দিল্লী বিস্ফোৰণক লৈ শোক প্ৰকাশ ভূটানৰ ৰজাৰ
দিল্লীৰ লালকিল্লাৰ সমীপত সংঘটিত হোৱা বিস্ফোৰণক লৈ শোক প্ৰকাশ কৰিছে ভূটানৰ ৰজা জিগমে খেছাৰ নামগিয়েল ৱাংচুকে । ভূটানৰ ৰজাই সহস্ৰাধিক ভূটানী লোকৰ সৈতে দিল্লী বিস্ফোৰণত নিহতসকলৰ বাবে থিম্ফুৰ সাংগলী থাং ষ্টেডিয়ামত অনুষ্ঠিত প্ৰাৰ্থনা অনুষ্ঠানৰ নেতৃত্ব দিয়ে । প্ৰাৰ্থনা অনুষ্ঠানত তেওঁ বিস্ফোৰণত প্ৰাণ হেৰুওৱা সকলৰ প্ৰতি শোক প্ৰকাশ কৰে । উল্লেখ্য যে, সোমবাৰে সন্ধিয়া সংঘটিত হোৱা এই বিস্ফোৰণত ১২ জন লোক নিহত হোৱাৰ লগতে ২৮ জন আহত হয় ।
জিগমে খেছাৰ নামগিয়েল ৱাংচুকে প্ৰধানমন্ত্ৰী নৰেন্দ্ৰ মোদী ভূটান ভ্ৰমণত থকাৰ সময়ছোৱাতে এই ঘটনাৰ শোক প্ৰকাশ কৰিছে । ভূটানৰ চাংলিমিথাং ফেষ্টিভেল খেলপথাৰত এক সভাত ভাষণ দি প্ৰধানমন্ত্ৰী মোদীয়ে কয় যে দিল্লী বিস্ফোৰণৰ দোষীক ৰেহাই দিয়া নহ’ব । এই বিস্ফোৰণে সকলোকে স্তম্ভিত কৰি তুলিছে বুলি মন্তব্য কৰে প্ৰধানমন্ত্ৰীগৰাকীয়ে । বিস্ফোৰণৰ ফলত ক্ষতিগ্ৰস্তসকলৰ যন্ত্ৰণা তেওঁ বুজি পাইছে বুলি উল্লেখ কৰে । তেওঁ কয় যে আজি সমগ্ৰ ৰাষ্ট্ৰ ভুক্তভোগীৰ পৰিয়ালৰ সৈতে থিয় দিছে । এই বিস্ফোৰণৰ বাবে দায়ী সকলোকে ন্যায়ৰ কাঠগঢ়ালৈ অনা হ’ব বুলি কয় তেওঁ ।
উল্লেখ্য যে, দুদিনীয়া ভ্ৰমণসূচীৰে ভূটানত উপস্থিত হৈছে প্ৰধানমন্ত্ৰী নৰেন্দ্ৰ মোদী । ভূটানৰ ৰাজধানী থিম্ফুৰ বিমানবন্দৰত প্ৰধানমন্ত্ৰী মোদীক উষ্ম আদৰণি জনোৱা হয় । এই সময়ত ভূটান চৰকাৰৰ বহু জ্যেষ্ঠ মন্ত্ৰী আৰু শীৰ্ষ বিষয়া উপস্থিত আছিল । ১১-১২ নৱেম্বৰত ভূটান ভ্ৰমণত থাকিব প্ৰধানমন্ত্ৰী মোদী । এই ভ্ৰমণে দুয়োখন দেশৰ দ্বিপাক্ষিক সম্পৰ্ক সুদৃঢ় কৰিব । ভূটানৰ ৰজা জিগমে চিংগে ৱাংচুকৰ ৭০ সংখ্যক জন্মদিন উদযাপনতো অংশগ্ৰহণ কৰে প্ৰধানমন্ত্ৰী মোদীয়ে ।
লগতে পঢ়ক : কাকো ৰেহাই দিয়া নহ’ব… ভূটানৰ পৰাই প্ৰধানমন্ত্ৰী মোদীৰ হুংকাৰ
