মুখ্যমন্ত্ৰীগৰাকীয়ে কয় যে চুবুৰীয়া ৰাজ্য পশ্চিমবংগত ভাৰতীয় জনতা পাৰ্টি ক্ষমতালৈ অহাৰ ফলত অসম এতিয়া অধিক নিৰাপদ হৈ পৰিছে
দ্বিতীয়বাৰৰ বাবে অসমৰ মুখ্যমন্ত্ৰী হিচাপে শপত গ্ৰহণ কৰাৰ ঠিক এদিন পিছতেই গুৰুত্বপূৰ্ণ মন্তব্য আগবঢ়াইছে ড° হিমন্ত বিশ্ব শৰ্মাই । বুধবাৰে সাংবাদিকৰ সৈতে হোৱা এক বাৰ্তালাপত মুখ্যমন্ত্ৰীগৰাকীয়ে কয় যে চুবুৰীয়া ৰাজ্য পশ্চিমবংগত ভাৰতীয় জনতা পাৰ্টি ক্ষমতালৈ অহাৰ ফলত অসম এতিয়া অধিক নিৰাপদ হৈ পৰিছে ।
উমৈহতীয়া প্ৰত্যাহ্বান আৰু ৰাজনৈতিক একতা-
মুখ্যমন্ত্ৰী ড০ শৰ্মাই উল্লেখ কৰে যে অসম আৰু পশ্চিমবংগৰ মাজত থকা একে ৰাজনৈতিক মতাদৰ্শৰ চৰকাৰে দুই ৰাজ্যৰ উমৈহতীয়া সমস্যাসমূহ সমাধানত এক নতুন মাত্ৰা প্ৰদান কৰিব । বিশেষকৈ বাংলাদেশৰ পৰা হোৱা ‘অবৈধ অনুপ্ৰৱেশ’ৰ দৰে স্পৰ্শকাতৰ বিষয়ত এতিয়াৰে পৰা দুয়োখন ৰাজ্যৰ মাজত উন্নত সমন্বয় গঢ়ি উঠিব বুলি তেওঁ আশা প্ৰকাশ কৰে । উল্লেখ্য যে, বাংলাদেশৰ সৈতে ভাৰতৰ থকা ৪,০৯৬.৭ কিলোমিটাৰ সীমান্তৰ এক বৃহৎ অংশ অৰ্থাৎ ২,৪৭৯.৭ কিলোমিটাৰ কেৱল অসম আৰু পশ্চিমবংগতে আছে ।
আইন-শৃংখলাৰ উন্নত সমন্বয়-
অতীতৰ তিক্ত অভিজ্ঞতাৰ কথা সোঁৱৰাই দি মুখ্যমন্ত্ৰীগৰাকীয়ে কয়, “আগতে এনে বহু ঘটনা ঘটিছিল য’ত অপৰাধীয়ে অসমত অপৰাধ কৰি পশ্চিমবংগলৈ পলাই গৈছিল । তেনে পৰিস্থিতিত দুয়োখন ৰাজ্যৰ মাজত প্ৰয়োজনীয় সহযোগিতা লাভ কৰাটো সদায় সহজ নাছিল ।” তেওঁ বিশ্বাস প্ৰকাশ কৰে যে বৰ্তমানৰ নতুন ৰাজনৈতিক পৰিৱেশত শাসন, নিৰাপত্তা আৰু উন্নয়নৰ স্বাৰ্থত দুয়োখন ৰাজ্য চৰকাৰে অধিক ঘনিষ্ঠভাৱে কাম কৰিব পাৰিব ।
আঞ্চলিক সহযোগিতাৰ নতুন দিশ-
মঙলবাৰে অনুষ্ঠিত শপত গ্ৰহণ অনুষ্ঠানত পশ্চিমবংগৰ নেতৃত্বৰ উপস্থিতিক এক ইতিবাচক দিশ হিচাপে অভিহিত কৰি তেওঁ কয় যে ই এক শক্তিশালী আঞ্চলিক সহযোগিতাৰ ইংগিত দিছে । পশ্চিমবংগৰ মুখ্যমন্ত্ৰীৰ উপস্থিতি আৰু চুবুৰীয়া ৰাজ্যখনৰ জনসাধাৰণৰ আন্তৰিকতাই সমগ্ৰ উত্তৰ-পূব ভাৰতৰ বাবে এক উজ্জ্বল ভৱিষ্যতৰ সূচনা কৰিছে বুলিও ড০ শৰ্মাই মন্তব্য কৰে ।
লগতে পঢ়ক : ৰাইজে মামা বুলি মতাটো বন্ধ কৰিলে মই মৰি যাম: আৱেগিক হৈ পৰিল মুখ্যমন্ত্ৰী ড° হিমন্ত বিশ্ব শৰ্মা
