে মন্ত্ৰী হিচাপে শপত ল’ব । ইয়াৰ উপৰিও, জ্যেষ্ঠ বিজেপি নেতা ৰঞ্জিত দাসক বিধানসভাৰ অধ্যক্ষ পদৰ বাবে মনোনীত কৰা হৈছে ।
লগতে পঢ়ক : হিমন্ত চৰকাৰ ২.০ : শপত গ্ৰহণৰ পূৰ্বে মা কামাখ্যা আৰু শংকৰদেৱৰ আশীৰ্বাদ বিচাৰিলে মুখ্যমন্ত্ৰীয়ে
